1. Kawe nụe i Yehuwa tawe napẹ̌sul᷊ung i kitẹ dingangu taumata wal᷊inẹ?

YEHUWA mapulu kěbị nẹ̌tatěntang. Ene nal᷊ahẹ bọu kěbị diadikang’E, nasuẹ̌ lai taumata. Tawẹ apa taumata kahěngang-hěngang mẹ̌sul᷊ung dingangu. Hakị u ene, Yehuwa tawe pernah napẹ̌sul᷊ung watangengu dingangu taumata wal᷊inẹ. I Sie botonge makasilo i sai i kau sěběnarẹ̌e. (1 Sam. 16:7) I Sie lai masingkạ karal᷊omenu, katatoghasu, dingangu latar belakang. Kụ i Sie tawe mẹ̌dorong i kau měkoạ hal᷊ẹ̌ tawe ikakoạu. I kitẹ perlu měmanda watangeng i kitẹ kere cara i Yehuwa. Mạeng měkoạ ene, i kitẹ sarung piạ ”tiněna masehatẹ̌”, tawe mẹ̌tiněna tumanịu mal᷊awọ arau limembong mahal᷊i soal u watangeng i kitẹ.​—Rm. 12:3, catatan kaki.

2. Kawe nụe mapẹ̌sul᷊ung watangeng dingangu taumata wal᷊inẹ ene makawahaya?

² Tantu, i kitẹ sarung makaěbạ lawọ gunane mạeng měmanda anạu sěmbaụ apang mapaelẹ̌ měnginjilẹ̌. (Ibr. 13:7) I kitẹ botonge měngěndung bọu i sire kerea tadeạu mapaelẹ̌ měnginjilẹ̌. (Flp. 3:17) Katewe piạ pẹ̌tatěntange mẹ̌těno contoh mapaelẹ̌ bọu sěngkatau dingangu mapẹ̌sul᷊ung watangeng i kitẹ dingange. Mạeng mapẹ̌sul᷊ung watangeng dingangu taumata wal᷊inẹ, i kitẹ sarung makoạ iri, makadodọ naung, arau mẹ̌pěndang tawe maarěga. Kere seng niěndungang su pěngangěndungang kal᷊imona, mạeng i kitẹ bersaing dingangu anạu sěmbaụ ene sarung makarusa pẹ̌dal᷊ahapị i kitẹ dingangi Yehuwa. Hakị u ene, Yehuwa dingangu makěndagẹ̌ něgělị laingatẹ̌ si kitẹ, ”Balạe pẹ̌sěngkatau měmarikěsa hala kakanoạe, kụ i sie sarung mal᷊uasẹ̌ ual᷊ingu watangenge, bal᷊inẹ ual᷊ingu napẹ̌sul᷊ungu watangenge dingangu taumata wal᷊inẹ.”​—Gal. 6:4.

3. Manga kemajuan rohani apa makakoạ i kau mal᷊uasẹ̌?

 ³ Yehuwa mapulu i kau mal᷊uasẹ̌ su kemajuan rohani seng nikoạu. Contone, mạeng i kau seng nibaptisẹ̌, i kau botonge mal᷊uasẹ̌ ual᷊ingu seng nakakoạ cita-citanu. I kau hala někoạ putusang ene. Kakěndagu si Yehuwa nakakoạ i kau někoạ putusang ene. Pẹ̌tiněna kemajuan seng nikoạu dongkeng tempo ene. Contone, apa i kau nakoạ limembong puluang mẹ̌basa dingangu měngěndung Alkitapẹ̌ hala? Apa daroanu nakoạ limembong spesifik dingangu bọu dal᷊ungu naung? (Mz. 141:2) Apa i kau nakoạ limembong mapaelẹ̌ měnětạ mẹ̌baweke dingangu měpakẹ alatẹ̌ su tempong měnginjilẹ̌? Kụ mạeng i kau seng bọu nẹ̌kawing, apa i Yehuwa nẹ̌tul᷊ung si kau nakoạ kawing arau matimadẹ̌ limembong mapaelẹ̌? I kau botonge puas dingangu mal᷊uasẹ̌ su kemajuan seng nikoạu.

4. Apa sarung ěndungang i kitẹ su pěngangěndungang ini?

⁴ I kitẹ mẹ̌tul᷊ung anạu sěmbaụ tadeạu mal᷊uasẹ̌ su kemajuan rohaning i sire. I kitẹ lai botonge mẹ̌tul᷊ung si sire tadeạu tawe mapẹ̌sul᷊ung watangeng i sire dingangu taumata wal᷊inẹ. Su pěngangěndungang ini, i kitẹ sarung měmanda kerea matimadẹ̌ mẹ̌tul᷊ung anạ i sire, kerea sěngkawingang mẹ̌tul᷊ung sěmbaụ su wal᷊inẹ, dingangu kerea manga penatua lai taumata wal᷊inẹ mẹ̌tul᷊ung anạu sěmbaụ. Samurine, i kitẹ sarung měngěndung piram baụ prinsip Alkitapẹ̌ makatul᷊ung si kitẹ měkoạ cita-cita botonge koateng i kitẹ.

5. Tumuhụ Efesus 6:4, apa sěběnarẹ̌e tawe wotonge koatengu matimadẹ̌?

⁵ Matimadẹ̌ harusẹ̌ pakaingatẹ̌ abe mapẹ̌sul᷊ung anạ sěmbaụ dingangu anạ wal᷊inẹ arau měharapẹ̌ anạe měkoạ limembong mal᷊awọ bọu apa wotonge koatenge. Mạeng matimadẹ̌ měkoạ ene, anạ i sire sarung makadodọ naung. (Basa Efesus 6:4.) Sěngkatau saudari arenge Sachiko * naul᷊ị, ”Guruku měharapẹ̌ iạ makoạ limembong mapaelẹ̌ bọu manga hapịku su kalasẹ̌. Mamạku lai mapulu iạ makoạ limembong mapaelẹ̌ su sikol᷊ah tadeạu makaghělị kesaksian su guruku dingangi papạku bal᷊inẹ Sahiding Yehuwa. I sie mapulu iạ tawe mẹ̌sal᷊a su ulangan, katewe ene tawe masuẹ̌ su akal᷊ẹ̌. Maning seng pira taung nalulusẹ̌ bọu sikol᷊ah, iạ pẹ̌sěngsul᷊ẹ nẹ̌pěndang Yehuwa tawe mal᷊uasẹ̌ si siạ maning iạ seng někoạ kapaelange.”

6. Apa kaěndungangu matimadẹ̌ bọu Mazmur 131:1, 2?

 ⁶ Piạ tatěntiro penting gunang matimadẹ̌ su Mazmur 131:1, 2. (Basa.) Datu Daud naul᷊ị i sie tawe ”mělẹ̌harapẹ̌ hal᷊ẹ̌ limembong marangẹ” arau manga hal᷊ẹ̌ tawe makamampo koatenge. Kasasanạu naunge lai sipatẹ̌ bersahaja ’nakahiborẹ̌ dingangu napakatěnang’ si sie. Apa kaěndungangu matatimadẹ̌ bọu bawerang i Daud? Tadeạu matimadẹ̌ masanạ naung, i sire tawe měharapẹ̌ tumanịu mal᷊awọ su watangeng i sire dingangu lai tawe měharapẹ̌ tumanịu mal᷊awọ bọu anạ i sire. Matimadẹ̌ botonge měkoạ anạ i sire mẹ̌pěndang maarěga mạeng masingkạ kelebihan dingangu kurangu anạ i sire, kụ mẹ̌tul᷊ung měkoạ cita-cita botonge ikakoạu anạ i sire. Sěngkatau saudari arenge Marina naul᷊ị, ”Mamạku tawe pernah napẹ̌sul᷊ung iạ dingangu tuhang lai tuariku, arau dingangu anạu taumata wal᷊inẹ. I sie naul᷊ị si siạ i kitẹ kěbị piạ bakat nẹ̌tatěntang kụ i kitẹ pẹ̌sěngkatau maarěga si Yehuwa. Ual᷊ingu i sie, iạ tawe masau mapẹ̌sul᷊ung watangengku dingangu taumata wal᷊inẹ.”

7-8. Kerea sěngkatau kawing esẹ měngadatẹ̌ kawinge?

⁷ Kawing esẹ harusẹ̌ měngadatẹ̌ kawinge. (1 Ptr. 3:7) Měngadatẹ̌ mangal᷊ene mapandung dingangu měngarěga taumata wal᷊inẹ. Contone, kawing esẹ měngadatẹ̌ kawinge carane měkoạ si sie dingangu maarěga. I sie tawe mẹ̌dorong kawinge měkoạ hal᷊ẹ̌ tawe makamampo koatenge. Kụ i sie tawe mapẹ̌sul᷊ung kawinge dingangu wawine wal᷊inẹ. Kerea pěndangu kawing wawine mạeng kawinge mapẹ̌sul᷊ung i sie dingangu wawine wal᷊inẹ? Kawing esẹ bal᷊inẹ Sahiding Yehuwa bọu sěngkatau saudari arenge Rosa masau mapẹ̌sul᷊ung i sie dingangu wawine wal᷊inẹ. Bawera dal᷊akị bal᷊inẹ kětạeng nakakoạ i Rosa natědụ naung, katewe lai nakakoạ i sie ragu apa piạ taumata kahěngang-hěngang makěndagẹ̌ si sie. I sie naul᷊ị, ”Iạ harusẹ̌ turusẹ̌ gělịkang laingatẹ̌ i Yehuwa měngẹ̌ngarěga si siạ.” Nẹ̌tatěntang bọu ene, sěngkatau saudara harusẹ̌ měngadatẹ̌ kawinge. I sie masingkạ mạeng měkoạ ene sarung piạ pěngarune mapia su pẹ̌kakawing i rẹ̌dua dingangu su pẹ̌dal᷊ahapịe dingangi Yehuwa. *

⁸ Sěngkatau kawing esẹ měngadatẹ̌ kawinge sarung maul᷊ị manga hal᷊ẹ̌ mapia soal u kawinge su taumata wal᷊inẹ, maul᷊ị i sie sěbạe makěndagẹ̌ su kawinge, lai měngarěga si sie. (Amsal 31:28) Katerina, nisěbạ su pěngangěndungang kal᷊imona, seng nitul᷊ungu kawinge gunang tumatěngo pěndang tawẹ arěgane. Su tempong i Katerina bědang kadodọ, mamạe tawe měngẹ̌ngarěga si sie dingangu masau mapẹ̌sul᷊ung i sie dingangu manga hapịe. Hakị u ene, i Katerina něnětạ napẹ̌sul᷊ung watangenge dingangu taumata wal᷊inẹ, kụ turusẹ̌ kerene sarang i sie seng nakoạ Sahiding Yehuwa. Katewe, kawinge nẹ̌tul᷊ung si sie gunang měngědo měkoạ ene kụ mẹ̌tiněna watangenge dingangu cara nihino. Katerina naul᷊ị, ”I sie masayang si siạ, mẹ̌dalo ual᷊ingu manga hal᷊ẹ̌ mapia seng nikoạku, dingangu mẹ̌doa gunang iạ. I sie lai někoạ si siạ nẹ̌tahěndung manga sipati Yehuwa mapaelẹ̌ dingangu nẹ̌tul᷊ung si siạ němal᷊ui tiněna nẹ̌sal᷊a.”

9-10. Kerea manga penatua mapadul᷊i nẹ̌tul᷊ung sěngkatau saudari tadeạu tawe mapẹ̌sul᷊ung watangenge dingangu taumata wal᷊inẹ?

⁹ Kerea penatua mẹ̌tul᷊ung si sire apang mapẹ̌sul᷊ung watangenge dingangu taumata wal᷊inẹ? Pěmanda pengalaman sěngkatau saudari arenge Hanuni, su tempong kadodọ kurang makaěbạ daralo. I sie nẹ̌bera, ”Iạ meang dingangu nẹ̌pěndang mangarariọ wal᷊inẹ limembong mapaelẹ̌ bọu iạ.  Iạ něnětạ napẹ̌sul᷊ung watangeng dingangu taumata wal᷊inẹ dongkeng bědang kadodọ.” Sarang su tempong seng nakoạ Sahiding Yehuwa, i Hanuni bědang mapẹ̌sul᷊ung watangenge dingangu taumata wal᷊inẹ. Hakị u ene, i sie nẹ̌pěndang tawẹ arěgane su sidang. Katewe orasẹ̌ ini, i sie kai sěngkatau perintis mal᷊uasẹ̌. Apa nakatul᷊ung si sie němal᷊ui tiněnane?

¹⁰ Hanuni nẹ̌bera i sie nakaěbạ tul᷊umang bọu pirang katau penatua makěndagẹ̌. I sire naul᷊ị i sie bageang maarěga bọu sidang dingangu nẹ̌dalo ual᷊ingu kasasatiane. I sie nẹ̌běke, ”Manga penatua pirang sul᷊ẹ nẹ̌dorong si siạ gunang měnoghasẹ̌ pirang katau saudari apang membutuhkan tul᷊umang. Iạ nẹ̌pěndang iạ piạ hal᷊ẹ̌ku su sidang. Iạ nakatahěndung su tempong manga penatua makěndagẹ̌ nẹ̌tarimakasẹ ual᷊ingu iạ nakawahangsang pirang katau saudari mangudạ. I sire nẹ̌basa 1 Tesalonika 1:2, 3 gunang iạ. Ene sěbạe nakakanoạ naungku. Ual᷊ingu manga penatua makěndagẹ̌ ene, orasẹ̌ ini iạ masingkạ iạ maarěga su sidang.”

11. Kere nilahẹ su Yesaya 57:15, kerea i kitẹ mẹ̌tul᷊ung taumata ”sěbạe nasusah naung dingangu nikailangengu sěmangatẹ̌”?

¹¹ Basa Yesaya 57:15. Yehuwa kahěngang-hěngang mapadul᷊i su taumata ”sěbạe nasusah naung dingangu nikailangengu sěmangatẹ̌”. Bal᷊inẹ kětạeng penatua, i kitẹ kěbị botonge mẹ̌tul᷊ung měnoghasẹ̌ anạu sěmbaụ piạ pěndang kerene. Sěmbaụ cara i kitẹ měnoghasẹ̌ si sire ute měnodẹ i kitẹ mapadul᷊i si sire. Yehuwa mapulu i kitẹ měnodẹ kerea kaguwạe kakěndag’E si sire. (Amsal 19:17) I kitẹ lai botonge mẹ̌tul᷊ung anạu sěmbaụ dingangu masanạ naung lai bersahaja. I kitẹ tawe mapakawantugẹ̌ watangeng ual᷊ingu madiri taumata wal᷊inẹ iri si kitẹ. Katewe, i kitẹ měpakẹ kemampuan dingangu kasingkạ i kitẹ gunang měnoghasẹ̌ sěmbaụ su wal᷊inẹ.​—1 Ptr. 4:10, 11.

12. Kawe nụe taumata wiasa mal᷊uasẹ̌ si Yesus? (Pěmanda gambarẹ̌ sampul.)

¹² I kitẹ botonge měngěndung mal᷊awọ soal u kerea měkoạ taumata wal᷊inẹ carane měmanda kerea i Yesus někoạ manga tumatol᷊ene. I sie tokoh terbesar bọu něbiahẹ̌ su dunia. Katewe, i sie ”masikome naung dingangu masanạ naung”. (Mat. 11:28-30) I sie tawe něngobotu kapandene dingangu kěbị apa nikasingkạe. I sie něněntiro něpakẹ bawera sederhana dingangu sasihing gampang kaěnang, kụ ene nakakanoạ naungu taumata wiasa. (Luk. 10:21) Nẹ̌tatěntang dingangu manga těmbonangu agama maobotẹ̌, Yesus tawe pernah někoạ taumata wal᷊inẹ nẹ̌pěndang i sire tawe maarěga su Mawu. (Yoh. 6:37) I sie měngẹ̌ngarěga taumata wiasa.

13. Kerea i Yesus něnodẹ kakěndagẹ̌ dingangu kapia naung su manga murite?

¹³ Kakěndagẹ̌ dingangu kapiang naung i Yesus nikasilong mal᷊ahẹ su tempong i sie berurusan dingangu manga murite. I sie masingkạ i sire piạ situasi dingangu kemampuan nẹ̌tatěntang. Hakị u ene, i sire tawe makakoạ kěbị hal᷊ẹ̌ mẹ̌sul᷊ung arau melayani mẹ̌sul᷊ung kal᷊awọe. Katewe, i sie mal᷊uasẹ̌ ual᷊ingu pẹ̌sěngkatau někoạ kapaelange. Yesus něnodẹ i sie piạ pěndang kerene su sasihinge soal u talenta. Su sasihing ene sěngkatau bosẹ̌ něgělị su manga ělange hal᷊ẹ̌ ”tuhụ kemampuan pẹ̌sěngkatau”. Sěmbaụ bọu darua ělang marading nakaěbạ limembong mal᷊awọ. Katewe bosẹ̌ ene nẹ̌dalo si rẹ̌dua dingangu bawera mẹ̌sul᷊ung ini: ”Sěbạe mapaelẹ̌, ělang mapia dingangu masatia!”​—Mat. 25:14-23.

14. Kerea i kitẹ mẹ̌těno si Yesus měkoạ taumata wal᷊inẹ?

¹⁴ Yesus sěntiniạ makěndagẹ̌ dingangu mapia si kitẹ. I sie masingkạ kemampuan dingangu situasing i kitẹ nẹ̌tatěntang, kụ i sie mal᷊uasẹ̌ su tempong i kitẹ někoạ kapaelange. I kitẹ perlu mẹ̌těno si Yesus. I kitẹ  madiri měkoạ anạu sěmbaụ mẹ̌pěndang tawẹ arěgane arau mamea ual᷊ingu i sie tawe makakoạ mal᷊awọ kere taumata wal᷊inẹ. Katewe, i kitẹ sěntiniạ mapulu mẹ̌dalo anạu sěmbaụ apang turusẹ̌ mětẹ̌tawakal᷊i měkoạ kapaelange gunang i Yehuwa.

15-16. Kerea sěngkatau saudari nakaěbạ gunane ual᷊ingu někoạ cita-cita botonge ikakoạe?

¹⁵ Cita-cita rohani makakoạ i kitẹ piạ timonang pěbawiahẹ̌. Katewe, i kitẹ harusẹ̌ měkoạ cita-cita botonge ikakoạ i kitẹ. Cita-citang i kitẹ tawe harusẹ̌ mẹ̌sul᷊ung dingangu taumata wal᷊inẹ. Tantu i kitẹ madiri mẹ̌sasěsilẹ̌ dingangu makadodọ naung. (Luk. 14:28) Pěmanda pengalaman sěngkatau perintis arenge Midori.

¹⁶ Su tempong i Midori bědang kadodọ, papạe bal᷊inẹ Sahiding Yehuwa napakamea si sie carane napẹ̌sul᷊ung i sie dingangu manga tuarine lai hapịe su sikol᷊ah. Midori nẹ̌bera, ”Iạ nẹ̌pěndang tawẹ arěgane.” Katewe su apang limembong matělang, i Midori nakoạ limembong percaya diri. I sie nẹ̌bera, ”Iạ nẹ̌basa Alkitapẹ̌ ěllo-ěllo ual᷊ingu ene nakatul᷊ung si siạ nẹ̌pěndang Yehuwa makěndagẹ̌ si siạ.” I sie lai někoạ cita-cita botonge ikakoạe, kụ nẹ̌doa bọu dal᷊ungu naunge tadeạu i sie makakoạ cita-citane. Samurine, i Midori mal᷊uasẹ̌ su kemajuan rohani seng nikoạe.

17. Apa makatul᷊ung si kitẹ měmal᷊ui tiněnang i kitẹ, kụ apa hasile?

¹⁷ Pěndang dingangu tiněna negatif ěndịu tawe mailang su ral᷊ungu sěhěbi. Hakị u ene, i Yehuwa něgělị laingatẹ̌ si kitẹ, ”Tiněnang i kamene harusẹ̌ turusẹ̌ koạ buhu.” (Ef. 4:23, 24) Tantu gunang měkoạ ene, i kitẹ harusẹ̌ mẹ̌doa, měngěndung Alkitapẹ̌, dingangu mẹ̌tiněna. Turusẹ̌ koạ hal᷊ẹ̌ ini, kụ pẹ̌dorong katatoghasẹ̌ bọu i Yehuwa. Rohkẹ̌’E masusi sarung makatul᷊ung si kau měngěndung tawe mapẹ̌sul᷊ung watangengu  dingangu taumata wal᷊inẹ. Yehuwa lai mẹ̌tul᷊ung si kau makasingkạ mạeng i kau seng nakoạ maobotẹ̌ arau iri, kụ i Sie sarung mẹ̌tul᷊ung si kau měkoạ pẹ̌bawal᷊ui.

18. Kerea bawera su 2 Tawarikh 6:29, 30 makahiborẹ̌ si kau?

¹⁸ Basa 2 Tawarikh 6:29, 30. Yehuwa masingkạ kerea pěndang i kitẹ. I Sie lai masingkạ i kitẹ lụlawang karal᷊omeng watangeng hala dingangu pengaruh dal᷊akị bọu dunia ini. Su tempong i Yehuwa nakasilo kerea kawěhạe i kitẹ lumawang manga hal᷊ẹ̌ ene, i Sie limembong makěndagẹ̌ si kitẹ.

19. Kerea i Yehuwa nělahẹ pěndange soal i kitẹ?

¹⁹ Gunang mělahẹ kerea pěndang’E soal i kitẹ, Yehuwa něpakẹ contoh kakěndagẹ̌ su tal᷊oarang matimadẹ̌ wawine dingangu anạe bědang kadodọ. (Yes. 49:15) Pẹ̌tiněna contoh sěngkatau matimadẹ̌ wawine arenge Rachel. I sie nẹ̌běke, ”Anạku wawine i Stephanie nalahirẹ̌ bědang tawe natimu su wul᷊ange. Su tempong humotong iạ nakasilo si sie, i sie sěbạe kadodọ dingangu lome. Katewe dokterẹ̌ němala si siạ měněngal᷊ẹ̌ anạ ene ěllo-ěllo su wul᷊ang humotong i sie nalahirẹ̌. Su kanandụu tempo ene, iạ dingangu anạku nakoạ sěbạe marani. Orasẹ̌ ini, umure seng ěnungu taung kụ badange limembong kadodọ bọu mangarariọ sěngumurẹ̌ dingange. Maning kerene, iạ sěbạe makěndagẹ̌ si sie ual᷊ingu i sie nẹ̌tawakal᷊i měbiahẹ̌, kụ nakakoạ pěbawiahẹ̌ku sěbạe mal᷊uasẹ̌.” I kitẹ mal᷊uasẹ̌ nakasingkạ i Yehuwa sěbạe makěndagẹ̌ si kitẹ ual᷊ingu nakasilo i kitẹ nẹ̌tawakal᷊i někoạ kapaelange gunang i Sie.

20. Kawe nụe ělang i Yehuwa botonge mal᷊uasẹ̌?

²⁰ Ual᷊ingu i kau ělang i Yehuwa, i kau maarěga su kěluargang i Yehuwa, kụ tawẹ apa taumata mẹ̌sul᷊ung dingangu. Yehuwa tawe němol᷊eng si kau ual᷊ingu i kau limembong mapaelẹ̌ bọu taumata wal᷊inẹ. I Sie němol᷊eng si kau ual᷊ingu i Sie nakasilo i kau kai taumata kerea, i kau masanạ naung, mapulu měngěndung bọu i Sie, kụ mapulu měkoạ pẹ̌bawal᷊ui. (Mz. 25:9) Pangimangke i Yehuwa mal᷊uasẹ̌ su tempong i kau někoạ kapaelange gunang i Sie. I kau seng nẹ̌tatahang dingangu satia si Sie. Ene něnodẹ i kau taumata ”naunge matul᷊idẹ̌ dingangu mapia”. (Luk. 8:15) Hakị u ene turusẹ̌ gělị kapaelange si Yehuwa. Kụ i kau sarung piạ alasang mapaelẹ̌ gunang ’mal᷊uasẹ̌ ual᷊ingu watangengu’.