1, 2. (a) Kawe nụe perbudakan dingangu kawawebasẹ̌ biasa bẹ̌bisarang su tempong i rasul Paulus? (b) I sai Simbul᷊u kawawebasẹ̌ tutune niul᷊ị i Paulus?

TAU Sahani su abad humotong měbẹ̌biahẹ̌ su tempong pěmamarentang Romawi. Su tempo ene kal᷊awokange taumata mal᷊uasẹ̌ su hukung, atorang soal u kal᷊aadilẹ̌, dingangu kawawebasi sire. Su sěngkatempo, ěndịu 1 bọu 3 taumata su pěmamarentang Romawi ene kai ělang. Kụ kesuksesan pěmamarentang Romawi ene kai hasilu hal᷊ẹ̌ u manga ělang. Nal᷊ahẹ, perbudakan dingangu kawawebasẹ̌ ene biasa bẹ̌bisarang su tal᷊oarang taumata, kerene lai su tau Sahani.

² Rasul Paulus hanesẹ̌ měmohẹ soal u kawawebasẹ̌. Katewe, timonane bal᷊inẹbe mapakailang masalah su dunia, kere kẹ̌kapuluangu taumata su tempo ene. Sěběnarẹ̌e i Paulus dingangu anạu sěmbaụe mětẹ̌tawakal᷊i měněntiro habarẹ̌ mapia bọu Kararatuang u Mawu su taumata. I sire lai mẹ̌tul᷊ung taumata makaěna tatěbusi Yesus Kristus kai  sěbạe maarěga. I Paulus naul᷊ị su anạu sěmbaụe i sai Simbul᷊u kawawebasẹ̌ tutune. I sie naul᷊ị, ”Su apang rohkẹ̌ [i Yehuwa] e ene, ute sene mal᷊aing piạ karal᷊iwirẹ̌ e, [arau, kawawebasẹ̌].”​—2 Kor. 3:17.

3, 4. (a) Apa nilahẹ i Paulus su manga ayatẹ̌ sebelum 2 Korintus 3:17? (b) Apa harusẹ̌ koateng i kitẹ tadeạu makaěbạ kawawebasẹ̌ bọu i Yehuwa?

³ Su surate karuane gunang tau Korintus, i Paulus nẹ̌běke apa nariadi si Musa su tempong i sie limintụ bọu Wul᷊udu Sinai su apang i sie bọu nẹ̌bisara dingangu malaekati Yehuwa. Gatine sụsěnang matualagẹ̌! Su tempong tau Israel nakasilo si Musa, i sire natakụ, hakị u ene gatine nitakạe dingangu tatimbuhung. (Sas. 34:29, 30, 33; 2 Kor. 3:7, 13) I Paulus nělahẹ, ”Kai kereu pẹ̌sěngkatau e ruměnta mẹ̌těngon Mawu e, tatimbuhung ene mal᷊aing lekesang bọu ghatin taumata ene.” (2 Kor. 3:16) Apa mangal᷊ene bawerang i Paulus?

⁴ Su pěngangěndungang misa tamai, i kitẹ něngěndung i Yehuwa kai měndariadi kěbị haghi, kụ kětạeng i Sie piạ kawawebasẹ̌ tawẹ kětạkenge. Hakị u ene masuẹ̌ su akal᷊ẹ̌ mạeng su apang Yehuwa ene dingangu ”su apang Rohkẹ̌ u Ruata e ene” mang piạ kawawebasẹ̌. Katewe, i Paulus naul᷊ị, mạeng i kitẹ mapulu makaěbạ kawawebasẹ̌ kerene, i kitẹ harusẹ̌ mẹ̌bal᷊ị si Yehuwa. Ini mangal᷊ene i kitẹ harusẹ̌ mědal᷊ahapị mapia dingang’E. Tau Israel su kěhu l᷊inggi měmanda haghing hal᷊ẹ̌ bọu tiněnang i sire bal᷊inẹ bọu tiněnang i Yehuwa. Naung dingangu tiněnang i sire seng natutu. I sire mapulu měpakẹ kawawebasi sire gunang mapakawatụ kapulung i sire hala.​—Ibr. 3:8-10.

5. (a) Kawawebasẹ̌ kerea nighělị u rohkẹ̌ i Yehuwa? (b) Kerea i kitẹ masingkạ taumata apang nakoạ ělang arau apang su selẹ̌ botonge makaěbạ kawawebasẹ̌ nighělị i Yehuwa? (c) Kakiwal᷊o apa sarung simbaheng i kitẹ?

⁵ Kawawebasẹ̌ nighělị u rohkẹ̌ i Yehuwa ene limembong mapaelẹ̌ bọu kawawebasẹ̌ u sěngkatau ělang. Rohkẹ̌ ene nakaghělị kawawebasẹ̌ limembong gěguwạ sul᷊ungu kawawebasẹ̌ botonge ikaghělị u taumata. Ene makawebasẹ̌ si kitẹ bọu perbudakan dosa dingangu papate, lai bọu agama palsu dingangu tradisine. (Rm. 6:23; 8:2) Kawawebasẹ̌ ene sěbạe makạlaherang! Sarang taumata nakoạ ělang arau su ral᷊ungu selẹ̌ lai botonge makaěbạ kawawebasẹ̌ kere ini. (Pěnd. 39:20-23) Saudari Nancy Yuen dingangi Saudara Harold King taunge niselẹ̌ ual᷊ingu pangangimang i sire, katewe i sire nakaěbạ kawawebasẹ̌ kerene. I kau botonge mẹ̌biala pengalaman i sire su JW Broadcasting. (Pěmanda su WAWANCARA DAN PENGALAMAN > BERTEKUN MENGHADAPI KESULITAN.) Mahi i kitẹ měmanda darua kakiwal᷊o. Kerea i kitẹ botonge měnodẹ kawawebasi kitẹ kai sěbạe maarěga? Dingangu kerea tadeạu i kitẹ matahuěna měpakẹ kawawebasi kitẹ?

6. Kerea tau Israel tawe něngarěga kawawebasẹ̌ nighělị i Yehuwa si sire?

⁶ Su tempong nakatarimạ hadiah, i kitẹ tantu sěbạe makitarimakasẹ su tau něgělị ene. Katewe, tau Israel tawe měngẹ̌ngarěga kawawebasẹ̌ nighělị i Yehuwa si sire. Kětạeng pira wul᷊ang bọu Yehuwa napakawebasẹ̌ si sire bọu Misire, i sire něnětạ nẹ̌sungutẹ̌ soal u kaěng. I sire nẹ̌sungutẹ̌ soal u manna, kaěng nisadiang i Yehuwa. I sire lai mapulu mẹ̌bal᷊ị sarang Misire! Tumuhụ si sire kinạ, katimu, semangka, daong bawang, langsuna mahamụ, dingangu langsuna mawira limembong penting sul᷊ungu kawawebasẹ̌ nighělị i Yehuwa si sire gunang maněmbah si Sie. Hakị u ene, i Yehuwa sěbạe nẹ̌pědu si sire. (Pẹ̌t. 11:5, 6, 10; 14:3, 4) Ini nakoạ tatěntiro penting si kitẹ.

7. Kerea i Paulus něbiahẹ̌ tuhụ sasasane su 2 Korintus 6:1, kụ kerea i kitẹ botonge měkoạ kerene?

⁷ I Paulus něgělị laingatẹ̌ tadeạu tau Sahani měngarěga kawawebasẹ̌ seng nighělị i Yehuwa bọu Ahuse, i Yesus Kristus. (Basa 2 Korintus 6:1.) I Paulus nasigěsạ ual᷊ingu i sie nakoạ ělangu rosa dingangu papate. Katewe bọu ene, i sie naul᷊ị, ”Tarimakasẹ su Mawu Ruata! I Sie mapulu mangambang si siạ ual᷊ingu i Yesus Kristus.” Kawe nụe i sie naul᷊ị kerene? I Paulus naul᷊ị su anạu sěmbaụe, ”U torat’u Rohkẹ̌ u Ruata nakariading kitẹ měbẹ̌biahẹ̌ masěmbaụ dingang i Kristus Yesus, seng něliwirẹ̌ si siạ bọu toratẹ̌ kụ nakakoạ dosa ringangu papate.” (Rm. 7:24-26; 8:2) Kere i Paulus, i kitẹ tawe wotonge miwul᷊e i Yehuwa seng napakawebasẹ̌ si kitẹ bọu dosa dingangu papate. Tatěbusẹ̌ nakakoạ si kitẹ botonge mẹ̌tahamawu si Yehuwa dingangu hati nurani wurěsi, kụ ene nakal᷊uasẹ̌ si kitẹ.​—Mzm. 40:9.

8, 9. (a) Laingatẹ̌ apa nighělị i rasul Petrus soal u cara i kitẹ měpakẹ kawawebasi kitẹ? (b) Apa makakoạ taumata mẹ̌sal᷊apakẹ kawawebasi sire?

 ⁸ I kitẹ tawe wotonge kětạeng mẹ̌bera i kitẹ měngẹ̌ngarěga si Yehuwa, katewe i kitẹ lai harusẹ̌ maingatẹ̌ tadeạu tawe mẹ̌sal᷊apakẹ kawawebasẹ̌ ene. Contone, rasul Petrus něgělị laingatẹ̌ abe sarang kawawebasi kitẹ makoạ alasang gunang měkoạ barang nẹ̌sal᷊a. (Basa 1 Petrus 2:16.) Ini něgělị laingatẹ̌ si kitẹ soal u apa nariadi su tau Israel su kěhu l᷊inggi. Orasẹ̌ ini, laingatẹ̌ ene lai penting si kitẹ. Setang dingangu duniane měmẹ̌mintaugẹ̌ si kitẹ su soal u pakeang, kaěng, inumang, dingangu hiburan. I sire apang někoạ iklan pande měpakẹ taumata mal᷊al᷊ěnggihẹ̌, tadeạu i kitẹ mapulu měmělị barang sěběnarẹ̌e i kitẹ tawe perlu. Ini makakoạ i kitẹ gampang kaakal᷊engu dunia kụ mẹ̌sal᷊apakẹ kawawebasi kitẹ.

⁹ Sasasang i Petrus lai botonge mapakẹ su hal᷊ẹ̌ limembong serius su pěbawiahẹ̌, kere soal u sikol᷊ah arau hal᷊ẹ̌ pileng i kitẹ. Contone, mangangudạ orasẹ̌ ini lẹ̌orong pěngěndung pakapia tadeạu botonge tarimakeng su universitas mapaelẹ̌. Lawọ maul᷊ị mạeng mangangudạ mẹ̌sikol᷊ah marangẹ, i sire sarung makaěbạ hal᷊ẹ̌ mapaelẹ̌, gajine marangẹ, dingangu lẹ̌adateng. Aramanung piạ lai něnodẹ bukti i sire apang bọu nẹ̌kuliah nakaěbạ gaji limembong mal᷊awọ sul᷊ungu taumata apang nalulusẹ̌ bọu SMA. Mẹ̌sikol᷊ah marangẹ aramanung kakělaěng kapaelange su mangangudạ su tempong i sire harusẹ̌ měkoạ putusang su pěbawiahi sire. Katewe, apa harusẹ̌ tahěndungang i sire dingangu matimadi sire?

10. Apa harusẹ̌ tahěndungang i kitẹ su tempong měkoạ putusang soal u urusang i kitẹ hala?

¹⁰ Piạ u nẹ̌pěndang, ual᷊ingu ini urusang i sire hala, i sire bebasẹ̌ měmile apa kẹ̌kapuluang i sire, asal᷊ẹ̌ ene tawe makasahaghe hati nuraning i sire. Aramanung i sire nẹ̌tiněna, ”Kawe nụe kawawebasẹ̌ku harusẹ̌ sědingangu hati nuraning taumata wal᷊inẹ?” Maning i kitẹ bebasẹ̌ měkoạ putusang soal u sikol᷊ah arau hal᷊ẹ̌, i kitẹ harusẹ̌ mẹ̌tahěndung kawawebasi kitẹ piạ kětạkenge kụ putusang i kitẹ mang piạ tětal᷊e. Hakị u ene i Paulus naul᷊ị, ”Wal᷊inewe kěbị kapulung kitẹ e piạ gunane . . . wal᷊inewe kěbị kapulung kitẹ e makapětị pẹ̌bawiah’i kitẹ.” (1 Kor. 10:23) Hakị u ene, maning i kitẹ bebasẹ̌ měkoạ putusang soal u urusang i kitẹ hala, kapulung i kitẹ tawe wotonge makoạ limembong penting.

11. Kawe nụe Yehuwa napakawebasẹ̌ si kitẹ?

¹¹ Su tempong i Petrus něgělị laingatẹ̌ si kitẹ tadeạu tawe mẹ̌sal᷊apakẹ kawawebasẹ̌, i sie naul᷊ị cara kapaelange měpakẹ ene utẹ mạeng makoạ ”ěllangu Mawu”. Alasang kawe nụe Yehuwa něpakẹ si Yesus gunang mapakawebasẹ̌ si kitẹ bọu rosa dingangu papate, ute tadeạu i kitẹ botonge měpakẹ kaguwạu pěbawiahi kitẹ gunang měkoạ kapulu-Ne.

12. Apa kaěndungang i kitẹ bọu i Noakẹ̌ dingangu keluargane?

¹² Cara kapaelange měpakẹ kawawebasi kitẹ ute mạeng měpakẹ tempo dingangu katatoghasẹ̌ gunang měkoạ kapulung Yehuwa. Měkoạ ini makariagạ si kitẹ tadeạu tawe měmala kapulung dunia dingangu kapulung batangeng  makoạ limembong penting su pěbawiahi kitẹ. (Gal. 5:16) Kěnang pẹ̌tiněna apa nikoạ i Noakẹ̌ dingangu keluargane. I sire měbẹ̌biahẹ̌ su dunia napenẹu taumata měpẹ̌papate dingangu měkẹ̌koạ hal᷊ẹ̌ amoral. Katewe, i sire tawe timol᷊e cita-cita dingangu kakanoạu taumata su tempo ene. I sire němile tatapẹ̌ sibukẹ̌ měkoạ hal᷊ẹ̌ nighělị i Yehuwa si sire. I sire někoạ bahtera, něngomol᷊ẹ̌ kaěng gunang i sire dingangu manga binatang, kụ něhabarẹ̌ su taumata soal u Lěba Maihạ. ”I Noakẹ̌ e mẹ̌kẹ̌koạewe apang ilẹ̌orong Mawu Ruata e si sie”. (Pěnd. 6:22) Hasile, i Noakẹ̌ dingangu keluargane nasal᷊amatẹ̌.​—Ibr. 11:7.

13. Apa parentang Yehuwa kụ harusẹ̌ koateng i kitẹ?

¹³ Apa parentang Yehuwa kụ harusẹ̌ koateng i kitẹ orasẹ̌ ini? Ual᷊ingu i kitẹ kai muriti Yesus, i kitẹ masingkạ Mawu nẹ̌parenta si kitẹ gunang pěnginjilẹ̌. (Basa Lukas 4:18, 19.) Orasẹ̌ ini, Setang napakawuta lawọ taumata kụ i sire tawe sadarẹ̌ i sire seng nakoạ ělangu agama palsu, arětạ, dingangu sistem politikẹ̌. (2 Kor. 4:4) Kere i Yesus, i kitẹ piạ hak istimewa gunang mẹ̌tul᷊ung taumata wal᷊inẹ tadeạu makasingkạ dingangu mẹ̌tahamawu si Yehuwa, Mawung kawawebasẹ̌. (Mat. 28:19, 20) Měnginjilẹ̌ ene tawe gampang. Su piram baụ tampạ, taumata madiri makasingkạ Mawu, kụ sěnggạ lai mẹ̌pědu su tempong i kitẹ měnginjilẹ̌ si sire. Katewe ual᷊ingu Yehuwa nẹ̌parenta gunang pěnginjilẹ̌, i kitẹ harusẹ̌ mẹ̌kiwal᷊o su watangeng, ’Apa botonge iạ měpakẹ kawawebasẹ̌ku gunang měkoạ hal᷊ẹ̌ i Yehuwa?’

14, 15. Lawọ ělang i Yehuwa němutusẹ̌ gunang měkoạ apa? (Pěmanda gambarẹ̌ humotong su pěngangěndungang ini.)

¹⁴ I kitẹ natoghasẹ̌ su tempong nakasilo lawọ ělang i Yehuwa nakasingkạ pěngěnsuengu dunia ini seng sěbạe marani, kụ i sire němutusẹ̌ gunang měbiahẹ̌ sederhana dingangu něnětạ merintis. (1 Kor. 9:19, 23) Pirang katau nakoạ perintis su tampạ i sire, arawe sěnggạ něngal᷊ing sarang tampạ harusẹ̌ itul᷊ung. Su lima taung ini, nal᷊iu bọu 250.000 su kataune něnětạ nakoạ perintis, kụ orasẹ̌ ini piạ nal᷊iu bọu 1.100.000 perintis biasa. Ene sěbạe makạlaherang ual᷊ingu lawọ něpakẹ kawawebasi sire gunang mẹ̌tahamawu si Yehuwa dingangu cara kerene!​—Mzm. 110:3.

¹⁵ Apa nakatul᷊ung si sire matahuěna něpakẹ kawawebasi sire? Kěnang pẹ̌tiněna soal i John dingangi Judith. I rẹ̌dua něnginjilẹ̌ su haghing tampạ karěngụe 30 su taunge. I rẹ̌dua naul᷊ị su tempong Sekolah Dinas Perintis nitětạ su taung 1977, siswane gẹ̌gausang měngal᷊ing gunang měnginjilẹ̌ su tampạ mahal᷊i penyiar. Gunang makakoạ cita-citang i rẹ̌dua, i John dingangi Judith harusẹ̌ měndiagạ pěbawiahẹ̌  tadeạu tatapẹ̌ sederhana. Hakị u ene i John hanesẹ̌ měgẹ̌gaghanti hal᷊ẹ̌e. Samurine, i rẹ̌dua něngal᷊ing sarang negara wal᷊inẹ. Apa nakatul᷊ung si rẹ̌dua timatěngo sigěsạ něngěndung bawera wuhu dingangu něbiahẹ̌ su tampạ nẹ̌tatěntang iklim lai budayane? I rẹ̌dua nẹ̌doa si Yehuwa dingangu mangimang i Sie sarung mẹ̌tul᷊ung si rẹ̌dua. Kerea pěndang i rẹ̌dua ual᷊ingu seng taunge nẹ̌tahamawu si Yehuwa dingangu cara kerene? I John naul᷊ị, ”Iạ sěbạe mal᷊uasẹ̌ někoạ hal᷊ẹ̌ ini. Ini kai hal᷊ẹ̌ kapaelange nikapěndangengku. Yehuwa nakoạ limembong mal᷊ahẹ si siạ, kere i amang makěndagẹ̌. Orasẹ̌ ini, iạ nakaěna mapia apa mangal᷊ene bawera su Yakobus 4:8, ’Lẹ̌haungko su Mawu Ruata kụ Duata e mal᷊aing sarung humaung si kamene.’ Iạ nakasingkạ, iạ seng nakaěbạ apa dẹ̌deakengku, ene kai timona makal᷊uasẹ̌ su pěbawiahẹ̌.”

16. Kerea hiwune taumata matahuěna něpakẹ kawawebasi sire?

¹⁶ Kere i John dingangi Judith, piạ lai seng marěngụ nakoạ perintis. Katewe, ual᷊ingu keadaan, piạ pirang katau nakoạ perintis kětạeng mal᷊ighạ. Maning kerene, lawọ sukarelawan mělẹ̌hal᷊ẹ̌ su proyek pembangunan su patikụ dunia. Contone, ěndịu 27.000 anạu sěmbaụ i kitẹ diměnta nẹ̌tul᷊ung pembangunan kantor pusat su Warwick, New York. Piạ u něhal᷊ẹ̌ duang kamisa, pira wul᷊ang, sěntaung, arau nal᷊iu bọu ene. Lawọ bọu i sire seng někoạ pengorbanan gunang mẹ̌tul᷊ung su Warwick. I sire nakoạ tatěnoěng ual᷊ingu něpakẹ kawawebasi sire gunang mẹ̌dalo dingangu měngadatẹ̌ si Yehuwa, Mawung kawawebasẹ̌!

17. Apa ampal᷊eng i kitẹ su tempo mahi mạeng i kitẹ matahuěna měpakẹ kawawebasi kitẹ?

¹⁷ I kitẹ mal᷊uasẹ̌ nakasingkạ si Yehuwa dingangu nakaěbạ kawawebasẹ̌ ual᷊ingu nẹ̌tahamawu si Sie. Mahịe i kitẹ měnodẹ kawawebasẹ̌ ene sěbạe maarěga bọu apa nipileng i kitẹ. Sul᷊ungu měpakẹ kawawebasẹ̌ ene dingangu cara nẹ̌sal᷊a, mahịe i kitẹ měpakẹ ene gunang mẹ̌tahamawu si Yehuwa. Bọu ene, i kitẹ sarung makatarimạ al᷊amatẹ̌ seng nirianding Yehuwa su tempong těbal᷊ẹ̌ ini mariadi: ”Kěbị diadikang sarung mawebasẹ̌ bọu perbudakan dosa dingangu papate, kụ makaěbạ kawawebasẹ̌ mawantugẹ̌ kere nikaěbạu manga anạ u Mawu.”​—Rm. 8:21, NW.