1. Apa sarung mariadi mạeng sěngkatau puluang bersaing?

ORASẸ̌ ini, lawọ taumata puluang bersaing. Contone, sěngkatau pebisnis ěndịu mapulu makoạ limembong berhasil sul᷊ungu taumata wal᷊inẹ. Hakị u ene, i sie ěndịu měkoạ manga hal᷊ẹ̌ makakoạ taumata wal᷊inẹ sěbạe masusah. Sěngkatau atlet ěndịu mẹ̌tawakal᷊i měkoạ atlet wal᷊inẹ mal᷊esẹ tadeạu i sie botonge makauntung. Sěngkatau muritẹ̌ ěndịu měngakal᷊ẹ̌ tadeạu makasuẹ̌ su sikol᷊ah marangẹ. Tau Kristen masingkạ ene kai kakanoạ nẹ̌sal᷊a, kụ bageang bọu ”kakanoạu gěsi”. (Gal. 5:19-21, catatan kaki) Katewe, apa piạ anạu sěmbaụ tawe sadarẹ̌ puluang bersaing? Kakiwal᷊o ini sěbạe penting ual᷊ingu sipatẹ̌ puluang bersaing piạ pěngarune su kasasěmbaụ i kitẹ.

2. Apa sarung ěndungang i kitẹ su pěngangěndungang ini?

² Su pěngangěndungang ini, i kitẹ sarung měngěndung manga sipatẹ̌ makakoạ i kitẹ puluang bersaing dingangu anạu sěmbaụ. I kitẹ lai sarung měngěndung contoh bọu manga ělang i Yehuwa su Alkitapẹ̌ apang madiri bersaing. Humotong, mahịe měngěndung kerea carane měmarikěsa motif i kitẹ.

3. Manga kakiwal᷊o apa perlu kiwal᷊ong i kitẹ su watangeng?

³ Bọu tempo sarang tempo, i kitẹ harusẹ̌ měmarikěsa motif i kitẹ. I kitẹ botonge mẹ̌kiwal᷊o su watangeng, ’Apa iạ mal᷊uasẹ̌ kětạeng su tempong mẹ̌pěndang watangeng limembong  mapaelẹ̌ bọu taumata wal᷊inẹ? Apa iạ něhal᷊ẹ̌ masěghadẹ̌ su sidang tadeạu makoạ kapaelange arau makoạ limembong mapaelẹ̌ bọu anạu sěmbaụ? Arau apa iạ něhal᷊ẹ̌ masěghadẹ̌ gunang makal᷊uasẹ̌ si Yehuwa?’ Kawe nụe i kitẹ harusẹ̌ mẹ̌kiwal᷊o kerene? Pěmanda apa niul᷊ịu Hengetangu Mawu.

4. Kere nilahẹ su Galatia 6:3, 4, kawe nụe i kitẹ tawe wotonge mapẹ̌sul᷊ung watangeng dingangu taumata wal᷊inẹ?

⁴ Alkitapẹ̌ naul᷊ị i kitẹ tawe wotonge mapẹ̌sul᷊ung watangeng dingangu taumata wal᷊inẹ. (Basa Galatia 6:3, 4.) Kawe nụe? Sěmbaụ alasange, mạeng i kitẹ mẹ̌pěndang limembong mapaelẹ̌ bọu anạu sěmbaụ, i kitẹ sarung makoạ maobotẹ̌. Arawe su tempo mẹ̌sul᷊ung, mạeng i kitẹ mẹ̌pěndang taumata wal᷊inẹ limembong mapaelẹ̌ bọu i kitẹ, i kitẹ sarung makadodọ naung. Pěndang kerene něnodẹ i kitẹ tawe matahuěna. (Rm. 12:3) Sěngkatau saudari mětẹ̌tanạ su Yunani, arenge Katerina, * naul᷊ị, ”Kangerẹ, iạ masau mapẹ̌sul᷊ung watangeng dingangu taumata wal᷊inẹ apang limembong masadadạ, limembong mapaelẹ̌ měnginjilẹ̌, dingangu limembong pande mědal᷊ahapị. Samurine, iạ nẹ̌pěndang tawẹ gunane.” I kitẹ harusẹ̌ mẹ̌tahěndung Yehuwa němol᷊eng si kitẹ bal᷊inẹ ual᷊ingu i kitẹ masadadạ, pande mẹ̌bisara, arau lawọ taumata puluang si kitẹ, katewe ual᷊ingu i kitẹ mapulu kuměndagẹ̌ si Sie dingangu dumaringihẹ̌ su Ahus’E.​—Yoh. 6:44; 1 Kor. 1:26-31.

5. Apa kaěndungangu bọu pengalaman i Saudara Hyun?

⁵ Kakiwal᷊o wal᷊inẹ botonge kiwal᷊ong i kitẹ su watangeng, ’Apa taumata masingkạ iạ puluang mẹ̌dame arau masau mẹ̌sitori dingangu taumata wal᷊inẹ?’ Pẹ̌tiněna pengalaman sěngkatau mětẹ̌tanạ su Korea Selatan, arenge Hyun. I sie bọu nẹ̌pikirẹ̌ pirang katau su sidang apang piạ tanggung jawab ene kai sědụe. I sie naul᷊ị, ”Iạ puluang měmorotesẹ̌ si sire, kụ masau tawe setuju su apa niul᷊ị i sire.” Apa nariadi? I sie nẹ̌bera, ”Ual᷊ingu kakanoạku sidang tawe nasěmbaụ.” Pirang katau hapị i Hyun nẹ̌tul᷊ung si sie gunang makaěna masalane. Hyun někoạ piram baụ pẹ̌bawal᷊ui, kụ orasẹ̌ ini i sie nakoạ penatua mapaelẹ̌. Mạeng i kitẹ nakasilo su watangeng i kitẹ seng piạ kapulu gunang bersaing bal᷊inẹ mẹ̌dame, i kitẹ harusẹ̌ mẹ̌bal᷊ui.

6. Tumuhụ Galatia 5:26, manga sipatẹ̌ apa makakoạ i kitẹ puluang bersaing?

⁶ Basa Galatia 5:26. Manga sipatẹ̌ apa makakoạ i kitẹ puluang bersaing? Humotong ene kai kal᷊aobotẹ̌. Taumata maobotẹ̌ mapandung kětạeng su watangenge hala. Sipatẹ̌ wal᷊inẹ ute iri. Taumata iri bal᷊inẹ kětạeng puluang su apa piạ su taumata wal᷊inẹ, katewe lai mapulu měmul᷊aho ene bọu taumata wal᷊inẹ. Hakị u ene, mạeng sěngkatau iri, sěběnarẹ̌e i sie mawěngsing su tau ene. Tantu, i kitẹ mapulu mẹ̌těngkarau bọu manga sipatẹ̌ dal᷊akị kerene.

7. Sasihing apa něnodẹ sipatẹ̌ maobotẹ̌ dingangu iri ene makawahaya?

⁷ Sipatẹ̌ maobotẹ̌ dingangu iri botonge isul᷊ung dingangu lana kotorẹ̌ su tangki pěsawatẹ̌. Pěsawatẹ̌ ěndịu botonge tumělạ, katewe barang kotorẹ̌ su lana sarung makasahaghe lana sumuẹ̌ su masina, ene makakoạ masinang pěsawatẹ̌ tawe matoghasẹ̌ gunang lumintụ kụ sarung masilakạ. Kerene lai, sěngkatau ěndịu mẹ̌tahamawu si Yehuwa. Katewe mạeng i sie maobotẹ̌ dingangu iri, i sie sarung masilakạ. (Amsal 16:18) I sie sarung měngědo mẹ̌tahamawu si Yehuwa kụ sarung makawahaya watangenge dingangu taumata wal᷊inẹ. Apa koateng i kitẹ tadeạu tawe makoạ maobotẹ̌ dingangu iri?

8. Kerea i kitẹ lumawang kal᷊aobotẹ̌?

 ⁸ I kitẹ botonge lumawang sipatẹ̌ maobotẹ̌ carane tumuhụ bawerang i Rasul Paulus gunang tau Filipi: ”Abe puluang mẹ̌sitori arau mẹ̌pěndang watangeng limembong penting. Katewe, dingangu kasasanạu naung, mẹ̌pěndang taumata wal᷊inẹ limembong marangẹ bọu i kamene.” (Flp. 2:3) Mạeng i kitẹ mẹ̌pěndang taumata wal᷊inẹ limembong penting, i kitẹ tawe bersaing dingangi sire apang piạ bakat dingangu keterampilan limembong mapaelẹ̌ bọu i kitẹ. Katewe, i kitẹ sarung mal᷊uasẹ̌ si sire. Ene kasilong mal᷊ahẹ su tempong i sire něpakẹ keterampilan gunang mapakawantugẹ̌ si Yehuwa. Bọu ene lai, mạeng anạu sěmbaụ apang piạ keterampilan kanini timol᷊e sasasang i Paulus, i sire sarung fokus su manga sipatẹ̌ mapaelẹ̌ bọu i kitẹ. Samurine, i kitẹ kěbị sarung makariagạ pẹ̌darame dingangu kasasěmbaụ su sidang.

9. Kerea tadeạu i kitẹ tawe iri su anạu sěmbaụ?

⁹ I kitẹ botonge mẹ̌těngkarau bọu pěndang iri, carane ute sadarẹ̌ i kitẹ piạ kurange. Mạeng masanạ naung, i kite tawe mẹ̌tawakal᷊i měnodẹ i kitẹ limembong mapaelẹ̌ bọu taumata wal᷊inẹ. Katewe, i kitẹ sarung měngěndung bọu i sire apang piạ keterampilan limembong mapaelẹ̌ bọu i kitẹ. Contone, piạ sěngkatau saudara su sidang nẹ̌bawa nasẹ̌e mapaelẹ̌. I kitẹ botonge mẹ̌kiwal᷊o kerea carane i sie něnadia nasẹ̌ ene. Mạeng sěngkatau saudari jago měnasạ, i kitẹ botonge mẹ̌dorong těgu kerea carane makoạ limembong mapaelẹ̌ měnasạ. Kụ mạeng piạ sěngkatau mangudạ tawe gampang makaěbạ hapị, i sie botonge mẹ̌dorong těgu si sire apang mapaelẹ̌ mědal᷊ahapị. Mạeng měkoạ ene, i kitẹ tawe makoạ iri kụ keterampilan i kitẹ sarung makoạ limembong mapaelẹ̌.

10. Sasal᷊ukạ apa tẹ̌tatěngong i Gideon?

¹⁰ Pẹ̌tiněna apa nariadi si Gideon, sěngkatau bọu suku Manasye dingangu manga esẹ bọu suku Efraim. Ual᷊ingu tul᷊umang i Yehuwa, i Gideon dingangu 300 esẹ bọu Efraim nakauntung su pẹ̌sasekẹ, kụ ene sěběnarẹ̌e makakoạ i sire maobotẹ̌. Manga esẹ bọu Efraim nẹ̌sombang i Gideon bal᷊inẹ gunang  mẹ̌dalo si sie, katewe gunang mědeạ soalẹ̌. I sire nẹ̌pědu ual᷊ingu i Gideon tawe němaringang si sire dongkeng humotong gunang lumawang sědụu Mawu. Si sire limembong penting ene kai taumata měngarěga sukung i sire. Katewe, i sire niwul᷊e i Gideon nẹ̌tul᷊ung napakawantugẹ̌ areng i Yehuwa dingangu něndiagạ manga ělang’E.​—Hak. 8:1.

11. Apa niul᷊ị i Gideon su manga esẹ bọu Efraim?

¹¹ Gideon dingangu masanạ naung nẹ̌bera su manga esẹ bọu Efraim, ”Bal᷊inẹbe iạ tawe makakoạ apa mạeng isul᷊ung si kamene?” I sie saụ někoạ si sire nẹ̌tahěndung kerea i Yehuwa seng něngal᷊amatẹ̌ si sire. Samurine, manga esẹ ene ”nakoạ natěnang”. (Hak. 8:2, 3) Gideon mapulu mẹ̌těngkasanạu naung gunang měndiagạ pẹ̌darame su tal᷊oarang ělangu Mawu.

12. Apa kaěndungang i kitẹ bọu tau Efraim dingangi Gideon?

¹² Apa kaěndungang i kitẹ bọu běke ini? Bọu contoh tau Efraim, i kitẹ něngěndung i kitẹ bal᷊inẹ fokus gunang mapakawantugẹ̌ watangeng hala, katewe gunang mapakawantugẹ̌ si Yehuwa. Těmbonangu keluarga dingangu penatua botonge makaěbạ tatěntiro bọu i Gideon. Mạeng piạ u lusiang ual᷊ingu apa nikoạ i kitẹ, i kitẹ harusẹ̌ mẹ̌tawakal᷊i makaěna kawe nụe i sie kerene. I kitẹ lai botonge mẹ̌dalo ual᷊ingu hal᷊ẹ̌ mapia seng nikoạe. Gunang měkoạ ene i kitẹ harusẹ̌ masanạ naung, lembone mạeng taumata wal᷊inẹ někoạ pẹ̌sasal᷊a. Katewe limembong penting piạ pẹ̌dal᷊ahapị mapia dingangu anạu sěmbaụ sul᷊ungu měnodẹ i kitẹ nihino.

13. Sasal᷊ukạ apa nikahombangeng i Hana, kụ kerea i sie timatěngo ene?

¹³ Pẹ̌tiněna lai contoh bọu i Hana. I sie nẹ̌kawing dingangi Elkana, sěngkatau tau Lewi sěbạe masayang si sie. Katewe i Elkana piạ kawing wal᷊inẹ, i Penina. Elkana limembong makěndagẹ̌ si Hana sul᷊ungu si Penina. Maning kerene, Alkitapẹ̌ naul᷊ị, ”Penina piạ manga anạe, arawe i Hana tala.” Ual᷊ingu ene i Penina ”mělẹ̌heghesẹ̌ si Hana tadeạu i sie lusiang”. Kerea pěndang i Hana? I sie sěbạe natědụ naung! ”I Hana simangị dingangu madiri kumaěng”. (1 Sam. 1:2, 6, 7) Maning kerene, Alkitapẹ̌ tawe naul᷊ị i Hana mẹ̌tawakal᷊i měmal᷊isẹ̌ si Penina. Katewe, i sie naul᷊ị si Yehuwa kerea pěndange dingangi mangimang Yehuwa sarung mẹ̌tul᷊ung si sie. Apa kakanoạ i Penina si Hana nẹ̌bal᷊ui? Alkitapẹ̌ tawe naul᷊ị. Katewe i kitẹ masingkạ i Hana nakapěndang dame su naung dingangu tatapẹ̌ piạ pěndang kerene. Alkitapẹ̌ naul᷊ị, ”Gatine seng tawe něnodẹ susang naung.”​—1 Sam. 1:10, 18.

14. Apa kaěndungang i kitẹ bọu i Hana?

¹⁴ Apa kaěndungang i kitẹ bọu i Hana? Mạeng piạ u mẹ̌tawakal᷊i bersaing dingangu, pẹ̌tahěndung i kau botonge měmal᷊ui situasine. I kau tawe harusẹ̌ měmala  sarang makoạ bersaing dingange. Sul᷊ungu měmal᷊isẹ̌ karal᷊akisẹ̌ dingangu karal᷊akisẹ̌, pẹ̌tawakal᷊i mẹ̌dame dingange. (Rm. 12:17-21) Maning i sie tawe mẹ̌bal᷊ui, i kau sarung matěnang dingangu mal᷊uasẹ̌.

15. Apolos dingangi Paulus mẹ̌papangawẹ su hal᷊ẹ̌ apa?

¹⁵ Pẹ̌tiněna lai apa kaěndungang i kitẹ bọu i Apolos dingangi Rasul Paulus. I rẹ̌dua nakaěna mapia Hengetangu Mawu. Lawọ taumata masingkạ si rẹ̌dua kụ i rẹ̌dua měnaněntiro mapaelẹ̌. I rẹ̌dua lai nẹ̌tul᷊ung někoạ lawọ muritẹ̌. Katewe i rẹ̌dua tawe iri sěmbaụ su wal᷊inẹ.

16. Apolos kai taumata kerea?

¹⁶ Apolos ”asal᷊e bọu Aleksandria”, tampạ nakoạ pusat pendidikan su abad humotong. I sie měnanasẹ̌ mapaelẹ̌, kụ ”mal᷊awọ kasingkạe soal u Binohẹ Susi”. (Kis. 18:24) Su tempong i Apolos su Korintus, pirang katau su sidang limembong puluang si sie sul᷊ungu saudara wal᷊inẹ, nasuẹ̌ lai i Paulus. (1 Kor. 1:12, 13) Apa i Apolos piạ sipatẹ̌ makapẹ̌sitori? Aramanung tala. Faktane, su apang i Apolos něněntangu Korintus, Paulus něgausẹ̌ si sie gunang saụ pẹ̌bal᷊ị. (1 Kor. 16:12) Paulus tawe měkoạ ene mạeng i sie mẹ̌pěndang i Apolos makapẹ̌sitori su sidang. Nal᷊ahẹ, i Apolos něpakẹ bakate pakapia gunang měnginjilẹ̌ dingangu měnoghasẹ̌ anạu sěmbaụ. I kitẹ lai mangimang i Apolos taumata masanạ naung. Contone, Alkitapẹ̌ tawe naul᷊ị i sie tersinggung su tempong i Akuila dingangi Priskila ”nělahẹ si sie soal u dal᷊engu Mawu limembong nihino”.​—Kis. 18:24-28.

17. Kerea i Paulus něndiagạ pẹ̌darame?

¹⁷ Rasul Paulus masingkạ manga hal᷊ẹ̌ mapia seng nikoạ i Apolos. Katewe i Paulus tawe giměnggang taumata mẹ̌pikirẹ̌ i Apolos limembong mapaelẹ̌ bọu i sie. Kasasanạu naung i Paulus, sipate bersahaja,  dingangu masuẹ̌ su akal᷊ẹ̌ ene nal᷊ahẹ bọu sasasane gunang sidang su Korintus. I sie madiri taumata mẹ̌bera, ”iạ tumatol᷊eng i Paulus”, katewe i sie něnarakang kěbị daralo su Mawu Yehuwa dingangi Yesus Kristus.​—1 Kor. 3:3-6.

18. Tumuhụ 1 Korintus 4:6, 7, apa kaěndungang i kitẹ bọu i Apolos dingangi Paulus?

¹⁸ Apa kaěndungang i kitẹ bọu i Apolos dingangi Paulus? I kitẹ ěndịu něhal᷊ẹ̌ masěghadẹ̌ gunang i Yehuwa, kụ nẹ̌tul᷊ung lawọ taumata sarang nibaptisẹ̌. Katewe i kitẹ masingkạ ene nariadi kětạeng ual᷊ingu tul᷊umang i Yehuwa. Bọu contoh i Apolos dingangi Paulus, i kitẹ lai něngěndung kakạl᷊awọe tanggung jawab i kitẹ su sidang, i kitẹ botonge limembong měndiagạ pẹ̌darame su sidang. I kitẹ sěbạe mẹ̌tarimakasẹ manga měngangahạ něndiagạ pẹ̌darame dingangu kasasěmbaụ ual᷊ingu sasasang i sire dasare Hengetangu Mawu kụ i sire tawe fokus su watangeng i sire, katewe si Yesus Kristus.​—Basa 1 Korintus 4:6, 7.

19. I kitẹ pẹ̌sěngkatau botonge měkoạ apa? (Pěmanda lai kotak ” Abe Bersaing”.)

¹⁹ I kitẹ kěbị piạ keterampilan. I kitẹ botonge měpakẹ keterampilan i kitẹ gunang ”mẹ̌tangkiang sěmbaụ su wal᷊inẹ”. (1 Ptr. 4:10) I kitẹ ěndịu mẹ̌pikirẹ̌ apa nikoạ i kitẹ ene tawe tumanịu penting. Katewe pẹ̌tahěndung gunang měkoạ sěmbaụ pakeang masadadạ, ene piạ manga gepẹe dararodọ. Hakị u ene, kěbị apa wotonge koateng i kitẹ ene makatul᷊ung sidang masěmbaụ. Karimạko i kitẹ měnděmẹ sipatẹ̌ puluang bersaing bọu watangeng hala. Mahịe i kitẹ mẹ̌tawakal᷊i měndiagạ pẹ̌darame dingangu kasasěmbaụ su sidang.​—Ef. 4:3.