Dongkeng Januari 2018, Contoh Carane Mẹ̌bawěke seng nitaho su bageang mukane su Pelayanan dingangu Pěbawiahẹ̌ Kristen—Bageang Pěngangěndungang. Kerea cara měpakẹ ene?

Su Tempong Nakaěbạ Tugasẹ̌: I kau harusẹ̌ měpakẹ kakiwal᷊o, ayatẹ̌, dingangu kakiwal᷊o tuhụe bọu Contoh Carane Mẹ̌bawěke. Katewe, i kau tawe harusẹ̌ tumol᷊e bawera su video Contoh Carane Mẹ̌bawěke. I kau botonge měpakẹ latar dingangu kata pengantar nẹ̌tatěntang. I kau lai botonge mělahẹ ayatẹ̌ dingangu cara nẹ̌tatěntang. Bọu ene lai, i kau botonge měgělị publikasi bọu Alat Bantu Pengajaran, maning tawẹ apa těgu gunang měgělị ene.

Su Tempong Měnginjilẹ̌: Contoh Carane Mẹ̌bawěke nikoạ tadeạu i kau piạ ide. Mạeng piạ taumata kahěngang-hěngang mapulu dumaringihẹ̌ kụ mapulu masingkạ mal᷊awọ, i kau botonge turusẹ̌ mẹ̌bawěke, ěndịu měpakẹ Contoh Carane Mẹ̌bawěke gunang Saụ Mẹ̌tiwo. I kau lai botonge měmalui Contoh Carane Mẹ̌bawěke arau měpakẹ topik wal᷊inẹ. Apa topik bọu wul᷊ang tamai arau ayatẹ̌ wal᷊inẹ limembong nẹ̌tatahino su taumata su tampạu? Arau, apa i sire limembong mapulu dumaringihẹ̌ mạeng i kau mẹ̌bisara soal u berita arau kejadian buhudeng nariadi su tampạu? Tawẹ soale cara sude paketang i kitẹ, limembong penting ene kai mẹ̌tawakal᷊i ’měkoạ kěbị haghi gunang habarẹ̌ mapia, tadeạu botonge měmahiạ ene su taumata wal᷊inẹ’.​—1 Kor 9:22, 23.