Tau Sahani tumol᷊e prinsip Alkitapẹ̌ su tempong měmutusẹ̌ soal u kerea měndiagạ batangeng i sire. Ene mangal᷊ene i sire tawe měpakẹ senjata, kere pistolẹ̌, lutang, arau senjata api wal᷊inẹ gunang měndiagạ si sire mạeng piạ u měndariha. Kěnang pěmanda piram baụ alasange:

Pěbawiahu taumata masusi su těngong Yehuwa. Pemazmur Daud němohẹ soal i Yehuwa, ”I Kau e simbul᷊u patikụ diadikang.” (Mzm. 36:10) Hakị u ene mạeng tau Sahani měmutusẹ̌ měndiagạ batangenge arau arětạe, i sie harusẹ̌ mẹ̌tahěndung apa nikoạe tawe makasilakạ taumata wal᷊inẹ arau makarěntang utang daha.—Pang. 22:8; Mzm. 51:14, Terjemahan Dunia Baru.

Barang pẹ̌paketangu gunang dariagạ ěndịu piạ makakoạ utang daha. Katewe, mạeng piạ lutang, taumata limembong gampang měmate, maning ene sengaja arau tala. * (Pěmanda catatan kaki.) Bọu ene lai taumata měkoạ dal᷊akị ěndịu matakụ, hakị u ene mạeng makasilo lutang, i sie sauneng měndal᷊akị kụ tantu piạ u mate.

Su hěbi maraning papatene Yesus něngoro manga murite pẹ̌bawa peda, katewe timonane bal᷊inẹ gunang měndiagạ batangeng i sire. (Luk. 22:36, 38) Yesus mapulu měněntiro sěmbaụ ěndung maarěga: Manga murite tawe harusẹ̌ mẹ̌dal᷊ia, maning tumatěngo taumata měbẹ̌bawa senjata arau aghidẹ̌. (Luk. 22:52) Sarětạeng i Petrus němotọ tul᷊ingu ělang imang mawantugẹ̌, Yesus něngoro si Petrus, ”Suhịe kapia pedanu e su homane.” Bọu ene Yesus naul᷊ị sěmbaụ prinsip gunang kěbị tau Sahani, ”U kěbị apang měmpamateng peda e, sarung lai mateng peda.”—Mat. 26:51, 52.

Kere nitěbal᷊ẹ̌ su Mikha 4:3, ělangu Mawu ’sarung měmpaněsal᷊ẹ̌ pedang sire koateng bajakẹ̌ dingangu wěngkong sire makoạ pisọ laambesẹ̌’. Tau Sahani tutune kẹ̌kakiral᷊aěng ual᷊ingu i sire puluang mẹ̌dame. I sire tụtol᷊e parentang Mawu kere nilahẹ i rasul Paulus, ”Kereu piạu měmpẹ̌koạ dal᷊aị si kamene abeko wal᷊ise ringangu ral᷊aị” dingangu ”pěhingidẹ̌ko sěngapam botonge mědeạu měbiahẹ̌ mararame ringangu kěbị taumata”. (Rm. 12:17, 18) Maning Paulus nakahombang silakạ, kere piạ u němul᷊aho barang niwawane, i sie tawe limawang atorangu Alkitapẹ̌ gunang měndiagạ watangenge. (2 Kor. 11:26) I sie mangimang su Mawu dingangu masingkạ sasasa bọu Alkitapẹ̌ ene ”limembong piạ gunane wọu aghidẹ̌”.—Měn. 9:18.

Su tau Sahani pěbawiahẹ̌ limembong maarěga bọu arětạ. I kitẹ masingkạ ”pěbawiah’u taumata e wal᷊inewe kahiang kakakalạ e”. (Luk. 12:15) Hakị u ene mạeng piạ taumata měkoạ dal᷊ai madiri mẹ̌bal᷊ui maning i kitẹ seng nẹ̌bisara pakapia, i kitẹ harusẹ̌ tumol᷊e sasasang i Yesus, ”Kumbahang měmal᷊isẹ̌ une si sai apan měkẹ̌koạ dal᷊akị.” Ini mangal᷊ene i kitẹ měmala i sie měngal᷊ạ apa ikẹ̌kapulune. (Mat. 5:39, 40; Luk. 6:29) * (Pěmanda catatan kaki.) Tantu kapaelange  tawe makoạ korban bọu kakanoạ dal᷊aki. I sire ěndịu tawe měkoạ kerene mạeng i kitẹ tumol᷊e sasasang Alkitapẹ̌, tawe mapakasilong arětạ i kitẹ. (1 Yoh. 2:16) Bọu ene lai, i kitẹ tawe tumanịu guměnggang mạeng lampung masingkạ i kitẹ kai Sahiding Yehuwa kụ puluang mẹ̌dame.—Baw. 18:10.

Tau Sahani měngẹ̌ngarěga hati nurani taumata wal᷊inẹ. (Rm. 14:21) Piạ anạu sěmbaụ ěndịu himěkosẹ̌ arau masangkong mạeng makaringihẹ̌ anạu sěmbaụe piạ lutange gunang dariagạ. Ěndịu tumuhụ hukung, i kitẹ piạ hakẹ̌ měpakẹ senjata. Katewe ualingu makěndagẹ̌ su anạu sěmbaụ, i kitẹ tawe měkoạ barang makasangkong si sire.—1 Kor. 10:32, 33; 13:4, 5.

Tau Sahani mapulu makoạ tatěnoěng su taumata wal᷊inẹ. (2 Kor. 4:2; 1 Ptr. 5:2, 3) Mạeng su tau Sahani piạ lutang gunang dariagạ, penatua sarung měgělị sasasa bọu Alkitapẹ̌ si sie. Mạeng i sie měmutusẹ̌ tatapẹ̌ měndesọ lutang ene, i sie tawe makoạ tatěnoěng mapaelẹ̌. Hakị u ene, i sie tawe makaěbạ tanggung jawab arau hak istimewa su sidang. Kerene lai mạeng piạ tau Sahani mělẹ̌hal᷊ẹ̌, kụ su hal᷊ẹ̌ ene i sie harusẹ̌ mẹ̌bawa senjata. Kapaelange mạeng i sie mědeạ hal᷊ẹ̌ bal᷊inẹ. *—Pěmanda catatan kaki.

Tau Sahani harusẹ̌ měmutusẹ̌ hala soal u cara měndiagạ batangeng i sire, keluarga, dingangu arětạ i sire arau lai soal u hal᷊ẹ̌ nipilene. Su tempong měkoạ putusang ene i sie harusẹ̌ tumol᷊e prinsip u Alkitapẹ̌. Mawung i kitẹ mapelesa něgělị si kitẹ prinsip-prinsip ene ual᷊ingu i Sie makěndagẹ̌ si kitẹ. Hakị u ene tau Sahani apang mědẹ̌dal᷊ahapị mapia dingangi Yehuwa němile tawe měndesọ senjata gunang měndiagạ batangenge. I sire masingkạ mạeng i sire mangimang su Mawu dingangu tumol᷊e prinsip u Alkitapẹ̌, i sire sarung makapěndang tạkonsange apa sarang karěngụe.—Mzm. 97:10; Baw. 1:33; 2:6, 7.