Disiplin piạ sěmpụe dingangu těntiro lai laahạ, katewe ene lai mangal᷊ene sasasa dingangu hukumang. Yehuwa něgělị disiplin tadeạu i kitẹ měněmbah si Sie dingangu cara nihino. (Rm 12:1; Ibr 12:10, 11) Pẹ̌sěngsul᷊ẹ, disiplin ene makatědụ naung, katewe ene makarěntang barang nihino dingangu al᷊amatẹ̌. (Amsal 10:7) Apa harusẹ̌ tahěndungangu taumata apang měgělị disiplin dingangu apang měnarimạ disiplin?

Apang měgělị disiplin. Manga penatua, matatimadẹ̌, dingangu taumata wal᷊inẹ mẹ̌tawakal᷊i měgělị disiplin dingangu mapia lai makěndagẹ̌ kere nitodẹ i Yehuwa. (Yer 46:28) Maning harusẹ̌ gělịkang disiplin těgasẹ̌, ene harusẹ̌ nẹ̌tatahino dingangu kebutuhan kụ dasare kai kakěndagẹ̌.​—Tit 1:13.

Apang měnarimạ disiplin. Maning kerea disiplin ene nighělị, i kitẹ harusẹ̌ měnarimạ kụ masahawụ měkoạ ene. (Amsal 3:11, 12) Ual᷊ingu tawe nasukụ, i kitẹ kěbị perlu makaěbạ disiplin su haghing cara. I kitẹ ěndịu nakaěbạ disiplin bọu apa niwasang i kitẹ su Alkitapẹ̌ arau bọu apa nikaringihang i kitẹ su pěngangibadang. Arau pẹ̌sěngsul᷊ẹ i kitẹ makaěbạ disiplin bọu panitia pengadilan. Tumuhụ disiplin makarěntang pěbawiahẹ̌ kěkalẹ̌.​—Amsal 10:17.

PẸ̌BIALA VIDEO ”YEHUWA MENDISIPLIN SEMUA YANG DIA SAYANGI”, BỌU ENE SIMBAHE MANGA KAKIWAL᷊O INI:

• Kerea pěbawiahi Canon kangerẹ, kụ kerea ene nẹ̌bal᷊ui?

• Disiplin makěndagẹ̌ apa nitarimạe bọu i Yehuwa?

• Apa kaěndungang i kitẹ bọu pengalaman i Canon?