I kitẹ měbẹ̌biahẹ̌ su dunia mětẹ̌tawakal᷊i měkoạ si kitẹ mẹ̌tiněna barang dal᷊akị ene mapia, kụ barang mapia ene dal᷊akị. (Yes 5:20) Piạ taumata seng někoạ barang ikẹ̌kawěngsing i Yehuwa, kere homoseksual. Hapị su sikol᷊ah arau taumata wal᷊inẹ aramanung mẹ̌tawakal᷊i gunang měkoạ mangangudạ tumol᷊e kakanoạ i sire. Kerea i kamene botonge měnadia anạ i kamene gunang tumatěngo sasal᷊ukạ kerene?

Těntiroi anạ i kamene soal u atorang i Yehuwa. (Im 18:3) Kadodọ-kadodọ, těntiroi anạ apa niul᷊ị u Alkitapẹ̌ soal u seks, kụ pẹ̌tatahino dingangu umurẹ̌ lai kesanggupan i sire gunang makaěna. (Ul 6:7) Kěnang pẹ̌tiněna, ’Apa iạ seng něněntiro su anạ soal u kakanoạ kerea nẹ̌tatahino gunang měnodẹ kakěndagẹ̌ dingangu penting měpakẹ pakeang sopan? Apa iạ seng něněntiro piạ hal᷊ẹ̌ tawe wotonge koatengu taumata wal᷊inẹ si sire lai piạ hal᷊ẹ̌ tawe wotonge koateng i sire maning taumata wal᷊inẹ mẹ̌dorong i sire měkoạ ene? Apa anạku seng masingkạ apa harusẹ̌ koateng mạeng piạ taumata měnodẹ pornografi arau mẹ̌dorong si sire měkoạ barang nẹ̌sal᷊a su těngong Yehuwa?’ Mạeng i kitẹ seng něněntiro kal᷊imona su anạ, ene sarung makariagạ si sire bọu silakạ. (Amsal 27:12; Pkh 7:12) Su tempong něněntiro anạ, matatimadẹ̌ něnodẹ i sire měngẹ̌ngarěga pusakạ bọu i Yehuwa.​—Mz 127:3.

PẸ̌BIALẠE VIDEO BANGUNLAH RUMAH YANG AKAN BERTAHAN—JAGALAH ANAK-ANAK SAUDARA DARI ”APA YANG JAHAT”, BỌU ENE SIMBAHE MANGA KAKIWAL᷊O INI:

• Kawe nụe piạ matatimadẹ̌ masigěsạ měněntiro soal u seks su anạ?

• Kawe nụe matatimadẹ̌ harusẹ̌ měněntiro anạ tuhụ ”tatěntiro dingangu sasasa bọu i Yehuwa”?​—Ef 6:4

• Apa seng nisadiangu organisasing Yehuwa gunang mẹ̌tul᷊ung matatimadẹ̌ měněntiro anạ i sire soal u seks?​—w19.05 12, kotak

• Kawe nụe i kitẹ harusẹ̌ lighạ mẹ̌bisara soal u seks dingangu anạ těntal᷊ang bědang tawẹ apa masalah serius?