Kěnang pẹ̌tiněna i kau mětẹ̌tanạ su Galilea su tempong Yesus bědang su dunia. I kau nakoạ sarang Yerusalem gunang tumol᷊e acara Pondok Daun. Su soa ene seng piạ lawọ ělangi Yehuwa diměnta bọu tampạ marau. I kau mapulu mẹ̌bawa sasěmbah gunang Yehuwa. Kạpěmol᷊enge kambing, i kau harusẹ̌ lumiu taumata lawọ su soa ene tadeạu makasuẹ̌ su bait. Su tempong i kau nahumpạ, bait seng napenẹu taumata měgělị sasěmbah. Bọu ene, su tempong seng bageangu měgělị kambing su manga imang, i kau nakatahěndung anạu sěmbaụu nẹ̌pědu si kau. I sie aramanung ene su tal᷊oarang taumata lawọ arau su soa ene. Yesus naul᷊ị apa harusẹ̌ koatengu. (Basa Matius 5:24.) Kerea tadeạu i rua mẹ̌dame, kere seng niorong i Yesus? Su daftar ini, tialaiko sude sasimbahẹ̌ nihino.

I KAU HARUSẸ̌ . . .

• mẹ̌bisara dingange kětạeng mạeng i kau nẹ̌pěndang i sie pědụ ual᷊ingu alasang masuẹ̌ su akal᷊ẹ̌

• měgělị sasasa si sie mạeng i kau nẹ̌pěndang i sie tawe kapẹ̌sal᷊ang dingangu i sie lai nẹ̌sal᷊a

• masabarẹ̌ dumaringihẹ̌ apa niul᷊ịe, kụ maning i kau tawe tumanịu nakaěna, i kau mẹ̌dorong ampung ual᷊ingu seng nakatědụ naunge arau ual᷊ingu apa nikoạu ene tawe sangaja

I SIE HARUSẸ̌ . . .

• mẹ̌běke su anạu sembaụ su sidang i kau seng nakatědụ naunge, tadeạu i sire měnumběka si sie

• mẹ̌taradạ si kau kụ maul᷊ị kěbị pẹ̌sasal᷊anu, kụ měnihasa si kau gunang měngaku pẹ̌sasal᷊anu

• mẹ̌tahěndung i kau seng nẹ̌těngkasanạ u naung dingangu nẹ̌tumbahani mẹ̌bisara dingange, kụ dingangu kaguwạu naung měgělị ampung

Maning orasẹ̌ ini i kitẹ seng tawe mẹ̌bawa sasěmbah binatang su tempong měngibadah, tumuhụ si Yesus, apa sěmpụe mẹ̌dame dingangu anạu sěmbaụ dingangu ibadah tarimakengu Mawu?