Měnodẹ Tatal᷊ěntụ su ”Kěbị Taumata”
SU TEMPONG i Yesus něněntiro manga murite kerea carane měhabarẹ̌ habarẹ̌ mapia, i sie něgělị laingatẹ̌ tawe kěbị taumata sarung dumaringihẹ̌ si sire. (Luk. 10:3, 5, 6) Su tempong měnginjilẹ̌, pẹ̌sěnsul᷊ẹ i kitẹ měsẹ̌sombang dingangu taumata tawẹ adate arau kasarẹ̌. Su tempong i sire něnodẹ kakanoạ kerene, i kitẹ masigěsạ tumal᷊ěntụ dingangu mapulu měnginjilẹ̌ si sire.
Taumata matal᷊ěntụ měmẹ̌manda kebutuhan dingangu masalang taumata wal᷊inẹ, tụtal᷊ěntu si sire, dingangu mapulu mẹ̌tul᷊ung si sire. Katewe, apa mariadi mạeng i kitẹ seng tawe matal᷊ěntụ su taumata nihabareng i kitẹ? I kitẹ sarung kailangengu sěmangatẹ̌ gunang měnginjilẹ̌ si sire kụ seng tawe makapẹ̌tul᷊ung si sire. Sěmangati kitẹ ene botonge isul᷊ung dingangu putung. Tadeạu tatapẹ̌ dumělị, putung harusẹ̌ tambaěng kalune. Kerene lai, tadeạu sěmangatẹ̌ tatapẹ̌ rụdělị, i kitẹ harusẹ̌ matal᷊ěntụ!—1 Tes. 5:19.
Kerea tadeạu i kitẹ tatapẹ̌ matal᷊ěntụ, maning ene masigěsạ? Mahịe i kitẹ měngěndung tatělu contoh botonge těnoěng i kitẹ: Yehuwa, Yesus, dingangi rasul Paulus.
PẸ̌TĚNỌE TATAL᷊ĚNTỤ I YEHUWA
Seng hiwune taung, lawọ taumata mělẹ̌habarẹ̌ konti soal i Yehuwa. Katewe i Sie tatapẹ̌ ”mal᷊ondo su taumata apan wẹ̌gang makitarimakasẹ dingangu su apan dal᷊akị”. (Luk. 6:35) Kerea i Sie něnodẹ kapiang naung’E? I Sie masabarẹ̌ su kěbị taumata. Yehuwa mapulu ”kěbị taumata” masal᷊amatẹ̌. (1 Tim. 2:3, 4) Maning Mawu mawěnsing barang dal᷊akị, taumata kai maarěga su těngo-Ne, kụ i Sie madiri i sire mate.—2 Ptr. 3:9.
Yehuwa masingkạ Setang sěbạe pande měkoạ taumata mangimang su konti. (2 Kor. 4:3, 4) Lawọ seng nitěntiroěngu konti soal u Mawu dongkeng i sire kadodọ. Hakị u ene tiněna dingangu pěndang i sire aramanung nakakoạ i sire masigěsạ měnarimạ těntiro nihino. Katewe Yehuwa sěbạe mapulu mẹ̌tul᷊ung si sire. Bọu apa i kitẹ nakasingkạ?
Contone, pẹ̌tiněna pěndang i Yehuwa su tau Niniwe. Maning kakanoạ i sire sěbạe dal᷊akị, Yehuwa naul᷊ị si Yunus, ’Unụ e wue Iạ tawe masusa naung-Ku mẹ̌sipiru Niniwe, soa gẹ̌guwạ ene. Sene lai kaěbakeng něngalembo wọu 120.000 su kataune kụ bědang [běga] mapẹ̌dal᷊ahaedu mapia ringangu dal᷊akisẹ̌.’ (Yun. 4:11) Yehuwa timal᷊ěntụ si sire ual᷊ingu i sire bědang běga těntiro nihino soal i Sie. Hakị u ene i Sie něndolohẹ̌ si Yunus gunang pěgělị laingatẹ̌ si sire.
I kitẹ lai harusẹ̌ piạ pěndang mẹ̌sul᷊ung i Yehuwa su taumata. I sire maarěga. Kere Yehuwa, i kitẹ sěbạe mapulu mẹ̌tul᷊ung si sire měngěndung soal i Sie maning kakělaěng i sire tawe měnarimạ těntiro nihino.
PẸ̌TĚNỌE TATAL᷊ĚNTỤ I YESUS
Mẹ̌sul᷊ung i Amange, Yesus matal᷊ěntụ su taumata ual᷊ingu i sire ”sẹ̌sědạkeng dingangu niwala kere domba tawẹ apa měngangahạe”. (Mat. 9:36, Terjemahan Dunia Baru, NW) Yesus nakaěna i sire kerene ual᷊ingu těmbonangu agama měkẹ̌konti dingangu dal᷊akị měkoạ si sire. Kụ, maning i Yesus masingkạ lawọ taumata dụdaringihẹ̌ si sie tawe makoạ murite ual᷊ingu haghing alasang, i sie tatapẹ̌ něněntiro lawọ hal᷊ẹ̌ si sire.—Mrk. 4:1-9.
Abe masusah naung mạeng humotong i sie madiri dumaringihẹ̌
Mạeng situasi su pěbawiahẹ̌ nẹ̌bal᷊ui, aramanung i sie limembong mapulu dumaringihẹ̌
Su tempong taumata madiri dumaringihẹ̌ habari kitẹ, i kitẹ harusẹ̌ mẹ̌tawakal᷊i makaěna alasange. Aramanung i sire madiri Alkitapẹ̌ dingangu tau Sahani ual᷊ingu bọu nakasilo taumata měngẹ̌ngakụ tau Sahani někoạ barang dal᷊akị. Sěnggạe wue nakaringihẹ̌ habarẹ̌ konti soal i kitẹ. Piạ lai matakụ heghesangu keluarga arau taumata wal᷊inẹ mạeng i sire mẹ̌bisara dingangi kitẹ.
Pirang katau nipẹ̌sombangeng i kitẹ aramanung bọu nakahombang barang dal᷊akị kụ nakakoạ si sire trauma. Sěngkatau utusan injil arenge i Kim naul᷊ị lawọ taumata su tampạ tugase bọu nakoạ korban pẹ̌sasekẹ kụ nikailangengu kěbị arětạ i sire. I sire tawẹ apa pělaharapẹ̌. I sire stres kụ madiri mangimang si sai-sai. Taumata su tampạ ene lai masau mẹ̌sěding Sahiding Yehuwa měnginjilẹ̌. Sěnsul᷊ẹ tempo i Kim nirarihang ual᷊ingu měngẹ̌nginjilẹ̌.
Kerea i Kim tatapẹ̌ matal᷊ěntụ maning seng nirarihang? I sie sěntiniạ mětẹ̌tahěndung bawera su Baweran Salomo 19:11, sene niul᷊ị, ’[Katatahuěnang, NW] taumata e makakědangu pẹ̌dune.’ Su tempong i sie mẹ̌tiněna apa seng nikapěndangengu taumata su tampạ ene, i sie nakoạ limembong timal᷊ěntụ si sire. Kụ tawe kěbị taumata nipẹ̌sombangenge dal᷊akị měkoạ si sie. Su tampạ ene lai, piạ pirang katau saụ tẹ̌tiwoěnge.
Kěnang pẹ̌tiněna, ’Mạeng iạ bal᷊inẹ Sahiding Yehuwa, kerea reaksiku mạeng Sahiding Yehuwa duměnta měnginjilẹ̌ si siạ?’ Contone, kerea mạeng i kitẹ bọu nakaringihẹ̌ lawọ konti soal u Sahiding Yehuwa? Aramanung i kitẹ lai tawe měnodẹ kakanoạ mapia hakị u Sahiding Yehuwa harusẹ̌ mẹ̌tawakal᷊i měnodẹ tatal᷊ěntụ si kite. Yesus naul᷊ị, i kitẹ harusẹ̌ měkoạ taumata wal᷊inẹ kere cara i kitẹ mapulu koateng. Hakị u ene i kitẹ mẹ̌tawakal᷊i tadeạu makaěna kerea pěndangu taumata wal᷊inẹ dingangu masabarẹ̌ si sire, maning ene masigěsạ.—Mat. 7:12.
PẸ̌TĚNỌE TATAL᷊ĚNTỤ I PAULUS
Rasul Paulus měnẹ̌nodẹ tatal᷊ěntụ maning taumata měnděndariha si sie. Kawe nụe? Ual᷊ingu i sie mětẹ̌tahěndung kangerẹ i sie taumata kerea. I sie naul᷊ị, ”Iạ e nạung kai taumata tahapěhodatẹ̌ dingangu tahapanumbiagẹ̌ dingangu tahapẹ̌tingkai si Sie. Kaiho iạ e mang nital᷊ěntụ u Mawu Kasěllahenge watụ u su tempo ene iạ e wẹ̌dang ta nangimang, kụ iạ bědangben bẹ̌ga měnsang apa takụ koateng.” (1 Tim. 1:13) I Paulus masingkạ i Yehuwa dingangi Yesus seng něnodẹ tatal᷊ěntụ si sie. I sie nakaěna pěndangu taumata apang něndariha si sie, ual᷊ingu kangerẹ i sie lai kerene.
Pẹ̌sěnsul᷊ẹ, i Paulus měsẹ̌sombangu taumata sěbạe mangimang su těntiro nẹ̌sal᷊a. Kerea pěndange? Su Munara’m Manga Rarolohang 17:16, i kitẹ nakawasa su tempong su Athena, ”naunge měngkate apa kiměndụ [lusiang, NW] u nakasilo e soa e měngkatewe napenẹ u pakal᷊uang [arau, berhala]”. Katewe, i Paulus něpakẹ barang nakal᷊usiang ene gunang měněntiro taumata. (MMR. 17:22, 23) I sie němal᷊ui cara měnginjilẹ̌ tadeạu mẹ̌tatahino dingangu latar belakang haghing taumata ”tadeạu [i sie] e makapangambangbe sěmbahageange wo’i sire”.—1 Kor. 9:20-23.
Mạeng i kitẹ mẹ̌sombangu taumata tawe něnarimạ mapia arau mangimang su těntiro nẹ̌sal᷊a, i kitẹ botonge mẹ̌těno si Paulus. I kitẹ botonge měpakẹ apa seng nikasingkạ i kitẹ soal i sire, gunang mẹ̌tul᷊ung si sire měngěndung ”habarẹ̌ mapia, habaru karal᷊unsemahẹ̌”. (Yes. 52:7) Sěngkatau saudari arenge Dorothy, naul᷊ị, ”Su tampạ i kami, lawọ taumata tẹ̌těntirong Mawu ene kai kasarẹ̌ dingangu puluang měhukung. Iạ mědẹ̌dalo si sire ual᷊ingu mangimang su Mawu. Bọu ene iạ maul᷊ị si sire apa niul᷊ị u Alkitapẹ̌ soal u sipati Yehuwa makěndagẹ̌ dingangu diandi-Ne soal u pěbawiahẹ̌ su tempo mahi.”
’MĚMATẠ RAL᷊AỊ DINGANGU MAPIA’
Ual᷊ingu pěngěnsuengu dunia ini seng marani, sipatu taumata ”mangkeng kạpahuntinambang [karal᷊akise, NW]”. (2 Tim. 3:1, 13) Maning kerene, i kitẹ abe sarang kailangengu tatal᷊ěntụ dingangu karal᷊uasẹ̌. Yehuwa botonge měgělị si kitẹ katatoghasẹ̌ gunang turusẹ̌ ’měmatạ ral᷊aị dingangu mapia’. (Rm. 12:21) Sěngkatau perintis arenge Jessica nẹ̌běke, i sie hanesẹ̌ mẹ̌sombangu taumata maobotẹ̌ dingangu mělẹ̌hinakang si kitẹ. I sie lai naul᷊ị, ”Ene makạl᷊usiang. Su tempong buhudeng měnětạ mẹ̌bisara, iạ mẹ̌doa si Yehuwa su ral᷊ungu naung dingangu mẹ̌dorong tul᷊umang’E tadeạu makatol᷊e cara i Sie měmanda taumata.” Hasile, Jessica tawe nẹ̌tiněna pěndange hala, katewe nẹ̌tiněna cara mẹ̌tul᷊ung tau ene.
I kitẹ turusẹ̌ mědeạ si sire apang mapulu makasingkạ těntiro nihino
Su tempone, pirang katau sarung měnarimạ tul᷊umang kụ měngěndung Alkitapẹ̌
I kitẹ lai harusẹ̌ měnoghasẹ̌ anạu sěmbaụ su tempong měnginjilẹ̌ dingangi sire. Jessica naul᷊ị su tempong i sie něnginjilẹ̌ dingangu taumata wal᷊inẹ, kụ piạ pengalaman dal᷊akị, i sie mětẹ̌tawakal᷊i tawe turusẹ̌ mẹ̌tiněna soal u ene. I sie němile mẹ̌bisara hal᷊ẹ̌ positif, kere hasilẹ̌ mapia seng nikaěbạ i rẹ̌dua su tempong něnginjilẹ̌.
Yehuwa masingkạ pẹ̌sěnsul᷊ẹ měnginjilẹ̌ ene tawe gampang koateng. Katewe i Sie sěbạe mal᷊uasẹ̌ su tempong i kitẹ nẹ̌těno tatal᷊ěntụ’E! (Luk. 6:36) Tantu, Yehuwa tawe turusẹ̌ tumal᷊ěntụ dingangu masabarẹ̌ su taumata su dunia ini. Yehuwa mang masingkạ kange tempone i Sie mapakailang kěbị karal᷊akisẹ̌. Sarang tempo ene marěnta, hal᷊ẹ̌ měnginjilẹ̌ sěbạe penting koateng. (2 Tim. 4:2) Hakị u ene, mahịe i kitẹ turusẹ̌ masěmangatẹ̌ měnginjilẹ̌ dingangu měnodẹ tatal᷊ěntụ su ”kěbị taumata”.
