Papạ i Rehabeam, i Salomo, nakoạ datu su Israel karěngụe 40 su taunge. (1 Rat. 11:42) Su apang i papạe nate, i Rehabeam nakoạ sarang Sikem gunang makoạ datu. (2 Kar. 10:1) Ual᷊ingu taumata masingkạ i papạe sěbạe mapelesa, apa i Rehabeam matakụ měngganti si papạe? Tawe nararěna su apang nihengkẹ nakoạ datu, i Rehabeam nakaěbạ masalah masigěsạ tatěngong, kụ ene makal᷊ahẹ apa i sie mapelesa arau tala.

Tau Israel nakapěndang i sire sẹ̌sigěsạkeng kụ něndolohẹ̌ pirang katau gunang maul᷊ị si Rehabeam, ”I amang i Tuange seng něgěllị u wawawaěng mawěhạ si kami. Kamageng i Tuang měhaěng bawawaěng, dingangu sigěsạ si kami, i kami e mẹ̌suba si Tuang.”​—2 Kar. 10:3, 4.

Rehabeam harusẹ̌ měkoạ putusang mawěhạ. Mạeng i sie měkoạ apa nirorongang i sire, ene makakoạ si sie, keluargane, dingangu taumata su istana kailangengu pěbawiahẹ̌ mal᷊uasẹ̌. Katewe, mạeng i sie tawe tumol᷊e kapulung i sire, i sire sarung lumawang si sie. Apa nikoạe? I sie nẹ̌kiwal᷊o su manga maghaghurang apang kangerẹ nakoạ měnanasang i papạe. I sire naul᷊ị i sie harusẹ̌ dumaringihẹ̌ dorongu rakyatẹ̌. Katewe, bọu ene i Rehabeam nẹ̌kiwal᷊o su hapịe mangangudạ, kụ i sie němutusẹ̌ gunang mapakasigěsạ rakyatẹ̌. I sie nẹ̌bera si sire, ”Iạ e měgěllị u wawawaěng limembong kawěhạ e. I amangku měgẹ̌nggeserẹ̌ dingangu cambokẹ̌, arawe iạ měnggeserẹ̌ dingangu cambokẹ̌ piạ larange uase si kamene.”​—2 Kar. 10:6-14.

Apa kaěndungang i kitẹ? Orasẹ̌ ini, su tal᷊oarang kitẹ piạ lawọ maghaghurang kụ seng taunge nakoạ ělang i Yehuwa. I sire botonge mẹ̌tul᷊ung si kitẹ měkoạ putusang matahuěna. Hakị u ene, i kitẹ harusẹ̌ dumaringihẹ̌ sasasang i sire.​—Ayb. 12:12-13.

Bọu ene i Rehabeam něngomol᷊ẹ̌ manga tentara gunang lumawang manga suku ene. Katewe, Yehuwa něndolohẹ̌ nabi Semaya gunang pěhabarẹ̌, ”Kumbahang mẹ̌sekẹ u manga anạ u sěmbaụ u tau  Israel. Kapul᷊ẹ e! Apan seng nariadi enẹ e kai kapulu-Ku.”​—1 Rat. 12:21-24. *—Pěmanda catatan kaki.

Apa gampang si Rehabeam tumuhụ parentang Yehuwa? I sie seng naul᷊ị sarung měhukung si sire ”dingangu cambokẹ̌ piạ larange uase”. Hakị u ene, mạeng i sie měmala dal᷊awang ene, apa sarung ul᷊ịkangu taumata su datu wuhung i sire? (Pěmanda lai 2 Kar. 13:7.) Maning kerene, i sie tawe nẹ̌pandung soal u ene. Datu Rehabeam dingangu manga tentarane ”dimaringihẹ̌ hengetangu MAWU e, kụ něngkapul᷊ẹ sol᷊ong bal᷊eng sěmbaụ-sěmbaụ”.

Apa kaěndungang i kitẹ? I kitẹ harusẹ̌ sěntiniạ matuhụ su Mawu, maning ene makakoạ i kitẹ sarung heghesang. Mawu mang sěntiniạ měngal᷊amatẹ̌ mạeng i kitẹ matuhụ si Sie.​—Pang. 28:2.

Apa i Rehabeam nial᷊amateng ual᷊ingu timuhụ su Mawu? Iya. I sie tatapẹ̌ nakoạ datu gunang suku Yehuda dingangu Benyamin, kụ i sie něndarisị manga soa wuhu su wilayane. I sie lai někoạ piram baụ soa sěbạe matoghasẹ̌. (2 Kar. 11:5-12) Kụ limembong penting, i sie timuhu su parentang i Yehuwa maning ene kětạeng su sěngkatempo. Ual᷊ingu kararatuang mapul᷊o suku něnětạ něněmbah berhala, lawọ taumata diměnta bọu tampạ ene sarang Yerusalem gunang měnumběka si Rehabeam dingangu měněmbah si Yehuwa.​—2 Kar. 11:16, 17.

Su apang kararatuange natoghasẹ̌, i Rehabeam někoạ sěmbaụ hal᷊ẹ̌ nakaherang. I sie seng tawe timuhụ parentang i Yehuwa kụ něnětạ něněmbah manga mahan duata! Kawe nụe? Apa i mamạe, tau Amon, nakakoạ si sie něngal᷊ạ putusang ene? (1 Rat. 14:21) I kitẹ běga, katewe bangsa ene timol᷊e kakanoạe dal᷊akị. Hakị u ene, Yehuwa němala Datu Sisak bọu Misirẹ̌ němul᷊aho lawọ soa su kararatuang Yehuda. Sěmbal᷊ia, i Rehabeam seng napakatoghasẹ̌ manga soa ene!​—1 Rat. 14:22-24; 2 Kar. 12:1-4.

Keadaan sauneng kakạdal᷊akịe su tempong i Sisak něnekẹ Yerusalem tampạ i Rehabeam měpẹ̌parenta. Su tempo ene nabi Semaya něhabarẹ̌ tatanatang Yehuwa si Rehabeam dingangu manga těmbonang u kararatuangu Yehuda: ”I kamene kai naněntang u Iạ, tangu su orasẹ̌ ini, Iạ mal᷊aing měněntang i kamene, hakịeweng i kamene manawo su kawasan Sisak.” Apa nikoạ i Rehabeam su tempong nakaěbạ disiplin ene? I sie někoạ barang sěbạe mapaelẹ̌! Alkitapẹ̌ naul᷊ị, ”Datu ringangkeweng těmbonange něngaku u i sire seng limampa ore nẹ̌dosa. I sire měngkate němpẹ̌bera, ’Apang kụ nikoạ u MAWU ene adilẹ̌.’” Hakị u ene, Yehuwa něnal᷊amatẹ̌ si Rehabeam kụ Yerusalem tawe niwinasa.​—2 Kar. 12:5-7, 12.

Bọu ene, i Rehabeam turusẹ̌ nakoạ datu su kararatuang Yehuda. Těntal᷊ang bědang tawe nate, i sie něgělị lawọ hadiah su manga anạe esẹ wal᷊inẹ. Aramanung i sie měndiagạ tadeạu i sire tawe lumawang si Abia, anạe esẹ kụ seng nipilene makoạ datu měngganti si sie. (2 Kar. 11:21-23) Apa nikoạe ene limembong matahuěna sul᷊ungu apa nikoạe su tempong bědang mangudạ.

Maning i Rehabeam někoạ piram baụ barang mapia, Alkitapẹ̌ naul᷊ị soal u pěmamarentang i Rehabeam: ”I Rehabeam nẹ̌koạ e ral᷊akị”. Kawe nụe? Ual᷊ingu ”i sie tawe nẹ̌tawakal᷊i timol᷊e kapulun MAWU Ruata”. Hakị u ene, Yehuwa madiri si sie.​—2 Kar. 12:14.

Apa kaěndungang i kitẹ bọu běkeng pěbawiahi Rehabeam? I sie pẹ̌sěnsul᷊ẹ tụtuhụ si Yehuwa dingangu měkẹ̌koạ barang mapia gunang manga ělang i Yehuwa. Katewe i sie tawe nědal᷊ahapị dingangi Yehuwa, lai tawe kahěngang-hěngang mapulu makal᷊uasẹ̌ naung’E. Hakị u ene, i sie nẹ̌dosa dingangu něněmbah mahan duata. I kitẹ aramanung mẹ̌tiněna, ’Apa i Rehabeam něnarimạ laahạ i Yehuwa ual᷊ingu kahěngang-hěngang nẹ̌tobatẹ̌ dingangu mapulu makal᷊uasẹ̌ Mawu? Arau ual᷊ingu taumata wal᷊inẹ naul᷊ị i sie harusẹ̌ měkoạ ene? (2 Kar. 11:3, 4; 12:6) Samurine, i sie saụ někoạ barang dal᷊akị. I sie sěbạe nẹ̌tatěntang dingangi opane, Datu Daud! Pẹ̌sěnsul᷊ẹ i Daud měkẹ̌koa barang nẹ̌sal᷊a, katewe i sie nẹ̌sasěsilẹ̌ kụ kahěngang-hěngang nẹ̌tobatẹ̌. Su kanandụu pěbawiahe, i sie makěndagẹ̌ dingangu naněmbah si Yehuwa  dingangu kaguwạu naunge.​—1 Rat. 14:8; Mzm. 51:3, 19; 63:2.

Piạ lawọ kaěndungang i kitẹ bọu běkeng Alkitapẹ̌ ini. Sěbạe mapaelẹ̌ mạeng i kitẹ měnadia kebutuhan keluarga dingangu měkoạ barang mapia gunang taumata wal᷊inẹ. Katewe, tadeạu makal᷊uasẹ̌ si Yehuwa, i kitẹ harusẹ̌ měněmbah si Sie dingangu cara ikẹ̌kapuluang’E lai mědal᷊ahapị mapia dingang’E.

Hakị u ene, kakěndagi kitẹ si Yehuwa harusẹ̌ matoghasẹ̌. Kere putung harusẹ̌ tambaěngu kalune tadeạu tatapẹ̌ dumělị, kakěndagi kitẹ si Yehuwa tatapẹ̌ matoghasẹ̌ mạeng i kitẹ marading měngěndung Alkitapẹ̌, mẹ̌tiněna apa niěndungang, dingangu marading mẹ̌doa. (Mzm. 1:2; Rm. 12:12) Kakěndagẹ̌ ene makakoạ si kitẹ mapulu turusẹ̌ makal᷊uasẹ̌ si Yehuwa. Ene lai makakoạ si kitẹ kahěngang-hěngang mẹ̌tobatẹ̌ su tempong někoạ pẹ̌sasal᷊a. Samurine, i kitẹ tawe makoạ kere i Rehabeam, katewe i kitẹ tatapẹ̌ masatia měněmbah si Yehuwa.​—Yud. 20, 21.