1, 2. Apa buktine Yehuwa maělugẹ̌?

YEHUWA kai Mawu maělugẹ̌. Kěbị apang piạ si kitẹ asal᷊e bọu i Sie. I Sie měnanaghuang kěbị barang maarěga su dunia, kụ i Sie něpakẹ ene tadeạu kěbị diadikang tatapẹ̌ biahẹ̌. (Mzm. 104:13-15; Hag. 2:8) Bọu Alkitapẹ̌, i kitẹ nakaěndung pẹ̌sěnsul᷊ẹ Yehuwa měkẹ̌koạ mukjizat gunang měnadia kebutuhan u manga ělang’E.

² Contone, Yehuwa něnadia manna dingangu akẹ karěngụe 40 su taunge gunang tau Israel su tempong i sire měbẹ̌biahẹ̌ su kěhu l᷊inggi. (Sas. 16:35) Hakị u ene, kěbị kebutuhan i sire nasukụ. (Neh. 9:20, 21) Bọu ene, Yehuwa něgělị kawasa si nabi Elisa gunang mapakal᷊awọ lanang sěngkatau wawine wal᷊u masatia. Gaghělị u Mawu ene nakatul᷊ung si sie němaehẹ̌ utange dingangu botonge piạ doitẹ̌ gunang i sire  tahanạ. (2 Rat. 4:1-7) Yehuwa lai něgěli si Yesus kawasa gunang měnadia kaěng dingangu doitẹ̌ mạeng perlu.​—Mat. 15:35-38; 17:27.

3. Apa ěndungang i kitẹ su pěngangěndungang ini?

³ Yehuwa botonge měpakẹ apa seng nipile-Ne gunang měnadia kebutuhan manga diadikang’E. Maning kerene, i Sie mapulu manga ělang’E měgělị sumbangan gunang hal᷊ẹ̌ u organisasi-Ne. (Sas. 36:3-7; basa Baweran Salomo 3:9.) Kawe nụe Yehuwa mělẹ̌harapẹ̌ i kitẹ měgělị arěta i kitẹ si Sie? Kerea manga ělang i Yehuwa su tempong tamai nẹ̌tul᷊ung hal᷊ẹ̌ i Yehuwa? Kerea organisasi něpakẹ̌ doitu sumbangan i kitẹ? Ene sarung ěndungang i kitẹ su pěngangěndungang ini.

4. Kawe nụe i kitẹ měngonggọ si Yehuwa?

⁴ I kitẹ měngonggọ si Yehuwa ual᷊ingu i kitẹ makěndagẹ̌ dingangu měngarěga si Sie. Su tempong mẹ̌tiněna apa seng nikoạ i Yehuwa gunang i kitẹ, naung i kitẹ sěbạe nakanoạ. Datu Daud nakapěndang kerene su tempong i sie nělahẹ apa sarung paketang gunang měkoạ bait. I sie naul᷊ị kěbị apang nitarimạ i kitẹ asal᷊e bọu Yehuwa, hakị u ene maning apa gělịkang i kitẹ si Sie, kěbị ene asal᷊e mang bọu i Sie.​—Basa 1 Kararatuang 29:11-14.

5. Kerea Alkitapẹ̌ něnodẹ měngonggọ dingangu kaguwạu naung kai bageang penting bọu ibadang kitẹ?

⁵ Měngonggọ si Yehuwa lai sěmbaụ cara měngibadah si Sie. Su sěmbaụ penglihatan, rasul Yohanes nakaringihẹ̌ manga ělang i Yehuwa su sorga naul᷊ị, ”Samatang i Kau Mawu e wotonge makatarimạ u raralo, adatẹ̌ dingangu kawasa. U kai i Kau něndiadi patikụ sabarange, ringangu kai su ral᷊ungu kapulun’U l᷊ai patikụ e seng nariadi dingangu nẹ̌biahẹ̌.” (Pěl. 4:11) Nal᷊ahẹ, kětạeng Yehuwa botonge makatarimạ kěbị kawawantugẹ̌ dingangu laadatẹ̌. Hakị u ene, i kitẹ mapulu měgělị kapaelange si Sie. Bọu i Musa, Yehuwa nẹ̌parenta su tau Israel gunang pěkoạ tatělu acara sabang taung. Sěmbaụ cara i sire měngibadah si Yehuwa su acara ene kai měngonggọ si Yehuwa. I sire apang duměnta si Yehuwa ”harusẹ̌ mẹ̌bawa sasěmba”. (Pang. 16:16) Orasẹ̌ ini lai, bageang penting bọu ibadang kitẹ ene kai měngonggọ dingangu kaguwạu naung. Mạeng měngonggọ, i kitẹ měnodẹ i kitẹ měngarěga dingangu mẹ̌tul᷊ung hal᷊ẹ̌ u organisasing Yehuwa.

6. Kawe nuẹ piạ gunane mạeng i kitẹ měngonggọ? (Pěmanda gambarẹ̌ humotong su pěngangěndungang ini.)

⁶ I kitẹ sarung makaěbạ gunane mạeng i kitẹ měngonggọ bal᷊inẹ kětạeng měnarimạ. (Basa Munara’m Manga Rarolohang 20:35.) Kěnang pẹ̌tiněna piạ sěngkatau anạ kadodọ něpakẹ jajan nighělị u matimade kụ němělị hadiah gunang matimade. Kerea pěndangu matimade? Arau, kěnang pẹ̌tiněna piạ sěngkatau perintis nětanạ dingangu matimade, kụ i sie něgělị doitẹ̌ gunang měmaehẹ̌ sewam bal᷊e arau měměli kaěng gunang keluargane. Matimade ěndịu tawe  něharapẹ̌ i sie měkoạ ene, katewe i sire něnarimạ ene. Kawe nụe? Ual᷊ingu gaghělị u anạ ene něnodẹ i sie měngarěga kěbị apang nikoạ u matimade gunang i sie. Kerene lai, Yehuwa masingkạ piạ gunane si kitẹ mạeng měngonggọ arětạ i kitẹ.

7, 8. Kerea manga ělang i Yehuwa su tempong tamai nakoạ tatěnoěng soal u měgělị sumbangan (a) gunang proyek khusus? (b) gunang mẹ̌tul᷊ung hal᷊ẹ̌ i Yehuwa?

⁷ Alkitapẹ̌ nẹ̌běke kerea manga ělang i Yehuwa něgělị sumbangan gunang hal᷊ẹ̌ i Yehuwa. Pẹ̌sěnsul᷊ẹ i sire měgělị sumbangan gunang proyek khusus. Contone, Musa něgausẹ̌ tau Israel tadeạu měgělị sumbangan gunang měkoạ tabernakel. Datu Daud lai někoạ kerene su tempong měmětị bait. (Sas. 35:5; 1 Kar. 29:4-9) Su pěmamarentang Datu Yoas, manga imang saụ někoạ pakapia bait kụ něpakẹ doitẹ̌ sumbangan bọu rakyatẹ̌. (2 Rat. 12:4, 5) Su abad humotong, tau Sahani nakaringihẹ̌ piạ karal᷊unusẹ̌ su Yudea kụ anạu sěmbaụ sene harusẹ̌ itul᷊ung. Hakị u ene, i sire němutusẹ̌ měgělị tuhụ apa botonge ikaghělị i sire gunang anạu sěmbaụ su Yudea.​—MMR. 11:27-30.

⁸ Manga ělang i Yehuwa lai něgělị sumbangan gunang mẹ̌tul᷊ung si sire apang nakoạ těmbonang su hal᷊ẹ̌’E. Contone, su hukung Musa, tau Lewi tawe nakaěbạ pusakạ kere manga suku wal᷊inẹ. Hakị u ene, tau Israel něgělị tahạpul᷊o bọu apang piạ si sire gunang tau Lewi. Ene nakakoạ tau Lewi turusẹ̌ někoạ hal᷊ẹ̌ i sire su tabernakel. (Pẹ̌t. 18:21) Kerene lai, manga wawine maělugẹ̌ něpakẹ arětạ i sire gunang mẹ̌tul᷊ung si Yesus dingangu manga murite.​—Luk. 8:1-3.

9. Su tempong tamai, kerea manga ělangu Mawu botonge něgělị sumbangan?

⁹ Kerea manga ělangu Mawu botonge nakaghělị kěbị sumbangan ene? Gunang měkoạ tabernakel, tau Israel aramanung něgělị barang maarěga niwawang i sire bọu Misirẹ̌. (Sas. 3:21, 22; 35:22-24) Su abad humotong, piạ tau Sahani nẹ̌bal᷊ụ arětạ i sire, kere wal᷊e arau ěntana, kụ doite nighělị su manga rasul. Bọu ene, manga rasul něgělị doitẹ̌ ene su anạu sěmbaụ apang masusah wiahe. (MMR. 4:34, 35) Tau Sahani wal᷊inẹ lai biasane měhae doitẹ̌ gunang koateng sumbangan. (1 Kor. 16:2) Hakị u ene, bọu taumata sěbạe kalạ sarang sěbạe masusah, kěbị botonge měgělị sumbangan.​—Luk. 21:1-4.

10, 11. (a) Kerea i kitẹ botonge mẹ̌těno kal᷊aělugẹ̌ manga ělangu Mawu su tempong tamai? (b) Kerea pěndangu soal u mẹ̌tul᷊ung hal᷊ẹ̌ u Kararatuang?

¹⁰ Orasẹ̌ ini, aramanung i kitẹ dẹ̌dorongang měgělị sumbangan gunang hal᷊ẹ̌ khusus. Ěndịu Banalang Kararatuang i kitẹ saụ koateng pakapia arau měmětị buhu. Arau aramanung kantor cabang lai harusẹ̌ saụ koateng pakapia. Bọu ene, i kitẹ lai  botonge měgělị sumbangan gunang kebaktian. Arau piạ anạu sěmbaụ i kitẹ su tampạ bal᷊inẹ nikahombangeng bencana alam kụ harusẹ̌ itul᷊ung. Sumbangan i kitẹ lai makatul᷊ung hal᷊ẹ̌ u utusan injil, perintis istimewa, pengawas wilayah, dingangu anạu sěmbaụ apang mělẹ̌hal᷊ẹ̌ su kantor pusat arau lai su kantor cabang. Sidang i kitẹ aramanung měnděndingọ sumbangan gunang měkoạ Banalang Kararatuang dingangu Balai Kebaktian su patikụ dunia.

¹¹ I kitẹ kěbị botonge měgělị gunang mẹ̌tul᷊ung organisasing Yehuwa su ěllo pěngěnsuenge ini. Kal᷊awokange sumbangan nighělị tawẹ apa arenge. Su tempong něgělị sumbangan su kotak sumbangan su Banalang Kararatuang arau bọu situs jw.org, i kitẹ tantu tawe mẹ̌běke su taumata wal᷊inẹ pira nighělị i kitẹ. Katewe kerea mạeng i kau nẹ̌pěndang sumbangan nighělị u tumanịu mahal᷊i? Sěběnarẹ̌e, kal᷊awokange sumbangan nitarimạ u organisasi asal᷊e bọu lawọ sumbangan dararodọ bal᷊inẹ bọu piram baụ sumbangan gaghaghuwạ. Anạu sěmbaụ i kitẹ apang mahal᷊i roite nẹ̌těno kal᷊aělugẹ̌ tau Sahani su Makedonia. I sire ”masasusa wiahe”, katewe i sire nẹ̌dorong tadeạu botonge měgělị sumbangan.​—2 Kor. 8:1-4.

12. Kerea organisasi nẹ̌tawakal᷊i něpakẹ pakapia doitu sumbangan?

¹² Badan Pimpinan masatia dingangu matahuěna měpakẹ sumbangan. (Mat. 24:45) I sire mědẹ̌doa tadeạu botonge měkoạ putusang mapaelẹ̌, kụ lai maingatẹ̌ su tempong měkoạ rencana kerea měpakẹ doitẹ̌ ene. (Luk. 14:28) Su tempong Alkitapẹ̌, manga esẹ apang nakaěbạ tanggung jawab měngurusẹ̌ sumbangan něngatorẹ̌ tadeạu ene kětạeng paketang gunang ibadah si Yehuwa. Contone, Esra nẹ̌bal᷊ị sarang Yerusalem nẹ̌bawa sumbangan bọu datung Persia, ene kai bul᷊aeng, sal᷊aka, dingangu barang maarěga wal᷊inẹ. Mạeng orasẹ̌ ini arěgane nal᷊iu bọu 1,3 triliun rupiah. Esra masingkạ sumbangan ene kai gaghělị bọu Yehuwa. Hakị u ene, i sie něgělị těgụ tadeạu i sire apang mẹ̌bawa sumbangan ene harusẹ̌ měndiagạ pakapia, ual᷊ingu i sire lumiu tampạ piạ lawọ bahaya. (Esr. 8:24-34) Rasul Paulus lai bọu něngomol᷊ẹ̌ sumbangan gunang tau Sahani apang nasusah su Yudea. I sie němile tadeạu apang mẹ̌bawa sumbangan ene ”matul᷊idẹ̌ bal᷊inewe kětạu su těngon Mawu e, kaiso su těngon taumata e lai”. (Basa 2 Korintus 8:18-21.) Orasẹ̌ ini, organisasing kitẹ nẹ̌těno si Esra dingangi Paulus, kụ něpakẹ sumbangan pakapia.

13. Buhu ini, kawe nụe organisasi někoạ penyesuaian?

¹³ Sěmbaụ keluarga ěndịu harusẹ̌ měhematẹ̌ tadeạu doitẹ̌ masěbang tawe limembong gěguwạ bọu doitẹ̌ nikaěbạ. Arau i sire ěndịu harusẹ̌ mẹ̌tawakal᷊i měbiahẹ̌ sederhana tadeạu makakoạ mal᷊awọ hal᷊ẹ̌ i Yehuwa. Kerene lai organisasing Yehuwa. Buhu ini, piạ lawọ proyek buhu, kụ pẹ̌sěnsul᷊ẹ, lawọ doitẹ̌ napakẹ sul᷊ungu nitarimạ. Hakị u ene, kere keluarga kanini, organisasi lai nẹ̌tawakal᷊i něhematẹ̌ dingangu někoạ hal᷊ẹ̌ limembong sederhana, tadeạu sumbangan i kitẹ botonge paketang pakapia gunang hal᷊ẹ̌ i Yehuwa.

14-16. (a) Sumbangan i kitẹ nipakẹ gunang apa? (b) Kerea i kau hala nakapěndang gunane bọu apa nisadiangu organisasi?

¹⁴ Lawọ taumata apang seng marěngụ  nakoạ ělang i Yehuwa naul᷊ị orasẹ̌ ini i kitẹ nakatarimạ lawọ barang mapia bọu organisasi sul᷊ungu kangerẹ. Contone, si kitẹ orasẹ̌ ini piạ jw.org dingangu JW Broadcasting. Piạ lai Kitab Suci Terjemahan Dunia Baru su lawọ bawera. Su taung 2014/2015, Kebaktian Internasional ”Teruslah Cari Dahulu Kerajaan Allah” nikoạ su piram baụ stadion gaghaghuwạ su 14 soa su patikụ dunia. Kěbị apang diměnta sene mal᷊uasẹ̌!

¹⁵ Lawọ taumata něnodẹ tatarimakasẹ i sire ual᷊ingu apa seng nikoạ u organisasi. Contone, sěngkawingang měngẹ̌nginjilẹ̌ su Asia němohẹ, ”I kami nakaěbạ tugasẹ̌ su soa kadodọ. Pẹ̌sěnsul᷊ẹ, i kami nakapěndang i kami nahae hala, kụ niwul᷊e su haghing tampạ piạ lawọ anạu sěmbaụ měkẹ̌koạ hal᷊ẹ̌ i Yehuwa. Katewe, su tempong nẹ̌biala JW Broadcasting, i kami saụ nakatahěndung i kami kai bageang bọu persaudaraan su patikụ dunia. Anạu sěmbaụ su tampạ i kami lai sěbạe mal᷊uasẹ̌ mẹ̌biala JW Broadcasting. I sire hanesẹ̌ maul᷊ị su apang bọu nẹ̌biala, i sire nakapěndang limembong marani dingangu Badan Pimpinan. I sire sěbạe mal᷊uasẹ̌ nakoạ bageang bọu organisasing Mawu.”

¹⁶ Su patikụ dunia, maraning 2.500 Banalang Kararatuang nikoạ arau saụ nikoạ pakapia. Sěmbaụ sidang su Honduras naul᷊ị dongkeng kangerẹ i sire lụipi piạ Banalang Kararatuang, kụ orasẹ̌ ini iping i sire seng nariadi. I sire němohẹ, ”I kami sěbạe mal᷊uasẹ̌ nakoạ bageang bọu keluargang Yehuwa dingangu persaudaraan su patikụ dunia.” Lawọ lai nakapěndang kerene su tempong nakatarimạ Alkitapẹ̌ arau publikasi su werang i sire hala, su tempong anạu sěmbaụ nẹ̌tul᷊ung si sire su tempong piạ bencana alam, arau su tempong i sire nakasilo hasilẹ̌ mapaelẹ̌ bọu  kesaksian metropolitan dingangu něnginjilẹ̌ su tampạ piạ lawọ taumata.

17. Apa buktine Yehuwa nẹ̌tul᷊ung hal᷊ẹ̌ u organisasi orasẹ̌ ini?

¹⁷ Lawọ taumata bal᷊inẹ Sahiding Yehuwa mạherang su tempong nakasingkạ i kitẹ botonge někoạ kěbị ene ual᷊ingu piạ sumbangan sukarela. Sěngkatau bosẹ̌ u perusahaan gěguwạ bọu nakoạ sarang sěmbaụ percetakan i kitẹ. I sie naherang ual᷊ingu kěbị hal᷊ẹ̌ su tampạ ene nariadi ual᷊ingu piạ sumbangan kụ mělahal᷊ẹ̌e tawe wẹ̌baehang. I sie naul᷊ị ene tawe masuẹ̌ su akal᷊ẹ̌. I kitẹ lai setuju! I kitẹ masingkạ kěbị ene nariadi kětạeng ual᷊ingu piạ tul᷊umang bọu Yehuwa.​—Ayb. 42:1-2.

18. (a) Al᷊amatẹ̌ apa kaěbakeng mạeng i kitẹ měgělị sumbangan gunang hal᷊ẹ̌ u Kararatuang? (b) Kerea carane měněntiro anạ i kitẹ arau taumata wuhu gunang měgělị sumbangan?

¹⁸ Yehuwa něngonggọ si kitẹ hak istimewa dingangu kesempatan gunang mẹ̌tul᷊ung hal᷊ẹ̌ u Kararatuang. I Sie něgělị jaminan mạeng i kitẹ měkoạ ene, i Sie sarung měngal᷊amatẹ̌ si kitẹ. (Mal. 3:10) Yehuwa nẹ̌diandi mạeng i kitẹ maělugẹ̌, i kitẹ mang tawe kakawusang. (Basa Baweran Salomo 11:24, 25.) I Sie lai naul᷊ị i kitẹ sarung mal᷊uasẹ̌ mạeng měngonggọ, ual᷊ingu ”limembong makariangkamang e měngonggọ, sul᷊ungu měnarimạ”. (MMR. 20:35) Bọu bawera dingangu kakanoạ, i kitẹ botonge měněntiro anạ i kitẹ arau taumata wuhu kerea carane i sire měgělị sumbangan dingangu makatarimạ lawọ al᷊amatẹ̌.

19. Su apang bọu něngěndung bageang ini, apa koatengu?

¹⁹ Kěbị apang piạ si kitẹ ene asal᷊e bọu Yehuwa. Su tempong i kitẹ měngonggọ si Sie, i kitẹ něnodẹ i kitẹ makěndagẹ̌ dingangu měngẹ̌ngarěga apa nikoạ’E gunang i kitẹ. (1 Kar. 29:17) Su tempong tau Israel něgělị sumbangan gunang měkoạ bait, i sire ”něngonggọ dingangu naung mal᷊uasẹ̌ su MAWU ringangu i sire e mal᷊uasẹ̌”. (1 Kar. 29:9) Mahịe i kitẹ turusẹ̌ měngonggọ si Yehuwa bọu apa seng nionggọ’E si kitẹ. I kitẹ mang makaěbạ karal᷊uasẹ̌.