1. Apa buktine Yehuwa maělugẹ̌?

HUMOTONG Yehuwa kětạeng měbẹ̌biahẹ̌ sẹ̌sane. Bọu ene, i Sie někoạ diadikang mapande su sorga dingangu dunia, kụ i Sie něgělị pěbawiahẹ̌ si sire. Yehuwa kai ”Mawu mal᷊uasẹ̌”, kụ i Sie mapulu měgělị manga hal᷊ẹ̌ mapaelẹ̌. (1 Tim. 1:11; Yak. 1:17) Yehuwa mapulu i kitẹ mal᷊uasẹ̌, hakị u ene i Sie něněntiro si kitẹ tadeạu maělugẹ̌.​—Rm. 1:20.

2, 3. (a) Kawe nụe i kitẹ mal᷊uasẹ̌ mạeng maělugẹ̌? (b) Apa sarung ěndungang i kitẹ?

² Yehuwa něndiadi taumata měpapangawẹ i Sie. (Kej. 1:27) Ini mangal᷊ene, i kitẹ piạ sipatẹ̌ kere si Yehuwa. Tadeạu i kitẹ mal᷊uasẹ̌ dingangu al᷊amateng i Yehuwa, i kitẹ harusẹ̌ mẹ̌těno si Sie. I kitẹ harusẹ̌ mapandung su taumata wal᷊inẹ dingangu makoạ taumata maělugẹ̌. (Flp. 2:3, 4; Yak. 1:5) Kawe nụe? Ual᷊ingu seng kerene Yehuwa něndiadi si kitẹ. Maning tawe nasukụ, i kitẹ botonge mẹ̌těno si Yehuwa kụ měnodẹ kal᷊aělugẹ̌.

 ³ I kitẹ sarung měngěndung piram baụ těntiro bọu Alkitapẹ̌ soal u maělugẹ̌. I kitẹ sarung měngěndung kawe nụe i Yehuwa mal᷊uasẹ̌ mạeng i kitẹ maělugẹ̌. I kitẹ lai sarung měngěndung kawe nụe i kitẹ harusẹ̌ maělugẹ̌ tadeạu botonge měkoạ hal᷊ẹ̌ nighělị i Yehuwa dingangu kawe nụe i kitẹ mal᷊uasẹ̌ mạeng maělugẹ̌. Kitẹ lai sarung měngěndung kawe nụe i kitẹ harusẹ̌ turusẹ̌ maělugẹ̌.

4, 5. Kerea i Yehuwa dingangi Yesus něnodẹ kal᷊aělugẹ̌, kụ kerea i kitẹ mẹ̌těno si sire?

⁴ Yehuwa mapulu i kitẹ mẹ̌těno si Sie, hakị u ene i Sie mal᷊uasẹ̌ mạeng i kitẹ maělugẹ̌. (Ef. 5:1) Yehuwa lai mapulu i kitẹ mal᷊uasẹ̌. Buktine, i Sie něndiadi si kitẹ dingangu cara makạlaherang. I Sie lai něndiadi dunia masadadạ dingangu haghing dal᷊ohone tadeạu i kitẹ mal᷊uasẹ̌. (Mz. 104:24; 139:13-16) Hakị u ene, mạeng i kitẹ mẹ̌tawakal᷊i měkoạ taumata wal᷊inẹ mal᷊uasẹ̌, ene něnodẹ i kitẹ měngadatẹ̌ si Yehuwa.

⁵ I kitẹ lai mẹ̌těno si Yesus, ual᷊ingu i sie tatěnoěng kapaelange soal u kerea taumata botonge maělugẹ̌. I sie naul᷊ị, ”Ahusu taumata diměnta, bal᷊inẹ gunang makitangkiang, katewe kai mẹ̌tangkiang kụ měgělị biahe makoạ tatěbusẹ̌ gunang lawọ taumata.” (Mat. 20:28) Rasul Paulus němahansang tau Sahani, ”Pẹ̌tawakal᷊ịe piạ tiněna dingangu sikap kere i Kristus Yesus . . . I sie něněntang kěbị apang piạ si sie kụ nakoạ kere sěngkatau ělang.” (Flp. 2:5, 7) Hakị u ene, pẹ̌kiwal᷊o su watangengu, ’Apa iạ botonge limembong mẹ̌tawakal᷊i mẹ̌těno si Yesus?’​—Basa 1 Petrus 2:21.

6. Bọu běke soal u tau Samaria, Yesus něněntiro apa si kitẹ? (Pěmanda gambarẹ̌ humotong su pěngangěndungang ini.)

⁶ Yehuwa mal᷊uasẹ̌ mạeng i kitẹ mẹ̌těno si Sie dingangu mẹ̌těno si Yesus. I kitẹ mẹ̌těno si rẹ̌dua su tempong i kitẹ mapadul᷊i su taumata wal᷊inẹ dingangu mẹ̌tawakal᷊i mẹ̌tul᷊ung si sire. Yesus něnodẹ ene penting su tempong nẹ̌běke soal u tau Samaria matal᷊ěntụ. (Basa Lukas 10:29-37.) I sie něněntiro, tumatol᷊ene harusẹ̌ mẹ̌tul᷊ung taumata wal᷊inẹ, tawẹ soale i sai i sire dingangu bọu apa asal᷊i sire. Apa i kau nakatahěndung kawe nụe i Yesus nělahẹ běke ene? Ual᷊ingu sěngkatau Yahudi nẹ̌kiwal᷊o si sie, ”Sěběnarẹ̌e i sai sěndinganengku?” Sasimbahi Yesus něněntiro, kere tau Samaria, i kitẹ lai harusẹ̌ maělugẹ̌ tadeạu makal᷊uasẹ̌ si Yehuwa.

7. Kerea měnodẹ i kitẹ mangimang cara i Yehuwa měkoạ sěmbaụ hal᷊ẹ̌ ene kai kapaelange? Lahẹko.

⁷ Alasang bal᷊inẹ kawe nụe harusẹ̌ maělugẹ̌ ene nal᷊ahẹ bọu apa nariadi su taman Eden. Setang naul᷊ị i Adam dingangi Hawa sarung mal᷊uasẹ̌ mạeng i sire tawe tumuhụ si Yehuwa dingangu kětạeng mẹ̌pandung watangeng i sire hala. I Hawa kětạeng mẹ̌pẹ̌pandung watangenge kụ mapulu makoạ kere Mawu. I Adam lai kerene kụ i sie limembong mapulu makal᷊uasẹ̌ si Hawa sul᷊ungu makal᷊uasẹ̌ Mawu. (Kej. 3:4-6) Tětal᷊e ute silakạ. Nal᷊ahẹ, tawẹ apa sarang sěngkatau mal᷊uasẹ̌ mạeng kětạeng mẹ̌pandung watangeng hala. Katewe, mạeng i kitẹ tawe kětạeng mẹ̌pandung watangeng hala dingangu maělugẹ̌, ene něnodẹ i kitẹ mangimang cara i Yehuwa měkoạ sěmbaụ hal᷊ẹ̌ ene kai kapaelange.

8. Kawe nụe i Adam dingangi Hawa harusẹ̌ mẹ̌tiněna soal u taumata wal᷊inẹ?

⁸ Maning humotong kětạeng i Adam dingangi Hawa mětẹ̌tanạ su taman Eden, i rẹ̌dua lai harusẹ̌ mẹ̌tiněna soal u taumata wal᷊inẹ. Kawe nụe? Ual᷊ingu Yehuwa něngoro si rẹ̌dua pěmenẹ dunia dingangu manga anạ i sire kụ pěkoạ dunia ini firdaus. (Kej. 1:28) Sěběnarẹ̌e i Adam dingangi Hawa harusẹ̌ mapulu manga anạ i sire mal᷊uasẹ̌, kere i Yehuwa mapulu kěbị taumata mal᷊uasẹ̌. I sire sarung měhal᷊ẹ̌ sěngkasio gunang měkoạ dunia ini firdaus. Ene kai proyek gěguwạ!

9. Kawe nụe taumata sarung mal᷊uasẹ̌ su tempong měkoạ dunia ini firdaus?

⁹ Taumata masukụ lai harusẹ̌ měhal᷊ẹ̌ sěngkasio dingangi Yehuwa tadeạu botonge měkoạ dunia firdaus dingangu mapakasěhụ kapulung Mawu. Mạeng i sire měkoạ ene, i sire sarung sumuẹ̌ su ěllong pěngangirul᷊eng Mawu. (Ibr. 4:11) Hal᷊ẹ̌ ene tantu sěbạe makal᷊uasẹ̌! Yehuwa sarung měgělị lawọ al᷊amatẹ̌ si sire mạeng i sire mapadul᷊i su taumata wal᷊inẹ.

10, 11. Apa makatul᷊ung si kitẹ měnginjilẹ̌ dingangu měkoạ muritẹ̌?

¹⁰ Orasẹ̌ ini, Yehuwa něgělị tugasẹ̌ istimewa si kitẹ. I Sie mapulu i kitẹ měnginjilẹ̌ dingangu měkoạ muritẹ̌. Gunang měkoạ hal᷊ẹ̌ ene, i kitẹ harusẹ̌ mapadul᷊i su taumata wal᷊inẹ. Sěběnarẹ̌e, i kitẹ botonge tatapẹ̌ měkoạ tugasẹ̌ ene mạeng piạ alasang nihino, ene kai kuměndagẹ̌ si Yehuwa dingangu taumata wal᷊inẹ.

 ¹¹ I Paulus naul᷊ị, i sie dingangu tau Sahani wal᷊inẹ su abad humotong kai ”Hapị sěngkapěhal᷊ẹ̌ dingangu Mawu” ual᷊ingu i sire něnginjilẹ̌ dingangu něněntiro tatěntiro nihino su taumata. (1 Kor. 3:6, 9) Orasẹ̌ ini, mạeng i kitẹ maělugẹ̌ měgělị tempo, katatoghasẹ̌, dingangu arětạ gunang hal᷊ẹ̌ měnginjilẹ̌, i kitẹ lai botonge makoạ ”Hapị sěngkapěhal᷊ẹ̌ dingangu Mawu”. Ini kai kehormatan gěguwạ!

12, 13. Apa al᷊amate mạeng i kitẹ měkoạ muritẹ̌?

¹² Mạeng i kitẹ maělugẹ̌ měgělị tempo dingangu katatoghasi kitẹ gunang měnginjilẹ̌ lai měněntiro, i kitẹ sarung mal᷊uasẹ̌. Ene niul᷊ịu anạu sěmbaụ apang seng něněntiro Alkitapẹ̌. I kitẹ sěbạe mal᷊uasẹ̌ nakasilo měngangěndung Alkitapẹ̌ nakaěna těntirong Alkitapẹ̌, botonge piạ pangangimang tutune, němal᷊ui pěbawiahe, kụ něnětạ nẹ̌běke su taumata wal᷊inẹ apa seng niěndungange. Yesus lai sěbạe mal᷊uasẹ̌ su tempong 70 měnganginjilẹ̌ seng nirarolohe ”nẹ̌bal᷊ị dingangu karal᷊uasẹ̌” ual᷊ingu nakaěbạ pengalaman mapaelẹ̌.​—Luk. 10:17-21.

¹³ Anạu sěmbaụ i kitẹ su patikụ dunia lai mal᷊uasẹ̌ su tempong nakasilo těntirong Alkitapẹ̌ nakatul᷊ung taumata nakaěbạ pěbawiahẹ̌ limembong mapaelẹ̌. Contone, sěngkatau saudari mangudạ arenge Anna mapulu měkoạ limembong mal᷊awọ gunang Yehuwa. * (Pěmanda catatan kaki.) Hakị u ene i sie něngal᷊ing sarang sěmbaụ tampạ su Eropa Timur, ual᷊ingu penyiar sene kětạeng mahal᷊i. I sie němohẹ, ”Iạ sěbạe mal᷊uasẹ̌ ual᷊ingu sini mal᷊awọ taumata mapulu měngěndung Alkitapẹ̌. Iạ mal᷊uasẹ̌ něnginjilẹ̌ sini. Su tempong mapul᷊ẹ sarang bal᷊e, iạ seng tawẹ apa tempo gunang mẹ̌tiněna soal u masalaku hala. Iạ mětẹ̌tiněna soal u masalah dingangu kaghaghěnggang i sire apang měngẹ̌ngěndung Alkitapẹ̌ dingangku. Iạ mětẹ̌tiněna carane mẹ̌tul᷊ung dingangu měnoghasẹ̌ si sire. Kụ iạ sauneng mangimang ’limembong mal᷊uasẹ̌ měgělị sul᷊ungu měnarimạ’.”​—Kis. 20:35.

14. Kerea carane tadeạu i kau tatapẹ̌ mal᷊uasẹ̌ maning taumata wal᷊inẹ tawe rumaringihẹ̌?

¹⁴ Maning taumata tawe rumaringihẹ̌ si kitẹ su tempong měnginjilẹ̌, i kitẹ botonge mal᷊uasẹ̌ ual᷊ingu seng něgělị kesempatan si sire gunang dumaringihẹ̌ habarẹ̌ mapia. Yehuwa mapulu i kitẹ měkoạ hal᷊ẹ̌ mẹ̌sul᷊ung kere dẹ̌dorongang’E si Yehezkiel: ”I kau harusẹ̌ měhabarẹ̌ bawera-Ku si sire tawẹ soale daringihang arau tala.” (Yeh. 2:7; Yes. 43:10) Hakị u ene tawẹ soale i sire rumaringihẹ̌ arau tala, Yehuwa měngẹ̌ngarěga apa seng nikoạ i kitẹ. (Basa Ibrani 6:10.) Sěngkatau saudara naul᷊ị, ”I kami mẹ̌suang, měněbohẹ̌, dingangu mẹ̌doa tadeạu Yehuwa mapakatuwo kapulung taumata.”​—1 Kor. 3:6.

15. Apa i kitẹ kětạeng maělugẹ̌ mạeng piạ u měngẹ̌ngarěga si kitẹ? Lahẹko.

¹⁵ Yesus mapulu i kitẹ maělugẹ̌ ual᷊ingu  ene makakoạ si kitẹ mal᷊uasẹ̌. Su tempong i kitẹ maělugẹ̌, lawọ taumata sarung maělugẹ̌ lai. Hakị u ene i sie němahansang si kitẹ, ”Turusẹ̌e pěngonggọ, kụ i kamene sarung onggọtang. Taumata sarung mẹ̌taho su kawihu pakeangu sěngsupa mapia-pia, nipakasěghadẹ̌, nitada, dingangu sěbạe nipakapenẹ. Ual᷊ingu sasupa nipakẹ i kamene gunang taumata wal᷊inẹ sarung lai paketang gunang ipěnupa si kamene.” (Luk. 6:38) Tantu, su tempong i kau maělugẹ̌, tawe kěbị taumata sarung měngarěga ene. Katewe, maning i sire tawe měngarěga, tatapẹ̌e pakaělugẹ̌. Pangimangke sarung piạ hasilẹ̌ mapia mạeng i kau maělugẹ̌.

16. Si sai i kitẹ harusẹ̌ maělugẹ̌, kụ kawe nụe?

¹⁶ Taumata kahěngang-hěngang maělugẹ̌ tawe měngonggọ kětạeng gunang makaěbạ bawal᷊ise. Yesus naul᷊ị, ”Mạeng i kau měkoạ pesta, pěnotẹ̌e taumata masusah, piạ kurangu wadange, kempal᷊ẹ̌, dingangu wuta. I kau sarung mal᷊uasẹ̌ ual᷊ingu si sire tawẹ apa barang bal᷊inẹ gunang ipěmal᷊isẹ̌ si kau.” (Luk. 14:13, 14) Alkitapẹ̌ lai naul᷊ị, ”Taumata maělugẹ̌ sarung al᷊amateng” dingangu ”Kariangkamang i saing měpẹ̌padul᷊i taumata masusah.” (Amsal 22:9; Mz. 41:1) I kitẹ maělugẹ̌ ual᷊ingu i kitẹ kahěngang-hěngang mapulu mẹ̌tul᷊ung taumata wal᷊inẹ.

17. Apa wotonge gělikang i kitẹ tadeạu mal᷊uasẹ̌?

¹⁷ Su tempong i Paulus něngutip bawerang Yesus, ”limembong mal᷊uasẹ̌ měgělị sul᷊ungu měnarimạ”, i sie tawe nẹ̌bisara kětạeng soal u hal᷊ẹ̌ materi. I kitẹ lai botonge měnoghasẹ̌, měgělị sasasa bọu Alkitapẹ̌, dingangu mẹ̌tul᷊ung si sire. (Kis. 20:31-35) Bọu bawera dingangu kakanoạe, i Paulus něněntiro si kitẹ maělugẹ̌  měgělị tempo, katatoghasẹ̌, kakěndagẹ̌, dingangu mapadul᷊i su taumata wal᷊inẹ ene kai penting.

18. Apa niul᷊ịu manga peneliti soal u maělugẹ̌?

¹⁸ Manga peneliti apang něngěndung soal u kakanoạu taumata lai naul᷊ị, měgělị ene makakoạ taumata mal᷊uasẹ̌. Sěmbaụ artikel naul᷊ị taumata nakapěndang limembong mal᷊uasẹ̌ su apang bọu někoạ barang mapia su taumata wal᷊inẹ. Manga peneliti naul᷊ị su tempong i kitẹ mẹ̌tul᷊ung taumata wal᷊inẹ, i kitẹ nakapěndang pěbawiahi kitẹ piạ timonane. Hakị u ene, pirang katau ahli něgělị těgu gunang pěkoạ hal᷊ẹ̌ sukarela tadeạu limembong masehatẹ̌ dingangu mal᷊uasẹ̌. Katewe i kitẹ tawe huměkosẹ̌ nakaringihẹ̌ ene. Ual᷊ingu bọu Alkitapẹ̌, Měndariading i kitẹ, i Yehuwa, sěntiniạ maul᷊ị měngonggọ ene makakoạ si kitẹ mal᷊uasẹ̌.​—2 Tim. 3:16, 17.

19, 20. Kawe nụe i kau mapulu turusẹ̌ maělugẹ̌?

¹⁹ Mạeng lawọ taumata kětạeng měpẹ̌pandung watangeng i sire hala, i kitẹ masigěsạ měnodẹ kal᷊aělugẹ̌. Katewe Yesus něgělị laingatẹ̌ soal u darua tita kaguwạkenge; i kitẹ harusẹ̌ kuměndagẹ̌ si Yehuwa dingangu kaguwạu naung, pěbawiahẹ̌, tiněna, lai katatoghasẹ̌, kụ i kitẹ harusẹ̌ kuměndagẹ̌ sěndinganeng kere kuměndagẹ̌ watangeng i kitẹ hala. (Mrk. 12:28-31) Su pěngangěndungang ini, i kitẹ seng něngěndung taumata apang makěndagẹ̌ si Yehuwa mang mẹ̌těno si Sie. Yehuwa dingangi Yesus kai maělugẹ̌. I rẹ̌dua mapulu i kitẹ mẹ̌těno si rẹ̌dua, ual᷊ingu i rẹ̌dua masingkạ ene makakoạ si kitẹ mal᷊uasẹ̌. Mạeng i kitẹ maělugẹ̌ su Mawu dingangu taumata wal᷊inẹ, i kitẹ měngẹ̌ngadatẹ̌ si Yehuwa. Bọu ene lai, i kitẹ dingangu taumata wal᷊inẹ sarung makaěbạ gunane.

²⁰ I kau tantu seng nẹ̌tawakal᷊i maělugẹ̌ dingangu nẹ̌tul᷊ung taumata wal᷊inẹ, něngělembo lai su anạu sěmbaụ. (Gal. 6:10) Mạeng i kau turusẹ̌ měkoạ ene, taumata wal᷊inẹ sarung měngarěga dingangu kuměndagẹ̌ si kau, kụ i kau sarung mal᷊uasẹ̌. Alkitapẹ̌ naul᷊ị, ”Taumata maělugẹ̌ sarung mal᷊unsemahẹ̌, kụ i saing maělugẹ̌ měgělị inumang su taumata wal᷊inẹ, i sie lai sarung gělịkangu inumang.” (Amsal 11:25) Su pěbawiahẹ̌ dingangu pelayanan, piạ lawọ cara měnodẹ kapiang naung, kal᷊aělugẹ̌, dingangu tawe kětạeng mẹ̌pandung watangeng hala. I kitẹ sarung měngěndung piram baụ cara wal᷊inẹ su pěngangěndungang tuhụe.