1, 2. (a) Kerea i kitẹ makasingkạ i kitẹ botonge měpakẹ pěbawiahẹ̌ buhu? (b) Sipatẹ̌ apa bọu pěbawiahẹ̌ buhu niěndungang i kitẹ su Kolose 3:10-14?

SU RAL᷊UNGU Kitab Suci Terjemahan Dunia Baru, bawera ”pěbawiahẹ̌ buhu” duang sul᷊ẹ nisěbạ. (Ef. 4:24; Kol. 3:10) Ini mangal᷊ene sipatẹ̌ su pěbawiahẹ̌ ”niriadi tuhụ koạ u Ruata”. Apa i kitẹ botonge měpakẹ pěbawiahẹ̌ buhu ini? Botonge. Yehuwa něndiadi taumata mẹ̌papangawẹ i Sie, hakị u ene i kitẹ botonge mẹ̌těno manga sipat’E mal᷊ěnggihẹ̌.​—Pěnd. 1:26, 27; Ef. 5:1.

² Ual᷊ingu i kitẹ tawe nasukụ, pẹ̌sěnsul᷊ẹ i kitẹ piạ kapulu nẹ̌sal᷊a. I kitẹ lai mạtol᷊e kakanoạ u taumata su pẹ̌tatanakeng i kitẹ. Katewe ual᷊ingu tul᷊umang bọu Yehuwa, i kitẹ botonge makoạ taumata kẹ̌kapuluang’E. Tadeạu i kitẹ piạ kapulu měkoạ ene, mahịe i kitẹ měngěndung piram baụ sipatẹ̌ nakoạ bageang bọu pěbawiahẹ̌ buhu. (Basa  Kolose 3:10-14.) Bọu ene, i kitẹ měmanda kerea carane měnodẹ sipatẹ̌ ene su tempong měnginjilẹ̌.

3. Apa sěmbaụ sipatẹ̌ bọu pěbawiahẹ̌ buhu?

³ Paulus nělahẹ kakanoạ tawe mawěhạ sěmběka ene kai bageang penting bọu pěbawiahẹ̌ buhu. I sie naul᷊ị, ’Něngkailang pẹ̌dal᷊ahaedangu arau pẹ̌tatěntangu tau Yahudi ringangu bal᷊inẹ Yahudi; nisunatẹ̌ dingangu tawe nisunatẹ̌; tau raghi dingangu taumata ral᷊akisẹ̌; arau ělang dingangu bal᷊inẹ ělang.’ Su sidang tawe wotonge piạ u mẹ̌pěndang i sie limembong mapaelẹ̌ bọu taumata kụ ras, kebangsaan, dingangu kedudukan su masyarakatẹ̌. Kawe nụe? Ual᷊ingu i kitẹ kai tumatol᷊eng i Yesus, kụ i kitẹ ”nasěmbaụ”.​—Kol. 3:11; Gal. 3:28.

4. (a) Kerea manga ělang i Yehuwa měkoạ taumata wal᷊inẹ? (b) Situasi apa makoạ sasal᷊ukạ su kasasěmbaụ u tau Sahani?

⁴ Mạeng i kitẹ měpakẹ pěbawiahẹ̌ buhu, i kitẹ měngadatẹ̌ dingangu měngarěga kěbị taumata, tawẹ soale ras dingangu asal᷊i sire. (Rm. 2:11) Su piram baụ bageang bọu dunia ini, hal᷊ẹ̌ ene masigěsạ koateng. Contone, kangerẹ su Afrika Selatan, pěměrenta něngatorẹ̌ pẹ̌tatanakengu ras sěmbaụ nẹ̌tatěntang dingangu ras bal᷊inẹ. Kal᷊awọkange taumata su negeri ene, lai Sahiding Yehuwa, bědang mětẹ̌tanạ su tampạ ene. Badan Pimpinan němahansang anạu sěmbaụ tadeạu ”naung i [sire] e apakal᷊oahẹ̌ko”. Hakị u ene su wul᷊ang Oktober 2013, i sire setuju su sěmbaụ pengaturan istimewa makatul᷊ung anạu sěmbaụ bọu ras nẹ̌tatěntang mědal᷊ahapị dingangu masingkạ sěmbaụ su wal᷊inẹ.​—2 Kor. 6:13.

5, 6. (a) Pengaturan apa nikoạ su sěmbaụ negeri gunang ělangu Mawu tadeạu masěmbaụ? (Pěmanda gambarẹ̌ humotong su pěngangěndungang ini.) (b) Apa al᷊amate?

⁵ Saudara-saudara někoạ pengaturan tadeạu su pěngěnsuengu sěngkamisa, darua sidang bọu bawera dingangu ras nẹ̌tatěntang nẹ̌komol᷊ẹ̌ sěngkahindọ. I sire něnginjilẹ̌, něngibadah, dingangu nẹ̌tiwo bal᷊eng sěmbaụ su wal᷊inẹ. Hasụe sidang timol᷊e pengaturan ini, kụ kantor cabang něnarimạ lawọ habarẹ̌ mapael᷊ẹ̌. Hal᷊ẹ̌ ini lai nakakoạ si sire apang bal᷊inẹ Sahiding Yehuwa naherang. Contone, piạ sěngkatau pelayan agama nẹ̌bera, ”Ia bal᷊inẹ Sahiding Yehuwa, katewe tumuhụ si siạ, i kamene sěbạe naatorẹ̌ dingangu nasěmbaụ tawẹ soale bọu apa asal᷊i kamene.” Kerea pěndangu anạu sěmbaụ su pengaturan ini?

⁶ Humotong sěngkatau saudari bọu werang Xhosa arenge Noma, gụgěnggang měmaringang anạu sěmbaụ bọu sidang werang Inggris sarang wal᷊ene. Katewe su tempong něnginjilẹ̌ dingangu anạu sěmbaụ pisine mawira kụ nakoạ sarang bal᷊eng i sire, i Noma mal᷊uasẹ̌. I sie nẹ̌bera, ”I sire nạung taumata wiasa kere i kami!” Hakị u ene su  tempong anạu sěmbaụ bọu sidang werang Inggris diměnta gunang měnginjilẹ̌ dingangu sidang werang Xhosa, i Noma němaringang pirang katau bọu i sire kumaěng su wal᷊ene. I sie naherang nakasilo sěngkatau penatua pisine mawira mapulu kumaiang su kasẹ̌ plastik. Ual᷊ingu program ini turusẹ̌ nikoạ, lawọ anạu sěmbaụ nakaěbạ hapị buhu dingangu nakasingkạ latar belakang sěmbaụ dingangu wal᷊inẹ.

7. Kawe nụe i kitẹ harusẹ̌ turusẹ̌ měnodẹ tatal᷊ěntụ?

⁷ Sarang kasuengu duniang Setang, manga ělang i Yehuwa sarung makahombang sasal᷊ukạ. Masigěsạ makaěbạ hal᷊ẹ̌, sakị mawěhạ, piạ u měndariha, bencana alam, kailangengu arětạ, arau sigěsạ bal᷊inẹ ěndịu kahombangeng i kitẹ kěbị. Tadeạu botonge mẹ̌tatul᷊ung su tempong sigěsạ, i kitẹ harusẹ̌ mẹ̌tatal᷊ěntụ. Tatal᷊ěntụ makatul᷊ung si kitẹ měnodẹ kapiang naung. (Ef. 4:32) Manga sipatẹ̌ ini kai bageang bọu pěbawiahẹ̌ buhu. Ini makatul᷊ung si kitẹ mẹ̌těno Mawu dingangu měhiborẹ̌ taumata wal᷊inẹ.​—2 Kor. 1:3, 4.

8. Apa al᷊amate mạeng i kitẹ měnodẹ tatal᷊ěntụ dingangu kapiang naung su anạu sěmbaụ su sidang? Gělịko contoh.

⁸ Kerea i kitẹ měnodẹ kapiang naung su anạu sěmbaụ apang něngal᷊ing bọu negeri wal᷊inẹ arau apang masusah? I kitẹ mapulu měnarimạ si sire, měhapị, dingangu mẹ̌tul᷊ung si sire makapěndang i kitẹ mapulu i sire ene su sidang. (1 Kor. 12:22, 25) Contone, Dannykarl něngal᷊ing bọu Filipina sarang Jepang. Ual᷊ingu i sie taumata raghi, hapị su pělahal᷊ẹ̌kang dal᷊akị měkoạ si sie. Bọu ene i sie diměnta su pěngangibadang Sahiding Yehuwa. Dannykarl nẹ̌bera, ”Kal᷊awọkange simongo sene tau Jepang, katewe i sire mahimumu někoạ si siạ kere hapị i sire.” Kapiang i sire nakakoạ si sie nědal᷊ahapị dingangi Yehuwa. Samurine i Dannykarl nisahani, kụ orasẹ̌ ini i sie nakoạ penatua. Penatua wal᷊inẹ mal᷊uasẹ̌ ual᷊ingu i Dannykarl dingangu kawinge Jennifer, nakoạ bageang bọu sidang. Penatua ene lai nẹ̌bera, ”I rẹ̌dua perintis, biahi rẹ̌dua sederhana, kụ nakoạ tatěnoěng soal u mědeạ kal᷊imona Kararatuang.”​—Luk. 12:31.

9, 10. Gělịko contoh al᷊amatẹ̌ kaěbạkeng mạeng i kitẹ matal᷊ěntụ su tempong měnginjilẹ̌.

⁹ I kitẹ piạ tempo měkoạ ”mapia su kěbị taumata” su tempong i kitẹ mẹ̌bawa habaru Kararatuang. (Gal. 6:10) Lawọ Sahiding Yehuwa matal᷊ěntụ su tau raghị dingangu mẹ̌tawakal᷊i měngěndung bawerang i sire. (1 Kor. 9:23) Ene makarěntang lawọ al᷊amatẹ̌. Contone, sěngkatau perintis su Australia, arenge Tiffany něngěndung werang Swahili tadeạu botonge mẹ̌tul᷊ung sidang werang Swahili su Brisbane. Maning tawe gampang, i sie limembong mal᷊uasẹ̌. Tifany nẹ̌běke, ”Mạeng  i kau mapulu měnginjilẹ̌ limembong mal᷊uasẹ̌, tol᷊ẹe sidang bahasa-asing. Ene mẹ̌sul᷊ungu mẹ̌daral᷊eng katewe tawe harusẹ̌ měněntangu soa pẹ̌tatanakengu. I kau sarung makapěndang persaudaraan internasional dingangu makasilo kasasěmbaụ.”

¹⁰ Sěmbaụ keluarga su Jepang lai někoạ kerene. Sakiko, anạ wawine su keluarga ene nẹ̌bera, ”I kami hanesẹ̌ mẹ̌sombangu tau Brasil su tempong měnginjilẹ̌. Su tempong i kami něnodẹ ayatẹ̌ bọu Alkitapẹ̌ werang Portugis, kere Pělal᷊ahẹ 21:3, 4 arau Mazmurẹ̌ 37:10, 11, 29, i sire dụdaringihẹ̌ kụ pẹ̌sěnsul᷊ẹ tẹ̌tědọkangu ěllo mata.” Keluarga ene timal᷊ěntụ su tau raghi ene, kụ mapulu mẹ̌tul᷊ung si sire měngěndung Alkitapẹ̌. Hakị u ene i sire něngěndung werang Portugis. Samurine i sire timol᷊e něndarisị sidang werang Portugis. Pira taung bọu ene, i sire nẹ̌tul᷊ung lawọ tau raghị nakoạ ělang i Yehuwa. Sakiko nẹ̌běke, ”I kami harusẹ̌ mẹ̌tawakal᷊i měngěndung werang Portugis, katewe al᷊amate mal᷊awọ-l᷊awọ. I kami sěbạe mẹ̌tarimakasẹ si Yehuwa.”​—Basa Munara’m Manga Rarolohang 10:34, 35.

11, 12. (a) Kawe nụe i kitẹ harusẹ̌ piạ alasang nihino gunang měpakẹ pěbawiahẹ̌ buhu? (b) Apa makatul᷊ung si kitẹ tadeạu tatapẹ̌ piạ kasasanạ u naung?

¹¹ Alasang i kitẹ měpakẹ pěbawiahẹ̌ buhu, harusẹ̌be gunang mẹ̌dalo si Yehuwa bal᷊inẹ tadeạu daloěngu taumata wal᷊inẹ. Pẹ̌tahěndung, malaekatẹ̌ masukụ lai naobotẹ̌ kụ nẹ̌dosa. (Pěmanda lai Yehezkiel 28:17.) I kitẹ tawe nasukụ, hakị u ene tawe gampang mẹ̌těngkarau bọu kal᷊aobotẹ̌. Katewe i kitẹ botonge měpakẹ kasasanạ u naung. Apa makatul᷊ung si kitẹ měkoạ ene?

¹² Sěmbaụ cara makatul᷊ung si kitẹ tadeạu piạ kasasanạ u naung ute mẹ̌basa Hengetang u Mawu ěllo-ěllo dingangu mẹ̌tiněna apa niwasa. (Pang. 17:18-20) I kitẹ lai harusẹ̌ mẹ̌tiněna apa nitěntirong i Yesus si kitẹ dingangu mẹ̌těno kasasanạ u naunge. (Mat. 20:28) Yesus masanạ naunge sarang i sie mapulu měnguhasẹ̌ laedu manga rasule. (Yoh. 13:12-17) Hal᷊ẹ̌ bal᷊inẹ botonge koateng i kitẹ ute mẹ̌doa mẹ̌dorong rohkẹ̌ masusi bọu Yehuwa. Rohkẹ̌’E makatul᷊ung si kitẹ lumawang pěndang limembong mapaelẹ̌ bọu taumata wal᷊inẹ.​—Gal. 6:3, 4; Flp. 2:3.

13. Apa al᷊amate mạeng i kitẹ masanạ naung?

 ¹³ Basa Baweran Salomo 22:4. Yehuwa nẹ̌dorong si kitẹ pakasanạ naung. Kasasanạ u naung makarěntang lawọ al᷊amatẹ̌. Mạeng i kitẹ masanạ naung, sidang sarung mararame dingangu masěmbaụ. Yehuwa lai sarung měgělị kakěndag’E masatia si kitẹ. Rasul Paulus nẹ̌bera, ’I kamene manga anạu sěmbaụ harusẹ̌ mẹ̌těngkasanạ u watangeng. Batụu Mawu Ruata rụdokạ taumata mal᷊aobotẹ̌, dingangu kụkěndagu taumata naunge masanạ.’​—1 Ptr. 5:5.

14. I sai nakoạ tatěnoěng kapaelange měnodẹ kasasanạ u naung dingangu kasasabarẹ̌?

¹⁴ Orasẹ̌ ini, mạeng taumata piạ kasasikome naung dingangu kasasabarẹ̌, taumata wal᷊inẹ mẹ̌pikirẹ̌ i sie lome. Katewe ene nẹ̌sal᷊a. Manga sipatẹ̌ mal᷊ěnggihẹ̌ ene asal᷊e bọu Yehuwa, Měngangawasa alam semesta. I Sie tatěnoěng kapaelange soal u kasasikome naung dingangu kasasabarẹ̌. (2 Ptr. 3:9) Contone, kěnang pẹ̌tiněna kasasabari Yehuwa su tempong i Sie simimbahẹ̌ si Abraham dingangi Lot bọu malaekatẹ̌. (Pěnd. 18:22-33; 19:18-21) Kụ pẹ̌tiněna lai kasasabari Yehuwa su tau Israel, maning nal᷊iu bọu 1.500 su taunge i sire tawe tumatuhụ si Sie.​—Yeh. 33:11.

15. Apa katěnoěng i kitẹ bọu Yesus soal u kasasikome naung dingangu kasasabarẹ̌?

¹⁵ Yesus ”masikome” naunge. (Mat. 11:29) I sie sěbạe masabarẹ̌ tumatěngo karal᷊omeng manga murite. Su tempong su dunia, taumata měmẹ̌morotesẹ̌ dingangu měnẹ̌nokẹ si Yesus. Katewe sarang papatene i sie masabarẹ̌ dingangu masikome naunge. Su tempong Yesus natědụ-tědụ su kalu pěnggantongang, i sie nẹ̌dorong si Amange tadeạu měgělị ampung su taumata apang němate si sie. I sie nẹ̌bera, ”U i sire wěga wue apa kẹ̌koateng i sire.” (Luk. 23:34) Maning sěbạe nasigěsạ, i Yesus tatapẹ̌ masabarẹ̌ dingangu masikome naunge.​—Basa 1 Petrus 2:21-23.

16. Kerea i kitẹ měnodẹ kasasabarẹ̌ dingangu kasasikome naung?

¹⁶ Paulus naul᷊ị sěmbaụ cara i kitẹ měnodẹ kasasikome naung dingangu kasasabarẹ̌ su tempong i sie něbera, ”I kamene harusẹ̌ mẹ̌sasabarẹ̌ sěmbaụ dingangu wal᷊ine, dingangu mẹ̌gaghěllị u ampung kereu piạ u měndesọ tunenaung su wal᷊ine. Mawu e mal᷊uasẹ̌ měngampung si kamene, kụ i kamene mal᷊aing hinom mẹ̌pẹ̌papangampung sěmbaụ dingangu wal᷊ine.” (Kol. 3:13) Tadeạu botonge měgělị ampung, i kitẹ harusẹ̌ masabarẹ̌ dingangu masikome naung. Sipatẹ̌ ene makakoạ dingangu makariagạ kasasěmbaụ su sidang.

17. Kawe nụe kasasabarẹ̌ dingangu kasasikome naung ene penting?

¹⁷ Yehuwa nẹ̌dorong si kitẹ masikome naung dingangu masabarẹ̌ su tau wal᷊inẹ. Manga sipatẹ̌ ene penting mạeng i kitẹ mapulu měbiahẹ̌ su dunia wuhu. (Mat. 5:5; Yak. 1:21) Mạeng masabarẹ̌ dingangu masikome naung, i kitẹ měngadatẹ̌ si Yehuwa dingangu mẹ̌tul᷊ung tau wal᷊inẹ měkoạ hal᷊ẹ̌ mẹ̌sul᷊ung.​—Gal. 6:1; 2 Tim. 2:24, 25.

18. Kerea kakěndagẹ̌ piạ kal᷊ahěmpụkange dingangu tawe měmamile ghati?

¹⁸ Kěbị sipatẹ̌ seng niěndungang i kitẹ kanini, piạ sěmpụe dingangu kakěndagẹ̌. Contone, Yakobus bọu něgělị sasasa su anạu sěmbaụ e ual᷊ingu i sire limembong měngadatẹ̌ taumata kalạ sul᷊ungu taumata masusah. I sie nělahẹ kakanoạ kerene nẹ̌tatěntang dingangu parentang Mawu ”kěndagu sěndinganengu taumata e kerẹewe lai kuměndagu watangengu”. I sie lai naul᷊ị, ”Kereu i kamene kawe mạmile ghati ute, i kamene kai měmpědẹ̌dosa.” (Yak. 2:8, 9) Mạeng i kitẹ makěndagẹ̌ su taumata, i kitẹ tawe berprasangka ual᷊ingu sikol᷊ah, ras, arau status sosial. Tawe mariadi mạeng kětạeng mẹ̌pěndang i kitẹ tawe měmile ghati. Tawe měmile ghati ene harusẹ̌ makoạ bageang bọu sipati kitẹ.

19. Kawe nụe penting měnodẹ kakěndagẹ̌?

¹⁹ Kakěndagẹ̌ ene lai ’makědang dingangu mapia naung’ lai ”tawẹ obote”. (1 Kor. 13:4) I kitẹ harusẹ̌ masabarẹ̌, mapia naung, lai masanạ naung tadeạu botonge měmahiạ habarẹ̌ mapia su taumata wal᷊inẹ. (Mat. 28:19) Manga sipatẹ̌ ene lai makatul᷊ung si kitẹ mědal᷊ahapị mapia dingangu kěbị anạu sěmbaụ su sidang. Mạeng kěbị měnodẹ kakěndagẹ̌ kerene, sidang sarung masěmbaụ dingangu makawantugẹ̌ si Yehuwa. Tau wal᷊inẹ sarung makasilo, kụ i sire mapulu měngěndung Alkitapẹ̌. Hakị u ene seng nihino apa nilahẹ u Alkitapẹ̌ soal u pěbawiahẹ̌ buhu nitutu dingangu wawera ini, ”Su wowon tamai ene, kěbị e ute: i kamene harusẹ̌be mẹ̌kakakěndagẹ̌ u kakěndagẹ̌ e mạpakasěmbaụ i kamene makoạ masukụ.”​—Kol. 3:14.

20. (a) Apa hinong kiwal᷊ong su watangeng i kitẹ? Kawe nụe? (b) Apa lẹ̌ampal᷊eng i kitẹ su ěllo mahi?

²⁰ I kitẹ kěbị harusẹ̌ mẹ̌kiwal᷊o su watangeng, ’Pẹ̌bawal᷊ui apa bědang harusẹ̌ koatengku gunang měnděmẹ pěbawiahẹ̌ těbe dingangu turusẹ̌ měkoạ ene?’ I kitẹ harusẹ̌ mẹ̌doa si Yehuwa gunang mẹ̌dorong tul᷊ung. I kitẹ lai mẹ̌tawakal᷊i měmal᷊ui tiněna arau kakanoạ nẹ̌sal᷊a tadeạu wotonge ”makahombang Kararatuang u Mawu”. (Gal. 5:19-21, Terjemahan Dunia Baru) I kitẹ lai harusẹ̌ mẹ̌kiwal᷊o, ’Apa iạ turusẹ̌ měmẹ̌mal᷊ui tiněnaku tadeạu makal᷊uasẹ̌ si Yehuwa?’ (Ef. 4:23, 24) I kitẹ tawe nasukụ, hakị u ene i kitẹ harusẹ̌ turusẹ̌ mẹ̌tawakal᷊i měpakẹ pěbawiahẹ̌ buhu. Ini tawẹ apa pěngěnsuenge. Sěbạe mal᷊ěnggihẹ̌ pěbawiahi kitẹ su tempong kěbị taumata měpakẹ pěbawiahẹ̌ buhu dingangu mẹ̌těno sipati Yehuwa masukụ!