1, 2. Sěngkatau saudara buhudeng nakasingkạ apa, kụ apa nikoạe?

I ROBERT nisahani su tempong bědang mangudạ, katewe těntirong Alkitapẹ̌ tawe nakoạ bageang penting su pěbawiahe. I sie naul᷊ị, ”Kẹ̌kasilong iạ kere taumata rohani. Iạ tawe někoạ dosa, marading měngibadah, kụ lai merintis ekstra pirang sul᷊ẹ su ral᷊ungu sěntaung. Katewe, ene kětạeng nakoạ hal᷊ẹ̌ biasa kẹ̌koateng. Pěndangeng bědang piạ barang kurang su pěbawiahẹ̌ku.”

² I Robert hědo nakasingkạ apa bědang kurang, su tempong i sie seng bọu nẹ̌kawing. I sie dingangu kawinge hanesẹ̌ měnalang kuis Alkitapẹ̌. Kawinge masingkạ kahěngang lohongu Alkitapẹ̌ kụ makạsimbahẹ̌ kakiwal᷊one. Katewe, i Robert hanesẹ̌ tawe makasimbahẹ̌ kakiwal᷊ong kawinge, kụ i sie namea. I sie naul᷊ị, ”Iạ nakasingkạ iạ běgaweng apa-apa. Iạ naul᷊ị su watangengku, ’Mạeng iạ makoạ těmbonang gunang kerohanian kawingku, iạ harusẹ̌ mẹ̌bal᷊ui.’” I sie někoạ ene. I sie naul᷊ị, ”Iạ něnětạ něngěndung Alkitapẹ̌, kụ turusẹ̌ měngẹ̌ngěndung. Iạ nakaěna apa niěndungang, kụ limembong penting, iạ nědal᷊ahapị mapia dingangi Yehuwa.”

3. (a) Apa kaěndungang i kitẹ bọu běkeng i Robert? (b) Apa kakiwal᷊o penting sarung ěndungang i kitẹ?

 ³ I kitẹ botonge měngěndung bọu běkeng i Robert. Aramanung i kitẹ seng masingkạ piram baụ těntirong Alkitapẹ̌, kụ marading měngibadah dingangu měnginjilẹ̌. Katewe, ene tawe langsung makakoạ si kitẹ piạ tiněna rohani. Arau ěndịu i kitẹ seng nẹ̌tawakal᷊i nakoạ taumata rohani, katewe su tempong němarikěsa watangeng i kitẹ, i kitẹ nakasingkạ bědang piạ lai harusẹ̌ koateng. (Flp. 3:16) Su pěngangěndungang ini, i kitẹ sarung sumimbahẹ̌ tatělu kakiwal᷊o penting: (1) Apa makatul᷊ung si kitẹ měmarikěsa apa i kitẹ seng nakoạ taumata rohani? (2) Kerea tadeạu kerohanian i kitẹ sauneng kakạtoghase? (3) Kerea kerohanian matoghasẹ̌ makatul᷊ung si kitẹ su pěbawiahẹ̌ ěllo-ěllo?

4. I sai-sai harusẹ̌ tumol᷊e bawera su Efesus 4:23, 24?

⁴ Su tempong i kitẹ buhudeng měnětạ měkoạ kapulung Mawu, i kitẹ němal᷊ui pěbawiahi kitẹ. Katewe, pẹ̌bawal᷊ui ene tawe naědo su tempong nisahani. Alkitapẹ̌ naul᷊ị si kitẹ, ”Karimạko ral᷊ungu naung dingangu tiněnnanu e pakasueko pakatal᷊imbuhu.” (Ef. 4:23, 24) Su werang Yunani, bawera ”pakatal᷊imbuhu arau pakariadi wuhu” nělahẹ hal᷊ẹ̌ harusẹ̌ turusẹ̌ koateng. Hakị u ene, tiněnang i kitẹ harusẹ̌ turusẹ̌ pakariadi wuhu. Ual᷊ingu tawe nasukụ, i kitẹ harusẹ̌ turusẹ̌ měkoạ pẹ̌bawal᷊ui. Maning seng taunge nakoạ ělang i Yehuwa, i kitẹ harusẹ̌ turusẹ̌ měndiagạ pẹ̌dal᷊ahapị dingangi Yehuwa tatapẹ̌ matoghasẹ̌.​—Flp. 3:12, 13.

5. Kakiwal᷊o apa makatul᷊ung si kitẹ měmarikěsa watangeng i kitẹ?

⁵ Maning bědang mangudạ arau seng maghurang, i kitẹ harusẹ̌ měmarikěsạ pakapia watangeng i kitẹ. Pẹ̌kiwal᷊o su watangengu, ’Apa iạ seng nakoạ taumata limembong rohani? Apa tiněnaku seng kakạsul᷊unge dingangu tiněnang Kristus? Apa kakanoạku su pěngangibadang něnodẹ iạ kai taumata rohani? Apa nilahẹu wisarakụ soal u hal᷊ẹ̌ kahumotongange su pěbawiahẹ̌ku? Kerea kebiasaanku měngěndung? Kerea pakeang dingangu penampilanku? Apa koatengku su tempong nighělịkangu sasasa? Apa koatengku su tempong piạ sasal᷊ukạ? Apa iạ seng nakoạ tau Sahani matělang su rohani?’ (Ef. 4:13) Manga kakiwal᷊o ini makatul᷊ung si kitẹ měmarikěsa kerohanian i kitẹ.

6. Apa lai makatul᷊ung si kitẹ měmarikěsa apa i kitẹ seng nakoạ taumata rohani?

⁶ Pẹ̌sěnsul᷊ẹ, i kitẹ harusẹ̌ makitul᷊ung su taumata wal᷊inẹ gunang měmarikěsa apa i kitẹ seng nakoạ taumata rohani. Rasul Paulus nělahẹ taumata jasmani běga kakanoạ i sire tawe nakal᷊uasẹ̌  naungu Mawu. Katewe, taumata rohani nakaěna pěndangu Mawu, dingangu masingkạ kakanoạu taumata jasmani tawe makal᷊uasẹ̌ si Sie. (1 Kor. 2:14-16; 3:1-3) Manga penatua apang tiněnane mẹ̌sul᷊ung i Kristus, masahawụ makasingkạ mạeng piạ anạu sěmbaụ něnětạ piạ tiněna jasmani, kụ i sire mẹ̌tawakal᷊i mẹ̌tul᷊ung. Mạeng penatua mẹ̌tul᷊ung si kitẹ, apa i kitẹ měnarimạ ene kụ mẹ̌bal᷊ui? Mạeng měkoạ ene, i kitẹ něnodẹ i kitẹ mapulu piạ kerohanian matoghasẹ̌.​—Měn. 7:5, 9.

7. Tadeạu makoạ taumata rohani, kawe nụe kětạeng masingkạ těntirong Alkitapẹ̌ ene bědang kurang?

⁷ Tadeạu makoạ taumata rohani, kětạeng masingkạ těntirong Alkitapẹ̌ ene bědang kurang. Datu Salomo masingkạ mal᷊awọ soal i Yehuwa, kụ manga bawerane mapelesa lai nakoạ bageang bọu Alkitapẹ̌. Katewe, pẹ̌dal᷊ahapịe dingangi Yehuwa nělome, kụ i sie nakoạ tawe satia. (1 Rat. 4:29, 30; 11:4-6) Hakị u ene, tadeạu makoạ limembong rohani, apa lai harusẹ̌ koateng i kitẹ? I kitẹ harusẹ̌ měnoghasẹ̌ pangangimang i kitẹ. (Kol. 2:6, 7) Kerea carane?

8, 9. (a) Apa makatul᷊ung si kitẹ měnoghasẹ̌ pangangimang? (b) Su tempong měngěndung dingangu mẹ̌tiněna, apa timonang i kitẹ? (Pěmanda gambarẹ̌ humotong su pěngangěndungang ini.)

⁸ Su abad humotong, rasul Paulus něgělị sasasa tadeạu tau Sahani ”mẹ̌tawakal᷊i makoạ taumata matělang” su hal᷊ẹ̌ rohani. (Ibr. 6: 1, Terjemahan Dunia Baru, NW) Kerea i kitẹ tumol᷊e sasasa ene? Sěmbaụ cara penting ute měngěndung bukẹ̌ Cara agar Tetap Dikasihi Allah. Bukẹ̌ ini makatul᷊ung si kau makaěna carane měpakẹ prinsip Alkitapẹ̌ su pěbawiahu. Mạeng seng bọu něngěndung bukẹ̌ ene, i kau botonge měngěndung bukẹ̌ bal᷊inẹ gunang měnoghasẹ̌ pangangimangu. (Kol. 1:23) Penting lai mẹ̌tiněna apa niěndungang dingangu makitul᷊ung si Yehuwa gunang měkoạ ene su pěbawiahẹ̌.

⁹ Su tempong měngěndung dingangu mẹ̌tiněna, timonang i kitẹ ute ual᷊ingu mapulu makal᷊uasẹ̌ dingangu tumuhụ si Yehuwa. (Mzm. 40:9; 119:97) I kitẹ lai  harusẹ̌ mẹ̌těngkarau bọu kěbị apang makasahaghe si kitẹ měnoghasẹ̌ kerohanian.​—Tit. 2:11, 12.

10. Apa botonge koatengu mangangudạ tadeạu kerohanian i sire matoghasẹ̌?

¹⁰ Mangangudạ, apa i kamene piạ cita-cita rohani? Sěngkatau saudara mělẹ̌hal᷊ẹ̌ su Betel hanesẹ̌ mẹ̌bawěke dingangu mangangudạ apang sahaniang su kebaktian wilayah. I sie nẹ̌kiwal᷊o apa cita-cita rohaning i sire. Lawọ simimbahẹ̌ i sire seng nẹ̌tiněna soal u hal᷊ẹ̌ ene. Piạ u mapulu makoạ pelayan sepenuh waktu arau měngal᷊ing su tampạ mahal᷊i penyiar. Katewe piạ lai tawe nakasimbahẹ̌ kakiwal᷊o ene. Kawe nụe? Apa i sire nẹ̌pěndang i sire tawe harusẹ̌ piạ cita-cita rohani? Mangangudạ, kěnang pẹ̌tiněna, ’Apa iạ měngẹ̌ngibadah dingangu měngẹ̌nginjilẹ̌ ual᷊ingu niorong matimadẹ̌ku? Arau apa iạ mědẹ̌dal᷊ahapị mapia dingangu Mawu?’ Tantu, i kitẹ kěbị harusẹ̌ piạ cita-cita rohani, bal᷊inẹ kětạeng mangangudạ. Ual᷊ingu mạeng piạ cita-cita, kerohanian i kitẹ sarung matoghasẹ̌.​—Měn. 12:1, 13.

11. (a) Apa harusẹ̌ koateng i kitẹ tadeạu piạ tiněna rohani? (b) I sai botonge těnoěng i kitẹ?

¹¹ Su apang nakasingkạ su bageang sude i kitẹ harusẹ̌ mẹ̌bal᷊ui, koạe pẹ̌bawal᷊ui ene. Ini penting, ual᷊ingu ini soal u měbiahẹ̌ arau mate. (Rm. 8:6-8) Yehuwa tawe nẹ̌dorong i kitẹ harusẹ̌ makoạ masukụ, kụ i Sie něgělị rohkẹ̌’E masusi gunang mẹ̌tul᷊ung si kitẹ. Katewe, i kitẹ hala harusẹ̌ mẹ̌tawakal᷊i. Saudara John  Barr, kangerẹ nakoạ anggota Badan Pimpinan, bọu nẹ̌bisara soal u Lukas 13:24. I sie naul᷊ị, ”Lawọ taumata tawe nakasuẹ̌ bọu tukadẹ̌ masěsẹ ual᷊ingu i sire tawe nẹ̌tawakal᷊i měnoghasẹ̌ kerohanian i sire.” I kitẹ harusẹ̌ mẹ̌těno tawakal᷊ing i Yakub ual᷊ingu i sie nẹ̌gulatẹ̌ dingangu malaekatẹ̌, kụ tawe něngědo sarang i sie nakatarimạ al᷊amatẹ̌. (Pěnd. 32:26-28) Maning měngěndung Alkitapẹ̌ ene makal᷊uasẹ̌, i kitẹ tawe mẹ̌basa Alkitapẹ̌ kere mẹ̌basa novel. I kitẹ harusẹ̌ mẹ̌tawakal᷊i tadeạu makaěbạ arětạ rohani ual᷊ingu ene sarung makatul᷊ung si kitẹ.

12, 13. (a) Apa makatul᷊ung si kitẹ tumol᷊e sasasa su Filipi 2:5? (b) Kerea i Petrus nakoạ tatěnoěng si kitẹ dingangu kerea sasasane makatul᷊ung si kitẹ? (c) Apa botonge koatengu tadeạu rohaninu makoạ matoghasẹ̌? (Pěmanda kotak ” Carane Tadeạu Kerohanian Matoghasẹ̌”.)

¹² Mạeng mẹ̌tawakal᷊i měnoghasẹ̌ kerohanian, rohkẹ̌ masusi sarung mẹ̌tul᷊ung si kitẹ měmal᷊ui tiněnang i kitẹ. Kakạrěngụe, tiněnang i kitẹ sarung mẹ̌sul᷊ung dingangu tiněnang i Kristus. (Flp. 2:5) Rohkẹ̌ masusi sarung mẹ̌tul᷊ung si kitẹ měnděmẹ kapulu nẹ̌sal᷊a dingangu měnodẹ sipatẹ̌ makal᷊uasẹ̌ Mawu. (Gal. 5:16, 22, 23) Mạeng i kitẹ nakasingkạ orasẹ̌ ini i kitẹ kětạeng mětẹ̌tiněna soal u arětạ dingangu karal᷊uasẹ̌, abe makadodọ naung. I kitẹ harusẹ̌ turusẹ̌ mẹ̌dorong rohkẹ̌ masusi bọu Yehuwa tadeạu turusẹ̌ měkoạ barang mapia. (Luk. 11:13) Pẹ̌tahěndung si rasul Petrus. Pẹ̌sěnsul᷊ẹ i sie tawe nẹ̌tiněna kere i Kristus. (Mat. 16:22, 23; Luk. 22:34, 54-62; Gal. 2:11-14) Katewe i sie tawe něngědo nẹ̌tawakal᷊i, kụ Yehuwa nẹ̌tul᷊ung si sie. Kakạrěngụe, i Petrus nẹ̌tiněna kere i Kristus. I kitẹ lai botonge kerene.

¹³ Su ral᷊ungu surate, i Petrus nẹ̌sěbạ manga sipatẹ̌ botonge makatul᷊ung si kitẹ. (Basa 2 Petrus 1:5-8.) I kitẹ lai harusẹ̌ mẹ̌tawakal᷊i mẹ̌tingkědang, mẹ̌tatahang, mẹ̌kakěndagẹ̌, dingangu měnodẹ sipatẹ̌ wal᷊inẹ. Ěllo-ěllo i kitẹ botonge mẹ̌tiněna, ’Sahěllo ini, sipatẹ̌ sude takụ todẹkang tadeạu kerohanianku matoghasẹ̌?’

14. Su pěbawiahẹ̌ ěllo-ěllo, kerea měnodẹ i kitẹ kai taumata rohani?

¹⁴ Mạeng i kitẹ mẹ̌tiněna kere i Kristus, ene sarung mal᷊ahẹ bọu kakanoạ i kitẹ su tampạ pěhal᷊ẹ̌kang arau su sikol᷊ah, bọu bawerang i kitẹ, dingangu bọu putusang koateng i kitẹ ěllo-ěllo. Ual᷊ingu nakoạ taumata rohani, i kitẹ tawe měmala barang bal᷊inẹ makarusa pẹ̌dal᷊ahapị i kitẹ dingangi Yehuwa. Su tempong piạ sasal᷊ukạ, i kitẹ sarung mẹ̌těngkarau bọu hal᷊ẹ̌ ene. Těntal᷊ang bědang tawe někoạ putusang, pẹ̌tiněnạ kal᷊imona: ’Prinsip Alkitapẹ̌ sude makatul᷊ung si siạ? Apa sarung koateng i Kristus su situasi kere ini? Putusang kerea makal᷊uasẹ̌ naung i Yehuwa?’ Mapaelẹ̌ mạeng cara mẹ̌tiněna kerene makoạ kebiasaan i kitẹ. Hakị u ene, mahịe i kitẹ měngěndung piram baụ situasi aramanung tẹ̌tatěngong i kitẹ. Bọu haghing situasi ene, i kitẹ sarung měmanda prinsip Alkitapẹ̌ sude makatul᷊ung si kitẹ měkoạ putusang nihino.

15, 16. Kerea mẹ̌tiněna kere i Kristus makatul᷊ung si kitẹ měkoạ putusang soal u (a) měmile kawing? (b) měmile hapị?

¹⁵ Měmile kawing. Prinsip Alkitapẹ̌ su 2 Korintus 6:14, 15. (Basa.) Paulus napakal᷊ahẹ cara taumata rohani mẹ̌tiněna ene sěbạe nẹ̌tatěntang dingangu  taumata jasmani. Kerea prinsip ini makatul᷊ung si kau měmile kawing?

¹⁶ Měmile hapị. Prinsip Alkitapẹ̌e su 1 Korintus 15:33. (Basa.) Taumata rohani tawe mědal᷊ahapị dingangu taumata apang makal᷊ome pangangimange. Pẹ̌tiněna lai kerea prinsip ini makatul᷊ung si kau su situasi wal᷊inẹ. Contone, kerea prinsip ini makatul᷊ung si kau měkoạ putusang soal u jejaring sosial? Kerea prinsip ini makatul᷊ung si kau měkoạ putusang soal u měnalang game online dingangu taumata i kau tawe kěnalẹ̌?

17-19. Kerea tiněna rohani makatul᷊ung si kau (a) tawe tumol᷊e kegiatan tawẹ gunane? (b) piạ cita-cita mapaelẹ̌? (c) mạeng piạ pẹ̌sasitori?

¹⁷ Kegiatan makawahaya kerohanian i kitẹ. Piạ laingatẹ̌ penting su Ibrani 6:1. (Basa.) I kitẹ harusẹ̌ mẹ̌těngkarau bọu ”sạbarang haghi tạ kěhase” apa? Ini kai kal᷊awọu kegiatan tawẹ gunane dingangu tawe makatoghasẹ̌ kerohanian i kitẹ. Laingatẹ̌ soal u sạbarang haghi tạ kěhase makatul᷊ung si kitẹ mẹ̌tiněna, ’Kegiatan ini piạ gunane arau tala? Apa iạ harusẹ̌ tumol᷊e bisnis ini? Kawe nụe iạ tawe harusẹ̌ tumol᷊e kelompok měmal᷊ui dunia ini tadeạu makoạ mapia?’

¹⁸ Cita-cita rohani. Su Nasẹ̌ su Wul᷊udẹ̌, Yesus něgělị sasasa mapaelẹ̌ soal u cita-cita. (Mat. 6:33) Taumata jasmani měmělọ Kararatuang u Mawu su tampạ kahumotongange su pěbawiahi sire. Prinsip ini makatul᷊ung si kitẹ mẹ̌tiněna: ’Apa iạ mẹ̌kuliah mạeng seng masueng sikol᷊ane? Apa iạ harusẹ̌ měnarimạ hal᷊ẹ̌ gělịkang si siạ?’

¹⁹ Pẹ̌sasitori. Sasasang i Paulus gunang tau Sahani su Roma, makatul᷊ung si kitẹ su tempong piạ pẹ̌sasitori. (Rm. 12:18) Ual᷊ingu nẹ̌těno si Kristus, i kitẹ mẹ̌tawakal᷊i ”mẹ̌biahẹ̌ marame ringangu kěbị taumata”. Apa koateng i kitẹ mạeng piạ pẹ̌sasitori? Apa iạ masigěsạ měnarimạ těgung taumata wal᷊inẹ? Arau apa taumata wal᷊inẹ masingkạ iạ kai puluang mẹ̌dame?​—Yak. 3:18.

20. Kawe nụe i kau mapulu mẹ̌tawakal᷊i makoạ taumata rohani?

²⁰ Manga contoh ini něnodẹ kerea prinsip Alkitapẹ̌ makatul᷊ung si kitẹ měkoạ putusang mapaelẹ̌, kụ něnodẹ i kitẹ lẹ̌ahạkengu rohkẹ̌ u Mawu. Mạeng piạ tiněna rohani, pěbawiahi kitẹ sarung mal᷊uasẹ̌. I Robert, nisěbạ humotong, naul᷊ị, ”Su apang iạ nědal᷊ahapị mapia dingangi Yehuwa, iạ nakoạ kawing dingangu papạ limembong mapia. Iạ sěbạe mal᷊uasẹ̌.” Mạeng i kitẹ mẹ̌tawakal᷊i makoạ taumata rohani, i kitẹ makapěndang lawọ gunane. Pěbawiahi kitẹ orasẹ̌ ini makoạ limembong mal᷊uasẹ̌, dingangu su tempo mahi i kitẹ sarung makatarimạ ”pẹ̌bawiahẹ̌ tutune”.​—1 Tim. 6:19.