MAWAWUDI arau kapiang naung ene sěbạe makahiborẹ̌ si kitẹ. Mạeng i kitẹ masingkạ piạ taumata mapadul᷊i si kitẹ, i kitẹ tantu sěbạe mal᷊uasẹ̌. Ual᷊ingu i kitẹ mal᷊uasẹ̌ mạeng taumata wal᷊inẹ mapia si kitẹ, kerea tadeạu i kitẹ piạ sipatẹ̌ ini?

Taumata mapia kahěngang-hěngang mapadul᷊i su taumata wal᷊inẹ, kụ ene tẹ̌todẹkang bọu bawera dingangu kakanoạ. I sie tawe kětạeng sopan, katewe mapia měkoạ taumata wal᷊inẹ ual᷊ingu i sie makěndagẹ̌ dingangu nakaěna pěndang i sire. Kụ limembong penting, kapiang naung ene buang rohkẹ̌ masusi bọu Mawu. (Galatia 5:22, 23) Yehuwa mapulu i kitẹ makoạ taumata mapia. Hakị u ene mahi měmanda kerea i Sie dingangu Ahuse něnodẹ kapiang naung, kụ kerea i kitẹ botonge mẹ̌těno si rẹ̌dua.

Yehuwa mapia su kěbị taumata, sarang lai su ”taumata ral᷊akị dingangu běga makitarimakasẹ”. (Lukas 6:35) Contone, Yehuwa ”někoạ matangěllo-Ne něnualagẹ̌ taumata ral᷊akị dingangu mapia, dingangu něgělị tahiti gunang taumata měkẹ̌koạ barang nihino dingangu tawe nihino”. (Matius 5:45) Sarang taumata tawe mangimang Yehuwa kai Měndariadi, lai nakapěndang kapiang i Yehuwa dingangu nakaěbạ karal᷊uasẹ̌.

Bọu apa nikoạ i Yehuwa si Adam dingangi Hawa, i kitẹ makasilo contoh sěbạe mapaelẹ̌ soal u kapiang naung i Yehuwa. Tawe nararěna bọu i Adam dingangi Hawa nẹ̌dosa, ”i sire něnggepẹ daokalung ara gunang měnutu kal᷊uwaeng i sire”. Katewe Yehuwa masingkạ su rělahu taman Eden, i sire harusẹ̌ piạ pakeang limembong makal᷊indung si sire, ual᷊ingu ěntana seng nikutukẹ̌ dingangu napenẹu ”sasuang mal᷊ahoro dingangu onasẹ̌”. Hakị u ene dingangu kapiang naung’E, Yehuwa někoạ ”pakeang manandụ bọu pisi” gunang i rẹ̌dua.​—Kejadian 3:7, 17, 18, 21.

Maning i Yehuwa mapia su ”taumata ral᷊akị dingangu mapia”, i Sie kahumotongange mapia su manga ělang’E masatia. Contone, su zaman Nabi Zakharia, piạ malaekatẹ̌ nasusah naung ual᷊ingu tau Israel něngědo někoạ bait i Yehuwa su Yerusalem. Yehuwa dimaringihẹ̌ apa niul᷊ị u malaekatẹ̌ ene, kụ i Sie simimbahẹ̌ něpakẹ ”bawera mapia dingangu makahiborẹ̌”. (Zakharia 1:12, 13) Yehuwa lai někoạ si Elia kerene. Su sěngkatempo, nabi ene sěbạe nasusah naung kụ i sie mapulu Yehuwa měngal᷊ạ pěbawiahe. Yehuwa mapadul᷊i su pěndang i Elia kụ i Sie něngoro sěmbaụ malaekatẹ̌ gunang měnoghasẹ̌ si Elia. Bọu ene Yehuwa lai naul᷊ị i Elia tawe sẹ̌sane. Kapiang naung i Yehuwa nakatoghasẹ̌ si Elia gunang turusẹ̌ měkoạ tugase. (1 Raja-Raja 19:1-18) Bọu kěbị ělang i Yehuwa, i sai nakoạ tatěnoěng kapaelange soal u mẹ̌těno kapiang naung i Yehuwa?

Su tempong su dunia, taumata botonge makasilo i Yesus kai mapia. I sie tawe kasarẹ̌ arau měnihasa taumata wal᷊inẹ gunang měkoạ kapulune. I sie mapadul᷊i su taumata wal᷊inẹ, kụ naul᷊ị, ”Děntako si siạ, i kamene kěbị apang nal᷊owe dingangu  nawěhạu bawawaěng, iạ sarung měgělị karal᷊unsemahẹ̌ si kamene.” (Matius 11:28-30) Ual᷊ingu i sie mapia, taumata tụtol᷊e si sie maning saranga i sie rumal᷊eng. Kụ ual᷊ingu tatal᷊ěntụ, Yesus něgělị kaěng si sire, napakapia apang masakị, dingangu něněntiro ”lawọ hal᷊ẹ̌” soal i Amange.​—Markus 6:34; Matius 14:14; 15:32-38.

Yesus mapia měkoạ taumata wal᷊inẹ dingangu mětẹ̌timbang pěndang i sire. Sěběnarẹ̌e, maning tempone tawe nẹ̌tatahino si Yesus, i sie tatapẹ̌ nẹ̌tul᷊ung taumata apang diměnta si sie. (Lukas 9:10, 11) Pẹ̌tiněna apa nariadi su sěngkatau wawine masakị pendarahan. Ual᷊ingu mapulu mapia, i sie něnenggehẹ̌ pakeang i Yesus. Katewe tumuhụ Hukung Musa, ene tawe wotonge ual᷊ingu i sie tawe wurěsi. (Imamat 15:25-28) Apa nikoạ i Yesus? I sie tawe nẹ̌pědu su wawine ene. I sie nakasilo wawine ene natakụ, kụ i sie timal᷊ěntụ su wawine ene ual᷊ingu seng 12 su taunge i sie nasigěsạ. Yesus nẹ̌bera si sie, ”Anạku, pangangimangu seng nakapia si kau. Dakọe kapul᷊ẹ dingangu pẹ̌darame. Sakịu seng nakasusah naung seng napia.” (Markus 5:25-34) Yesus kahěngang-hěngang mapia!

Bọu manga contoh kanini, i kitẹ něngěndung kapiang naung ene harusẹ̌ todẹkang bọu kakanoạ. Yesus napakal᷊ahẹ ene sěbạe penting bọu papinintu soal u tau Samaria mapia naung. Tau Samaria ene timal᷊ěntụ nakasilo sěngkatau Yahudi nihampasẹ̌, niwěbahẹ̌, bọu ene niwala su ral᷊eng. Sěmbal᷊ia tau Samaria dingangu tau Yahudi mawěnsing sěmbaụ su wal᷊inẹ. Kapiang naung nakakoạ tau Samaria nẹ̌tul᷊ung tau Yahudi ene. I sie němurěsi lesẹu tau Yahudi ene, kụ nẹ̌bawa si sie sarang penginapan. Tau Samaria něgělị doitẹ̌ su měndariagạ penginapan gunang měngurusẹ̌ tau Yahudi ene kụ mạeng ene tawe nakatikụ, i sie mapulu saụ měgělị tatambane.​—Lukas 10:29-37.

Maning kapiang naung botonge todẹkang bọu kakanoạ, ene lai botonge todẹkang bọu bawera matahuěna dingangu makatoghasẹ̌. Alkitapẹ̌ naul᷊ị, ”Kaghaghěnggang su naungu taumata makakoạ naunge masusah, katewe bawera mapia makakoạ naunge mal᷊uasẹ̌.” (Amsal 12:25) Kapiang naung dingangu kapia makakoạ si kitẹ maul᷊ị barang makatoghasẹ̌ su taumata wal᷊inẹ, kụ ene sarung makahiborẹ̌ si sire. * (Pěmanda catatan kaki.) Bawera mapia sarung měnodẹ i kitẹ mapadul᷊i si sire. Hasile, i sire limembong gampang mẹ̌tatahang tumatěngo kasasigěsạ.​—Amsal 16:24.

I kitẹ kěbị botonge měnodẹ kapiang naung ual᷊ingu Mawu něndiadi si kitẹ mẹ̌papangawẹ i Sie. (Kejadian 1:27) Contone, i Yulius, sěngkatau těntara Romawi nakaěbạ tugasẹ̌ měndiagạ si Paulus su ral᷊eng sarang Roma. Su Sidon, i sie ”něnodẹ kapiang naung si Paulus. I sie němala si Paulus mẹ̌tiwo manga hapịe dingangu měnarimạ tul᷊umang bọu i sire”. (Kisah 27:3) Su tempong kapal᷊ẹ̌ nisakeng i Paulus dingangu taumata wal᷊inẹ nasiladẹ̌, taumata su Malta ”sěbạe mapia” si sire. I sire něhunụ putung tadeạu i Paulus dingangu taumata wal᷊inẹ botonge měndarang. (Kisah 28:1, 2) Apa nikoạ i sire ene mapia. Katewe, tadeạu makal᷊uasẹ̌ si Yehuwa, i kitẹ harusẹ̌ mapia sabang tempo, bal᷊inẹ kětạeng pẹ̌sěnsul᷊ẹ.

Yehuwa mapulu kapiang naung makoạ bageang bọu sipati kitẹ dingangu dal᷊engu wiahi kitẹ. Hakị u ene i Sie něngoro si kitẹ gunang ’měpakẹ’ kapiang naung. (Kolose 3:12) Katewe tawe gampang měnodẹ kapiang naung sabang tempo. Kawe nụe? Ěndịu i kitẹ tawe měnodẹ kapiang naung ual᷊ingu mamea, madiri masigěsạ, arau bědang tawe makailang sipatẹ̌ kětạeng mapandung watangeng hala. Arau i kitẹ masigěsạ měnodẹ kapiang naung su taumata ral᷊akị měkoạ si kitẹ. Katewe mạeng i kitẹ mẹ̌doa mẹ̌dorong rohkẹ̌ masusi dingangu mẹ̌tawakal᷊i mẹ̌těno si Yehuwa, i Sie sarung mẹ̌tul᷊ung si kitẹ tadeạu makoạ taumata kahěngang-hěngang mapia.​—1 Korintus 2:12.

 Tadeạu limembong mapia naung, i kitẹ harusẹ̌ makasingkạ apa lai harusẹ̌ koateng i kitẹ. Kěnang pẹ̌tiněna: ’Apa iạ dụdaringihẹ̌ mapia tadeạu makaěna pěndangu taumata wal᷊inẹ? Apa iạ masahawụ makaěna kebutuhan taumata wal᷊inẹ? Kange kasamuriange iạ něnodẹ kapiang naung su taumata bal᷊inẹ keluarga arau hapị mapia?’ Bọu ene, i kitẹ botonge měkoạ cita-cita, contone makasingkạ mal᷊awọ soal u taumata marani dingangi kitẹ, kahumotongange anaụ sěmbaụ su sidang. I kitẹ sarung makasingkạ apa sigěsạ nikahombangeng i sire dingangu apa kebutuhan i sire. Bọu ene, pakapia měkoạ si sire kere cara i kitẹ mapulu taumata měkoạ si kitẹ su tempo kerene. (Matius 7:12) Samurine, pakitul᷊ung si Yehuwa, kụ i Sie sarung měngal᷊amatẹ̌ tawakal᷊inu gunang makoạ taumata mapia.​—Lukas 11:13.

Su tempong Rasul Paulus němohẹ manga hal᷊ẹ̌ nakatul᷊ung si sie nakoạ pelayan Mawu, i sie nẹ̌sěbạ sipatẹ̌ kapiang naung. (2 Korintus 6:3-6) Taumata mapulu mědal᷊ahapị dingangi Paulus ual᷊ingu i sie mapia, kụ ene kasilong bọu bawera dingangu kakanoạe. (Kisah 28:30, 31) Kerene lai, mạeng i kitẹ mapia, taumata wal᷊inẹ aramanung mapulu měngěndung katěngadẹ̌. Mạeng i kitẹ mapia su kěbị taumata, sarang lai su taumata ral᷊akị měkoạ si kitẹ, ene sarung makakoạ si sire mẹ̌bal᷊ui. (Roma 12:20) Su tempone, i sire sarung mapulu měngěndung Alkitapẹ̌.

Su Firdaus, kěbị taumata sarung mapia sěmbaụ su wal᷊inẹ. Taumata apang saụ nipěbiahẹ̌ sarung makapěndang kapiang naung, kụ su pirang katau ěndịu buhudeng ene nakapěndang kerene. Ini makakoạ si sire lai měnodẹ kapiang naung su taumata wal᷊inẹ. Sěběnarẹ̌e, mạeng piạ u madiri měnodẹ kapiang naung dingangu mẹ̌tul᷊ung taumata wal᷊inẹ, i sie tawe iwala makoạ bageang bọu Kararatuangu Mawu. Kětạeng taumata mapia dingangu makěndagẹ̌ sarung mẹ̌tanạ sarang karěngụe su Firdaus. (Mazmur 37:9-11) Dunia sarung aman dingangu mapenẹu pẹ̌darame! Katewe, těntal᷊ang ene bědang tawe nariadi, apa gunane měnodẹ kapiang naung orasẹ̌ ini?

Alkitapẹ̌ naul᷊ị, ”Esẹ mapia naung makarěntang untung gunang watangenge.” (Amsal 11:17) Taumata puluang mědal᷊ahapị dingangu taumata mapia, kụ i sire lai mapia měkoạ si sie. Yesus naul᷊ị, ”Ual᷊ingu sasupa nipakẹ i kamene gunang taumata wal᷊inẹ sarung lai paketang gunang ipěnupa si kamene.” (Lukas 6:38) Hakị u ene taumata mapia gampang makaěbạ hapị dingangu měndiagạ pẹ̌dal᷊ahapị ene.

Rasul Paulus němahansang anaụ sěmbaụ su sidang Efesus tadeạu ”mapia sěmbaụ su wal᷊inẹ, mẹ̌tatal᷊ěntụ, dingangu mẹ̌papangampung”. (Efesus 4:32) Mạeng kěbị taumata su sidang mapia dingangu matal᷊ěntụ, sidang sarung matoghasẹ̌ dingangu masěmbaụ. I kitẹ tawe měmorotesẹ̌ su anạu sěmbaụ, mẹ̌sampuhẹ̌, mẹ̌bisara kasarẹ̌ arau makatědụ naung maning ene mẹ̌tatal᷊ewa. Katewe, i kitẹ mapulu mẹ̌bisara gunang měnoghasẹ̌ si sire. (Amsal 12:18) Hasile, sidang sarung mẹ̌tahamawu si Yehuwa dingangu ral᷊uasẹ̌.

Kere seng niěndungang i kitẹ, kapiang naung ene kai sipatẹ̌ harusẹ̌ todẹkang bọu bawera dingangu kakanoạ. Mạeng i kitẹ mapia, i kitẹ nẹ̌těno si Yehuwa, Mawu makěndagẹ̌ dingangu maělugẹ̌. (Efesus 5:1) Ini makakoạ sidang matoghasẹ̌ kụ taumata wal᷊inẹ lai sarung mapulu mẹ̌tahamawu si Sie. Hakị u ene, mahịe i kitẹ mẹ̌tawakal᷊i tadeạu taumata wal᷊inẹ makasilo Sahiding Yehuwa kai taumata mapia!