1-2. Kerea bawerang i Yehuwa su Yesaya 65:16, 17 makatoghasẹ̌ si kitẹ gunang mẹ̌tatahang?

”JANGAN MENYERAH!” ene kai tema mapaelẹ̌ bọu acara pertemuan regional taung 2017. Acara ene něnodẹ kerea i kitẹ mẹ̌tatahang tumatěngo manga masalang i kitẹ. Ěpạu taung seng nal᷊iu dongkeng pertemuan ene, kụ i kitẹ bědang mětẹ̌tatahang měbiahẹ̌ su dunia dal᷊akị orasẹ̌ ini.

² Apa masalah buhudeng nikahombangengu? Apa anạu sěngkataunu arau hapịu nate? Apa i kau nasakị mawěhạ? Apa pěbawiahu limembong masigěsạ ual᷊ingu seng kakạgurange? Apa i kau nakahombang bencana alam, katatingkaị, arau dẹ̌darihang? Arau apa i kau nasigěsạ ual᷊ingu pandemi COVID-19? I kitẹ měhědo su tempong i kitẹ seng tawe mẹ̌tahěndung kěbị masalah dingangu kěbị ene seng tawe saụ mariadi.​—Basa Yesaya 65:16, 17.

3. Apa harusẹ̌ koateng i kitẹ orasẹ̌ ini, kụ kawe nụe?

³ Měbiahẹ̌ su dunia ini kai tawe gampang, kụ i kitẹ ěndịu sarung makahombang masalah limembong masigěsạ su tempo mahi. (Mat. 24:21) Hakị u ene, i kitẹ harusẹ̌ turusẹ̌ měngěndung limembong mẹ̌tatahang. Kawe nụe? Ual᷊ingu i Yesus naul᷊ị, ”Mạeng i kamene mẹ̌tatahang, i kamene sarung tatapẹ̌ biahẹ̌.” (Luk. 21:19) I kitẹ sarung limembong mẹ̌tatahang mạeng mẹ̌tiněna kerea taumata wal᷊inẹ nẹ̌tatahang timatěngo masalah mẹ̌sul᷊ung dingangi kitẹ.

4. Kawe nụe i Yehuwa nakoạ pẹ̌tatěnoěng kapaelange soal u mẹ̌tatahang?

⁴ I sai pẹ̌tatěnoěng kapaelange soal u mẹ̌tatahang? Mawu Yehuwa. Ěndịu i kau naherang. Katewe mạeng i kau mẹ̌tiněna soal u ene, i kau sarung makaěna. Setang měngẹ̌ngawasa dunia ini, hakị u ene dunia ini piạ lawọ masalah. Yehuwa piạ kawasa gunang mapakasue masalah orasẹ̌ ini, katewe i Sie měngampal᷊ẹ̌ měkoạ ene hědo su tempo mahi. (Rm. 9:22) Su  tempo mẹ̌sul᷊ung Mawung i kitẹ turusẹ̌ nẹ̌tatahang, sarang tempone i Sie měminasa dunia ini. Mahịe i kitẹ měngěndung kerea i Yehuwa nẹ̌tatahang su sio hal᷊ẹ̌.

5. Kerea arengu Mawu nihinakaneng, kụ kerea pěndangu soal u hal᷊ẹ̌ ene?

⁵ Areng’E nihinakaneng. Yehuwa makěndagẹ̌ su areng’E, kụ i Sie mapulu kěbị taumata měngadatẹ̌ areng ene. (Yes. 42:8) Katewe su kanandụu ěnungu hiwu su taunge, areng’E seng nihinakaneng. (Mz. 74:10, 18, 23) Ene něnětạ su taman Eden su tempong Iblis (mangal᷊ene ”Tahapěhinakang”) něnoke Mawu madiri piạ hal᷊ẹ̌ makakoạ i Adam dingangi Hawa měbiahẹ̌ mal᷊uasẹ̌. (Kej. 3:1-5) Dongkeng tempo ene, Yehuwa nitoke něnahang apa nakoạ kebutuhan taumata. Yesus nasusah naung ual᷊ingu areng i Amange nihinakaneng. Hakị u ene, i sie něněntiro manga murite gunang mẹ̌doa, ”I Amang i kami su Sorga, apakasusiko areng’U.”​—Mat. 6:9.

6. Kawe nụe i Yehuwa němala lawọ tempo nal᷊iu těntal᷊ang i Sie bědang tawe napakasue masalah hakẹ̌’E mẹ̌parenta?

⁶ Hakẹ̌ i Yehuwa gunang mẹ̌parenta nisal᷊ukateng. Kětạeng i Yehuwa piạ hakẹ̌’E gunang mẹ̌parenta su sorga dingangu su dunia, kụ cara-Ne mẹ̌parenta ene kapaelange. (Why. 4:11) Katewe Setang něngakal᷊ẹ̌ malaekatẹ̌ dingangu taumata tadeạu mẹ̌pikirẹ̌ Mawu tawe hakẹ̌’E. Kụ masalah hakẹ̌u Mawu mẹ̌parenta dingangu pěmamarentang’E kapaelange ene tawe masue su ral᷊ungu sěhěbi. Mawu dingangu matahuěna němala tempo nal᷊iu tadeạu taumata makasilo pěmamarentang nikoạ i sire hala tawe makakoạ apa-apa mạeng tawe dumaringihẹ̌ su Měndariadi. (Yer. 10:23) Ual᷊ingu Mawu masabarẹ̌, masalah ene sarung ipakasue sarang karěngụe. I Sie sarung mapakasusi areng’E su tempong měnodẹ kětạeng Kararatuang’E botonge makarěntang pẹ̌darame tutune su patikụ dunia.

7. I sai limawang si Yehuwa, kụ apa sarung koateng i Yehuwa si sire?

⁷ Pirang katau anạ’E limawang si Sie. Yehuwa něndiadi malaekatẹ̌ dingangu taumata nasukụ. Katewe bọu ene Setang (mangal᷊ene ”Tahapěndongka”) limawang si Yehuwa, kụ i sie lai nakakoạ i Adam dingangi Hawa limawang si Yehuwa. Malaekatẹ̌ wal᷊inẹ dingangu taumata lai timol᷊e limawang. (Yud. 6) Samurine pirang katau tau Israel, umatẹ̌ nipileng Mawu, tawe něnarimạ si Sie kụ něnětạ něněmba mawu palsu. (Yes. 63:8, 10) Yehuwa nẹ̌pěndang dikhianati. Katewe, i Sie tatapẹ̌ nẹ̌tatahang, kụ sarung turusẹ̌ mẹ̌tatahang sarang tempone i Sie měminasa kěbị apang limawang si Sie. Bọu ene, Yehuwa dingangu manga ělang’E apang masatia sarung mal᷊uasẹ̌ ual᷊ingu i sire seng tawe tumatěngo karal᷊akisẹ̌ bọu dunia ini.

8-9. Apa konting Setang soal i Yehuwa, kụ apa koateng i kitẹ?

⁸ Konting Setang. Setang něnoke si Ayub dingangu manga ělangu Mawu masatia wal᷊inẹ, i sire nẹ̌tahamawu si Yehuwa kětạeng tadeạu makaěbạ al᷊amatẹ̌. (Ayb. 1:8-11; 2:3-5) Sarang orasẹ̌ ini, Setang bědang měnẹ̌noke. (Why. 12:10) I kitẹ měnodẹ Setang ene tahakontiang carane turusẹ̌ mẹ̌tatahang tumatěngo manga sasal᷊ukạ dingangu tatapẹ̌ satia si Yehuwa ual᷊ingu makěndagẹ̌ si Sie. Mạeng i kitẹ mẹ̌tatahang, i kitẹ sarung makaěbạ al᷊amatẹ̌ kere i Ayub.​—Yak. 5:11.

⁹ Setang něpakẹ manga těmbonangu agama palsu gunang maul᷊ị i Yehuwa kai dal᷊akị kụ nakakoạ taumata nasigěsạ. Pirang katau naul᷊ị, su tempong dariọ kadodọ nate Mawu něngal᷊ạ ual᷊ingu i Sie membutuhkan limembong lawọ malaekatẹ̌ su sorga. Ini kai  kurangajarẹ̌! Katewe, i kitẹ masingkạ Yehuwa kai Amang makěndagẹ̌. Su tempong i kitẹ nakahombang sakị mawěhạ arau piạ taumata ikẹ̌kěndagẹ̌ nate, i kitẹ tawe mapẹ̌sal᷊ang Mawu. Katewe, i kitẹ mangimang su tempone i Sie sarung mapakapia taumata masakị dingangu mapakawiahẹ̌ taumata nate. I kitẹ botonge maul᷊ị su kěbị taumata apang mapulu dumaringihẹ̌ Yehuwa kai Mawu makěndagẹ̌. Mạeng měkoạ ene, Yehuwa makasimbahẹ̌ apa nitokengu Setang.​—Amsal 27:11.

10. Apa nilahẹu Mazmur 22:23, 24 soal i Yehuwa?

¹⁰ Manga ělang’E nasigěsạ. Yehuwa kai Mawu matal᷊ěntụ. I Sie sěbạe nasusah naung su tempong nakasilo i kitẹ nasigěsạ ěndịu ual᷊ingu tawe nasukụ, dẹ̌darihang, arau masakị. (Basa Mazmur 22:23, 24.) Yehuwa nakaěna kerea kasigěsạe i kitẹ, i Sie mapulu mapakaědo ene, kụ sarung mapakaědo ene. (Bandingkan Keluaran 3:7, 8; Yesaya 63:9.) Sarung duměnta tempone ”i Sie sarung měngěmụ kěbị ěllo matang [i kitẹ]. Papate sarung mailang. Pěndang lụl᷊ahunsusah, sasangị, arau pěndang matědụ lai sarung mailang”.​—Why. 21:4.

11. Kerea pěndang i Yehuwa su manga ělang’E masatia apang seng nate?

¹¹ Nitěntangu manga hapị’E ual᷊ingu papate. Kerea pěndang i Yehuwa su manga ělang’E masatia apang seng nate? I Sie sěbạe mapulu saụ mẹ̌sombang dingangi sire. (Ayb. 14:15) Pẹ̌tiněna kerea i Yehuwa sěbạe mapulu saụ makasilo hapị’E i Abraham. (Yak. 2:23) Arau Musa bọu ”nẹ̌bisara langsung” dingangi Yehuwa. (Kel. 33:11) Kụ i Sie mělẹ̌hědo kakantarị daralo bọu i Daud dingangu pemazmur wal᷊inẹ. (Mz. 104:33) Maning manga hapị u Mawu ini seng nate, Yehuwa tawe niwul᷊e si sire. (Yes. 49:15) I Sie nakatahěndung kěbị sipati sire. Alkitapẹ̌ naul᷊ị, ”Su mata-Ne, i sire kěbị biahẹ̌.” (Luk. 20:38) Su tempo mahi,  i Sie sarung mapakawiahẹ̌ si sire, kụ sarung dumaringihẹ̌ daroang i sire bọu dal᷊ungu naung lai měnarimạ ibadang i sire. Mạeng piạ taumata ikẹ̌kěndagu nate, i kau tantu makoạ matěnang.

12. Apa nakakoạ i Yehuwa sěbạe nasusah naung su kanandụu pěngěngsuengu dunia dal᷊akị ini?

¹² Taumata dal᷊akị něndariha taumata wal᷊inẹ. Su tempong dal᷊awang něnětạ su Eden, Yehuwa masingkạ situasi sarung makoạ limembong dal᷊akị těntal᷊ang tawe nakoạ mapia. Yehuwa mawěngsing su karal᷊akisẹ̌, hal᷊ẹ̌ tawẹ adile, dingangu su katatingkaị su dunia orasẹ̌ ini. Yehuwa sěbạe mapandung su taumata gampang tingkaitang. Contone, i sire apang lome dingangu tawe makariagạ watangenge kere wawine wal᷊u dingangu anạ kasisi. (Za. 7:9, 10) Yehuwa sěbạe nasusah naung su tempong nakasilo manga ělang’E masatia nitingkaitang dingangu nipěnjara. Pangimangke i Sie makěndagẹ̌ si kamene kěbị apang nẹ̌tatahang sěngkasio dingang’E.

13. Kakanoạ makạdarěnting apa nikasilongu Mawu su taumata, kụ apa sarung koateng’E?

¹³ Taumata nakoạ limembong amoral. Yehuwa něndiadi taumata gunang mẹ̌těno si Sie, katewe Setang něngakal᷊ẹ̌ taumata gunang měkoạ hal᷊ẹ̌ amoral. Su tempong Mawu ”nakasilo karal᷊akị su dunia sauneng kakạdal᷊akịe” su zaman i Noakẹ̌, ”Yehuwa nẹ̌sasěsilẹ̌ seng něndiadi taumata su dunia, kụ i Sie natědụ naung”. (Kej. 6:5, 6, catatan kaki, 11) Apa něnětạ tempo ene dunia nakoạ limembong mapaelẹ̌? Tantu tala. Setang sěbạe mal᷊uasẹ̌ su tempong nakasilo hal᷊ẹ̌ amoral nakoạ kere wiasa, baebe su tal᷊oarang esẹ dingangu wawine arau sesama jenis. (Ef. 4:18, 19) Setang sěbạe mal᷊uasẹ̌ mạeng ělang i Yehuwa někoạ dosa gěguwạ. Su tempong kasasabari Yehuwa seng nasue, i Sie sarung měnodẹ i Sie sěbạe mawěngsing su kakanoạ amoral kụ měminasa kěbị taumata amoral apang madiri mẹ̌bal᷊ui.

14. Apa nikoạu taumata su diadikangu Mawu su dunia?

¹⁴ Taumata něndusa diadikang’E. Bal᷊inẹ kětạeng ”taumata nẹ̌kawasa taumata sarang nakarugi watangeng i sire hala”, katewe taumata lai tawe něngurusẹ̌ dunia dingangu binatang kere seng niparentang i Yehuwa. (Pkh. 8:9; Kej. 1:28) Pirang katau ahli naul᷊ị ual᷊ingu kakakoạu taumata, satu juta jenis sasuang dingangu binatang ěndịu sarung mailang su pira taung tuhụe. Hakị u ene, tawe makaherang mạeng taumata gụgěnggang soal u lingkungan hidup. I kitẹ sěbạe mẹ̌tarimakasẹ ual᷊ingu i Yehuwa nẹ̌diandi ”sarung měminasa taumata apang měnděndusa dunia”, kụ měkoạ dunia ini mariadi firdaus.​—Why. 11:18; Yes. 35:1.

15-16. Apa sěběnarẹ̌e makawahangsang si kitẹ gunang mẹ̌tatahang sěngkasio dingangi Yehuwa? Gělịko sasihinge.

¹⁵ Pẹ̌tiněna soal u kěbị masalah nikahombangeng i Amang i kitẹ su sorga su kanandụu hiwune su taunge. (Pěmanda kotak ” Yehuwa Nẹ̌tatahang Timatěngo Manga Hal᷊ẹ̌ Apa”.) Yehuwa sěběnarẹ̌e botonge langsung měminasa dunia dal᷊akị ini. Katewe ual᷊ingu i Sie masabarẹ̌ ene nakarěntang al᷊amatẹ̌ si kitẹ. Pẹ̌tiněna soal u sasihing ini: Sěngkawingang nakaěbạ habarẹ̌ anạ i sire bědang su ral᷊ungu kandungan piạ sakị mawěhạ, su tempong malahirẹ̌ pěbawiahe sarung masigěsạ, kụ tawe kararěngụe mate. Katewe, su tempong anạ ene nalahirẹ̌, matimade mal᷊uasẹ̌ maning i sire sarung sěbạe masigěsạ měngurusẹ̌ anạ ene. Ual᷊ingu makěndagẹ̌ su anạ, i sire nẹ̌tatahang timatěngo haghing masalah tadeạu makaghělị kapaelange gunang pěbawiahu anạ i sire.

 ¹⁶ Kerene lai, su tempong nalahirẹ̌ kěbị hiteng i Adam dingangi Hawa tawe nasukụ. Katewe, Yehuwa tatapẹ̌ makěndagẹ̌ dingangu něngurusẹ̌ si sire. (1 Yoh. 4:19) Nẹ̌tatěntang dingangu matimadẹ̌ su sasihing kanini, i Yehuwa botonge mapakailang kasasigěsạ tẹ̌tatěngongu manga anạ’E. I Sie seng němile tempo gunang mapakasue kěbị kasasigěsạu taumata. (Mat. 24:36) Kakěndagi Yehuwa sěběnarẹ̌e botonge makakoạ i kitẹ mẹ̌tatahang sarang tempone duměnta.

17. Kawe nụe keterangan soal i Yesus su Ibrani 12:2, 3 makatoghasẹ̌ si kitẹ gunang tatapẹ̌ mẹ̌tatahang?

¹⁷ Yehuwa kai pẹ̌tatěnoěng nasukụ soal u mẹ̌tatahang. Yesus nẹ̌těno si Amange soal u mẹ̌tatahang. Su tempong su dunia, Yesus nẹ̌tatahang timatěngo bawera dal᷊akị, nipakamea, dingangu nate su rihi gunang i kitẹ. (Basa Ibrani 12:2, 3.) Tantu ual᷊ingu nakasilo i Yehuwa nẹ̌tatahang ene nakatoghasẹ̌ si Yesus gunang mẹ̌tatahang. Ene lai botonge makatoghasẹ̌ si kitẹ.

18. Kerea 2 Petrus 3:9 nakatul᷊ung si kitẹ nakaěna apa nariadi ual᷊ingu i Yehuwa sěbạe masabarẹ̌?

¹⁸ Basa 2 Petrus 3:9. Yehuwa masingkạ tempo kapaelange gunang měminasa dunia dal᷊akị ini. Ual᷊ingu i Sie masabarẹ̌, lawọ taumata nakasingkạ si Sie, kụ orasẹ̌ ini jutane taumata bọu komol᷊ang gěguwạ nẹ̌tahamawu si Sie. I kitẹ kěbị mal᷊uasẹ̌ ual᷊ingu i Yehuwa seng marěngụ nẹ̌tatahang kụ ene nakakoạ i kitẹ nalahirẹ̌, něngěndung kiměndagẹ̌ si Sie, lai něgělị watangeng i kitẹ si Sie. Su tempong jutane taumata nẹ̌tatahang sarang pěngěngsuenge, ene něnodẹ putusang i Yehuwa gunang mẹ̌sasabarẹ̌ ene seng nihino.

19. I kitẹ mapulu mẹ̌tawakal᷊i měkoạ apa, kụ al᷊amatẹ̌ apa sarung kaěbakeng i kitẹ?

¹⁹ I kitẹ něngěndung bọu i Yehuwa kerea mẹ̌tatahang apidu mal᷊uasẹ̌. Tawẹ soale Setang nakakoạ kasasigěsạ dingangu susah naung, Yehuwa tatapẹ̌ ”Mawu mal᷊uasẹ̌”. (1 Tim. 1:11) I kitẹ lai botonge tatapẹ̌ mal᷊uasẹ̌ apidu masabarẹ̌ měngampal᷊ẹ̌ Yehuwa mapakasusing areng’E, měnodẹ kětạeng i Sie piạ hakẹ̌’E gunang mẹ̌parenta, měminasa kěbị karal᷊akisẹ̌, dingangu mapakailang kěbị masalang i kitẹ orasẹ̌ ini. Karimạko i kitẹ mahiborẹ̌ dingangu mẹ̌tawakal᷊i turusẹ̌ mẹ̌tatahang ual᷊ingu masingkạ i Amang i kitẹ su sorga lai turusẹ̌ mětẹ̌tatahang. Mạeng i kitẹ měkoạ ene, bawera ini sarung mariadi: ”Mal᷊uasẹ̌ taumata apang nẹ̌tatahang timatěngo sasal᷊ukạ, ual᷊ingu su tempong Mawu mal᷊uasẹ̌ si sie, taumata ene sarung makaěbạ mahkota pěbawiahẹ̌, seng nirianding i Yehuwa gunang taumata apang turusẹ̌ kụkěndagẹ̌ si Sie.”​—Yak. 1:12.