KAWE NỤE PENTING: Tadeạu botonge ipakasal᷊amatẹ̌, taumata harusẹ̌ mẹ̌kui arengi Yehuwa. (Rm 10:13, 14) Katewe, tawe kěbị měngangěndung Alkitapẹ̌ mapulu tumol᷊e manga parentang i Yehuwa. I kitẹ měpakẹ tempong i kitẹ maarěga gunang mẹ̌tul᷊ung taumata apang kahěngang-hěngang mapulu mẹ̌bal᷊ui gunang makal᷊uasẹ̌ si Yehuwa. Mạeng měngangěndung tawe něnodẹ kemajuan maning i sie seng marěngụ něngěndung, kapaelange tawe měnurusẹ̌ pěngangěndungang dingange. Mạeng měkoạ ene, i kitẹ botonge makatul᷊ung taumata wal᷊inẹ apang niwol᷊eng i Yehuwa sarang i Sie dingangu organisasi-Ne. (Yoh 6:44) Mạeng su tempo mahi měngangěndung ene aramanung nẹ̌bal᷊ui kụ něnodẹ i sie piạ ”kakanoạ nihino gunang makaěbạ pěbawiahẹ̌ tutune”, i kitẹ mal᷊uasẹ̌ měněpasẹ̌ pěngangěndungang Alkitapẹ̌ dingange.​—Kis 13:48.

KEREA CARANE:

• Daloi měngangěndung ual᷊ingu i sie mapulu makaěbạ kasingkạ nihino.​—1Tim 2:4

• Lahẹko pakapia měkoạ apa seng niěndungang ene sěbạe penting.​—Luk 6:46-49

• Lahẹko pakapia si sie papinintu i Yesus soal u měnanawuhẹ̌, katewe abe makakadodọ naunge. Bọu ene, pẹ̌dorong i sie mẹ̌tiněna kawe nụe i sie bědang tawe někoạ apa seng niěndungange.​—Mat 13:18-23

• Pakatahuěna mělahẹ kawe nụe i kau seng tawe měnurusẹ̌ pěngangěndungang dingange

• Paul᷊ị si sie pẹ̌sěnsul᷊ẹ i kau sarung mẹ̌tiwo gunang měnoghasẹ̌ si sie su hal᷊ẹ̌ rohani. Paul᷊ị lai i kau mapulu saụ měnurusẹ̌ pěngangěndungang mạeng i sie seng někoạ pẹ̌bawal᷊ui

PẸ̌BIALA VIDEO, BỌU ENE SIMBAHE MANGA KAKIWAL᷊O INI:

• Bọu bisarang i rẹ̌dua, apa něnodẹ měngangěndung Alkitapẹ̌ tawe někoạ kemajuan rohani?

• Kerea penyiar nẹ̌tul᷊ung měngangěndung ene makaěna i sie harusẹ̌ měkoạ pẹ̌bawal᷊ui?

• Kerea penyiar něnodẹ i sie mapulu saụ měnurusẹ̌ pěngangěndungang Alkitapẹ̌ mạeng měngangěndung ene seng někoạ pẹ̌bawal᷊ui?