Kawe nụe tawe wotonge mẹ̌taho haghing publikasi Sahiding Yehuwa su situs web bal᷊inẹ arau su media sosial?

Pirang katau nẹ̌pěndang ual᷊ingu publikasing i kitẹ tawe wẹ̌bal᷊ukang, i sire botonge mẹ̌taho arau měngkopi ene su situs web bal᷊inẹ arau su media sosial. Katewe ene makarěntang masalah serius kụ lai tawe nẹ̌tatahino dingangu Syarat Penggunaan * (pěmanda catatan kaki) gunang situs web i kitẹ. Syarat ene sěbạe mal᷊ahẹ naul᷊ị tawe wotonge ”memposting gambarẹ̌, publikasi elektronik, merek dagang, musikẹ̌, foto, video, arau artikel bọu situs web ini su Internet (situs web, situs file-sharing, situs video-sharing, arau jejaring sosial)”. Kawe nụe harusẹ̌ piạ atorang kere ini?

Kěbị bahan su situs web i kitẹ piạ hak ciptane, ene mangal᷊ene kěbị ene dẹ̌diagatengu hukung. Ini penting gunang měndiagạ tadeạu tawe mẹ̌sal᷊apakẹ. Taumata murtad dingangu taumata wal᷊inẹ apang mapulu měnahaghe hal᷊ẹ̌ i kitẹ, pẹ̌sěnsul᷊ẹ mětẹ̌taho publikasing i kitẹ su situs web i sire tadeạu Sahiding Yehuwa dingangu taumata wal᷊inẹ měmanda situs ene. Katewe, su situs ene, i sire lai mẹ̌taho bahan seng nikoạ gunang makakoạ taumata ragu. (Mz. 26:4; Amsal 22:5) Sěnggạe wue něpakẹ bahan arau logo jw.org su iklan, su aplikasi mobile, dingangu su barang bẹ̌bal᷊ukang i sire. Katewe, ual᷊ingu bahan dingangu logo niriagạ u hukung, i kitẹ botonge měnuntụ si sire su pengadilan. (Amsal 27:12) Katewe, pengadilan tawe makatul᷊ung si kitẹ mạeng i kitẹ měmala taumata wal᷊inẹ, arau lai anạu sěmbau, mẹ̌taho publikasing i kitẹ su situs web bal᷊inẹ arau měpakẹ logo jw.org gunang mẹ̌bal᷊u barang.

Mạeng i kitẹ měn-download publikasing i kitẹ bal᷊inẹ bọu situs jw.org, ene makasilakạ. Yehuwa něgělị kaěng rohani si kitẹ kětạeng bọu ”ělang masatia dingangu matahuěna”. (Mat. 24:45) ”Ělang” ene kětạeng měpẹ̌pakẹ piram baụ situs resmi gunang měnadia kaěng rohani—www.pr418.com, tv.pr418.com, dingangu wol.pr418.com. Kụ si kitẹ kětạeng piạ tatělu aplikasi resmi gunang perangkat elektronik, ene kai JW Language^®, JW Library^®, dingangu JW Library Sign Language^®. Su manga situs dingangu aplikasi ene, tawẹ apa iklan arau barang bal᷊inẹ kụ asal᷊e bọu duniang Setang. Katewe, mạeng i kitẹ měngal᷊ạ publikasi bọu situs web arau aplikasi wal᷊inẹ, ene makasilakạ ual᷊ingu ěndịu ene seng niwal᷊ui.​—Mz. 18:26; 19:8.

Bọu ene lai, mạeng i kitẹ mẹ̌taho bahan i kitẹ su situs web, kụ sene taumata botonge měmohẹ komentar, ene sarung makaghělị kesempatan su taumata murtad dingangu taumata wal᷊inẹ gunang měmorotesẹ̌ organisasing Yehuwa. Piạ anạu sěmbaụ seng nẹ̌darendehẹ̌ dingangu taumata kerene, kụ ene tawe nakawantugẹ̌ si Yehuwa. Bisara kere tamai ene su Internet, bal᷊inẹ cara nẹ̌tatahino gunang měnul᷊idẹ̌ tiněnang taumata dingangu mẹ̌tul᷊ung si sie makahěngang těntiro nihino. (1 Tim. 6:3-5; 2 Tim. 2:23-25) Bọu ene lai, piạ pirang katau seng někoạ situs web dingangu akun media sosial, kụ kakělaěng ene asal᷊e bọu organisasi arau bọu anggota Badan Pimpinan. Katewe ene kai palsu. Tawẹ apa anggota Badan Pimpinan piạ halaman Web i sire hala arau akun su media sosial.

Su tempong i kitẹ měngahạ taumata sarang jw.org, i kitẹ němahiạ ”habarẹ̌ mapia” si sire. (Mat. 24:14) Situs web dingangu aplikasing i kitẹ sauneng kakạpaele. I kitẹ mapulu kěbị taumata makaěbạ gunane bọu ene. Hakị u ene i kitẹ botonge měndoho pulikasi bọu e-mail arau měndoho link sarang situs web i kitẹ si sire. Mạeng měpakẹ cara ini, i kitẹ měngahạ taumata sarang dal᷊eng nipakẹ i Yehuwa gunang měnadia kaěng rohani, ene kai ”ělang masatia dingangu matahuěna”.