Yehuwa tantu mapulu duang katau mal᷊uasẹ̌ su pẹ̌kakawing i sire dingangu piạ hubungan mapia sěmbaụ su wal᷊inẹ, kụ ene matahang marěngụ. (Mat. 19:4-6) Mạeng i kau mapulu mẹ̌kawing, kerea tadeạu i kau makaěbạ taumata mapia gunang makoạ kawing? Ual᷊ingu i Yehuwa Měndariading i kitẹ, i Sie masingkạ apa harusẹ̌ koateng i kitẹ tadeạu piạ pẹ̌kakawing mal᷊uasẹ̌. Hakị u ene, mạeng i kau tumol᷊e prinsipẹ̌ seng nighělị’E, i kau sarung kahěngang-hěngang mal᷊uasẹ̌. Pěmanda piram baụ prinsipe.

Humotong, i kitẹ harusẹ̌ makaěna watangeng i kitẹ soal u ini: ”Naung limembong maakal᷊ẹ̌ bọu kěbị haghi kụ nekat.” (Yer. 17:9) Su tempong duang katau mapulu mẹ̌kawing nẹ̌sěmạ kụ nẹ̌sasintị, sarung masahawụ tumuwo pěndang matoghasẹ̌ sěmbaụ su wal᷊inẹ. Mạeng ene nariadi, sarung masigěsạ i sire měkoạ putusang matahuěna. Su tempong sěngkatau měkoạ putusang ual᷊ingu pěndang, samurine i sie sarung mẹ̌sasěsilẹ̌. (Amsal 28:26) Mạeng duang katau masahawụ maul᷊ị pěndang i sire arau měkoạ diandi těntal᷊ang bědang tawe nakasingkạ mal᷊awọ sěmbaụ su wal᷊inẹ ene tawe matahuěna.

Amsal 22:3 naul᷊ị, ”Taumata mapelesa mẹ̌kěmbuni su tempong makasilo silakạ, katewe taumata tawẹ apa pengalaman dụdal᷊eng turusẹ̌ kụ makahombang tětal᷊e.” Apa bahayane mạeng měpakẹ situs mědeạ sintị? Pirang katau nakahombang pengalaman dal᷊akị ual᷊ingu pěndang i sire niakal᷊engu taumata tawe nikěnalẹ̌ nipẹ̌sombangeng i sire su situs online. Kụ lai, taumata tawe jujurẹ̌ měpakẹ akun palsu gunang měngakal᷊ẹ̌ taumata kụ mẹ̌tako doiti sire. Pẹ̌sěngsul᷊ẹ taumata tawe jujurẹ̌ kerene mengaku i sire Sahiding Yehuwa.

Pěmanda lai tětal᷊ẹ̌ wal᷊inẹ. Piram baụ situs mědeạ sintị něpakẹ perhitungan matematika gunang mapẹ̌sombangu taumata nẹ̌tatahino. Katewe, tawẹ apa bukti měpakẹ cara ene kahěngang-hěngang berhasil. Apa matahuěna měngumbala su perhitungan nikoạu taumata su tempong měkoạ putusang penting gunang mědeạ kawing? Program komputer tawe kapěngumbalaěng sul᷊ungu prinsip Alkitapẹ̌.​—Amsal 1:7; 3:5-7.

Prinsipẹ̌ su Amsal 14:15 naul᷊ị, ”Taumata tawẹ apa pengalaman mangimang su kěbị bawera, arawe taumata matahuěna mẹ̌timbangu  kěbị lempange.” Těntal᷊ang bědang tawe někoạ putusang i sie sarung makoạ kawingu, i kau harusẹ̌ kahěngang-hěngang masingkạ si sie. Katewe mạeng kětạeng mẹ̌sombang secara online ene tawe gampang koateng. Maning i kau měmanda informasi sěmbaụ su wal᷊inẹ dingangu měpakẹ lawọ tempo gunang mẹ̌bawěke sěngkasio secara online, apa i kau kahěngang-hěngang makasingkạ soal i sie? Pirang katau apang nẹ̌pěndang seng nakaěbạ cinta sejati himěkosẹ̌ ual᷊ingu apa nikasingkạ i sire su tempong nẹ̌sombang langsung dingangu tau ene.

Pemazmur naul᷊ị, ”Iạ tawe mědal᷊ahapị dingangu taumata maakal᷊ẹ̌, kụ iạ mẹ̌těngkarau bọu taumata měmẹ̌muni watangenge.” (Mz. 26:4) Lawọ taumata mẹ̌pikirẹ̌ mẹ̌konti soal u informasi i sire su situs mědeạ sintị ene tawẹ apa-apa tadeạu i sire kasilong limembong masadadạ. I sire ěndịu němuni taumata kerea i sire sěběnarẹ̌e arau bědang tawe kasilong su tempong mẹ̌bawěke. Maning pirang katau maul᷊ị i sire Sahiding Yehuwa, apa i sire kahěngang-hěngang bọu nibaptisẹ̌? Apa i sire matělang su rohani? Apa i sire piạ pẹ̌dal᷊ahapị mapia dingangi Yehuwa? Apa i sire lẹ̌adateng su sidang i sire? Arau apa i sire někoạ hal᷊ẹ̌ tawe matahuěna arau piạ ”pẹ̌dal᷊ahapị dal᷊akị”? (1 Kor. 15:33; 2 Tim. 2:20, 21) Kụ tumuhụ prinsip Alkitapẹ̌, apa i sire piạ kawawebasẹ̌ gunang mẹ̌kawing? I kau perlu masingkạ sasimbahu manga kakiwal᷊o ene. Katewe sarung masigěsạ makaěbạ sasimbahe mạeng tawe mẹ̌kiwal᷊o su Sahiding Yehuwa wal᷊inẹ apang kahěngang-hěngang masingkạ soal u tau ene. (Amsal 15:22) Tantu, sěngkatau Sahiding Yehuwa masatia tawe mẹ̌tiněna gunang ”makoạ sěmbaụ” dingangu taumata bal᷊inẹ Sahiding Yehuwa.​—2 Kor. 6:14; 1 Kor. 7:39.

Ual᷊ingu měpakẹ situs mědeạ sintị ene makawahaya, piạ manga cara limembong mapaelẹ̌ gunang mědeạ dingangu makasingkạ sěngkatau ěndịu sarung makoạ kawingu. Su apa i kau makaěbạ sěngkatau sarung makoạ kawingu mapia? Su tempong i kitẹ mẹ̌komol᷊ẹ̌ sěngkasio, i kite botonge langsung makasingkạ sěngkatau su tempong duměnta su pěngangibadang, manga pertemuan gěguwạ, dingangu manga pertemuan wal᷊inẹ.

Su tempong tawe makapẹ̌komol᷊ẹ̌ sěngkasio, kere su kanandụu pandemi COVID-19, i kitẹ něpakẹ alat elektronik gunang měngibadah, kụ sene piạ kesempatan gunang makasingkạ Sahiding Yehuwa wal᷊inẹ apang lajang. I kau botonge dumaringihẹ̌ su tempong i sire měnasẹ̌ dingangu měnodẹ pangangimang i sire su tempong něgělị komentarẹ̌ su pěngangibadang. (1 Tim. 6:11, 12) Su apang nasue ibadane, i kau lai botonge mẹ̌bawěke sěngkasio. Su tempong i kau tumol᷊e mědal᷊ahapị secara virtual dingangu anạu sěmbaụ, i kau botonge měmanda kerea i sie měkoạ taumata wal᷊inẹ. Mạeng i kau měkoạ ene, i kau botonge makasilo kerea i sie sěběnarẹ̌e. (1 Ptr. 3:4) Su tempong i kau makasingkạ limembong mal᷊awọ soal i sie, i kau botonge makasingkạ apa i rua piạ cita-cita mẹ̌sul᷊ung dingangu cocokẹ̌ arau tala.

Su tempong sěngkatau měpakẹ prinsip Alkitapẹ̌ gunang mědeạ kawing, pẹ̌kakawinge sarung maral᷊uasẹ̌. Kere niul᷊ịu Amsal 18:22, ”Taumata nakaěbạ kawing wawine [arau kawing esẹ] mapia seng nakaěbạ barang maarěga, kụ Yehuwa mal᷊uasẹ̌ si sie.”