1-3. (a) Aramanung kange Mazmurẹ̌ 147 niwohẹ? (b) Apa kaěndungang i kitẹ bọu Mazmurẹ̌ 147?

KASAUANGE i kitẹ mẹ̌dalo taumata ual᷊ingu bawerane dingangu kakakoạe. Kerene lai i kitẹ tantu mapulu mẹ̌dalo Mawu Yehuwa! I kitẹ mẹ̌dalo si Sie ual᷊ingu kawasa-Ne masělahẹ̌, kụ kẹ̌kasilong i kitẹ bọu diandikang’E makạlaherang. I kitẹ lai mẹ̌dalo ual᷊ingu i Sie sěbạe makěndagẹ̌ si kitẹ, i Sie něgělị Ahus’E nakoạ tatěbusẹ̌.

² Su tempong mẹ̌basa Mazmurẹ̌ 147, mal᷊ahẹ měmamohẹ Mazmurẹ̌ ini mapulu-pulu mẹ̌dalo si Yehuwa. I sie lai mapulu taumata wal᷊inẹ mẹ̌dalo Mawu sěngkasio ringange.—Basa Mazmurẹ̌ 147:1, 7, 12.

³ I kitẹ běga i sai měmamohẹ Mazmurẹ̌ 147. Aramanung i sie měbẹ̌biahẹ̌ su tempong tau Israel nẹ̌bal᷊ị sarang Yerusalem su tempong Yehuwa napakawěbasẹ̌ si sire bọu Babelẹ̌. (Mzm. 147:2) Pemazmur nẹ̌dalo si Yehuwa ual᷊ingu manga ělang’E botonge měngibadah su wanuang i sire hala. Pemazmur lai nẹ̌sěbạ alasang bal᷊inẹ  mẹ̌dalo si Yehuwa. Apa alasange? Kụ kawe nụe i kau botonge mẹ̌bera ”Pẹ̌daloko MAWU”?—Mzm. 147:1.

4. Su tempong Datu Kores napakawěbasẹ̌ tau Israel, kerea pěndang i sire, kụ kawe nụe?

⁴ Kěnang pẹ̌tiněna pěndangu tau Israel su tempong i sire nitaweng su Babelẹ̌. I sire lẹ̌heghesang, tau Babelẹ̌ nẹ̌bera, ”Pẹ̌kantarịko waug’i kami e kakantarị bọu Sion!” Katewe tau Yahudi madiri mẹ̌kantarị ual᷊ingu Yerusalem, tampạ kẹ̌kapuluang i sire, seng niwinasa. (Mzm. 137:1-3, 6) Naungi sire nasusah kụ harusẹ̌ piạ měhiborẹ̌ si sire. Katewe kere seng nitěbal᷊ẹ̌, Yehuwa mang nẹ̌tul᷊ung manga ělang’E. Kerea carane? Datu Kores bọu Persia němatạ Babelẹ̌, kụ i sie nẹ̌bera, ”[Yehuwa] . . . něngoro si siạ pěmẹ̌mětị bal᷊e waug’i Sie su Yerusalem.” Kores lai naul᷊ị su tau Israel, ”Kụ i kamene kěbị e apan nakoạ umatu Ruata e harusẹ̌ pẹ̌sul᷊e sarang paị ene!” (2 Kar. 36:23) Bawera ini tantu nakahiborẹ̌ tau Israel su Babelẹ̌!

5. Tumuhụ pemazmur apa nikoạ i Yehuwa si sire apang naunge nasusah?

⁵ Yehuwa něhiborẹ̌ kěbị tau Israel. Katewe i Sie lai něhiborẹ̌ si sire sěngkatau-sěngkatau. Kerene lai orasẹ̌ ini. Pemazmur němohẹ Mawu ”mapakaul᷊eng apang naunge něnsu arau nasusah”. (Mzm. 147:3) Su tempong i kitẹ masakị arau nasusah naung, pangimangke Yehuwa mapadul᷊i si kitẹ. Yehuwa mapulu měhiborẹ̌ dingangu mapakapia naungi kitẹ. (Mzm. 34:19; Yes. 57:15) I Sie něgělị si kitẹ pelesa dingangu katatoghasẹ̌ tadeạu i kitẹ botonge tumatěngo haghing sigěsạ.—Yak. 1:5.

6. Apa gunane Mazmurẹ̌ 147:4 si kitẹ? (Pěmanda gambarẹ̌ humotong su pěngangěndungang ini.)

⁶ Pemazmur němanda sarang langị kụ nẹ̌bera ’Yehuwa něndekeng kal᷊awọu wituing’ dingangu ”sěmbaụ-sěmbaụ e nigěllirang’E areng”. (Mzm. 147:4) Pemazmur nakasilo manga wituing, katewe i sie wěga kal᷊awọe. Orasẹ̌ ini manga ilmuwan masingkạ piạ miliarẹ̌ e wituing su galaksing kitẹ. Kụ, piạ triliunan galaksi su alam semesta! Taumata tawe makarekeng kal᷊awọe bituing, katewe Měndariadi botonge. I Sie lai něgělị areng su kěbị bituing. (1 Kor. 15:41) Yehuwa masingkạ tampạ u manga wituing, kerene lai i Sie masingkạ si kau. I Sie masingkạ su apa i kau, apa kebutuhan, dingangu apa nikapěndangengu!

7, 8. (a) Yehuwa masingkạ apa soal i kitẹ? (b) Gělịko contoh něnodẹ Yehuwa kai mapadul᷊i.

⁷ Yehuwa masingkạ kasasigěsạu, kụ i Sie mapulu mẹ̌tul᷊ung si kau. (Basa Mazmurẹ̌ 147:5.) Aramanung i kau mẹ̌pěndang kasasigěsạ ene tumanịu mawěhạ, kụ i kau tawe makamampo tumatěngo. Katewe Mawu masingkạ kal᷊al᷊omenu, ”i Sie mětẹ̌tahěndung u i kitẹ e  kětạembeng awul᷊ẹ̌”. (Mzm. 103:14) I kitẹ lai tawe nasukụ hakị u ene i kitẹ masau měkẹ̌koạ pẹ̌sasal᷊a mẹ̌sul᷊ung, kụ ini nakakadodọ naungi kitẹ. I kitẹ ěndịu nẹ̌sasěsilẹ̌ ual᷊ingu nẹ̌sal᷊a wera, piạ kapulu dal᷊akị, arau iri! Yehuwa tawẹ kurange kerene, katewe i Sie sěbạewe masingkạ pěndang i kitẹ.—Yes. 40:28.

⁸ Apa i kau nakapěndang limang Yehuwa nẹ̌tul᷊ung si kau? (Yes. 41:10, 13) Sěngkatau perintis arenge Kyoko, nakapěndang hal᷊ẹ̌ ene. Naunge nakadodọ su tempong něngal᷊ing sarang tampạ tugasẹ̌ buhu. Katewe kerea Kyoko masingkạ Yehuwa nakaěna apa nikapěndangenge? Su sidang buhu, lawọ masingkạ apa nikapěndangenge, kụ i sie mẹ̌sul᷊ung nakaringihẹ̌ Yehuwa nẹ̌bera, ”Iạ makěndagẹ̌ si kau, bal᷊inẹ kětạeng ual᷊ingu i kau perintis, katewe ual᷊ingu i kau kai anạ-Ku kụ i kau seng něgělị pěbawiahu gunang měkoạ kapulu-Ku. Iạ mapulu i kau mal᷊uasẹ̌ nakoạ Sahidi-Ku!” Kerea Yehuwa něnodẹ si kau ”kapelesa-Ne tawẹ kẹ̌takenge”?

9, 10. Kěbutuhan apa kahumotongange sadiaěng i Yehuwa? Gělịko contoh.

⁹ Kaěng, pakeang, dingangu pẹ̌tatanakeng kai kebutuhan i kitẹ. Ěndịu i kau gụgěnggang kaěng mahal᷊i. Katewe Yehuwa něndiadi dunia ini tadeạu makasadia kaěng su kěbị, sarang ”manga pěgol᷊u manụ gagakẹ̌ e kereu mạhungkui” lai nisadiangu kaěnge. (Basa Mazmurẹ̌ 147:8, 9.) Mạeng Yehuwa něgělị kaěngu burung gagak, i Sie lai mang měnadia kebutuhan i kitẹ.—Mzm. 37:25.

¹⁰ Katewe limembong penting, Yehuwa něnadia kaěng rohani tadeạu pangangimang tatapẹ̌ matoghasẹ̌, kụ i Sie něgělị si kitẹ ’karal᷊unsemahẹ̌ tawe ikatiněnang taumata’. (Flp. 4:6, 7) Sěngkatau saudara arenge Mutsuo dingangu kawinge nakapěndang hal᷊ẹ̌ ene. Su tempong piạ tsunami su Jepang taung 2011, i rẹ̌dua maraning mate, katewe i rẹ̌dua nasal᷊amatẹ̌ ual᷊ingu naawị su wowong bal᷊e. Su ěllo ene, maraning kěbị arětạ i rẹ̌dua nailang. Hěbine i rẹ̌dua nẹ̌tikị su lantai dua, tempo ene sěbạewe marěndung kụ matěho. Sěngkarịěllone, i rẹ̌dua nědeạ barang makatoghasẹ̌ pangangimang. I rẹ̌dua kětạeng nakaěbạ Buku Kegiatan Saksi-Saksi Yehuwa 2006. Mutsuo němuka bukẹ̌ ene kụ nakawasa ”Tsunami Terdasyat yang Pernah Dicatat”. Bukẹ̌ ene nẹ̌běkeng linuhẹ̌ kụ nakakoạ tsunami gěguwạ su Sumatra su taung 2004. Su tempong nẹ̌basa pengalaman anạu sěmbaụ, Mutsuo dingangu kawinge simangị. I rẹ̌dua nakapěndang tul᷊umang i Yehuwa nẹ̌tatahino su tempone. Yehuwa lai něgělị kebutuhan bal᷊inẹ. Anạu sěmbaụ bọu tampạ bal᷊inẹ su Jepang, něnadia kaěng dingangu pakeang si rẹ̌dua. Katewe, limembong nakatoghasẹ̌ ute organisasi něndolohẹ̌ pirang katau gunang mẹ̌tiwo si sire. Mutsuo nẹ̌běke, ”Iạ nakapěndang Yehuwa ene su rěduhi kami, kụ něngurusẹ̌ si kami. Ini sěbạe nakahiborẹ̌!” Humotong Mawu měnadia kebutuhan rohani tadeạu pangangangimang tatapẹ̌ matoghasẹ̌, bọu ene i Sie měnadia kěbutuhan bal᷊inẹ.

11. Apa koateng i kitẹ tadeạu makaěbạ tul᷊umang bọu Mawu?

¹¹ Yehuwa ’měhengkẹ taumata kụ lẹ̌ěpisang arau naunge masanạ’. I Sie makěndagẹ̌ dingangu sadia mẹ̌tul᷊ung si kitẹ. (Mzm. 147:6a) Kerea tadeạu makaěbạ tul᷊umang’E? I kitẹ harusẹ̌ mědal᷊ahapị mapia dingang’E. Hakị u ene, si kitẹ harusẹ̌ piạ kasasanạ u naung. (Zep. 2:3) Taumata naunge masanạ, mangimang kětạeng Yehuwa botonge mapakailang kasasigěsạ dingangu apang tawẹ adile. Yehuwa puluang su taumata kerene.

12, 13. (a) I kitẹ harusẹ̌ mẹ̌těngkarau bọu apa tadeạu makaěbạ tul᷊umang bọu Mawu? (b) Yehuwa puluang su taumata kerea?

¹² Katewe ’taumata ral᷊akisẹ̌ ipakasanạ sarang ěntana’. (Mzm. 147:6b) Tantu i  kitẹ madiri makoạ kerene! I kitẹ mapulu Mawu kuměndagẹ̌ si kitẹ. Hakị u ene i kitẹ harusẹ̌ mawěnsing apa ikẹ̌kawěnsingang’E. (Mzm. 97:10) Contone, i kitẹ harusẹ̌ mawěnsing barang amoral. Ini mangal᷊ene i kitẹ mẹ̌těngkarau bọu barang makakoạ si kitẹ měkoạ ene, kere pornografi. (Mzm. 119:37; Mat. 5:28) Ini tawe gampang, katewe i kitẹ harusẹ̌ mẹ̌tawakal᷊i tadeạu makaěbạ al᷊amatẹ̌ bọu Yehuwa.

¹³ I kitẹ tawe makal᷊awang mạeng měpakẹ toghasi kitẹ hala. I kite harusẹ̌ makitul᷊ung si Yehuwa. Apa i Sie mal᷊uasẹ̌ mạeng i kitẹ mangimang su apang kụ biasane kapěngimangengu taumata? Tala, kẹ̌kapulung Yehuwa ”wal᷊inewe kawal᷊o kụ matoghasẹ̌”. Apa I kitẹ harusẹ̌ mangimang su watangeng arau su taumata wal᷊inẹ? Yehuwa puluang bal᷊inẹbe su ”mẹ̌sasekẹ kụ bahani”. (Mzm. 147:10) I kitẹ harusẹ̌ turusẹ̌ mẹ̌doa mẹ̌dorong tul᷊ung si Yehuwa gunang lumawang karal᷊omeng i kitẹ. Yehuwa tawe masahe dumaringihẹ̌ daroang i kitẹ. ”MAWU e puluang su taumata kụ mararingihẹ̌, su taumata kụ tatapẹ̌ mělẹ̌harapẹ̌ kakěndag’E.” (Mzm. 147:11) Ual᷊ingu Yehuwa masatia lai makěndagẹ̌, i Sie sarung mẹ̌tul᷊ung si kitẹ měmatạ kapulu nẹ̌sal᷊a.

14. Pemazmur mangimang apa?

¹⁴ Yehuwa mapulu i kitẹ mangimang i Sie mẹ̌tul᷊ung si kitẹ su tempong sigěsạ. Su tempong tau Israel nẹ̌bal᷊ị sarang Yerusalem, pemazmur nẹ̌tiněna tul᷊umang i Yehuwa. I sie nẹ̌kantarị, ”U i Sie mạmal᷊e manga tukadu pasěllangeng dingangu mạngal᷊amatẹ̌ manga tumanạu e. I Sie e mělẹ̌lukadẹ̌ banuanu tadeạu tatapẹ̌be mal᷊enehẹ̌.” (Mzm. 147:13, 14) Ual᷊ingu Yehuwa měnoghasẹ̌ papal᷊eng pasělangeng, pemazmur tawe natakụ. Ini nakakoạ si sie mangimang Yehuwa sarung měndiagạ manga ělang’E.

15-17. (a) Kerea pěndang i kitẹ su tempong piạ sasal᷊ukạ, katewe kerea Yehuwa něpakẹ Hengetang’E gunang mẹ̌tul᷊ung si kitẹ? (b) Gělịko contoh kerea hengetang u Mawu ’masahawụ’ mẹ̌tul᷊ung si kitẹ.

¹⁵ I kau ěndịu gụgěnggang ual᷊ingu piạ sasal᷊ukạ. Katewe Yehuwa makaghělị  pelesa gunang tumatěngo ene. Pemazmur naul᷊ị, ’Mawu mapasěbangu orone sarang dunia ringangu hengetang’E masahawụ.’ I sie lai nẹ̌bisara soal u salju, namuhẹ̌, dingangu eisẹ̌, kụ naul᷊ị, ”Tawẹ u makatahang těhone.” Bọu ene i sie nẹ̌bera soal i Yehuwa, ”kahiang hengetang’E eisẹ̌ ene e nasue nelehẹ̌”. (Mzm. 147:15-18) Mawung kitẹ masingkạ lai makakoạ kěbị haghi, kere měngahạ eisẹ̌ dingangu salju. I Sie makatul᷊ung si kitẹ tumatěngo sasal᷊ukạ.

¹⁶ Orasẹ̌ ini, Yehuwa měngahạ si kitẹ bọu Hengetang’E, Alkitapẹ̌. Pemazmur nẹ̌bera hengetang i Yehuwa ’masahawụ’ mẹ̌tul᷊ung si kitẹ. Mawu měngahạ si kitẹ su tempo lai cara nẹ̌tatahino. Kěnang pẹ̌tiněna apa seng nikaěbakengu bọu Alkitapẹ̌, publikasi bọu ’ělang masatia ringangu matahuěna’, JW Broadcasting, jw.org, manga penatua, dingangu anạu sěmbaụ. (Mat. 24:45) Apa i kau nakapěndang Yehuwa masahawụ měngahạ si kau?

¹⁷ Sěngkatau saudari arenge Simone nakaěbạ tul᷊umang bọu Hengetang u Mawu. Su pěndange i sie seng tawẹ gunane, kụ Yehuwa tawe mẹ̌padul᷊i si sie. Katewe su tempong nasusah naunge, i sie turusẹ̌ nẹ̌doa nẹ̌dorong tul᷊ung si Yehuwa. I sie lai turusẹ̌ něngěndung Alkitapẹ̌. Simone nẹ̌běke, ”Sabang iạ mẹ̌dorong tul᷊ung si Yehuwa, i Sie mang měgělị toghasẹ̌ dingangu měngahạ si siạ.” Ene nakatul᷊ung si sie piạ tiněna mapia.

18. Hal᷊ẹ̌ maarěga apa seng nighělị si kau, kụ apa alasangu maul᷊ị ”Pẹ̌daloko MAWU”?

¹⁸ Pemazmur masingkạ Yehuwa němile bangsa Israel bọu kěbị wangsa su patikụ dunia gunang makoạ ělang’E. Kětạeng i sire nakatarimạ ”wawera-Ne” dingangu ”tiaha-Ne”. (Basa Mazmurẹ̌ 147:19, 20.) Orasẹ̌ ini, i kitẹ nakaěbạ hal᷊ẹ̌ maarěga mẹ̌bawa arengu Mawu. I kitẹ mẹ̌tarimakasẹ ual᷊ingu nakasingkạ si Sie, piạ Hengetang’E měngahạ si kitẹ, kụ lai botonge mědal᷊ahapị mapia dingang’E. Kere měmamohẹ Mazmurẹ̌ 147, si kitẹ piạ lawọ alasang maul᷊ị, ”Pẹ̌daloko MAWU!” dingangu měgausẹ̌ taumata wal᷊inẹ měkoạ kerene.