I YOSUA harusẹ̌ měngahạ bangsa Israel sarang Ěntanang Pẹ̌dariandi. Ene kai tugasẹ̌ mawěhạ. Katewe, Yehuwa něnoghasẹ̌ dingangu němahansang si sie, kụ nẹ̌bera, ”Karimạko i kau e mamben těngadẹ̌ maiaking dingangu wahani.” Yehuwa naul᷊ị si Yosua mạeng i Yosua mẹ̌basa dingangu tumuhụ su Hukung, i sie sarung makakoạ putusang nihino dingangu mawarauntu arau berhasil.​—Yos. 1:7, 8.

I kitẹ měbẹ̌biahẹ̌ su tempong ”kasasusa l᷊awọ”, haki u ene biahi kitẹ lai masigěsạ. (2 Tim. 3:1) Mạeng i kitẹ mapulu berhasil kere i Yosua, i kitẹ lai harusẹ̌ tumol᷊e sasasa nighělị i Yehuwa si Yosua. I kitẹ harusẹ̌ marading měngěndung Alkitapẹ̌ dingangu měpakẹ apa seng niěndungang gunang měkoạ putusang nihino.

I kitẹ aramanung běga carane měngěndung, arau i kitẹ tawe tumanịu mal᷊uasẹ̌ su tempong měngěndung. Katewe, měngěndung Alkitapẹ̌ hala ene sěbạe penting. Su kotak ” Pěnal᷊ukạ Těgu Ini”, piạ lawọ těgu tadeạu i kitẹ limembong mal᷊uasẹ̌ měngěndung dingangu makaěbạ lawọ gunane.

Sěngkatau pemazmur nẹ̌kantarị, ”Karimạko iạ měngumpaedẹ̌ matoghasẹ̌ su hengetang’U, batụu kai ene [ikẹ̌kapuluangku].” (Mzm. 119:35) I kau lai botonge makaěbạ karal᷊uasẹ̌ su tempong měngěndung Hengetang u Mawu. Mạeng turusẹ̌ měngěndung Alkitapẹ̌, i kau sarung makaěbạ lawọ hal᷊ẹ̌ mapapia.

Maning tawe měngahạ sěmbaụ bangsa kere i Yosua, i kau lai tantu nakahombang kasasigěsạ. Hakị u ene, kere i Yosua, pěngěndungke Hengetang u Mawu, kụ tol᷊ei ene. Mạeng měkoạ ene, i kau sarung makakoạ putusang nihino dingangu berhasil su pěbawiahẹ̌.