Alat bantu visual makatul᷊ung apang nẹ̌biala gunang mẹ̌tarukira. Ene lai makatul᷊ung si sie makaěna dingangu makatahěndung apa seng niěndungange. I Yehuwa, Měnaněntirong i kitẹ Mawantugẹ̌, něpakẹ alat bantu visual gunang měněntiro hal᷊ẹ̌ penting. (Kej 15:5; Yer 18:1-6) Hakị u ene, i Yesus, Guru Kapaelange lai něpakẹ ene. (Mat 18:2-6; 22:19-21) Sěmbaụ alat bantu visual kụ gunane seng nikapěndangeng i kitẹ ene kai video. Apa i kau měpẹ̌pakẹ manga video ini su tempong měněntiro Alkitapẹ̌?

Mapul᷊o video seng nisadia gunang mẹ̌tul᷊ung si kitẹ mělahẹ tatěntiro su brosur Habarẹ̌ Mapia Bọu Mawu! Biasane tatěmbọu video piạ sěmpụe dingangu sěmbaụ kakiwal᷊o niwohẹ masuwenehẹ̌ su brosur ene. Su versi elektronik brosur ene, piạ link měgělị laingatẹ̌ kange harusẹ̌ měnodẹ manga video ene. Piạ lai manga video wal᷊inẹ su manga bukẹ̌ pẹ̌paketang gunang měngěndung Alkitapẹ̌ su bageang Alat Bantu Pengajaran.

Apa i kau sarung měněntiro topik Alkitapẹ̌ masigěsạ kaěnangu měngangěndung? Arau apa i sie tụtatěngo sigěsạ? Su jw.org® dingangu su JW Broadcasting®, deạe video nẹ̌tatahino gunang i sie. Aramanung i kau dingangu měngangěndung Alkitapẹ̌ botonge mẹ̌biala sěngkasio sěmbaụ video, bọu ene mẹ̌bisara soal u video ene.

Sabang wul᷊ang, piạ video buhu nisadia. Su tempong mẹ̌biala ene, pẹ̌tiněna kerea i kau botonge měpakẹ video ene gunang měněntiro taumata wal᷊inẹ.