1. Kawe nụe i kitẹ kěbị sěbạe mal᷊uasẹ̌?

I KITẸ sěbạe mal᷊uasẹ̌ nakaringihẹ̌ kerea manga ělangu Mawu němala tualagi sire siměnang! Su taung tamai, manga ělang i Yehuwa něngahạ nal᷊iu wọu 10.000.000 pěngangěndungang Alkitapẹ̌. Bọu ene, jutane taumata apang mapulu dumaringihẹ̌ diměnta su Pẹ̌tatahěndungang kụ něngěndung soal u tatěbusẹ̌, gaghělị i Yehuwa, Mawu makěndagẹ̌.​—1 Yoh. 4:9.

2, 3. (a) Apa tawe makaědo si kitẹ ’suměnang měnualagẹ̌ dunia’? (b) Apa ěndungang i kitẹ su pěngangěndungang ini?

² Sahiding Yehuwa su patikụ dunia měpẹ̌pakẹ haghing bawera. Katewe, ene tawe nakaědo si sire nẹ̌dalo si Yehuwa kere sěmbaụ keluarga. (Pěl. 7:9) Tawẹ soale bawera apa pẹ̌paketang arau su apa i kitẹ mětẹ̌tanạ, i kitẹ botonge ’suměnang měnualagẹ̌ dunia’.​—Flp. 2:15-16.

³ Pelayanan i kitẹ, kasasěmbaụ, dingangu pěndang mẹ̌dariagạ makawantugẹ̌ si Yehuwa, kụ ene makakoạ taumata mapulu měngěndung Alkitapẹ̌. Su pěngangěndungang ini,  i kitẹ sarung měngěndung carane tadeạu tualagẹ̌ suměnang su tatělu bageang ene.​—Basa Matius 5:14-16.

4, 5. (a) Su tempong měnginjilẹ̌, apa botonge koateng i kitẹ tadeạu tualagẹ̌ suměnang? (b) Apa hasile mạeng i kitẹ mahimumu dingangu mapia? (Pěmanda gambarẹ̌ humotong su pěngangěndungang ini.)

⁴ Měnginjilẹ̌ dingangu měkoạ muritẹ̌ ene kai cara penting gunang mapasěnangu tualagẹ̌. (Mat. 28:19, 20) Su taung 1925, artikel ”Terang yang Menembus Kegelapan” naul᷊ị, su ěllo pěngěnsuěnge i kitẹ harusẹ̌ ”mapasěnangu tualagẹ̌” tadeạu botonge masatia si Tuang. Artikel ene lai naul᷊ị, ”I kitẹ měkoạ ene su tempong měhabarẹ̌ habarẹ̌ mapia su kěbị taumata dingangu měbiahẹ̌ tuhụ standar i Yehuwa.” (The Watch Tower, 1 Juni 1925) Su tempong měnginjilẹ̌, kakanoạ i kitẹ makawantugẹ̌ si Yehuwa. Lawọ taumata měmẹ̌manda su tempong i kitẹ měnginjilẹ̌. Mạeng i kitẹ huměming dingangu měngadatẹ̌ si sire, ene makakoạ i sire mẹ̌tiněna mapia soal i kitẹ dingangu Mawu sẹ̌sěmbang i kitẹ.

⁵ Yesus naul᷊ị su manga murite, ”Kereu i kamene kạdangenge su wal᷊e ute pẹ̌berako, ’Karimạko Mawu e měngal᷊amatẹ̌ si kamene.’” (Mat. 10:12) Kangerẹ, su tampạ i Yesus něnginjilẹ̌, mạeng piạ taumata wuhu duměnta, taumata biasane měmaringang si sire apasuẹ̌. Orasẹ̌ ini su lawọ tampạ seng bal᷊inẹ kerene. Taumata biasane matakụ arau madiri mạeng piạ taumata wuhu duměnta. Katewe, mạeng i kitẹ mahimumu dingangu mapia, i sire sarung matěnang. Su tempong měnginjilẹ̌ su tampạ lawọ taumata, apa i kau měmẹ̌manda mạeng i kau huměming dingangu mahimumu měgělị adatẹ̌, taumata limembong mapulu měngal᷊ạ bukẹ̌ bawasang? Piạ lai měngal᷊imona mẹ̌bisara si kitẹ!

6. Apa nikoạ u sěngkawingang seng maghurang tadeạu tatapẹ̌ aktif měnginjilẹ̌?

⁶ Piạ sěngkawingang seng maghurang su Inggris seng tawe makapěnginjilẹ̌ bọu wal᷊e sarang bal᷊e kere kangerẹ ual᷊ingu mahungsakị. Hakị u ene, i rẹ̌dua něngatorẹ̌ manga bukẹ̌ su meda su rělahu wal᷊eng i rẹ̌dua. Sěngkatau saudari perintis masau tụtol᷊e dingangi rẹ̌dua. Bal᷊eng i rẹ̌dua maraning sikol᷊ah, hakị u ene i rẹ̌dua nẹ̌taho bukẹ̌ nẹ̌tatahino su matatimadẹ̌ apang měngal᷊ạ anạ i sire. Pirang katau matatimadẹ̌ něngal᷊ạ manga bukẹ̌, kere bukẹ̌ Pertanyaan Kaum Muda—Jawaban yang Praktis, Jilid 1 dingangu 2. Ual᷊ingu i rẹ̌dua mahimumu, piạ matatimadẹ̌ mapulu měngěndung Alkitapẹ̌.

7. Kerea carane mẹ̌tul᷊ung pengungsi su tampạu?

⁷ Buhu ini, lawọ taumata timal᷊ang bọu wal᷊eng i sire kụ nakoạ pengungsi su negeri wal᷊inẹ. Apa wotonge koateng i kitẹ gunang mẹ̌tul᷊ung si sire měngěndung soal i Yehuwa? Humotong, i kau botonge měngěndung měgělị adatẹ̌ su werang i sire. Karuane, i kau botonge měpakẹ aplikasi JW Language gunang  měngěndung piram baụ bawera tadeạu i sire mapulu mẹ̌bisara dingangu. Katělune, i kau botonge měpakẹ jw.org gunang měnodẹ video dingangu bawasang su werang i sire hala.​—Pang. 10:19.

8, 9. (a) Apa gunane tumol᷊e pěngangibadang tengah pekan? (b) Apa botonge těntirong matatimadẹ̌ su manga anạ i sire?

⁸ Yehuwa něnadia bantuan tadeạu i kitẹ limembong mapaelẹ̌ měnginjilẹ̌. Contone, apa niěndungang i kitẹ su Pelayanan dingangu Pěbawiahẹ̌ Sahani makatul᷊ung si kitẹ limembong sadia mẹ̌tiwo dingangu měnětạ měngěndung Alkitapẹ̌ dingangu taumata wal᷊inẹ.

⁹ Taumata apang buhudeng diměnta su pěngangibadang i kitẹ biasane mạherang makaringihẹ̌ komentarẹ̌u manga rariọ. I kau botonge měněntiro manga anạu tadeạu měgělị komentarẹ̌ dingangu wawerang i sire hala. Piạ u napulu měngěndung Alkitapẹ̌ ual᷊ingu nakaringihẹ̌ komentarẹ̌u manga rariọ, ual᷊ingu ene sederhana dingangu bọu dal᷊ungu naung i sire.​—1 Kor. 14:25.

10. Kerea ibadat keluarga botonge mapakasěmbaụ keluarga?

¹⁰ Cara wal᷊inẹ i kitẹ měmantugẹ̌ si Yehuwa ute měndiagạ keluarga tatapẹ̌ mararame dingangu masěmbaụ. Contone, matatimadẹ̌ harusẹ̌ rutin měkoạ Ibadat Keluarga. Lawọ keluarga nẹ̌biala JW Broadcasting sěngkasio, bọu ene nẹ̌bisara soal u kerea i sire botonge měkoạ apa seng niěndungang i sire.  Pẹ̌tahěndung, kebutuhan anạ kadodọ dingangu anạ mangudạ nẹ̌tatěntang. Hakị u ene matimadẹ̌ harusẹ̌ menyesuaikan bahan pěngangěndungang tadeạu kěbị anggota keluarga makaěbạ gunane bọu ibadat keluarga.​—Mzm. 148:12, 13.

11-13. Kerea i kitẹ botonge mẹ̌tul᷊ung sidang tadeạu limembong masěmbaụ?

¹¹ Mangangudạ, i kamene lai botonge měkoạ sidang tatapẹ̌ masěmbaụ, tadeạu taumata wal᷊inẹ lai turusẹ̌ mapakasěnangu tualagẹ̌. Contone, pẹ̌dal᷊ahapịe dingangu anạu sěmbaụ limembong maghurang. Kěnang pẹ̌kiwal᷊o kerea i sire tatapẹ̌ satia měkẹ̌koạ kapulung Yehuwa maning seng taunge. I kamene botonge měngěndung bọu pengalaman i sire. Ene sarung makatoghasẹ̌ si sire dingangu si kamene! Bọu ene, i kitẹ botonge měněnsomahẹ̌ kěbị apang diměnta su Banalang Kararatuang. I kamene botonge měgělị adatẹ̌ dingangu huměming si sire, mẹ̌tul᷊ung mědeạ kakaianeng, lai mẹ̌bawa si sire tadeạu mẹ̌sombang dingangu taumata wal᷊inẹ. Mạeng měkoạ ene, i sire makapěndang i sire nitarimạ.

¹² Mạeng i kau nakaěbạ tugasẹ̌ memandu pertemuan dinas lapangan, i kau botonge mẹ̌tul᷊ung maghaghurang tadeạu mapakasěnangu tualagẹ̌. Atorẹ̌ tadeạu i sire makaěbạ daerah dinas nẹ̌tatahino. Atorẹ̌ko lai tadeạu piạ mangangudạ měndingang si sire. Anạu sěmbaụ apang seng maghurang kụ mahungsakị aramanung mạkadodọ naung ual᷊ingu tawe makapěnginjilẹ̌ kere kangerẹ. Katewe, i sire sarung mahiborẹ̌ mạeng i sire masingkạ i kitẹ mapadul᷊i dingangu mětẹ̌tawakal᷊i makaěna keadaan i sire. Tawẹ soale pira umuri sire arau karěngụe i sire nakoạ ělang i Yehuwa, kapiang naung i kitẹ makatul᷊ung si sire tatapẹ̌ masěmangatẹ̌ měnginjilẹ̌.​—Imng. 19:32.

¹³ Tau Israel puluang maněmbah si Yehuwa sěngkasio. Pemazmur němohẹ, ”Enẹ e kapiane ringangu kaholẹ e, kereu umatu Mawu e mẹ̌biahẹ̌ sěnsunduang [arau, maghaghighilẹ̌]!” (Basa Mazmurẹ̌ 133:1, 2.) I sie napẹ̌sul᷊ungu kasasěmbaụ dingangu lanang pělanisang kụ mawěngi dingangu mapaelẹ̌ su pisi. Kerene lai, i kitẹ botonge makal᷊uasẹ̌ anạu sěmbaụ, mạeng i kitẹ mahimumu dingangu mapia. Ini makakoạ sidang limembong masěmbaụ. Apa i kau mětẹ̌tawakal᷊i makasingkạ mal᷊awọ soal u anạu sěmbaụ su sidangu?​—2 Kor. 6:11-13.

14. Kerea i kau botonge mapakasěnangu tualagẹ̌ su tampạ pẹ̌tanakengu?

¹⁴ Su haghing tampạ, i kitẹ botonge mapakasěnangu tualagẹ̌. Mạeng i kitẹ mapia, lampung i kitẹ sarung mapulu měngěndung soal i Yehuwa. Kěnang pẹ̌tiněna: ’Apa tẹ̌tiněnangu lampungku soal u iạ? Apa wal᷊eku burěsi dingangu naatorẹ̌? Apa ene kẹ̌kasilong maudupẹ̌? Apa iạ puluang mẹ̌tul᷊ung?’ Kěnang pẹ̌kiwal᷊o su Sahidi wal᷊inẹ kerea kapiang naung dingangu kakanoạ i sire nakaghělị pengaruh su keluarga, lampung, hapị su pělahal᷊ẹ̌kang, arau hapị su sikol᷊ang i sire.​—Ef. 5:9.

15. Kawe nụe i kitẹ harusẹ̌ turusẹ̌ mẹ̌dariagạ?

¹⁵ Cara wal᷊inẹ i kitẹ turusẹ̌ mapasěnangu tualagẹ̌ ute mạeng i kitẹ mědẹ̌dariagạ. Yesus pirang sul᷊ẹ mạul᷊ị su manga murite, ”Tangu pakal᷊ahěkosẹ̌ bue.” (Mat. 24:42; 25:13; 26:41) Mạeng i kitẹ mẹ̌pěndang ”kasasusa masaria” bědang marau, i kitẹ seng tawe měpakẹ haghing tempo gunang měněntiro taumata wal᷊inẹ soal i Yehuwa. (Mat. 24:21) Suwụe, tualagi kitẹ sauneng mẹ̌dědusẹ̌ kụ kakạrěngụe sarung mate.

16, 17. Apa wotonge koateng i kitẹ tadeạu turusẹ̌ mẹ̌dariagạ?

¹⁶ Orasẹ̌ ini, i kitẹ harusẹ̌ limembong mẹ̌dariagạ ual᷊ingu dunia sauneng kakạdal᷊akịe. Katewe, i kitẹ masingkạ kiamatẹ̌ sarung duměnta kere seng nitantung Yehuwa. (Mat. 24:42-44) Kạpěngampal᷊e ene, i kitẹ harusẹ̌ masabarẹ̌ dingangu mẹ̌tiněna pělaharapi kitẹ. Pẹ̌basạe Alkitapẹ̌ ěllo-ěllo, kụ abe pěngědo mẹ̌doa si Yehuwa. (1 Ptr. 4:7) Pěngěndungke bọu anạu sěmbaụ apang seng taunge nakoạ ělang i Yehuwa. Contone, i kau botonge mẹ̌basa běkeng pěbawiahẹ̌, kere su  artikel ”Tujuh Puluh Tahun Memegang Punca Baju Seorang Yahudi”, su Menara Pengawal 15 April 2012, halaman 18-21.

¹⁷ Tatapẹ̌e sibukẹ̌ měkoạ kapulung Yehuwa. Pakẹe tempo gunang měkoạ barang mapia lai mědal᷊ahapị dingangu anạu sěmbaụ. Mạeng měkoạ ene, i kau sarung limembong mal᷊uasẹ̌ kụ tempo lai kapěndangeng masahawụ mal᷊iu. (Ef. 5:16) Mahasụ su taunge tamai, piạ lawọ seng nikoạ u manga ělang i Yehuwa. Kụ orasẹ̌ ini, i kitẹ limembong masibukẹ̌. Hal᷊ẹ̌ u organisasing Yehuwa sauneng kakạl᷊awọe, limembong mal᷊awọ bọu apa tẹ̌tiněnang i kitẹ. Tualagi kitẹ sauneng kakạsěnange!

18, 19. Kerea manga penatua botonge mẹ̌tul᷊ung si kitẹ tadeạu masěmangatẹ̌ měkoạ kapulung Yehuwa? Gělịko contoh.

¹⁸ Maning i kitẹ hanesẹ̌ měkoạ pẹ̌sasal᷊a, Yehuwa tatapẹ̌ něgělị kesempatan si kitẹ gunang měkoạ kapulu-Ne. Gunang mẹ̌tul᷊ung si kitẹ, i Sie něnadia gaghělị taumata, ene kai manga penatua. (Basa Efesus 4:11, 12.) Hakị u ene, mạeng manga penatua mẹ̌tiwo si kau, pakẹe tempo ene gunang měngěndung bọu pelesa lai sasasang i sire.

¹⁹ Contone, sěngkawingang su Inggris nakahombang masalah su pẹ̌kakawing i sire. I sire nakitul᷊ung su penatua. Kawing wawine nẹ̌pěndang kawinge tawe tumanịu měpẹ̌padul᷊i soal u kerohanian keluarga. Katewe, kawinge nẹ̌pěndang i sie bal᷊inẹ guru mapaelẹ̌ hakị u ene i sie madiri měkoạ ibadat keluarga. Manga penatua nẹ̌tul᷊ung si rẹ̌dua nẹ̌tiněna soal i Yesus. I sire nẹ̌mahansang kawing esẹ gunang pẹ̌těno si Yesus mapadul᷊i su manga murite. I sire němahansang kawing wawine tadeạu masabarẹ̌ su kawinge. I sire lai něgělị piram baụ těgu tadeạu i rẹ̌dua botonge měkoạ ibadat keluarga dingangu duang katau anạ i rẹ̌dua. (Ef. 5:21-29) Samurine, manga penatua nẹ̌dalo kawing esẹ ual᷊ingu seng nẹ̌tawakal᷊i nakoạ těmbonangu keluarga limembong mapia. I sire němahansang si sie tadeạu turusẹ̌ měkoạ ene dingangu měngumbala su rohkẹ̌ masusi bọu Yehuwa. Kakěndagẹ̌ dingangu kapiang naung nitodẹu manga penatua ene kahěngang-hěngang nakatul᷊ung keluarga ene gunang mapakasěnangu tualagẹ̌!

20. Apa hasile mạeng i kitẹ turusẹ̌ mapakasěnangu tualagẹ̌?

²⁰ ”Kariangkamang taumata apang maimang dingangu mẹ̌bẹ̌biahẹ̌ tụtuhụ tita’m Mawu Ruata.” (Mzm. 128:1) Mạeng i kitẹ turusẹ̌ mapakasěnangu tualagẹ̌, i kitẹ sarung mal᷊uasẹ̌. Hakị u ene, těntiroi taumata wal᷊inẹ soal i Yehuwa, pẹ̌tawakal᷊ịe měndiagạ keluarga dingangu sidang tatapẹ̌ masěmbaụ, dingangu turusẹ̌e pẹ̌dariagạ. Taumata wal᷊inẹ sarung makasilo kakanoạu mapia kụ i sire lai mapulu měmantugẹ̌ si Amang i kitẹ, Yehuwa.​—Mat. 5:16.