1. Kawe nụe botonge ikawera Yehuwa kai taghuangu kěbị haghi? (Pěmanda gambarẹ̌ humotong su pěngangěndungang ini.)

YEHUWA kai taghuangu kěbị haghi! I Sie mạnaghuang ”langị karangetange; dunia e mal᷊aing tataghuaneng’E ringangu kal᷊awọu apang ene su wowone”. (Pang. 10:14; Pěl. 4:11) Ual᷊ingu Yehuwa něndiadi taumata, i kitẹ kěbị kai tataghuaneng’E. (Mzm. 100:3) Katewe bọu kěbị taumata apang měbẹ̌biahẹ̌, Mawu seng němile sěmbaụ kelompok taumata gunang makoạ tataghuanenge dingangu cara istimewa.

2. Tumuhụ Alkitapẹ̌, i sai nakoạ tataghuaneng i Yehuwa dingangu cara istimewa?

² Contone, Mazmurẹ̌ 135 nẹ̌sěbạ ělang i Yehuwa masatia su Israel kangerẹ kai ”tataghuaneng’E”. (Mzm. 135:4) Bọu ene lai, Hosea něněbal᷊ẹ̌, piạ pirang katau bal᷊inẹ Israel sarung makoạ ělang i Yehuwa. (Hos. 2:23) Těbal᷊ẹ̌ ini naghanapẹ̌ su tempong Yehuwa něnětạ němile taumata bal᷊inẹ tau Israel gunang mẹ̌parenta dingangi Kristus  su sorga. (MMR. 10:45; Rm. 9:23-26) I sire apang nilanisu rohkẹ̌ masusi nisěbạ ”wansa susi”. I sire kai ”tataghuaneng [i Yehuwa] sẹ̌sane”. (1 Ptr. 2:9, 10) Katewe, kerea dingangu tau Sahani wal᷊inẹ apang masatia kụ piạ pělaharapẹ̌ měbiahẹ̌ su dunia? Yehuwa lai nẹ̌sěbạ i sire ”umatẹ̌-Ku” dingangu ”taumata nipile-Ku”.​—Yes. 65:22, Terjemahan Dunia Baru, NW.

3. (a) Orasẹ̌ ini, i sai piạ hubungan istimewa dingangi Yehuwa? (b) Apa sarung ěndungang i kitẹ su pěngangěndungang ini?

³ Orasẹ̌ ini i sire apang ”rekenange mahal᷊i”, kụ sarung mẹ̌biahẹ̌ su sorga, dingangi sire apang ”domba wal᷊ine”, kụ sarung mẹ̌biahẹ̌ su dunia, něněmbah si Yehuwa kere ”ghapaěng sěmbaụ”. (Luk. 12:32; Yoh. 10:16) I kitẹ tantu mapulu makitarimakasẹ si Yehuwa ual᷊ingu piạ hubungan istimewa dingang’E. Su pěngangěndungang ini, i kitẹ sarung měngěndung piram baụ cara měnodẹ tatarimakasẹ i kitẹ.

4. Kerea i kitẹ měnodẹ tatarimakasẹ si Yehuwa, kụ kerea i Yesus lai někoạ kerene?

⁴ I kitẹ měnodẹ tatarimakasẹ si Yehuwa su tempong mẹ̌diandi měgělị pěbawiahi kitẹ kụ sahaniang. Su tempong nisahani, kěbị taumata nakasingkạ i kitẹ seng nakoạ tataghuaneng i Yehuwa dingangu mapulu tumuhụ si Sie. (Ibr. 12:9) Yesus lai někoạ kerene su tempong nisahani. Maning i Yesus kai bageang bọu bangsa seng nakoạ tataghuaneng i Yehuwa, i sie tatapẹ̌ něgělị watangenge si Yehuwa. I sie kere naul᷊ị, ”Iạ e mal᷊uasẹ̌ mẹ̌koạ kapulu-Nu, Mawu.”​—Mzm. 40:8, 9.

5, 6. (a) Apa niul᷊ị i Yehuwa su tempong i Yesus nisahani? (b) Sasihing apa makatul᷊ung si kitẹ makaěna pěndang i Yehuwa mạeng i kitẹ měgělị pěbawiahi kitẹ si Sie?

⁵ Kerea pěndang i Yehuwa su tempong i Yesus nisahani? Alkitapẹ̌ naul᷊ị, ’Bọu nisahani, Yesus siměpụ bọu akẹ u sal᷊ụ. Arakutẹu langị e natopẹ kụ Yesus nakasilo Rohkẹ̌ u Ruata ěnnaẹ limintụ kere paluma kụ dimorọ si sie. Mase nikaringihẹ̌ tingihu Mawu Ruata něhengetang, ”Ini kai Ahusẹ̌-Ku ikẹ̌kěndagẹ̌. I sie makạl᷊uasẹ̌ naung-Ku.”’ (Mat. 3:16, 17) Yesus seng tataghuanengu Mawu. Katewe Yehuwa mal᷊uasẹ̌ su tempong nakasilo si Yesus něgělị pěbawiahe gunang měkoạ kapulung Yehuwa. Yehuwa lai mal᷊uasẹ̌ su tempong i kitẹ měgělị pěbawiahi kitẹ si Sie, kụ i Sie sarung měngal᷊amatẹ̌ si kitẹ.​—Mzm. 149:4, NW.

⁶ Katewe Yehuwa kai taghuangu kěbị haghi! Apa wotonge gělịkang i kitẹ si Sie? Kěnang pẹ̌tiněna, sěngkatau matimadẹ̌ esẹ nẹ̌suang haghing bungang su taman su rělahu wal᷊ene. Sěnsul᷊ẹ tempo, anạe wawine něnipo sěmbaụ bungang kụ nighělị si sie. Maning i papạe taghuangu bungang ene, i papạe mal᷊uasẹ̌ něnarimạ hadiah ene. Ene něnodẹ anạe makěndagẹ̌ si sie. Bungang bọu anạe limembong maarěga sul᷊ungu kěbị bungang su taman nikoạe. Kerene lai, Yehuwa mal᷊uasẹ̌ mạeng i kitẹ měgělị pěbawiahi kitẹ si Sie.​—Sas. 34:14, NW.

7. Kerea i Maleakhi nẹ̌tul᷊ung si kitẹ nakaěna pěndang i Yehuwa su taumata apang mapulu mẹ̌tahamawu si Sie?

⁷ Basa Maleakhi 3:16, NW. Kawe nụe penting měgělị pěbawiahi kitẹ si Yehuwa kụ sahaniang? Sěběnarẹ̌e, dongkeng  su ral᷊ungu kandungan, i kitẹ kai tataghuanengu Měndariading kitẹ, Yehuwa. Katewe, tantu Yehuwa sěbạe mal᷊uasẹ̌ mạeng i kitẹ měnarimạ si Sie makoạ Měngangawasang i kitẹ dingangu měgělị pěbawiahi kitẹ si Sie! (Baw. 23:15) Yehuwa masingkạ si sire apang mapulu mẹ̌tahamawu si Sie, kụ i Sie němohẹ areng i sire su ”bukẹ̌ u pẹ̌tatahěndungang”.

8, 9. Apa dẹ̌dorongang i Yehuwa bọu i sire apang arenge kạbawohẹ su ”bukẹ̌ u pẹ̌tatahěndungang”?

⁸ Mạeng i kitẹ mapulu areng i kitẹ tatapẹ̌ su ”bukẹ̌ u pẹ̌tatahěndungang” i Yehuwa, piạ lai harusẹ̌ koateng i kitẹ. Maleakhi naul᷊ị i kitẹ harusẹ̌ měngadatẹ̌ si Yehuwa dingangu mẹ̌tiněna areng’E. Mạeng i kitẹ maněmbah su wal᷊inẹ, areng i kitẹ sarung ěmụkang bọu bukẹ̌ i Yehuwa!​—Sas. 32:33; Mzm. 69:28.

⁹ Hakị u ene, mẹ̌diandi si Yehuwa gunang měkoạ kapulu-Ne dingangu sahaniang, ene bědang kurang. Manga hal᷊ẹ̌ ene kětạeng koateng sěnsul᷊ẹ, katewe maněmbah si Yehuwa kai ral᷊engu wiahẹ̌. Ěllo-ěllo, su kanandụu pěbawiahẹ̌, i kitẹ harusẹ̌ měnodẹ i kitẹ tụtuhụ si Yehuwa.​—1 Ptr. 4:1, 2.

10. Pẹ̌tatěntang apa harusẹ̌ mal᷊ahẹ kasilong si sire apang měnẹ̌němbah Mawu dingangu tala?

¹⁰ Su pěngangěndungang kal᷊imona, i kitẹ něngěndung i Kain, Salomo, dingangu tau Israel měngẹ̌ngaku maněmbah si Yehuwa. Katewe samurine i sire nakoạ tawe satia. Manga contoh ini něnodẹ kětạeng maul᷊ị i kitẹ měnẹ̌němbah si Yehuwa, ene bědang kurang. I kitẹ harusẹ̌ mawěnsing barang dal᷊akị, kụ kuměndagẹ̌ barang mapia. (Rm. 12:9) Yehuwa naul᷊ị sarung piạ pẹ̌tatěntange mal᷊ahẹ ”taumata matul᷊idẹ̌ dingangu ral᷊akị, taumata měnẹ̌němbah Mawu dingangu tala”.​—Mal. 3:18, NW.

11. Kawe nụe taumata wal᷊inẹ harusẹ̌ makasilo mal᷊ahẹ i kitẹ kětạeng měnẹ̌numběka si Yehuwa?

¹¹ I kitẹ makitarimakasẹ si Yehuwa ual᷊ingu seng němile si kitẹ nakoạ umat’E! I kitẹ harusẹ̌ mapakal᷊ahẹ su taumata wal᷊inẹ, i kitẹ kai manumběka si Yehuwa. (Mat. 5:16; 1 Tim. 4:15) Pẹ̌tiněna: ’Apa taumata wal᷊inẹ nakasilo iạ kahěngang-hěngang masatia si Yehuwa? Apa iạ mal᷊uasẹ̌ měngaku iạ kai Sahiding Yehuwa?’ Yehuwa tantu mạsusah naung’E mạeng i kitẹ mamea měngaku su taumata wal᷊inẹ, i kitẹ kai tataghuaneng’E.​—Mzm. 119:46; basa Markus 8:38.

12, 13. Kerea pirang katau tawe napakal᷊ahẹ i sire kai Sahiding Yehuwa?

¹² Katewe, piạ Sahiding Yehuwa seng timol᷊e ”rohkẹ̌ u dunia”. Suwụe, i sire tawe nẹ̌tatěntang marau dingangu taumata tawe měnẹ̌němbah si Yehuwa. (1 Kor. 2:12) ”Rohkẹ̌ u dunia” makakoạ taumata kětạeng mẹ̌tiněna kapulung i sire hala. (Ef. 2:3) Contone, maning seng nighělịkangu lawọ sasasa soal u mẹ̌papakeang, piạ pirang katau bědang měpẹ̌pakẹ pakeang tawe nẹ̌tatahino. I sire něpakẹ pakeang ketat  dingangu terbuka. I sire lai něpakẹ pakeang kerene su pěngangibadangu tau Sahani. Arau piạ u timol᷊e modelẹ̌ u utạ tawe nẹ̌tatahino. (1 Tim. 2:9, 10) Suwụe, taumata wal᷊inẹ masigěsạ makakiral᷊a apa i sire Sahiding Yehuwa arau bal᷊inẹ.​—Yak. 4:4.

¹³ Piạ lai hal᷊ẹ̌ bal᷊inẹ nakakoạ pirang katau Sahiding Yehuwa tawe tumanịu nẹ̌tatěntang bọu dunia. Contone, su tempong pesta, kakanoạ dingangu goyang i sire tawe nẹ̌tatahino su tau Sahani. Sěnggạe wue nẹ̌taho foto arau komentar něnodẹ tiněnang dunia ini su media sosial. Aramanung i sire tawe někoạ pẹ̌sasal᷊a serius hakị u tawe nisěbang bọu sidang. Katewe i sire nakoạ pengaruh dal᷊akị su anạu sěmbaụ apang mětẹ̌tawakal᷊i tadeạu mẹ̌tatěntang bọu dunia ini.​—Basa 1 Petrus 2:11, 12, NW.

14. Apa harusẹ̌ koateng i kitẹ gunang měndiagạ hubungan istimewa dingangi Yehuwa?

¹⁴ Kěbị haghi su dunia ini nikoạ tadeạu i kitẹ kětạeng mẹ̌tiněna ”kapulung badang warạdosa, kapulung mata, dingangu kapulu měnodẹ arětạ”. (1 Yoh. 2:16, NW) I kitẹ kai tataghuaneng i Yehuwa, hakị u ene i kitẹ nẹ̌tatěntang. I kitẹ madiri měnarimạ ”apang dal᷊akị su těngong Mawu” dingangu ”kapulung dunia”. I kitẹ ”měbiahẹ̌ dingangu tiněna mapia, dingangu katul᷊idẹ̌, lai dingangu kasasatia su Mawu su dunia orasẹ̌ ini”. (Tit. 2:12, NW) Patikụ dalengu wiahi kitẹ, kere soal u kerea i kitẹ mẹ̌bisara, kumaěng, měnginung, mẹ̌papakeang, dingangu měhal᷊ẹ̌, harusẹ̌ makal᷊ahẹ i kitẹ kai tataghuaneng i Yehuwa.​—Basa 1 Korintus 10:31, 32.

15. Kawe nụe i kitẹ harusẹ̌ mapia dingangu makěndagẹ̌ su anạu sěmbaụ?

¹⁵ Cara i kitẹ měkoạ anạu sěmbaụ, ene makal᷊ahẹ i kitẹ měngẹ̌ngarěga pẹ̌dal᷊ahapị dingangi Yehuwa. I sire lai tataghuaneng i Yehuwa, kere i kitẹ. Mạeng i kitẹ mẹ̌tahěndung hal᷊ẹ̌ ini, i kitẹ mang mapia dingangu makěndagẹ̌ si sire. (1 Tes. 5:15) Kawe nụe ini penting? Yesus naul᷊ị su manga tumatol᷊ene, ”Kereu i kamene lawọbe měmpẹ̌kẹ̌kakěndagẹ̌ e ute kal᷊awọu taumata e sarungbe makakasingkạ u i kamene kawe muritẹ̌-Ku.”​—Yoh. 13:35.

16. Apa kaěndungang i kitẹ bọu Hukung Musa soal u kakěndagi Yehuwa su manga ělang’E?

¹⁶ Sěmbaụ contoh bọu Hukung Musa makatul᷊ung si kitẹ makaěna kerea i kitẹ harusẹ̌ měkoạ anạu sěmbaụ. Su bait, piạ haghing barang pẹ̌paketang gunang ibadah si Yehuwa. Hukung něgělị laahạ mal᷊ahẹ kerea tau Lewi harusẹ̌ měngurusẹ̌ manga barang ene. I saing tawe tumol᷊e laahạ ene sarung pateěng. (Pẹ̌t. 1:50, 51) Mạeng Yehuwa sěbạe mapadul᷊i su cara manga barang ene lẹ̌urusang, tantu i Sie limembong mapadul᷊i su cara i kitẹ měkoạ manga ělang’E masatia! Su těngong Yehuwa i kitẹ sěbạe maarěga. I Sie naul᷊ị, ”I saing měněnggehẹ̌ si kamene ene mẹ̌sul᷊ungu měnenggehẹ̌ mata-Ku.”​—Za. 2:8, NW.

17. I Yehuwa ”rụdaringihẹ̌ dingangu tụtatingang” apa?

¹⁷ Maleakhi naul᷊ị i Yehuwa ”rụdaringihẹ̌ dingangu tụtatingang” kerea manga ělang’E měkoạ anạu sěmbaụ i sire. (Mal. 3:16) Yehuwa ”makạkiral᷊a  tataghuanenge”. (2 Tim. 2:19) I Sie sěbạe mapadul᷊i su apa kẹ̌koateng arau wẹ̌bisarang i kitẹ. (Ibr. 4:13) Mạeng i kitẹ dal᷊akị měkoạ anạu sěmbaụ i kitẹ, Yehuwa měmẹ̌manda ene. Katewe i kitẹ mangimang, i Sie lai měmẹ̌manda mạeng i kitẹ mahimumu, maělugẹ̌, puluang měgělị ampung, dingangu mapia.​—Ibr. 13:16; 1 Ptr. 4:8, 9.

18. Kerea i kitẹ makitarimakasẹ si Yehuwa ual᷊ingu seng nipile nakoạ tataghuaneng’E?

¹⁸ I kitẹ tantu mapulu měnodẹ si Yehuwa i kitẹ makitarimakasẹ ual᷊ingu seng nakoạ tataghuaneng’E dingangu ělang’E. I kitẹ masingkạ, měgělị pěbawiahẹ̌ si Yehuwa ene kai putusang matahuěna. Maning měbẹ̌biahẹ̌ ”su tal᷊oaran taumata raral᷊aị dingangu mararosa,” i kitẹ botonge tatapẹ̌ ”měbẹ̌biahẹ̌ dingangu katul᷊idẹ̌ ore lai katěngadẹ̌”, dingangu makoạ kere tualagẹ̌ ”simẹ̌nnang nanualagẹ̌ dunia”. (Flp. 2:15-16) Hakị u ene i kitẹ madiri měkoạ apa ikẹ̌kawěnsing i Yehuwa. (Yak. 4:7) Kụ i kitẹ kuměndagẹ̌ dingangu měngadatẹ̌ anạu sěmbaụ ual᷊ingu i sire lai tataghuaneng i Yehuwa.​—Rm. 12:10.

19. Kerea Yehuwa měngal᷊amatẹ̌ si sire apang nakoạ tataghuaneng’E?

¹⁹ Alkitapẹ̌ nẹ̌diandi, ’[Yehuwa] tawe měněntangu umat’E.’ (Mzm. 94:14) Ini kai jaminan. Tawẹ soale apa sarung mariadi, Yehuwa mang duměndingang si kitẹ. Maning i kitẹ mate, i Sie tawe miwul᷊e si kitẹ. (Rm. 8:38, 39) ”Kereu i kitẹ biahẹ̌ ute, i kitẹ e wiahẹ̌ baugu Mawu. Dingangu kereu i kitẹ e mate, i kitẹ lai mate, waụgu Mawu. Kụ biahẹ̌ arau mate, i kitẹ e tataghuanengu Mawu.” (Rm. 14:8) I kitẹ měngampal᷊ẹ̌ tempone Yehuwa saụ mapakawiahẹ̌ manga ělang’E apang seng nate. (Mat. 22:32) Orasẹ̌ ini, i kitẹ lai nakatarimạ lawọ al᷊amatẹ̌ makạlaherang bọu i Amang i kitẹ. Kụ kere niul᷊ị u Alkitapẹ̌, ’Kariangkamang bangsa kụ [Yehuwa] kai Ruatane, kariangkamang umatẹ̌ kụ nipile-Ne nakoạ tataghuaneng’E!’​—Mzm. 33:12.