Kangerẹ i kitẹ nẹ̌pikirẹ̌ kerene ual᷊ingu bawera su Ibrani 12:16. Su ayatẹ̌ ene niul᷊ị i Esau ”tawẹ pandungange su pẹ̌bawiahẹ̌ marohkẹ̌” arau tawe měngẹ̌ngarěga hal᷊ẹ̌ masusi, kụ i sie něgělị si Yakub hakẹ̌ ”kal᷊aiakange, tumbạeng ual᷊ingu kaěng sělamạ”. Hakị u ene i kitẹ nẹ̌pikirẹ̌, su tempong i Yakub něnarimạ hakẹ̌ ’kal᷊aiakang’, hak istimewa makoạ i upung i Mesias lai nakoạ bageange.​—Mat. 1:2, 16, Terjemahan Dunia Baru, NW; Luk. 3:23, 34.

Katewe, mạeng i kitẹ měmarikěsa běke wal᷊inẹ su ral᷊ungu Alkitapẹ̌, i kitẹ makasingkạ sěngkatau esẹ tawe harusẹ̌ anạ kaiakanenge buhudeng botonge makoạ i upung i Mesias. Mahịe i kitẹ měmanda piram baụ běkene:

Anạ esẹ i Yakub kaiakanenge bọu i Lea ute i Ruben. Mạeng anạe esẹ kaiakanenge bọu i Rahel ute i Yusup. Su tempong i Ruben někoạ barang amoral, i sie kinailangengu hakẹ̌ anạ kaiakanenge, kụ hakẹ̌ ene naal᷊ing si Yusup. (Pěnd. 29:31-35; 30:22-25; 35:22-26; 49:22-26; 1 Kar. 5:1-2) Maning kerene, Mesias bal᷊inẹ hiteng i Ruben arau i Yusup. I sie kai hiteng i Yehuda, anạ kaěpạe bọu i Yakub dingangi Lea.​—Pěnd. 49:10.

Lukas 3:32 nẹ̌sěbạ limang katau i upung i Mesias. Kụ aramanung i sire kai anạ kaiakanenge. Contone, i Boas kai papạ i Obed, kụ i Obed kai papạ i Isai.​—Rut. 4:17, 18-22; 1 Kar. 2:10-12.

I Daud anạ i Isai, bal᷊inẹ anạ kaiakanenge. I sie kai anạ katuariange bọu ual᷊u tahatuari. Katewe, i Mesias siměpụ bọu hiteng i Daud. (1 Sam. 16:10, 11; 17:12; Mat. 1:5, 6, NW) Kerene lai, i upung tuhụe bọu i Mesias kai  i Salomo, kụ i sie bal᷊inẹ anạ i Daud kaiakanenge.​—2 Sam. 3:2-5.

Ini bal᷊inẹ mangal᷊ene anạ esẹ kaiakanenge tawe penting. Anạ esẹ kaiakanenge makatarimạ hak istimewa tawe nikatarimạu anạ bal᷊inẹ. Pẹ̌sěnsul᷊ẹ, i sie makoạ těmbonang tuhụe bọu keluarga ene dingangu makatarimạ pusakạ dua kali lipat.​—Pěnd. 43:33; Pang. 21:17; Yos. 17:1.

Katewe hakẹ̌ kal᷊aiakang botonge maal᷊ing sarang anạ esẹ wal᷊inẹ. Su tempong i Abraham něngoro si Ismael pěngal᷊ing, hakẹ̌ kal᷊aiakang i Ismael naal᷊ing si Ishak. (Pěnd. 21:14-21; 22:2) Kụ kere seng niěndungang i kitẹ, hakẹ̌ kal᷊aiakang i Ruben naal᷊ing si Yusup.

Mạeng kerene, sěběnarẹ̌e i Paulus nẹ̌bisara soal u apa su Ibrani 12:16? Su ayatẹ̌ ene niul᷊ị, ”Pakatanure wue u kumbahang piạu mawuang arau piạ u tawẹ pandungange su pẹ̌bawiahẹ̌ marohkẹ̌ e, kere nạung kẹ̌koateng i Esau. I sie nẹ̌bal᷊ụ u kal᷊aiakange, tumbạeng ual᷊ingu kaěng sělamạ.”

Su ayatẹ̌ ini, i Paulus tawe nẹ̌bisara soal i upung i Mesias. I sie kai něgělị laingatẹ̌ gunang tau Sahani. I sie naul᷊ị si sire, ”Kụ pěmpahundal᷊engko sidutu sural᷊eng matene” tadeạu ”kumbahang sarang piạu sěngkatau sumẹ̌bang bọu kapiang tatal᷊ěntụ u Mawu”. Katewe, i sire tawe makatarimạ tatal᷊ěntụ u Mawu mạeng i sire měkoạ barang amoral. (Ibr. 12:12-16) Kụ mạeng ene nariadi, i sire nakoạ kere i Esau tawe měngẹ̌ngarěga hal᷊ẹ̌ rohani. I sire limembong mapulu měkoạ apa ikẹ̌kapulung i sire.

Manga ělang i Yehuwa su tempong tamai biasa měgẹ̌gělị sasěmbah si Yehuwa, kụ ěndịu i Esau nakaěbạ hak istimewa měgělị sasěmbah ene. (Pěnd. 8:20, 21; 12:7, 8; Ayb. 1:4, 5) Katewe, i Esau kětạeng mapulu měkoạ apa ikẹ̌kapuluange, kụ hakẹ̌ kal᷊aiakange nisal᷊iune dingangu kaěng. Aramanung i Esau madiri makapěndang sigěsạ kere seng nitěbal᷊i Yehuwa sarung kapěndangengu manga hiteng i Abraham. (Pěnd. 15:13) I Esau lai tawe měngẹ̌ngarěga hal᷊ẹ̌ masusi su tempong i sie nẹ̌kawing dingangu duang katau wawine bal᷊inẹ ělang i Yehuwa, kụ ene nakasusah naungu matimade. (Pěnd. 26:34, 35) I sie sěbạe nẹ̌tatěntang dingangi Yakub. I Yakub nẹ̌kawing dingangu ělang i Yehuwa.​—Pěnd. 28:6, 7; 29:10-12, 18.

Bọu běke ini, apa kaěndungang i kitẹ soal u manga i upung i Mesias? Pirang katau bọu i sire kai anạ kaiakanenge, sěnggạ e wue bal᷊inẹ. Tau Yahudi lai masingkạ ene, ual᷊ingu i sire něngakui i Kristus kai marěnta bọu hiteng i Daud, anạ i Isai katuariange.​—Mat. 22:42.