Hukung i Musa seng tawe mapakẹ su tau Sahani. Katewe, darua tita kaguwakenge su hukung, bědang harusẹ̌ tuhụkang i kitẹ. Ene kai parenta gunang kuměndagẹ̌ Mawu dingangu taumata wal᷊inẹ. (Mat 22:37-39, NW) I kitẹ tawe nalahirẹ̌ dingangu kakěndagẹ̌ kerene. I kitẹ harusẹ̌ mẹ̌tawakal᷊i tadeạu piạ sipatẹ̌ ene. Kerea carane? Sěmbaụ cara penting ute mẹ̌basa Alkitapẹ̌ ěllo-ěllo. Mạeng i kitẹ mẹ̌tiněna manga sipatu Mawu nilahẹ su Alkitapẹ̌, i kitẹ sarung makapěndang ’kapiang [Yehuwa]’. (Mzm 27:4) Hasile, kakěndagi kitẹ si Yehuwa kakạtoghase dingangu tiněnang i kitẹ makoạ mẹ̌sul᷊ung dingangu tiněna-Ne. Ini makawahansang si kitẹ tumuhụ parentang Mawu, kụ sěmbaụ parenta-Ne ute kuměndagẹ̌ taumata wal᷊inẹ. (Yoh 13:34, 35; 1Yoh 5:3) Sini piạ tatělu těgu tadeạu i kitẹ puluang měngěndung Alkitapẹ̌:

• Pakẹ tiněna dingangu manga inderanu. Pẹ̌tiněna i kau ene sene. Apa wotonge kasiloěngu, karingihangu, dingangu kaimbuangu? Kerea pěndang i sire apang niwěke sene?

• Pakẹ piram baụ cara. Contone: Basa dingangu tingihẹ̌ maihạ, arau basa apidu dumaringihẹ̌ rekaman audione. Sul᷊ungu mẹ̌basa manga pasale ipẹ̌tatuhụ, basạe soal u taumata arau topik su Alkitapẹ̌. Mạeng mẹ̌basa soal i Yesus, pěmanda lai Lampiran A7 arau B12 su Kitab Suci Terjemahan Dunia Baru. Basa kěbị ayatẹ̌ su pasalẹ̌ bọu ayat harian. Basạe manga bukẹ̌ su Alkitapẹ̌ tuhụ tempo bukẹ̌ ene niwohẹ.

• Pẹ̌basạe gunang makaěna. Abe mẹ̌basa lawọ pasalẹ̌ tadeạu mal᷊ighạ masue. Kapaelange mẹ̌basa sěmbaụ pasalẹ̌ sahěllo, katewe i kau nẹ̌tiněna dingangu nẹ̌tawakal᷊i makaěna apa niwasanu. Pẹ̌tiněna latare dingangu haghing keterangan. Pakẹ peta dingangu referensi silang. Pěkoạ riset soal u topik tawe nikaěnangu. Mạeng botonge, tempo paketangu gunang mẹ̌tiněna harusẹ̌ mẹ̌sul᷊ung dingangu tempo nipakẹu gunang mẹ̌basa.