1, 2. (a) Hal᷊ẹ̌ apa harusẹ̌ makoạ limembong penting su kěbị taumata? (b) Kawe nụe hal᷊ẹ̌ ene penting si kitẹ?

DOITẸ̌ kai sěmbaụ hal᷊ẹ̌ penting su taumata orasẹ̌ ini. I sire turusẹ̌ mẹ̌tiněna soal u roitẹ̌ dingangu měpakẹ lawọ tempo gunang měnahusu ene. Sěnggạ lai mẹ̌pěndang hal᷊ẹ̌ penting ene kai keluarga, kasasehatẹ̌, dingangu cita-cita.

² Katewe, piạ sěmbaụ hal᷊ẹ̌ limembong penting bọu kěbị hal᷊ẹ̌ ene. Ene kai měnodẹ kětạeng Yehuwa piạ hakẹ̌ e mẹ̌parenta. I kitẹ harusẹ̌ turusẹ̌ mẹ̌tiněna hal᷊ẹ̌ ini. Mạeng i kitẹ tawe maingatẹ̌, hal᷊ẹ̌ ěllo-ěllo arau sigěsạ makakoạ si kitẹ miwul᷊e hal᷊ẹ̌ limembong penting ini. Sěběnarẹ̌e mạeng měnarimạ hakẹ̌ i Yehuwa mẹ̌parenta, i kitẹ botonge tumatěngo sigěsạ ěllo-ěllo, kụ mědal᷊ahapị mapia dingangi Yehuwa.

3. Apa niul᷊ị u Setang soal u cara Mawu mẹ̌parenta?

³ Setang arau Iblis někoạ sěmbaụ konti nělahẹ Yehuwa tawẹ hakẹ̌ e mẹ̌parenta. Setang mapulu tadeạu  taumata mẹ̌tiněna Yehuwa bal᷊inẹbe Měngangawasa mapia kụ i Sie tawe mapadul᷊i si kitẹ. Setang sěběnarẹ̌e nẹ̌bera taumata limembong mal᷊uasẹ̌ mạeng i sire mẹ̌parenta watangenge hala. (Pěnd. 3:1-5) I sie lai nělahẹ tawẹ apa taumata masatia su Mawu mạeng pěbawiahe nasigěsạ. (Ayb. 2:4, 5) Hakị u ene, Yehuwa němala tempo nal᷊iu gunang měnodẹ su kěbị diadikang, mạeng bal᷊inẹ Mawu makoạ Měngangawasa, i sire sarung masigěsạ.

4. Kawe nụe masalah i sai piạ hakẹ̌ e mẹ̌parenta harusẹ̌ lighạ ipakasue?

⁴ Yehuwa masingkạ apa niul᷊ị u Iblis kai konti. Mạeng kerene, kawe nụe i Sie něgělị tempo si Setang? Tadeạu taumata dingangu malaekatẹ̌ maka-silo apa niul᷊ị u Iblis ene kahěngang arau konti. (Basa Mazmurẹ̌ 83:19.) I Adam dingangi Hawa madiri Yehuwa mẹ̌parenta, kụ lawọ lai němile kerene. Hakị u ene, piạ u nẹ̌tiněna apa niul᷊ị u Iblis ene kahěngang. Mạeng hal᷊ẹ̌ ene tawe lighạ ipakasue, ene mang tẹ̌tiněnangu taumata dingangu malaekatẹ̌, kụ tawe makarěntang pẹ̌darame dingangu kasasěmbaụ. Katewe mạeng nal᷊ahẹ kětạeng Yehuwa piạ hakẹ̌ e mẹ̌parenta, kěbị diadikang sarung makapěndang pẹ̌darame su al᷊ungu pěmamarenta-Ne sarang karěngụe.​—Ef. 1:9, 10.

5. Apa koateng i kitẹ gunang měnodẹ i kitẹ měnarimạ hakẹ̌ u Mawu mẹ̌parenta?

⁵ Seng mal᷊ighạ kasingkateng kětạeng Mawu piạ hakẹ̌ e mẹ̌parenta. Setang dingangu taumata tawe nakakoạ mẹ̌parenta, kụ i sire sarung punaseng. Pěměrentang Mawu bọu Kararatuang i Mesias sarung makoạ pěměrenta kapaelange. I sire apang masatia sarung makoạ tatiala taumata botonge tatapẹ̌ masatia su Mawu dingangu měnarimạ pěmamarenta-Ne. (Yes. 45:23, 24) Apa i kitẹ mapulu kere i sire? Tantu! Hakị u ene, i kitẹ harusẹ̌ mẹ̌tahěndung hal᷊ẹ̌ penting ini.

6. Měnodẹ Yehuwa piạ hakẹ̌ e mẹ̌parenta ene limembong penting bọu apa?

⁶ Měnodẹ kětạeng i Yehuwa piạ hakẹ̌ e mẹ̌parenta ene limembong penting bọu karal᷊uasẹ̌ i kitẹ hala. Katewe, ene bal᷊inẹbe mangal᷊ene Yehuwa tawe mẹ̌padul᷊i kasasal᷊amatẹ̌ i kitẹ. Bọu apa i kitẹ masingkạ?

7, 8. Apa al᷊amate si kitẹ mạeng hakẹ̌ u Mawu mẹ̌parenta makoạ mal᷊ahẹ?

⁷ Yehuwa makěndagẹ̌ su taumata, hakị u ene i Sie něgělị Ahuse tadeạu i kitẹ měbiahẹ̌ kěkalẹ̌. (Yoh. 3:16; 1 Yoh. 4:9) Mạeng dianding Yehuwa tawe mariadi, apa nitokeng Setang dingangu sědụ u Mawu wal᷊inẹ, ene kahěngang. Setang něnoke Yehuwa kai makonti kụ tawe mapadul᷊i su taumata dingangu cara-Ne mẹ̌parenta tawẹ adile.  Manga sědụ u Mawu něheghesẹ̌ su diandi-Ne kụ nẹ̌bera, ”Uadewe Mawu e nẹ̌kědou sarung duměnta! Kụ ini e kawe suapa i Sie? Manga i upung i kitẹ e seng nasue něngkairị, kaiso kěbị sạbarange měngkate lai těbe kere nạung dunia e nariadi!” (2 Ptr. 3:3, 4) Katewe Yehuwa mang měkoạ manga diandi-Ne. I Sie něngatorẹ̌ su tempong hakẹ̌ e mẹ̌parenta seng mal᷊ahẹ, ene lai mangal᷊ene kasasal᷊amatẹ̌ su taumata matuhụ. (Basa Yesaya 55:10, 11.) Pěmamarentang Yehuwa dasare kai kakěndagẹ̌. Hakị u ene i kitẹ mangimang i Sie turusẹ̌ kuměndagẹ̌ dingangu měngarěga manga ělang’E apang masatia.​—Sas. 34:6.

⁸ Hakẹ̌ i Yehuwa mẹ̌parenta ene penting, katewe ene bal᷊inẹbe i Sie tawe mẹ̌padul᷊i soal u kasasal᷊amatẹ̌ i kitẹ. Yehuwa makěndagẹ̌ si kitẹ. I kitẹ harusẹ̌ turusẹ̌ mẹ̌tahěndung hal᷊ẹ̌ limembong penting kụ satia su pěmamarentang i Yehuwa.

9. Apa nitokeng Setang si Ayub? (Pěmanda gambarẹ̌ humotong su pěngangěndungang ini.)

⁹ Penting piạ tiněna nihino soal u hakẹ̌ u Mawu mẹ̌parenta. Ene nal᷊ahẹ su bukẹ̌ Ayub, sěmbaụ bọu manga bukẹ̌ su Alkitapẹ̌ niwohẹ kakal᷊imonaěnge. Bukẹ̌ ene nẹ̌běke kerea Setang něnoke si Ayub, kụ naul᷊ị mạeng i Ayub masigěsạ, i sie sarung měněntang Mawu. Setang lai nẹ̌dorong Mawu pěkoạ si Ayub masigěsạ. Yehuwa madiri měkoạ ene, katewe i Sie němala Setang měnal᷊ukạ si Ayub, kụ nẹ̌bera, ”Kerenẹ e, koạ e walạewe měnsang apa wọu kakakalạ i Ayub.” (Basa Ayub 1:7-12.) Bọu ene, i Ayub kinailangengu ělang dingangu arětạe. Mapul᷊ong katau anạe lai nate. Setang někoạ sasal᷊ukạ ene kakělaěng kere bọu Mawu. (Ayb. 1:13-19) Bọu ene, Setang naparěntang sakị makạdarěnting kụ i Ayub sěbạe nasigěsạ. (Ayb. 2:7) Kawinge dingangu tatělu hapịe něluang bawera nakasusah naunge.​—Ayb. 2:9; 3:11; 16:2.

10. (a) Kerea i Ayub něnodẹ kasasatiane su Mawu? (b) Kawe nụe Yehuwa něgělị sasasa si Ayub?

¹⁰ Apa bawerang Setang ene kahěngang? Tala. Maning i Ayub nasigěsạ, i sie tawe něněntang si Yehuwa. (Ayb. 27:5) Katewe, su sěngkatempo Ayub niwul᷊e hal᷊ẹ̌ limembong penting kụ kětạeng nẹ̌tiněna watangenge hala. I sie naul᷊ị i sie tawe někoạ barang nẹ̌sal᷊a. Ayub lai nẹ̌pěndang i sie harusẹ̌ masingkạ kawe nụe i sie nasigěsạ. (Ayb. 7:20; 13:24) I kitẹ tantu nakaěna pěndang i Ayub. Katewe Yehuwa masingkạ tiněnang i Ayub nẹ̌sal᷊a, kụ i Sie něgělị sasasa si Ayub. Kerea carane?

11, 12. Yehuwa mapulu měněntiro apa si Ayub, kụ apa nikoạ i Ayub?

¹¹ Bawerang Yehuwa si Ayub niwohẹ su bukẹ̌ Ayub pasalẹ̌ 38 sarang 41. Yehuwa tawe naul᷊ị alasange i Ayub nasigěsạ. Katewe Yehuwa nělahẹ i Ayub tawe ikasul᷊ung dingang’E. I Sie něněntiro si Ayub piạ hal᷊ẹ̌ limembong penting bọu kasasigěsạ kinahombangenge. (Basa Ayub 38:18-21.) Apa niul᷊ị i Yehuwa nakatul᷊ung si Ayub němal᷊ui tiněnane.

¹² Apa bawerang i Yehuwa kasarẹ̌ sěmbal᷊iau i Ayub buhudeng nakahombang kasasigěsạ? Tala, Ayub tawe  nẹ̌tiněna kerene. Ayub nakaěna dingangu něnarimạ sasasa bọu Yehuwa. I sie nẹ̌bera, ”Ual᷊ingu ene iạ e mamea makatahěndung kal᷊awọu waweraku ringangu piạ sěsilẹ̌ku iạ e naiang su ral᷊ungu awul᷊ẹ̌ dingangu awu.” (Ayb. 42:1-6) Bọu ene, piạ lai umbaseng arenge i Elihu nẹ̌tul᷊ung si Ayub němal᷊ui tiněnane. (Ayb. 32:5-10) Su apang i Ayub něnarimạ sasasa bọu Yehuwa kụ němal᷊ui tiněnane, Yehuwa naul᷊ị su taumata wal᷊inẹ i Sie mal᷊uasẹ̌ ual᷊ingu i Ayub masatia.​—Ayb. 42:7, 8.

13. Kerea sasasang Yehuwa nakatul᷊ung si Ayub maning pěbawiahe nakoạ limembong mapia?

¹³ Sasasang Yehuwa bědang piạ gunane si Ayub maning pěbawiahe seng nakoạ limembong mapia. ”I Ayub ni-al᷊amateng u MAWU niapẹ̌dal᷊embo su ral᷊ungu pěngěnsueěngu pẹ̌bawiahe.” I sie lai ”nakaěbạ manga rariọ esẹ pitung katau ringangu manga rariọ bawine i sire těllung katau”. (Ayb. 42:12-14) Maning i Ayub makěndagẹ̌ su manga anạe, i sie tantu mapulu mẹ̌sombang dingangu manga anạe apang seng nate. I sie lai tawe niwul᷊e kasasusang i sire. Kụ mạeng i sie makasingkạ kawe nụe i sie nasigěsạ, i sie tatapẹ̌ tawe makaěna kawe nụe Mawu němala i sie sěbạewe nasigěsạ. Mạeng i Ayub mẹ̌tiněna kerene, i sie botonge mẹ̌tahěndung sasasang Yehuwa. Ene makahiborẹ̌ dingangu makatul᷊ung si sie piạ tiněna nihino.​—Mzm. 94:19.

14. Apa kaěndungang i kitẹ bọu apa nikahombangeng i Ayub?

¹⁴ Mẹ̌tiněna apa nariadi si Ayub, makahiborẹ̌ dingangu makawal᷊ui tiněnang i kitẹ. Bukẹ̌ Ayub nakoạ bageang bọu Alkitapẹ̌ kụ niwohẹ ”tadeạu pạněntiro si kitẹ. Batụu těntiro nikatarimạ i kitẹ bọu Winohẹ Susi e makạkědang dingangu makạtoghasẹ̌ si kitẹ hakị u i kitẹ makapělẹ̌harapẹ̌ su Ruata”. (Rm. 15:4) Bukẹ̌ ene něgělị tatěntiro mapaelẹ̌ si kitẹ, abe tumanịu mẹ̌tiněna kasasusang i kitẹ  hala, sarang i kitẹ seng tawe mẹ̌tiněna hakẹ̌ u Mawu mẹ̌parenta. Kere i Ayub, i kitẹ mapulu měnodẹ Mawu piạ hakẹ̌ e mẹ̌parenta, carane tatapẹ̌ satia si Sie maning nakahombang kasasusah.

15. Apa pul᷊ise mạeng i kitẹ tatapẹ̌ satia maning nakahombang sigěsạ?

¹⁵ Běke soal i Ayub makahiborẹ̌ si kitẹ. Běke ene něnodẹ mạeng nakahombang kasasusah, ene bal᷊inẹ Yehuwa pědu si kitẹ. Su tempong i kitẹ nasigěsạ ene tempone měnodẹ kětạeng i Yehuwa piạ hakẹ̌ e mẹ̌parenta. (Baw. 27:11) Mạeng tatapẹ̌ satia su tempong piạ sigěsạ, Yehuwa mal᷊uasẹ̌ kụ pělaharapẹ̌ i kitẹ sauneng kakạto-ghase. (Basa Roma 5:3-5.) Běke soal i Ayub něnodẹ ”Mawu e měngkai matal᷊ěntụ dingangu kerẹeng kapiane naung’E”. (Yak. 5:11) Mạeng i kitẹ měnarimạ pěmamarentang i Yehuwa, i Sie sarung měngal᷊amatẹ̌ si kitẹ. Mạeng mẹ̌tahěndung hal᷊ẹ̌ ene, i kitẹ ”makakẹ̌dang su patikụ sabarang, masasabarẹ̌ dingangu maral᷊uasẹ̌”.​—Kol. 1:11.

16. Kawe nụe i kitẹ harusẹ̌ turusẹ̌ mẹ̌tahěndung hakẹ̌ i Yehuwa mẹ̌parenta ene penting?

¹⁶ Tantu su tempong i kitẹ nakahombang kasasigěsạ, tawe gampang mẹ̌tahěndung hakẹ̌ i Yehuwa mẹ̌parenta. Kerene lai, sigěsạ darodọ makoạ gěguwạ mạeng turusẹ̌ tẹ̌tiněnang. Hakị u ene i kitẹ harusẹ̌ mẹ̌tahěn-dung pěmamarentang u Mawu ene penting, tawẹ soale sigěsạ apa nikahombangeng i kitẹ.

17. Apa pul᷊ise mạeng i kitẹ tatapẹ̌ sibukẹ̌ su hal᷊ẹ̌ i Yehuwa?

¹⁷ Mạeng turusẹ̌ sibukẹ̌ su hal᷊ẹ̌ i Yehuwa, ene makakoạ si kitẹ gampang mẹ̌tahěndung hal᷊ẹ̌ limembong penting. Contone, sěngkatau saudari arenge Renee nakaěbạ stroke, kanker, kụ badange turusẹ̌ gụgiadẹ̌. Su rumah sakitẹ̌, i sie něnginjilẹ̌ si sire  apang mělẹ̌hal᷊ẹ̌ sene, su pasien bal᷊inẹ, dingangu su apang mětẹ̌tiwo. Karěngụe duang kamisa stengah su rumah sakitẹ̌, i sie něnginjilẹ̌ 80 su kaorase. Renee masingkạ i sie seng mal᷊ighạ mate. Katewe i sie tawe niwul᷊e apa limembong penting. Měnodẹ Yehuwa piạ hakẹ̌ e mẹ̌parenta nakakoạ si sie tawe gụgěnggang.

18. Apa kaěndungang i kitẹ bọu pengalaman i Jennifer soal u měnodẹ Yehuwa piạ hakẹ̌ e mẹ̌parenta?

¹⁸ I kitẹ lai botonge měnodẹ Yehuwa piạ hakẹ̌ e mẹ̌parenta su hal᷊ẹ̌ ěllo-ěllo. Sěngkatau saudari arenge Jennifer harusẹ̌ měngampal᷊ẹ̌ tělu ěllo su bandara, ual᷊ingu penerbangan mapul᷊ẹ pirang sul᷊ẹ nitunda, hakị u ene i sie nal᷊owe dingangu tawẹ apa hapịe. Sěběnarẹ̌e i sie botonge tumal᷊ěntụ su watangenge. Katewe i sie tawe někoạ ene, i sie nẹ̌doa si Yehuwa tadeạu botonge měnginjilẹ̌ su taumata apang měngẹ̌ngampal᷊ẹ̌ sene. I sie něnginjilẹ̌ kụ němahiạ lawọ publikasi. Jennifer naul᷊ị, ”Maning nakahombang hal᷊ẹ̌ ini, iạ nakapěndang Yehuwa něngal᷊amatẹ̌ dingangu něnoghasẹ̌ si siạ tadeạu měkoạ hal᷊ẹ̌ makawantugẹ̌ areng’E.”

19. Apa tatialang ibadah tutune?

¹⁹ Kětạeng ělangi Yehuwa kahěngang-hěngang nakaěna hakẹ̌ i Yehuwa mẹ̌parenta ene penting. Ini něnodẹ ibadang i sire kai ibadah tutune. Hakị u ene, i kitẹ kěbị harusẹ̌ mẹ̌tahěndung hakẹ̌ i Yehuwa mẹ̌parenta.

20. Kerea pěndang i Yehuwa su hal᷊ẹ̌ nikoạ i kitẹ gunang i Sie?

²⁰ Yehuwa měmanda dingangu mě-ngarěga kěbị apa nikoạ i kitẹ gunang pěmamarenta-Ne, kere kasasatiang i kitẹ su tempong nakahombang kasasusah. (Mzm. 18:26) Pěngangěndu-ngang tuhụe mělahẹ kawe nụe penting i kitẹ měnarimạ hakẹ̌ i Yehuwa mẹ̌parenta dingangu kerea měnodẹ i kitẹ měnarimạ ene.