Piạ taumata nẹ̌běke rahasia si kau?— *Su Alkitapẹ̌ piạ rahasia mapaelẹ̌, arenge ”rahasia masusi.” Ini masusi ual᷊ingu asal᷊e bọu Mawu. Ene lai rahasia ual᷊ingu kangerẹ tawẹ apa taumata masingkạ. Manga malaekatẹ̌ lai mapulu masingkạ rahasia ene. Apa i kau lai mapulu masingkạ?—

Su tempong kangerẹ, Mawu někoạ esẹ dingangu wawine humotong. Areng i rẹ̌dua i Adam dingangi Hawa. I rẹ̌dua mětẹ̌tanạ su tampạ mapaelẹ̌, arenge taman Eden. Mạeng i Adam dingangi Hawa matuhụ su Mawu, i rẹ̌dua dingangu anạ i rẹ̌dua sarung měkoạ dunia ini firdaus mẹ̌sul᷊ungu taman Eden. I sire lai botonge turusẹ̌ mẹ̌tanạ sene. Katewe, apa i kau nakatahěndung apa nikoạ i Adam dingangi Hawa?—

I Adam dingangi Hawa tawe timuhụ su Mawu, hakị u ene i kitẹ orasẹ̌ ini tawe nẹ̌tanạ su firdaus. Katewe Mawu nẹ̌bera i Sie sarung měkoạ dunia ini mapaelẹ̌, kěbị taumata sarung mal᷊uasẹ̌ kụ měbiahẹ̌ sarang karěngụe. Kerea Mawu měkoạ ene? Seng marěngụ, tawẹ apa taumata masingkạ. Ene kai rahasia.

Su tempong Yesus su dunia, i sie nẹ̌běke rahasia ini su taumata. Ene kai Kararatuang u Mawu. I sie nẹ̌bera kětạeng Kararatuang u Mawu botonge makakoạ firdaus mariadi su dunia. Ual᷊ingu ene Yesus nẹ̌bera i kitẹ harusẹ̌ mědoa tadeạu Kararatuang u Mawu mal᷊ighạ sumongo.

Apa i kau lai mapulu masingkạ rahasia ene?— Tahěndunge kětạeng taumata dumaringihẹ̌ si Yehuwa botonge mẹ̌tanạ su firdaus. Su Alkitapẹ̌ piạ lawọ běke bọu taumata dụdaringihẹ̌ su Mawu. Apa i kau mapulu masingkạ i sai i sire?— Ndaị e i kitẹ měmanda i sai i sire dingangu kerea i kitẹ botonge mẹ̌těno si sire.