Měnětạ wul᷊ang September, su Bageang Pěngangěndungang Pěbawiahẹ̌ Sahani dingangu Pelayanan i Kitẹ, sarung piạ contoh cara měhabarẹ̌ buhu, tatěmbọe ”Těntiroi Hengetang u Mawu”. Gunane ute mělahẹ těntirong Alkitapẹ̌, měpakẹ kakiwal᷊o dingangu ayetẹ̌.

Mạeng piạ u mapulu dumaringihẹ̌, i kitẹ botonge měgělị bukẹ̌ bawasang arau lai měmutarẹ̌ video bọu jw.org, tadeạu i sire tatapẹ̌ mapulu dumaringihẹ̌ sarang i kitẹ saụ mẹ̌tiwo si sire. Tempo kapaelange mẹ̌tiwo gunang měnurusẹ̌ pěngangěndungang dingangi sire ute pira ěllo bọu tempo humotong i kitẹ něhabarẹ̌. Contoh měhabarẹ̌ ini dingangu bahan gunang i saing nakaěbạ tugasẹ̌, nial᷊ạ bọu lawọ topik su bukẹ̌ Alkitab Ajarkan. Su pěngěnsuengu pasalẹ̌ su bukẹ̌ ene, piạ ringkasan lohone manga ayetẹ̌, kụ botonge paketang su tempong saụ mẹ̌tiwo arau měněntiro kětạeng měpakẹ Alkitapẹ̌.

Kětạeng piạ sěmbaụ dal᷊eng sarang pěbawiahẹ̌. (Matius 7:13, 14) Su tempong měnginjilẹ̌, i kitẹ mẹ̌sombang dingangu taumata bọu nẹ̌dal᷊ahaghing agama dingangu latar belakang. Hakị u ene, těntirong Alkitapẹ̌ lahẹkang i kitẹ, harusẹ̌ makawahansang si sire. (1 Timotius 2:4) Mạeng i kitẹ masingkạ lawọ topik Alkitapẹ̌ dingangu matahuěna su tempong mělahẹ ayetẹ̌, i kitẹ sarung limembong mal᷊uasẹ̌. I kitẹ lai makakoạ měněntiro Hengetang u Mawu su taumata wal᷊inẹ.—2 Timotius 2:15.