TEMPO ene maraning pěngěnsuengu wul᷊ang November 1932 su Mexico City, sěmbaụ soa marame, sene piạ nal᷊iu bọu satu juta taumata mětẹ̌tanạ. Buhudeng sěngkamisa sol᷊ong lalu lintas su soa ene nipasẹ̌. Katewe taumata sene seng měbẹ̌bisara soal u barang bal᷊inẹ. Manga wartawan měngẹ̌ngampal᷊ẹ̌ su stasiun kereta, piạ kamerane, mělẹ̌hědo sěngkatau sake penting. I sai i sie? I sie kai Joseph F. Rutherford, presiden Lembaga Menara Pengawal. Sahiding Yehuwa su soa ene lai měngẹ̌ngampal᷊ẹ̌ gunang měněnsomahẹ̌ si Saudara Rutherford, gunang tumol᷊e kebaktian tělu ěllo.

Majalah The Golden Age nẹ̌habarẹ̌, ”Kebaktian ini tawe kawul᷊enang su kanandụu sejarah penting” gunang měbawa habarẹ̌ su Meksiko. Katewe ini kětạeng kebaktian kadodọ, ěndịu piạ 150 su kataune diměnta. Kawe nụe kebaktian ini penting?

Su tempong kebaktian ene bědang tawe nikoạ, bědang mahal᷊i taumata su Meksiko nakaringihẹ̌ soal u habarẹ̌ mapia. Dongkeng taung 1919, seng piạ kebaktian dararodọ, katewe bọu taung ene, sidang kakạhal᷊ine. Su tempong kantor cabang niwuka su Mexico City taung 1929, kakělaěng situasine kakạpaele, katewe bědang piạ sungkal᷊e harusẹ̌ tatěngong i sire. Organisasi seng něgělị těgu su manga kolportir arau perintis tempo ene, tadeạu tawe mẹ̌bisnis su tempong měnginjilẹ̌. Hal᷊ẹ̌ ini nakakoạ sěngkatau kolportir nẹ̌bawal᷊uang kụ siměbang bọu organisasi, bọu ene i sie někoạ kelompok pěngangěndungang Alkitapẹ̌ e hala. Su kanandụu tempo ene lai, pengawas cabang nighanti ual᷊ingu kakakoạ e nẹ̌sal᷊a. Sahiding Yehuwa masatia su Meksiko harusẹ̌ toghaseng.

Su tempong Saudara Rutherford nẹ̌tiwo, i sie něnoghasẹ̌ apang masatia bọu darua nasẹ̌ e su kebaktian ene, dingangu lima nasẹ̌ e wal᷊ine boụ siaran radio. Buhudeng ene i sire něpakẹ stasiun radio gunang měhabarẹ̌ injilẹ̌ su Meksiko. Nasueng kebaktian, sěngkatau pengawas cabang nihengkẹ gunang mengorganisasi lawọ hal᷊ẹ̌. Sahiding Yehuwa saụ nasěmangatẹ̌, kụ ual᷊ingu tul᷊umang i Yehuwa i sire turusẹ̌ něnginjilẹ̌.

Su taung tuhụ e, 1933, piạ darua kebaktian su negeri ene, sěmbaụ su Veracruz kụ sěmbaụ lai su Mexico City. Anạu sěmbaụ něhal᷊ẹ̌ masěghadẹ̌ su darua tampạ ene, kụ hasile mapaelẹ̌. Contone, su taung 1931, piạ 82 penyiar. Katewe su taung 1941, natambah mapul᷊o kali lipat! Ěndịu piạ 1.000 su kataune diměnta sarang Kebaktian Teokratis taung 1941 su Mexico City.

Su taung 1943, Sahiding Yehuwa něnětạ někoạ iklan gunang Kebaktian Teokratis ”Bangsa yang Merdeka”, kụ ene sarung koateng su 12 soa su Meksiko. * (Pěmanda catatan kaki.) I sire něpakẹ papan iklan dua lapisẹ̌. Piạ darua papan iklan nisangẹ su wěmbang, sěmbaụ su sěbạ sěmbaụ su likudẹ̌. Sahiding Yehuwa něpakẹ papan iklan kerene dongkeng 1936 gunang měhabaru kebaktian i sire.

Něpakẹ papan iklan piạ hasile mapaelẹ̌ hakị u majalah La Nación němohẹ soal u Sahiding Yehuwa su kebaktian ene, ”Su ěllo humotong, i sire dẹ̌dorongang měgausẹ̌ taumata lawọ gunang sumongo. Su ěllo tuhụ e, i sire němenẹ tampạ ene.” Gahedang Katolik nawěnsing, kụ i sire něndariha Sahiding Yehuwa. Katewe, anạu sěmbaụ tawe natakụ. I sire turusẹ̌ něhabarẹ̌ soal u kebaktian ene. Sěmbaụ artikel su La Nación nẹ̌bera, ”Patikụ soa němanda si sire.” Artikel ene lai nẹ̌bera Sahiding Yehuwa ”niwal᷊ui nakoạ iklan ’roti lapis’”. Artikel ini lai něnodẹ gambarẹ̌ anạu sěmbaụ su manga ral᷊eng su Mexico City. Su bageang bawah bọu gambarẹ̌ ene mạbawohẹ, ”Serangan su ral᷊eng.”

Su pira taung ene, kal᷊awọkange Sahiding Yehuwa harusẹ̌ měkoạ pengorbanan gěguwạ mạeng makoạ sarang kebaktian su Meksiko. Lawọ anạu sěmbaụ diměnta bọu kampong kụ marau bọu jalur kereta arau ral᷊eng gěguwạ. Sěmbaụ sidang němohẹ, ”Kětạeng sěmbaụ jalur lumiu kampong i kami, kụ ene jalur u telegraf.” Hakị u ene, anạu sěmbaụ harusẹ̌ sumake roda arau luměngang pira ěllo sarang makaěbạ kereta sarang tampạ u kebaktian.

Kal᷊awokange Sahiding Yehuwa biahe masusah kụ tawe makawaehẹ̌ ongkosẹ̌ sarang kebaktian. Su tempong i sire nahumpạ sene, lawọ nětanạ su wal᷊eng anạu sěmbaụ apang něnodẹ kakěndagẹ̌ dingangu mapulu měnarimạ sake. Sěnggạ lai nẹ̌tikị su Banalang Kararatuang. Su sěngkatempo piạ 90 anạu sěmbaụ nẹ̌tikị su kantor cabang, su wowong manga dosẹ̌ u bukẹ̌. Buku Tahunan nẹ̌běke anạu sěmbaụ ene nẹ̌tarimakasẹ ual᷊ingu manga dosẹ̌ nipẹ̌tikilang i sire ”limembong mal᷊owọ dingangu tawe matěho sul᷊ungu lante meselẹ̌”.

Su Sahiding Yehuwa tempo ene, mẹ̌komol᷊ẹ̌ dingangu anạu sěmbaụ i sire kai maarěga. Orasẹ̌ ini, piạ 850.000 Sahiding Yehuwa su Meksiko, kụ i sire lai něnodẹ pěngangarěga mẹ̌sul᷊ung. * (Pěmanda catatan kaki.) Laporan su Buku Tahunan 1949 naul᷊ị pengorbanan nikoạ u anạu sěmbaụ, ene tawe nakal᷊ome semangat i sire gunang měngibadah si Yehuwa. Kebaktian nirěntang i sire, ene ”turusẹ̌ nakoạ bisarang i sire”. Kakiwal᷊o hanesẹ̌ kiwal᷊ongu anạu sěmbaụ ene kai, ”Kange i kitẹ saụ piạ kebaktian?”​—Bọu arsip i kitẹ su Amerika Tengah.