1. Apa seng nikoạ i Yehuwa si kau?

KEREA sarang i kau nakoạ Sahiding Yehuwa? Humotong, i kau nakaringihẹ̌ ”habarẹ̌ mapia” ěndịu bọu matimadu, hapị su pělahal᷊ẹ̌kang, hapị su sikol᷊ah, arau su tempong piạ Sahiding Yehuwa něnginjilẹ̌ bọu wal᷊e sarang bal᷊e. (Mrk. 13:10) Bọu ene, piạ sěngkatau něpakẹ lawọ tempo dingangu katatoghasẹ̌ gunang měngahạ pěngangěndungang Alkitapẹ̌ dingangu. Su kanandụu pěngangěndungang ene, i kau nakoạ makěndagẹ̌ si Yehuwa kụ i kau masingkạ i Sie makěndagẹ̌ si kau. Yehuwa němol᷊eng si kau sarang katěngadẹ̌, kụ orasẹ̌ ini ual᷊ingu i kau nakoạ muriti Yesus, i kau piạ pělaharapẹ̌ měbiahẹ̌ kěkalẹ̌. (Yoh. 6:44) I kau tantu mẹ̌tarimakasẹ si Yehuwa ual᷊ingu i Sie němahangsang sěngkatau gunang měněntiro katěngadẹ̌ si kau, kụ i Yehuwa něnarimạ si kau nakoạ ělang’E.

2. Apa sarung ěndungang i kitẹ su pěngangěndungang ini?

² Su apang i kitẹ nakasingkạ katěngadẹ̌, i kitẹ piạ kehormatan gěguwạ gunang mẹ̌tul᷊ung taumata wal᷊inẹ tumol᷊e dingangi kitẹ su ral᷊eng sarang pěbawiahẹ̌. Ěndịu gampang si kitẹ měnginjilẹ̌ bọu wal᷊e sarang bal᷊e, katewe ěndịu masigěsạ měngahạ sarang pěngangěndungang Alkitapẹ̌. Apa ene nikapěndangengu? Mạeng kerene, i kau sarung makaěbạ gunane bọu piram baụ těgu su pěngangěndungang ini. I kitẹ sarung měngěndung apa makawahangsang si kitẹ gunang mẹ̌tul᷊ung měkoạ muritẹ̌. I kitẹ lai sarung měngěndung kerea i kitẹ botonge tumatěngo manga sasal᷊ukạ makakoạ i kitẹ ragu gunang měnětạ pěngangěndungang Alkitapẹ̌. Humotong, mahịe i kitẹ měngěndung kawe nụe i kitẹ bal᷊inẹ kětạeng makoạ měnganginjilẹ̌ katewe lai měnaněntiro habarẹ̌ mapia.

3. Kawe nụe i kitẹ měnginjilẹ̌?

³ Su tempong i Yesus su dunia, i sie něgělị darua parenta su manga murite. Humotong, i sie naul᷊ị si sire gunang pěnginjilẹ̌ měhabarẹ̌ soal u Kararatuang, kụ i sie něnodẹ si sire kerea měkoạ ene. (Mat. 10:7; Luk. 8:1) Contone, i Yesus naul᷊ị su manga murite apa harusẹ̌ koateng i sire su tempong taumata mapulu dingangu madiri dumaringihẹ̌ habarẹ̌ mapia. (Luk. 9:2-5) Su tempong i Yesus naul᷊ị i sire ’měhabarẹ̌ su patikụ dunia’ ene mangal᷊ene manga murite sarung měnginjilẹ̌ su lawọ taumata dingangu su lawọ tampạ. (Mat. 24:14; Kis. 1:8) Tawẹ soale taumata měnarimạ habari kitẹ arau tala, Yesus nẹ̌parenta su manga murite gunang měhabarẹ̌ su taumata soal u Kararatuangu Mawu dingangu apa sarung koatengu Kararatuang ene.

4. Sul᷊ungu kětạeng měnginjilẹ̌ soal u Kararatuang, apa lai harusẹ̌ koateng i kitẹ tumuhụ Matius 28:18-20?

⁴ Apa parenta karuane nighělị i Yesus? I sie naul᷊ị su manga tumatol᷊ene tadeạu měněntiro taumata gunang tumuhụ kěbị apa seng niparentane. Katewe, apa hal᷊ẹ̌ měnginjilẹ̌ dingangu měněntiro kětạeng gunang koateng su abad humotong, kere tiněnang pirang katau? Tala. Yesus něnodẹ hal᷊ẹ̌ sěbạe penting ini sarung turusẹ̌ koateng ”sarang pěngěngsuengu zaman ini”. (Basa Matius 28:18-20.) Yesus ěndịu něgělị parenta ini su tempong i sie nẹ̌těngkatodẹ su nal᷊iu wọu 500 tumatol᷊ene. (1 Kor. 15:6) Su penglihatan nighělịe si Yohanes, i Yesus něnodẹ i sie mapulu kěbị murite mẹ̌tul᷊ung taumata měngěndung soal i Yehuwa.​—Why. 22:17.

5. Su 1 Korintus 3:6-9, apa sasihing nipakẹ i Paulus gunang měnodẹ hěmpụe hal᷊ẹ̌ měnginjilẹ̌ dingangu měněntiro?

⁵ Rasul Paulus napẹ̌sul᷊ung hal᷊ẹ̌ měkoạ muritẹ̌ dingangu měngurusẹ̌ sasuang, kụ ene bal᷊inẹ kětạeng měnawuhẹ̌ bibitẹ̌. I sie něgělị laingatẹ̌ su tau Korintus, ”Iạ nẹ̌suang, i Apolos něněbohẹ̌ . . . kụ i kamene kai baelu Mawu.” (Basa 1 Korintus 3:6-9.) Ual᷊ingu nakoạ mělahal᷊ẹ̌ su ”baelu Mawu”, i kitẹ bal᷊inẹ kětạeng měnawuhẹ̌ bibitẹ̌ katewe lai měněbohẹ̌ dingangu měmarikěsa katatuwong bibitẹ̌ ene. (Yoh. 4:35) Su tempo mẹ̌sul᷊ung, i kitẹ masingkạ Mawu napakatuwo bibitẹ̌ ene.

6. Su tempong i kitẹ měněntiro taumata, i kitẹ harusẹ̌ mẹ̌tul᷊ung si sire měkoạ apa?

⁶ I kitẹ mědẹ̌deạ si sire apang ”piạ kapulu nihino gunang makaěbạ pěbawiahẹ̌ kěkalẹ̌”. (Kis. 13:48) Gunang mẹ̌tul᷊ung si sire makoạ muritẹ̌, i kitẹ harusẹ̌ mẹ̌tul᷊ung si sire gunang (1) makaěna, (2) mangimang, dingangu (3) měkoạ manga hal᷊ẹ̌ seng niěndungang i sire bọu Alkitapẹ̌. (Yoh. 17:3; Kol. 2:6, 7; 1 Tes. 2:13) Kěbị su sidang botonge mẹ̌tul᷊ung měngangěndung Alkitapẹ̌, carane měnodẹ kakěndagẹ̌ si sire dingangu měněnsomahẹ̌ su tempong i sire duměnta su pěngangibadang. (Yoh. 13:35) Sěngkatau měnaněntiro ěndịu perlu měnadia lawọ tempo dingangu katatoghasẹ̌ gunang mẹ̌tul᷊ung sěngkatau měngangěndung měmal᷊ui apa pẹ̌pangimangenge arau kebiasaan seng tẹ̌těngal᷊eng ”matoghasẹ̌”. (2 Kor. 10:4, 5) Ěndịu bul᷊ange gunang mẹ̌tul᷊ung měngangěndung měkoạ pẹ̌bawal᷊ui su pěbawiahe sarang i sie botonge ibaptisẹ̌. Katewe sěbạe gěguwạ gunane mạeng měkoạ pẹ̌bawal᷊ui kerene.

7. Apa makawahangsang si kitẹ gunang měnginjilẹ̌ dingangu měkoạ muritẹ̌?

⁷ Kawe nụe i kitẹ měnginjilẹ̌ dingangu měkoạ muritẹ̌? Humotong, ual᷊ingu i kitẹ makěndagẹ̌ si Yehuwa. Su tempong i kitẹ měkoạ kapaelange gunang tumuhụ parenta tadeạu měnginjilẹ̌ dingangu měkoạ muritẹ̌, ene něnodẹ i kitẹ makěndagẹ̌ su Mawu.  (1 Yoh. 5:3) Pẹ̌tiněna soal u ini: Kakěndagu si Yehuwa nakawahangsang si kau něnginjilẹ̌ bọu wal᷊e sarang bal᷊e. Apa gampang tumuhụ parenta ene? Ěndịu tala. Su tempong i kau něnginjilẹ̌ humotong, apa i kau gugupẹ̌? Tantu i kau gugupẹ̌. Katewe, i kau masingkạ ini hal᷊ẹ̌ dẹ̌dorongang i Yesus gunang koatengu, kụ i kau timuhụ parenta ene. Kụ, su apang i kau kakạrěngụe něnginjilẹ̌, ene ěndịu nakoạ limembong gampang. Katewe, kerea pěndangu soal u měngahạ pěngangěndungang Alkitapẹ̌? Apa i kau gugupẹ̌ su tempong nẹ̌pikirẹ̌ hal᷊ẹ̌ ene? Ěndịu. Katewe, mạeng i kau mẹ̌doa si Yehuwa kụ mẹ̌dorong tadeạu i Sie mẹ̌tul᷊ung si kau makoạ bahani gunang měnětạ pěngangěndungang Alkitapẹ̌, i Sie botonge mẹ̌tul᷊ung si kau piạ kapulu gunang měkoạ muritẹ̌.

8. Tumuhụ Markus 6:34, apa lai makawahangsang si kitẹ gunang měněntiro taumata wal᷊inẹ?

⁸ Karuane, kakěndagẹ̌ su taumata makawahangsang si kitẹ gunang měněntiro katěngadẹ̌ si sire. Contone, i Yesus dingangu manga murite sěbạe nal᷊owe ual᷊ingu něnginjilẹ̌ sahěllo tiwatu. I sire membutuhkan tampạ gunang měngirul᷊e, katewe piạ komol᷊angu lawọ taumata nakaěbạ si sire. Yesus timal᷊ěntụ, kụ něnětạ něněntiro si sire ”lawọ hal᷊ẹ̌”. (Basa Markus 6:34.) I sie nẹ̌tawakal᷊i někoạ ene maning seng nal᷊owe. Kawe nụe? Yesus masingkạ kerea pěndang komol᷊angu lawọ taumata ene. I sie mapulu mẹ̌tul᷊ung si sire ual᷊ingu i sie nakasilo i sire sěbạe nasigěsạ kụ membutuhkan pělaharapẹ̌. Situasing taumata orasẹ̌ ini lai mẹ̌sul᷊ung. Abe kaakal᷊eng ual᷊ingu penampilan i sire. I sire mẹ̌sul᷊ung kere domba napal᷊idẹ̌, kụ tawẹ apa měngangahạe. Rasul Paulus naul᷊ị taumata kerene běgang Mawu dingangu tawẹ apa pělaharapẹ̌. (Ef. 2:12) I sire su ral᷊ungu ’dal᷊eng mal᷊oahẹ̌ mětẹ̌timona kawawinasa’. (Mat. 7:13) Su tempong i kitẹ mẹ̌tahěndung keadaan rohani taumata su tampạ i kitẹ, kakěndagẹ̌ dingangu tatal᷊ěntụ makawahangsang si kitẹ gunang mẹ̌tul᷊ung si sire. Kụ cara kapaelange i kitẹ mẹ̌tul᷊ung si sire ene kai měnětạ pěngangěndungang Alkitapẹ̌ dingangi sire.

9. Tumuhụ Filipi 2:13, kerea i Yehuwa mẹ̌tul᷊ung si kau?

⁹ I kau ěndịu ragu gunang měnětạ pěngangěndungang Alkitapẹ̌ ual᷊ingu masingkạ i kau sarung měnadia lawọ tempo gunang měkoạ persiapan dingangu měngahạ pěngangěndungang ene. Mạeng ene nikapěndangengu, pẹ̌běke si Yehuwa. Pẹ̌doa si Sie tadeạu mẹ̌tul᷊ung si kau piạ kapulu gunang mědeạ taumata mapulu měngěndung. (Basa Filipi 2:13.) Rasul Yohanes naul᷊ị si kitẹ, Mawu sarung sumimbahẹ̌ daroa nẹ̌tatahino dingangu kapulu-Ne. (1 Yoh. 5:14, 15) Hakị u ene, i kau botonge mangimang Yehuwa sarung mẹ̌tul᷊ung si kau piạ kapulu gunang měněntiro taumata.

10-11. Kawe nụe i kitẹ ěndịu ragu měngahạ pěngangěndungang Alkitapẹ̌?

¹⁰ I kitẹ masingkạ sěbạe penting gunang měněntiro, katewe ěndịu tawe gampang měkoạ mal᷊awọ kere ikẹ̌kapulung i kitẹ. Mahịe i kitẹ měngěndung piram baụ sasal᷊ukạ dingangu kerea carane tumatěngo ene.

¹¹ I kitẹ ěndịu tawe makakoạ kěbị kere ikẹ̌kapulung i kitẹ. Contone, pirang katau penyiar seng maghurang arau mahungsakị. Apa ene nikahombangengu? Mạeng iya, pěmanda sěmbaụ tatěntiro botonge kaěndungang i kitẹ bọu pandemi COVID-19. I kitẹ něngěndung kerea měněntiro Alkitapẹ̌ měpakẹ alat elektronik. Hakị u ene, i kau botonge měnětạ dingangu měngahạ pěngangěndungang Alkitapẹ̌ bọu wal᷊enu, kụ ene ěndịu limembong gampang. Piạ lai gunane wal᷊inẹ. Pirang katau ěndịu mapulu měngěndung Alkitapẹ̌, katewe i sire tawe makakoạ ene su tempong anạu sěmbaụ i kitẹ biasane měnginjilẹ̌. I sire ěndịu  botonge měkoạ ene su tempong mal᷊ukadẹ̌ arau hěbi. Apa i kau botonge měngěndung Alkitapẹ̌ dingangu sěngkatau su tempo kerene? Yesus něněntiro si Nikodemus su tempong hěbi, tempo nẹ̌tatahino si Nikodemus.​—Yoh. 3:1, 2.

12. Apa makatul᷊ung si kitẹ mangimang i kitẹ botonge makoạ měnaněntiro mapaelẹ̌?

¹² I kitẹ ěndịu nẹ̌pěndang tawe makakoạ měngahạ pěngangěndungang Alkitapẹ̌. I kitẹ ěndịu nẹ̌pěndang i kitẹ harusẹ̌ makasingkạ limembong mal᷊awọ arau makoạ měnaněntiro limembong mapaelẹ̌ těntal᷊ang tawe něněntiro Alkitapẹ̌ su sěngkatau. Mạeng ene nikapěndangengu, pěmanda tatělu hal᷊ẹ̌ botonge makatul᷊ung si kau makoạ limembong percaya diri. Humotong, Yehuwa nẹ̌pěndang i kau botonge měněntiro taumata wal᷊inẹ. (2 Kor. 3:5) Karuane, Yesus, piạ ”kěbị kawasa su sorga dingangu su dunia”, seng nẹ̌parenta si kau gunang měněntiro. (Mat. 28:18) Kụ katělune, i kau botonge mẹ̌dorong tul᷊ung su taumata wal᷊inẹ. Yesus něngumbala su těntirong i Amange soal u apa harusẹ̌ ul᷊ịkange, kụ i kau lai botonge kerene. (Yoh. 8:28; 12:49) I kau lai botonge mẹ̌dorong tul᷊ung su pengawas kelompok dinas lapangan, perintis, arau penyiar piạ lawọ pěngalaman gunang mẹ̌tul᷊ung si kau měnětạ dingangu měngahạ pěngangěndungang Alkitapẹ̌. Sěmbaụ cara tadeạu i kau makoạ limembong percaya diri ute tumol᷊e dingangu anạu sěmbaụ wal᷊inẹ su tempong i sire měngahạ pěngangěndungang Alkitapẹ̌.

13. Kawe nụe i kitẹ harusẹ̌ měkoạ penyesuaian?

¹³ I kitẹ ěndịu masigěsạ měpakẹ cara dingangu alatẹ̌ buhu. Orasẹ̌ ini, cara i kitẹ měněntiro Alkitapẹ̌ seng nẹ̌bal᷊ui. Publikasi kahumotongange paketang i kitẹ gunang měněntiro ene kai Pěbiahe Mal᷊uasẹ̌ Sarang Karěngụe!. Ene nakakoạ i kitẹ harusẹ̌ měkoạ persiapan dingangu měngahạ pěngangěndungang nẹ̌tatěntang bọu cara i kitẹ kangerẹ. Diọ mahal᷊i paragraf basaěng i kitẹ, kụ limembong lawọ mẹ̌bisara dingangu měngangěndung. Su tempong měněntiro i kitẹ limembong lawọ měpakẹ video dingangu alat elektronik, kere aplikasi JW Library^®. Mạeng i kau běga kerea měpakẹ ene, pẹ̌dorong tul᷊ung su sěngkatau tadeạu měněntiro si kau kerea měpakẹ ene. Mạeng i kitẹ seng nawiasa su sěmbaụ hal᷊ẹ̌, tawe gampang si kitẹ gunang měkoạ sěmbaụ hal᷊ẹ̌ buhu. Katewe dingangu tul᷊umang i Yehuwa lai anạu sěmbaụ, i kau sarung limembong gampang měkoạ penyesuaian kụ lai limembong mal᷊uasẹ̌ gunang měněntiro taumata wal᷊inẹ. Kere niul᷊ịu sěngkatau perintis, cara měngěndung kere ini ”makal᷊uasẹ̌ su měnaněntiro dingangu su měngangěndung”.

14. Apa harusẹ̌ tahěndungang i kitẹ su tempong měnginjilẹ̌ su tampạ lawọ taumata madiri dumaringihẹ̌, kụ kerea 1 Korintus 3:6, 7 makawahangsang si kitẹ?

¹⁴ I kitẹ ěndịu mětẹ̌tanạ su tampạ tawe gampang měnětạ pěngangěndungang Alkitapẹ̌. Pirang katau ěndịu tawe tumanịu puluang dumaringihẹ̌ arau mawěngsing su habari kitẹ. Apa makatul᷊ung si kitẹ tatapẹ̌ positif su tampạ kerene? Pẹ̌tahěndung su dunia dal᷊akị ini pěbawiahu taumata mal᷊ighạ mẹ̌bal᷊ui, kụ i sire apang madiri měnarimạ ěndịu samurine masadarẹ̌ i sire membutuhkan laahạ bọu Mawu. (Mat. 5:3) Pirang katau humotong madiri měnarimạ bawasang i kitẹ, samurine mapulu měngěndung Alkitapẹ̌. I kitẹ lai masingkạ i Yehuwa kai Taghuangu paměnsạkeng. (Mat. 9:38) I Sie mapulu i kitẹ turusẹ̌ mẹ̌suang dingangu měněbohẹ̌, katewe i Sie sarung mapakatuwo ene. (1 Kor. 3:6, 7) Kụ i kitẹ sěbạe mawahangsang su tempong mẹ̌tahěndung maning tawẹ apa něngěndung Alkitapẹ̌ dingangi kitẹ, Yehuwa sarung měngal᷊amatẹ̌ tawakal᷊ing i kitẹ bal᷊inẹ hasile. *

15. Kerea pěndang i Yehuwa su tempong sěngkatau mapulu měngěndung Alkitapẹ̌ kụ měkoạ apa seng niěndungange?

¹⁵ Yehuwa mal᷊uasẹ̌ su tempong sěngkatau něnarimạ katěngadu Alkitapẹ̌ lai nẹ̌běke katěngadẹ̌ ene su taumata wal᷊inẹ. (Amsal 23:15, 16) Yehuwa tantu mal᷊uasẹ̌ nakasilo apa nariadi orasẹ̌ ini. Contone, maning piạ pandemi global su kanandụu taung dinas 2020, piạ 7.705.765 něngěndung Alkitapẹ̌, kụ bọu i sire piạ 241.994 taumata něgělị watangenge si Yehuwa kụ nibaptisẹ̌. Kụ manga muritẹ̌ buhu ene sarung měngahạ pěngangěndungang Alkitapẹ̌ lai měkoạ limembong lawọ muritẹ̌. (Luk. 6:40) Yehuwa tantu mal᷊uasẹ̌ su tempong i kitẹ měkoạ muritẹ̌.

16. I kitẹ botonge měkoạ cita-cita apa?

¹⁶ Hal᷊ẹ̌ měkoạ muritẹ̌ ene kai hal᷊ẹ̌ gěguwạ, katewe dingangu tul᷊umang i Yehuwa i kitẹ botonge měněntiro taumata wuhu kuměndagẹ̌ si Amang i kitẹ su sorga. Apa i kitẹ botonge měkoạ cita-cita mẹ̌těngkahal᷊i měněntiro Alkitapẹ̌ su sěngkatau? I kitẹ ěndịu sarung huměkosẹ̌ makasilo apa sarung mariadi su tempong i kitẹ mẹ̌kiwal᷊o su taumata apang nipẹ̌sombangeng, apa i sire mapulu měngěndung Alkitapẹ̌ dingangi kitẹ. I kitẹ mangimang Yehuwa sarung měngal᷊amatẹ̌ tawakal᷊ing i kitẹ.

17. Apa sarung kapěndangeng mạeng i kitẹ měngahạ pěngangěndungang Alkitapẹ̌?

¹⁷ Měnginjilẹ̌ dingangu měněntiro katěngadẹ̌ su taumata wal᷊inẹ ene kai sěmbaụ kehormatan gěguwạ. Hal᷊ẹ̌ ini sěbạe makal᷊uasẹ̌ si kitẹ. Rasul Paulus, seng nẹ̌tul᷊ung lawọ taumata su Tesalonika nakoạ muritẹ̌, naul᷊ị pěndange kere ini: ”Mạeng bal᷊inẹ i kamene, i sai sarung makoạ pělaharapeng arau mahkota karal᷊uasi kami su těngong Tuang Yesus su tempong i sie seng ene? I kamene nakoạ kawawantugẹ̌ dingangu karal᷊uasi kami.” (1 Tes. 2:19, 20; Kis. 17:1-4) Orasẹ̌ ini, lawọ taumata piạ pěndang kerene. Sěngkatau saudari arenge Stéphanie dingangu kawinge, seng nẹ̌tul᷊ung lawọ taumata sarang nibaptisẹ̌ nẹ̌bera, ”Tawẹ apa limembong makal᷊uasẹ̌ sul᷊ungu mẹ̌tul᷊ung taumata měgělị pěbawiahi sire si Yehuwa.”