Kawe nụe i kitẹ harusẹ̌ mědal᷊ahapị dingangu taumata makěndagẹ̌ si Yehuwa? Ual᷊ingu hapị i kitẹ makakoạ si kitẹ makoạ taumata limembong mapia arau limembong dal᷊akị. (Amsal 13:20) Contone, Datu Yehoas ”měkẹ̌koạ barang nihino su těngong Yehuwa” su tempong i sie nědal᷊ahapị dingangu Imang Mawantugẹ̌ Yehoyada. (2Taw 24:2) Su apang i Yehoyada nate, Yehoas něněntang si Yehuwa kụ nědal᷊ahapị dingangu taumata tawe makěndagẹ̌ si Yehuwa.​—2Taw 24:17-19.

Su abad humotong, Rasul Paulus napẹ̌sul᷊ungu sidang Kristen dingangu sěmbaụ ”bal᷊e gěguwạ”. Anggota sidang nipẹ̌sul᷊ung dingangu manga ”apal᷊iwụ” pẹ̌paketang su wal᷊e ene. I kitẹ botonge tatapẹ̌ makoạ ”alatẹ̌ penting” mạeng i kitẹ tawe mědal᷊ahapị dingangu taumata tawe makěndagẹ̌ si Yehuwa, maning ene anggota keluarga arau anggota sidang i kitẹ. (2Tim 2:20, 21) Hakị u ene, mahịe i kitẹ turusẹ̌ mědal᷊ahapị dingangu taumata apang makěndagẹ̌ si Yehuwa dingangu měmẹ̌mahangsang si kitẹ gunang mẹ̌tahamawu su Mawu.

PẸ̌BIALA VIDEO BELAJAR MENOLAK PERGAULAN BURUK, BỌU ENE SIMBAHE MANGA KAKIWAL᷊O INI:

• Kerea i kitẹ, tawe sadarẹ̌, seng nědal᷊ahapị dingangu taumata tawe nẹ̌tatahino?

• Bọu video ini, apa nakatul᷊ung tatělu anạu sěmbaụ tadeạu seng tawe mědal᷊ahapị dingangu taumata tawe nẹ̌tatahino?

• Prinsip Alkitapẹ̌ sude makatul᷊ung si kitẹ matahuěna měmile hapị?