Yesus něněntiro, ”I kamene seng něnarimạu kěbị ene tawẹ bawaehe, kụ pěmpẹ̌gělịko lai tawẹ bawaehe.” (Mat 10:8) Ual᷊ingu tụtol᷊e laahạ ene, i kite tawẹ mědẹ̌dorong bawaehẹ̌ bọu i sire apang něnarimạ Alkitapẹ̌ arau bawasang bal᷊inẹ. (2Kor 2:17) Maning kerene, manga bawasang ini lohone těntiro maarěga bọu Hengetang u Mawu. Bal᷊inẹ gampang saghedẹ̌ dingangu kal᷊awọe roitẹ̌ nipakẹ gunang měkoạ dingangu měndingọ bawasang su sidang-sidang su patikụ dunia. Hakị u ene, mapaelẹ̌ mạeng měngal᷊ạ ­bawasang kětạeng kal᷊awọe paketang i kitẹ.

Pakatahuěna su tempong měgělị bawasang su taumata wal᷊inẹ, maning lai měnginjilẹ̌ su tampạ piạ lawọ taumata. (Mat 7:6) Sul᷊ungu kětạeng měgělị bawasang su taumata sụsahe, kapaelange lai mẹ̌bawěke dingangi sire tadeạu makasingkạ i sire mapulu arau madiri. Apa Anạu sěmbaụ něgělị sasimbahẹ̌ iya maning kětạeng sěmbaụ bọu kakiwal᷊o su ral᷊ungu kotak? Mạeng i sie kakělaěng madiri dumaringihẹ̌, ěndọkangbe pěgělị risalah si sie. Katewe mạeng i sie mẹ̌dorong bawasang bal᷊inẹ, tantu i kitẹ mal᷊uasẹ̌ měgělị si sie.—Baw 3:27, 28.