I DIANA umure nal᷊iu wọu 80 su taunge, kụ pira taung ini i sie nakahombang lawọ kasasigěsạ. Kawinge masakị Alzheimer kụ bọu niurusẹ̌ su panti jompo, samurine nate. Duang katau anạe lai nate, kụ i sie nakaěbạ kanker payudara. Katewe su tempong měngibadah dingangu měnginjilẹ̌, anạu sěmbaụ nakasilo i sie sěntiniạ mal᷊uasẹ̌.

John nakoạ pengawas keliling nal᷊iu wọu 43 su taunge. I sie sěbạe puluang su tugasẹ̌ ene, kụ ene nakoạ bageang bọu pěbawiahe. Katewe, i sie harusẹ̌ měngědo ual᷊ingu mẹ̌tangkiang keluarga masakị. Su tempong anạu sěmbaụ nẹ̌sombang dingangi John su kebaktian, i sire nẹ̌pěndang i John tawe nẹ̌bal᷊ui sarang kadodọ. I sie bědang sěbạe mal᷊uasẹ̌.

Kerea i Diana dingangi John botonge tatapẹ̌ mal᷊uasẹ̌? Kerea taumata botonge tatapẹ̌ mal᷊uasẹ̌ maning piạ lawọ kasasigěsạ arau harusẹ̌ měngědo měkoạ tugasẹ̌ ikẹ̌kapuluange? Alkitapẹ̌ naul᷊ị sasimbahe: ”Taumata měkẹ̌koạ barang nihino sarung mal᷊uasẹ̌ ual᷊ingu Yehuwa.” (Mazmur 64:10) Tadeạu makaěna mapia ayatẹ̌ ini, i kitẹ harusẹ̌ masingkạ kal᷊imona apa wotonge makakoạ si kitẹ piạ karal᷊uasẹ̌ matahang marěngụ dingangu tala.

Piạ piram baụ hal᷊ẹ̌ biasane makakoạ si kitẹ mal᷊uasẹ̌. Contone, duang katau buhudeng nẹ̌kawing mal᷊uasẹ̌. Taumata buhudeng nakaěbạ anạ arau nakaěbạ tugasẹ̌ buhu su organisasing Yehuwa lai mal᷊uasẹ̌. Manga hal᷊ẹ̌ ini nakal᷊uasẹ̌ ual᷊ingu ene kai gaghělị bọu Yehuwa. I sie něgělị pẹ̌kakawing, nakakoạ si kitẹ botonge makaěbạ anạ, dingangu něgělị hal᷊ẹ̌ su organisasi-Ne.​—Kejadian 2:18, 22; Mazmur 127:3; 1 Timotius 3:1.

Katewe karal᷊uasẹ̌ ual᷊ingu manga hal᷊ẹ̌ ini aramanung kětạeng sementara. Kawing aramanung nakoạ tawe satia arau nate. (Yehezkiel 24:18; Hosea 3:1) Manga rariọ aramanung tawe timuhụ su matimadẹ̌ dingangu Mawu, kụ ěndịu nisěbang bọu sidang. Contone, anạ i Samuel tawe masatia nẹ̌tahamawu si Yehuwa, kụ i Daud nakahombang lawọ masalah su keluarga ual᷊ingu i sie nawuang dingangi Bat-syeba. (1 Samuel 8:1-3; 2 Samuel 12:11) Su tempong manga hal᷊ẹ̌ ini nariadi, ini  tawe nakarěntang karal᷊uasẹ̌ katewe nakarěntang susah naung dingangu sigěsạ.

Pẹ̌sěnsul᷊ẹ, i kitẹ tawe turusẹ̌ měkoạ tugasẹ̌ su organisasing Yehuwa ual᷊ingu masakị arau harusẹ̌ měngurusẹ̌ keluarga. Arau, ěndịu piạ pẹ̌bawal᷊ui su organisasi. Lawọ anạu sěmbaụ apang harusẹ̌ měngědo bọu tugasẹ̌ naul᷊ị i sire mapulu saụ makapěndang karal᷊uasẹ̌ nikapěndangeng i sire kangerẹ.

Nal᷊ahẹ, karal᷊uasẹ̌ ual᷊ingu manga hal᷊ẹ̌ kanini tawe sěntiniạ matahang marěngụ. Hakị u ene, apa piạ karal᷊uasẹ̌ botonge tatapẹ̌ matahang maning i kitẹ nakahombang sigěsạ? Tantu piạ, ual᷊ingu i Samuel, i Daud, dingangu manga ělangu Mawu wal᷊inẹ botonge tatapẹ̌ mal᷊uasẹ̌ maning nakahombang lawọ kasasigěsạ.

Yesus masingkạ apa karal᷊uasẹ̌ tutune. Těntal᷊ang bědang tawe diměnta su dunia, Alkitapẹ̌ naul᷊ị i sie ”mal᷊uasẹ̌ su [těngong Yehuwa] su kanandụu tempo”. (Amsal 8:30) Katewe, su tempong diměnta su dunia, pẹ̌sěnsul᷊ẹ i sie harusẹ̌ tumatěngo haghing sigěsạ mawěhạ. Maning kerene, Yesus mal᷊uasẹ̌ ual᷊ingu někoạ kapulung i Amange. (Yohanes 4:34) Su pěngěnsuengu pěbawiahe, Yesus harusẹ̌ tumatěngo papate sěbạe masigěsạ. Katewe Alkitapẹ̌ naul᷊ị, ”Ual᷊ingu karal᷊uasẹ̌ seng nitaho su těngone, i sie nẹ̌tatahang su rihi pěnggantongang.” (Ibrani 12:2) Mahịe i kitẹ měngěndung soal u karal᷊uasẹ̌ tutune bọu darua hal᷊ẹ̌ niwerang i Yesus.

Sěnsul᷊ẹ tempo, 70 murite nakoạ sarang i sie su tempong bọu něnginjilẹ̌. I sire sěbạe mal᷊uasẹ̌ ual᷊ingu nakakoạ lawọ hal᷊ẹ̌, kere něnokol᷊ẹ̌ manga rohkẹ̌ dal᷊akị. Katewe Yesus naul᷊ị si sire, ”Abe mahul᷊uasẹ̌ ual᷊ingu manga rohkẹ̌ ene timuhụ si kamene, katewe pahul᷊uase ual᷊ingu areng i kamene seng niwohẹ su sorga.” (Lukas 10:1-9, 17, 20) Makakoạ Yehuwa mal᷊uasẹ̌ ene limembong penting, kụ ene makakoạ si kitẹ limembong mal᷊uasẹ̌ sul᷊ungu su tempong i kitẹ nakaěbạ tugasẹ̌.

Su tempo wal᷊inẹ Yesus měbẹ̌bisara su lawọ taumata, kụ sěngkatau wawine Yahudi sěbạe naherang ual᷊ingu cara Yesus měněntiro. Wawine ene naul᷊ị mamạ i Yesus tantu sěbạe mal᷊uasẹ̌ ual᷊ingu piạ anạ kere i Yesus. Katewe Yesus simimbahẹ̌, ”Tala, mal᷊uasẹ̌ ene ute taumata apang dimaringihẹ̌  hengetangu Mawu dingangu timuhụ ene!” (Lukas 11:27, 28) I kitẹ tantu mal᷊uasẹ̌ mạeng anạ někoạ barang makal᷊uasẹ̌ si kitẹ. Katewe, i kitẹ limembong mal᷊uasẹ̌ mạeng i kitẹ tumuhụ si Yehuwa dingangu mědal᷊ahapị mapia dingang’E.

I kitẹ sěbạe mal᷊uasẹ̌ mạeng nakasingkạ Yehuwa mal᷊uasẹ̌ si kitẹ. Ual᷊ingu nakasingkạ hal᷊ẹ̌ ini, i kitẹ botonge tatapẹ̌ mal᷊uasẹ̌ su tempong tumatěngo kasasigěsạ maning ene tawe makal᷊uasẹ̌. Sěběnarẹ̌e, mạeng i kitẹ tatapẹ̌ masatia su tempong tumatěngo sigěsạ, karal᷊uasẹ̌ nikapěndangeng i kitẹ sarung matamba. (Roma 5:3-5) Bọu ene lai, Yehuwa něgělị rohkẹ̌’E masusi si saing mangimang si Sie, kụ karal᷊uasẹ̌ kai bageang bọu rohkẹ̌ ene. (Galatia 5:22) Ene makatul᷊ung si kitẹ makaěna kawe nụe Mazmur 64:10 naul᷊ị, ”Taumata měkẹ̌koạ barang nihino sarung mal᷊uasẹ̌ ual᷊ingu Yehuwa.”

I kitẹ lai nakaěna kawe nụe i Diana dingangi John botonge tatapẹ̌ mal᷊uasẹ̌ maning i sire nakahombang lawọ kasasigěsạ. Diana naul᷊ị, ”Iạ nẹ̌těngkal᷊indung si Yehuwa, kere anạ kadodọ si papạe.” I sie lai naul᷊ị, ”Iạ nẹ̌pěndang i Sie něgělị katatoghasẹ̌ si siạ tadeạu turusẹ̌ marading měnginjilẹ̌ dingangu karal᷊uasẹ̌.” Apa nakatul᷊ung si John tatapẹ̌ masatia dingangu sibukẹ̌ su pelayanan maning i sie harusẹ̌ měněntang tugase? I sie naul᷊ị, ”Su taung 1998, iạ nakaěbạ tugasẹ̌ makoạ měnaněntiro su Sekolah Pelatihan Pelayanan. Dongkeng tempo ene, iạ limembong marading měngěndung Alkitapẹ̌.” I sie lai nẹ̌běke i rẹ̌duang kawinge limembong gampang měnarimạ pẹ̌bawal᷊ui ene ual᷊ingu i rẹ̌dua sěntiniạ mapulu měkoạ tugasẹ̌ bọu i Yehuwa, tawẹ soale apa tugasẹ̌ ene. I sie lai naul᷊ị, ”I kami tawe nẹ̌sasěsilẹ̌ seng někoạ ene.”

Lawọ lai nakapěndang bawera su Mazmur 64:10 ene kahěngang. Contone ute sěngkawingang seng nal᷊iu wọu 30 su taunge mělẹ̌hal᷊ẹ̌ su Betel Amerika Serikat. I rẹ̌dua nakaěbạ tugasẹ̌ makoạ perintis istimewa. I rẹ̌dua něngakui, ”Su tempong i kitẹ nikailangengu hal᷊ẹ̌ ikẹ̌kapuluang i kitẹ, masusah naung ene biasa.” Katewe i rẹ̌dua lai naul᷊ị, ”I kitẹ tawe wotonge turusẹ̌ masusah naung.” Su apang i rẹ̌dua nahumpạ su tampạ tugasẹ̌ buhu, i rẹ̌dua langsung něnginjilẹ̌ dingangu sidang. I rẹ̌dua lai nẹ̌bera, ”I kami nẹ̌doa secara khusus soal u piram baụ hal᷊ẹ̌. Su tempong nakasilo daroang i kami nisimbaheng, i kami natoghasẹ̌ dingangu mal᷊uasẹ̌. Tawe nararěna i kami nahumpạ su sidang ini, pirang katau něnětạ merintis, kụ i kami nial᷊amateng ual᷊ingu duang katau měngangěndung Alkitapẹ̌ dingangi kami někoạ kemajuan.”

Tantu i kitẹ tawe sěntiniạ mal᷊uasẹ̌. Piạ tempone i kitẹ masusah naung. Katewe Yehuwa něhiborẹ̌ si kitẹ dingangu wawera su Mazmur 64:10. Maning nakadodọ naung, i kitẹ mangimang mạeng i kitẹ tatapẹ̌ masatia tawẹ soale apa mariadi, i kitẹ ”sarung mal᷊uasẹ̌ ual᷊ingu Yehuwa”. I kitẹ lai měngampal᷊ẹ̌ tempone dianding Yehuwa soal u ”langị buhu dingangu dunia wuhu” mariadi. Bọu ene kěbị taumata sarung masukụ dingangu ’mal᷊uasẹ̌ sarang karěngụe’ ual᷊ingu kěbị apa sarung koateng i Yehuwa.​—Yesaya 65:17, 18.

Pẹ̌tiněna apa sarung kapěndangeng i kitẹ. I kitẹ sarung masehatẹ̌, kụ sabang mẹ̌bangung badang i kitẹ matoghasẹ̌. Barang dal᷊akị su tempong tamai seng tawe makasusah naung. Yehuwa naul᷊ị, ”Barang nariadi kangerẹ seng tawe saụ tahěndungang, arau suměpụ su ral᷊ungu naung.” I kitẹ sarung měněnsomahẹ̌ taumata ikẹ̌kěndagi kitẹ apang seng nate. Pěndang i kitẹ sarung mẹ̌sul᷊ung dingangu pěndang matimadu rariọ umure 12 taung su tempong Yesus napakawiahẹ̌ anạ ene. Alkitapẹ̌ naul᷊ị, ”Matimade sěbạe mal᷊uasẹ̌ hakị u tawe nakatahang pěndang i sire.” (Markus 5:42) Su tempo mahi, dunia sarung mapenẹu taumata měkẹ̌koạ barang nihino, kụ i sire sarung ”mal᷊uasẹ̌ ual᷊ingu Yehuwa” sarang karěngụe.