Su těngong Yehuwa, dianding pẹ̌kakawing ene sěbạe serius. I Sie naul᷊ị kawing esẹ dingangu kawing wawine harusẹ̌ tatapẹ̌ masěmbaụ. (Mat 19:5, 6) Su tal᷊oarang ělang i Yehuwa, piạ lawọ pẹ̌kakawing maral᷊uasẹ̌. Maning kerene, tawẹ apa pẹ̌kakawing nasukụ. Bọu ene lai, piạ haghing masalah sụsěpụ. I kitẹ tawe wotonge piạ tiněna kere taumata orasẹ̌ ini. I sire mẹ̌pěndang mẹ̌tatěntang dingangu mẹ̌cere kai cara gunang maliwirẹ̌ bọu masalah. Kerea tau Kristen botonge měndiagạ pẹ̌kakawing i sire?

Pẹ̌tiněna lima cara penting ini:

1. Diagạ naungu, carane ute abe pẹ̌biala hiburan amoral arau hiburan makakoạ si kau piạ tiněna amoral, ual᷊ingu ene sarung makal᷊ome pẹ̌kakawing.​—Mat 5:28; 2Ptr 2:14.

2. Pakatoghasẹ̌ pẹ̌dal᷊ahapịu dingangu Mawu, kụ pẹ̌tawakal᷊ịe makal᷊uasẹ̌ si Sie su ral᷊ungu pẹ̌kakawingu.​—Mz 97:10.

3. Turusẹ̌e pẹ̌pakẹ pěbawiahẹ̌ buhu. Bọu ene, todẹko kapiang naung maning bọu hal᷊ẹ̌ dararodọ ual᷊ingu ene sarung makakoạ pěbawiahu kawingu limembong mal᷊uasẹ̌.​—Kol 3:8-10, 12-14.

4. Pakaadatẹ̌ su tempong mẹ̌bisara dingangu pakasau mẹ̌bawěke.​—Kol 4:6.

5. Pěgělị hakẹ̌u pẹ̌kakawing dingangu tatal᷊ěntụ lai kakěndagẹ̌.​—1Kor 7:3, 4; 10:24.

Mạeng tau Kristen měngadatẹ̌ pẹ̌kakawing, i sire měngẹ̌ngadatẹ̌ si Yehuwa, Mawu seng někoạ pẹ̌kakawing.

PẸ̌BIALẠE VIDEO KITA HARUS ”BERLARI DENGAN TEKUN”—TAATILAH PERATURAN PERLOMBAAN, BỌU ENE SIMBAHE MANGA KAKIWAL᷊O INI:

• Maning su tětạe sěmbaụ pẹ̌kakawing ene mal᷊uasẹ̌, masalah apa aramanung sụsěpụ?

• Kerea prinsip Alkitapẹ̌ makatul᷊ung si sire apang nẹ̌pěndang seng tawẹ apa kakěndagẹ̌ su ral᷊ungu pẹ̌kakawing i sire?

• Atorang apa nikoạ i Yehuwa gunang pẹ̌kakawing?

• Tadeạu pẹ̌kakawing maral᷊uasẹ̌, apa harusẹ̌ koatengu kawing esẹ dingangu kawing wawine?