Su tempong bědang kadodọ, i Samuel mětẹ̌tanạ dingangu měhal᷊ẹ̌ su tabernakel. Tabernakel ene tampạ u taumata měngẹ̌ngibadah si Yehuwa. I kau masingkạ kawe i Samuel nẹ̌tanạ sene? Mahi i kitẹ mẹ̌basa kal᷊imona běkeng i Hana, mamạ i Samuel.

Seng marěngụ, i Hana mapulu piạ anạ, katewe i sie bědang tawẹ nakaěbạ. Hakị u ene, i sie nědoa mědorong tul᷊ung si Yehuwa. I sie nědiandi si Yehuwa, mạeng i sie piạ anạ, i sie měgělị anạ ene gunang pẹ̌tanạ dingangu měhal᷊ẹ̌ su tabernakel. Bọu ene, Yehuwa dimaringihẹ̌ doane, kụ i Hana nakaěbạ anạ esẹ. I Hana něgělị areng u anạ e, Samuel. Kere apa niriandine, su tempong i Samuel umure tatělu arau ěpạ u taung, i Hana nẹ̌bawa si Samuel sarang tabernakel.

Tempo ene, i Eli nakoạ imam besar su tabernakel. Darua anạ e lai nakoạ imam sene. Tabernakel ene kai tampạ u taumata měngibadah si Yehuwa, hakị u ene i sai mělẹ̌hal᷊ẹ̌ sene harusẹ̌ měkoạ barang mapia. Katewe, manga anạ i Eli turusẹ̌ měkẹ̌koạ barang dal᷊akị. I Samuel nakasilo apa nikoạ i rẹ̌dua. Apa i Samuel tụtol᷊e lai měkoạ barang dal᷊akị?— Tala, Samuel turusẹ̌ měkẹ̌koạ barang mapia kere nitěntiro mamạ e dingangi papạ e.

Mạeng si kau kerea, apa harusẹ̌ koateng i Eli su manga anạe?— Sěběnarẹ̌e, i Eli harusẹ̌ měhukung si sire, katewe i Eli tawe někoạ ene. Hakị u ene, i Yehuwa nẹ̌pědu si Eli dingangu manga anạ e, kụ i Yehuwa nẹ̌bera sarung měhukung si sire.

Piạ su hěbi su tempong i Samuel mětẹ̌tikị, i sie nakaringihẹ̌ piạ tingihẹ̌ nẹ̌kui si sie: ’Samuel!’. I Samuel timal᷊ang sarang i Eli, katewe i Eli nẹ̌bera: ’Iạ tawe nẹ̌kui si kau.’ Ene nariadi sarang tělung sul᷊ẹ. Su katělung sul᷊ẹ e, i Eli nẹ̌bera si Samuel, mạeng Samuel saụ makaringihẹ̌ tingihẹ̌ ene, i sie harusẹ̌ pẹ̌bera: ’Pẹ̌bisara e Yehuwa; iạ dumaringihẹ̌.’ I Samuel někoạ kerene. Bọu ene Yehuwa nẹ̌bisara si Samuel: ’Pẹ̌bera si Eli, Iạ sarung měhukung keluargane ual᷊ingu i sire seng někoạ barang dal᷊akị.’ Mạeng si kau kerea, apa gampang maul᷊ị ene si Eli?—  Mạeng si Samuel, ene tawe gampang, i sie matakụ maul᷊ị ene. Katewe i sie tatapẹ̌ někoạ apa niparentang Yehuwa. Apa niwerang Yehuwa nariadi, manga anạ i Eli dingangi Eli lai nate.

Samuel nakoạ contoh mapaelẹ̌ si kitẹ. I sie tatapẹ̌ měkoạ barang mapia, maning i sie nakasilo taumata wal᷊inẹ někoạ barang dal᷊akị. Mạeng i kau kerea? Apa i kau mapulu měkoạ barang mapia kere i Samuel? Mạeng i kau mẹ̌těno si Samuel, i kau botonge měkoạ naung i papạ, i mamạ, dingangi Yehuwa mal᷊uasẹ̌.