1. Apa harusẹ̌ parikěsaěngu matatimadẹ̌ Sahani těntal᷊ang anạe bědang tawe nisahani?

SĚNGKATAU saudari arenge Blossom Brandt nẹ̌běke, ”Bul᷊ange iạ turusẹ̌ mạul᷊ị si Papạ dingangi Mamạku iạ mapulu sahaniang. I sire lai hanesẹ̌ měbẹ̌bisara soal u ene dingangku. I sire mapulu měmarikěsa apa iạ nakaěna putusang ene kai serius. Kụ su tanggalẹ̌ 31 Desember 1934, iạ nisahani. Ene kai ěllo istimewa si siạ.” Kere matimadi Blossom, matatimadẹ̌ orasẹ̌ ini lai mapulu mẹ̌tul᷊ung manga anạ i sire měkoạ putusang mapaelẹ̌. Mạeng anạ mẹ̌děngụ sahaniang kụ tawẹ apa alasang mapia, pẹ̌dal᷊ahapịe dingangi Yehuwa sarung mělome. (Yak. 4:17) Katewe, těntal᷊ang anạ bědang tawe nisahani, matatimadẹ̌ matahuěna sarung měmarikěsa apa anạ i sire seng sadia makoạ muriti Kristus.

2. (a) Masalah apa nikasilong manga pengawas wilayah? (b) Apa ěndungang i kitẹ su pěngangěndungang ini?

 ² Pirang katau pengawas wilayah měmẹ̌manda lawọ mangangudạ umure maraning 20 arau nal᷊iu bọu ene bědang tawe nisahani, sěmbal᷊ia i sire seng něngěndung dongkeng kadodọ. Biasane, i sire měngibadah, měnginjilẹ̌, dingangu nẹ̌pěndang i sire kai Sahiding Yehuwa. Katewe, i sire bědang tawe něgělị pěbawiahi sire si Yehuwa dingangu sahaniang. Pẹ̌sěnsul᷊ẹ, ene mạdiadi ual᷊ingu matimadi sire nẹ̌pěndang anạ i sire bědang tawe sadia sahaniang. Hakị u ene, su pěngangěndungang ini, i kitẹ sarung měngěndung ěpạ hal᷊ẹ̌ makạgěnggang matatimadẹ̌ měmahansang anạ i sire gunang sahaniang.

3. Matimadi Blossom gụgěnggangu apa?

³ Matimadi Blossom, nisěbạ su paragraf humotong, gụgěnggang apa anạ i sire bědang tumanịu mangudạ gunang makaěna pẹ̌sasahani ene penting dingangu serius. Kerea matatimadẹ̌ makasingkạ anạ i sire seng sadia měgělị watangeng i sire si Yehuwa?

4. Kerea parentang i Yesus su Matius 28:19, 20 makatul᷊ung matatimadẹ̌ orasẹ̌ ini?

⁴ Basa Matius 28:19, 20. Alkitapẹ̌ tawe naul᷊ị umurẹ̌ pira taumata botonge sahaniang. Katewe, matatimadẹ̌ harusẹ̌ mẹ̌tiněna pakapia apa mangal᷊ene makoạ muritẹ̌. Su Matius 28:19, bawera Yunani gunang ’měkoạ muritẹ̌’ mangal᷊ene měněntiro taumata kụ timonane ute mẹ̌tul᷊ung si sie tadeạu makoạ muritẹ̌. Muritẹ̌ kai taumata seng něngěndung dingangu nakaěna těntirong Yesus dingangu mapulu tumuhụ si sie. Hakị u ene, dongkeng anạ nalahirẹ̌, matimadẹ̌ harusẹ̌ měněntiro dingangu měngahạ si sie tadeạu měgělị pěbawiahe si Yehuwa dingangu makoạ muriti Kristus. Tantu anạ kadodọ bědang tawe wotonge sahaniang. Maning kerene, Alkitapẹ̌ něnodẹ anạ seng diọ gěguwạ botonge makaěna dingangu kuměndagẹ̌ těntirong Alkitapẹ̌.

5, 6. (a) Bọu běkeng Alkitapẹ̌ soal i Timotius, apa kasingkateng i kitẹ soal u pẹ̌sasahanine? (b) Apa cara kapaelange su matatimadẹ̌ matahuěna gunang mẹ̌tul᷊ung manga anạ i sire?

⁵ Sěngkatau muritẹ̌ kụ němutusẹ̌ gunang mẹ̌tahamawu si Yehuwa dongkeng mangudạ ute i Timotius. Rasul Paulus naul᷊ị i Timotius něngěndung Hengetang u Mawu ’dongkeng kadodọ’. Papạ i Timotius bal᷊inẹ ělang i Yehuwa, katewe i mamạ dingangi omane nẹ̌tul᷊ung si sie gunang kuměndagẹ̌ Hengetang u Mawu. Pul᷊ise, pangangimang i Timotius sěbạe matoghasẹ̌. (2 Tim. 1:5; 3:14, 15) Su tempong umure ěndịu maraning 20 su taunge arau nal᷊iu kadodọ bọu ene, i sie seng nighělịkangu tugasẹ̌ khusus su sidang.​—MMR. 16:1-3.

⁶ Katewe, kěbị anạ nẹ̌tatěntang. Tawe kěbị nakoạ matělang su umurẹ̌ mẹ̌sul᷊ung. Piạ u nakaěna těntirong Alkitapẹ̌, někoạ putusang nihino, dingangu mapulu sahaniang maning bědang mangudạ. Sěnggạ e wue aramanung hědo sadia sahaniang su tempong i sie diọ matělang. Matimadẹ̌ matahuěna tawe měnihasa anạ i sire gunang sahaniang. Katewe, i sire mẹ̌tul᷊ung anạ i sire měkoạ kemajuan tuhụ kasahawụ i sire. Matatimadẹ̌  sarung mal᷊uasẹ̌ mạeng anạ i sire tumol᷊e bawera su Baweran Salomo 27:11. (Basa.) Katewe, i sire harusẹ̌ mẹ̌tahěndung, timonang i sire mẹ̌tul᷊ung anạ ute tadeạu anạ i sire makoạ muritẹ̌. Hakị u ene, matatimadẹ̌ harusẹ̌ mẹ̌tiněna, ’Apa kasingkạ u anạku seng diọ botonge gunang měgělị watangenge su Mawu dingangu sahaniang?’

7. Apa taumata harusẹ̌ masingkạ kěbị perincian těntirong Alkitapẹ̌, buhudeng botonge sahaniang? Lahẹko.

⁷ Matatimadẹ̌ harusẹ̌ měněntiro manga anạ i sire tadeạu i sire makaěna mapia těntirong Alkitapẹ̌. Kasingkạ ene makakoạ i sire měmutusẹ̌ měgělị watangeng i sire su Mawu. Katewe, ene bal᷊inẹ mangal᷊ene anạ harusẹ̌ masingkạ kěbị perincian těntirong Alkitapẹ̌, buhudeng botonge sahaniang. Kěbị muriti Kristus harusẹ̌ turusẹ̌ měngěndung maning seng bọu nisahani. (Basa Kolose 1:9, 10.) Hakị u ene, pira kal᷊awọe kasingkạ u taumata tadeạu botonge sahaniang?

8, 9. Apa nariadi su sěngkatau měndariagạ selẹ̌ su Filipi, kụ apa kaěndungang i kitẹ bọu apa nariadi si sie?

⁸ Matatimadẹ̌ botonge měngěndung bọu sěmbaụ keluarga su tempong tamai. (MMR. 16:25-33) Su perjalanan utusan injil karuane, su taung 50 M, Paulus nakoạ sarang Filipi. Sene i sie dingangi Silas nitoke kụ niselẹ̌. Hěbine, piạ linuhẹ̌ maihạ nakawuka kěbị tukadẹ̌ su selẹ̌ ene. Měndariagạ selẹ̌ nẹ̌tiněna kěbị taumata niselẹ̌ sene seng timal᷊ang, hakị u ene i sie seng mẹ̌tumpate. Katewe i Paulus nẹ̌sěding si sie. Bọu ene i Paulus dingangi Silas něněntiro soal i Yesus si sie dingangu keluargane. I sire mangimang apa nikaringihi sire, kụ i sire nakaěna tumuhụ si Yesus ene penting. Hakị u ene i sire apidu nakisahani. Apa kaěndungang i kitẹ bọu pengalaman ini?

⁹ Aramanung měndariagạ selẹ̌ ene kai těntarang Roma kụ seng napangsiong. I sie běga Hengetang u Mawu. Hakị u ene, tadeạu makoạ tau Sahani, i sie harusẹ̌ měngěndung těntiro dasaru Alkitapẹ̌, makaěna apa dẹ̌dorongang i Yehuwa bọu manga ělang’E, dingangu sadia tumuhụ su těntirong i Yesus. Apa niěndungange su tempo kadodọ ene nakakoạ i sie mapulu makisahani. Tantu, maning bọu nisahani i sie bědang harusẹ̌ měngěndung mal᷊awọ. Hakị u ene, mạeng anạu maul᷊ị i sie mapulu sahaniang ual᷊ingu makěndagẹ̌ si Yehuwa dingangu mapulu tumuhụ si Sie, apa sarung koatengu? Paul᷊ị si sie gunang pẹ̌bisara dingangu manga penatua, tadeạu i sire měmutusẹ̌ apa i sie seng botonge sahaniang. * (Pěmanda catatan kaki.) Kere tau Sahani apang seng bọu nisahani, anạ ene sarung turusẹ̌ měngěndung soal i Yehuwa su kanandụu wiahe, dingangu sarang karěngụe.​—Rm. 11:33, 34.

10, 11. (a) Apa tẹ̌tiněnaěngu pirang katau matatimadẹ̌? (b) Apa wotonge kahěngang-hěngang makariagạ anạ?

¹⁰ Piạ matatimadẹ̌ nẹ̌tiněna kapaelange anạe sahaniang mạeng seng bọu nẹ̌sikol᷊ah marangẹ dingangu piạ hal᷊ẹ̌ mapaelẹ̌. Aramanung timonang i sire mapia. Katewe i sire harusẹ̌ mẹ̌tiněna, ’Apa manga hal᷊ẹ̌ ene makakoạ anạku kahěngang-hěngang mal᷊uasẹ̌? Apa ene nẹ̌tatahino dingangu těntirong Alkitapẹ̌? Yehuwa mapulu kerea i kitẹ měpakẹ pěbawiahi kitẹ?’​—Basa Měnanasẹ̌ 12:1.

¹¹ I kitẹ harusẹ̌ mẹ̌tahěndung dunia ini dingangu dal᷊ohone tawe nẹ̌tatahino su tiněna dingangu kapulung Yehuwa. (Yak. 4:7, 8; 1 Yoh. 2:15-17; 5:19) Pẹ̌dal᷊ahapị mapia dingangi Yehuwa kai dariagạ kapaelange bọu Setang, duniane, dingangu tiněna dal᷊akị bọu dunia ini. Mạeng matatimadẹ̌ měngal᷊imona sikol᷊ah dingangu hal᷊ẹ̌ mapaelẹ̌ su ral᷊ungu pěbawiahẹ̌, manga rariọ sarung mẹ̌tiněna kěbị lohong dunia ini limembong penting sul᷊ungu mědal᷊ahapị dingangi Yehuwa. Ini makasilakạ. Matatimadẹ̌, apa i kamene mapulu anạ i kamene těntiroěngu dunia ini soal u carane měbiahẹ̌ mal᷊uasẹ̌? Pẹ̌tahěndung, carane tadeạu berhasil dingangu mal᷊uasẹ̌ ute kětạeng měmělọ Yehuwa su tampạ kahumotongange su pěbawiahi kitẹ.​—Basa Mazmurẹ̌ 1:2, 3.

12. Kawe nụe pirang katau matatimadẹ̌ nẹ̌pěndang kapaelange anạe hědoko sahaniang?

¹² Sěngkatau matimadẹ̌ wawine naul᷊ị alasange kawe nụe i sie madiri anạe sahaniang. I sie naul᷊ị, ”Sěběnarẹ̌e iạ mamea maul᷊ị ini, katewe alasang kahumotongange ute iạ matakụ i sie sěbangeng bọu sidang.” Mẹ̌sul᷊ungu saudari ini, piạ matatatimadẹ̌ nẹ̌pěndang kapaelange anạ i sire sahaniang mạeng seng matělang, ual᷊ingu i sie botonge mẹ̌těngkarau bọu pẹ̌sasal᷊a kẹ̌koatengu mangangudạ. (Pěnd. 8:21; Baw. 22:15) I sire ěndịu  nẹ̌tiněna mạeng anạ i sire bědang tawe nisahani, i sie tawe sěbangeng. Katewe, kawe nụe matatimadẹ̌ tawe wotonge mẹ̌tiněna kerene?​—Yak. 1:22.

13. Mạeng anạ bědang tawe nisahani, apa i sie tawe bertanggung jawab si Yehuwa? Lahẹko.

¹³ Tantu, matimadẹ̌ madiri anạ i sire sahaniang mạeng bědang tawe sadia měgělị watangenge si Yehuwa. Katewe, i sire tawe wotonge mẹ̌tiněna mạeng anạ bědang tawe nisahani, i sie tawe bertanggung jawab si Yehuwa. Anạ bertanggung jawab su Mawu mạeng i sie seng masingkạ sude nihino dingangu nẹ̌sal᷊a su těngong Mawu. (Basa Yakobus 4:17.) Matimadẹ̌ matahuěna tawe měnahaghe anạe sahaniang. Maning anạ bědang mangudạ, i sire měněntiro si sie gunang kuměndagẹ̌ barang nihino dingangu mawěnsing barang nẹ̌sal᷊a su těngong Yehuwa. I sire lai mẹ̌tawakal᷊i makoạ tatěnoěng su anạ. (Luk. 6:40) Kakěndagu anạ i kamene si Yehuwa sarung makariagạ si sie bọu pẹ̌sasal᷊a gěguwạ, ual᷊ingu i sie mapulu měkoạ barang nihino su těngong Yehuwa.​—Yes. 35:8.

14. Kerea manga penatua botonge mẹ̌tul᷊ung matatimadẹ̌?

¹⁴ Manga penatua botonge mẹ̌tul᷊ung matatimadẹ̌, contone positif su tempong mẹ̌bisara dingangu manga rariọ soal u cita-cita rohani. Sěngkatau saudari nẹ̌tahěndung su tempong umure ěnungu taung, Saudara Russell bọu nẹ̌bisara dingange. Saudari ene naul᷊ị, ”Mapul᷊o l᷊ima su měnitẹ̌e i sie nẹ̌bisara dingangku soal u cita-cita rohani.” Apa hasile? Saudari ini nakoạ perintis karěngụe nal᷊iu bọu 70 su taunge! Nal᷊ahẹ, bawera positif dingangu makawahansang piạ pengaruh gěguwạ su pěbawiahu taumata. (Baw. 25:11) Penatua lai botonge měgausẹ̌ matatimadẹ̌ dingangu anạ i sire gunang mẹ̌tul᷊ung hal᷊ẹ̌ su Banalang Kararatuang. Manga rariọ lai botonge gělịkangu hal᷊ẹ̌ nẹ̌tatahino su umurẹ̌ dingangu katatoghasi sire.

15. Kerea taumata wal᷊inẹ su sidang botonge mẹ̌tul᷊ung?

 ¹⁵ Kerea taumata wal᷊inẹ su sidang botonge mẹ̌tul᷊ung? Carane ute mapadul᷊i su mangangudạ su sidang. Contone, pěmanda tatiala něnodẹ sěngkatau anạ mangudạ někoạ kemajuan rohani. Apa i sie něgělị komentarẹ̌ mapaelẹ̌ su sidang, arau apa i sie někoạ tugase su perhimpunan tengah pekan? Apa i sie měngẹ̌nginjilẹ̌ su sikol᷊ah? Apa i sie někoạ barang nihino maning sẹ̌sal᷊ukateng měkoạ barang nẹ̌sal᷊a? Mạeng i sie někoạ ene, daloi i sie! Pẹ̌tawakal᷊ịe mẹ̌bisara dingangu mangangudạ těntal᷊ang ibadah bědang tawe nitětạ arau su tempong seng nasue. Mạeng měkoạ ene, mangangudạ sarung makapěndang i sire kai bageang bọu umatu Mawu.​—Mzm. 35:18.

16, 17. (a) Kawe nuẹ penting manga rariọ sahaniang? (b) Karal᷊uasẹ̌ apa botonge kapěndangengu matatimadẹ̌? (Pěmanda gambarẹ̌ humotong su pěngangěndungang ini.)

¹⁶ Měněntiro anạ kuměndagẹ̌ si Yehuwa ene kai sěmbaụ tugasẹ̌ istimewa gunang matatimadẹ̌. (Mzm. 127:3; Ef. 6:4) Kangerẹ, su tau Israel, su tempong anạ nalahirẹ̌ anạ ene nighělị si Yehuwa. Katewe orasẹ̌ ini bal᷊inẹ kerene. Maning matatimadẹ̌ makěndagẹ̌ si Yehuwa dingangu su těntiro nihino, ene bal᷊inẹ mangal᷊ene manga anạ i sire piạ pěndang mẹ̌sul᷊ung. Dongkeng anạ nalahirẹ̌, matatimadẹ̌ harusẹ̌ piạ timona mẹ̌tul᷊ung si sie makoạ muritẹ̌, měgělị watangenge su Mawu bọu ene sahaniang. Tawẹ apa limembong penting bọu ene. Mạeng taumata měgělị watangenge, sahaniang, dingangu masatia si Yehuwa, i sie sarung masal᷊amatẹ̌ bọu kasasusah masaria.​—Mat. 24:13.

¹⁷ Su tempong i Blossom Brandt mapulu sahaniang, matimade mapulu měmarikěsa apa i sie seng sadia. Bọu ene, i sire setuju su putusangu anạ i sire. I sie nẹ̌běke apa nikoạ i papạe su hěbi dịělone i sie sahaniang: ”Papạ němaringang si kami mẹ̌tumpěkuhẹ̌, kụ i sie nẹ̌doa. I sie naul᷊ị si Yehuwa i sie sěbạe mal᷊uasẹ̌ ual᷊ingu anạe wawine němutusẹ̌ gunang měgělị pěbawiahe si Yehuwa.” Nal᷊iu bọu 60 su taunge bọu ene, Blossom naul᷊ị, ”Maning kerea karěngụe, iạ tawe niwul᷊e hěbị ene!” Matatimadẹ̌, karimạko i kamene lai makapěndang karal᷊uasẹ̌ su tempong makasilo anạ i kamene něgělị watangenge kụ sahaniang makoạ ělang i Yehuwa.