Mal᷊uasẹ̌ Ual᷊ingu Měbiahẹ̌ Sederhana
DANIEL DINGANGI MIRIAM nẹ̌kawing su wul᷊ang September taung 2000 kụ nẹ̌tana su Barcelona, Spanyol. Pěbawiahi sire tawẹ kurange. Daniel nẹ̌bera, ”Ual᷊ingu gaji gěguwạ, i kami kụkaěng su restoran mapapaelẹ̌, mẹ̌pasiarẹ̌ su luar negeri, dingangu měměli pakeang mal᷊ěghadẹ̌. I kami lai masau měnginjilẹ̌.” Katewe bọu ene piạ barang nariadi.
Su kebaktian taung 2006, Daniel nakaringihẹ̌ sěmbaụ nasẹ̌. Sene piạ kakiwal᷊o, ”Apa i kitẹ mětẹ̌tul᷊ung si sire apang ’lẹ̌ahakeng sol᷊ong tampạu pěnggaghantongang’ tadeạu makaěbạ pěbawiahẹ̌ kěkalẹ̌?” (Baw. 24:11) Nasẹ̌ ene nělahẹ tanggung jawab i kitẹ mẹ̌bawa habaru kasasal᷊amatẹ̌ su taumata. (MMR. 20:26, 27) Daniel nẹ̌tahěndung, ”Su tempo ene iạ nẹ̌pěndang Yehuwa nẹ̌bisara si siạ.” Měnanasẹ̌ lai nẹ̌bera kakạl᷊awọe koateng i kitẹ gunang Yehuwa i kitẹ sauneng kakạl᷊uase. Daniel lai nakasilo kawinge mal᷊uasẹ̌ seng nakoạ perintis.
Nasẹ̌ ene nakawahansang si Daniel měmal᷊ui pěbawiahe. I sie něhal᷊ẹ̌ kětạeng pirang kaorasẹ̌ kụ něnětạ nakoạ perintis. I sie lai nẹ̌tiněna i rẹ̌duang Miriam limembong mal᷊uasẹ̌ mạeng měnginjilẹ̌ su tampạ mahal᷊i penyiar.
HUMOTONG MASIGĚSẠ, SAMURINE MAL᷊UASẸ̌
Su wul᷊ang Mei 2007, Daniel dingangi Miriam něngědo něhal᷊ẹ̌ kụ něngal᷊ing sarang Panama tampạ bọu nitiwong i sire. I sire něnginjilẹ̌ su piram baụ pulo su Kepulauan Bocas del Toro su Laudẹ̌ Karibia. Kal᷊awọkange mětẹ̌tana sene kai tau Guaymi. I rẹ̌dua nẹ̌tiněna ěndịu doitẹ̌ i rẹ̌dua makatikụ sarang ual᷊u wul᷊ang su Panama.
I rẹ̌dua něnginjilẹ̌ něpakẹ kapal᷊ẹ̌ dingangu sepeda. Humotong něnginjilẹ̌ dingangu sepeda, i rẹ̌dua simaka karaune 30 kilometer su tempong pědisẹ̌. Daniel sěbạewe nal᷊owe kụ maraning mapingsang. Katewe tau Guaymi mapia ringangu mahimumu, napal᷊iung su tempong i rẹ̌dua nẹ̌bisara něpakẹ bawera su tampạ ene. Bọu ene piạ 23 su kataune něngěndung Alkitapẹ̌ dingangi rẹ̌dua.
Apa nariadi su tempong doitẹ̌ i rẹ̌dua nasue? Daniel nẹ̌bera, ”I kami simangị mẹ̌tahěndung harusẹ̌ mapul᷊ẹ sarang Spanyol. I kami madiri měněntang si sire apang něngěndung Alkitapẹ̌.” Katewe sěmbul᷊ang bọu ene, piạ habarẹ̌ mapia. Miriam nẹ̌běke, ”I kami nakaěbạ undangan makoạ perintis istimewa. I kami sěbạewe mal᷊uasẹ̌ ual᷊ingu tatapẹ̌ měnginjilẹ̌ sini!”
KARAL᷊UASẸ̌ KAGUWẠKENGE
Su taung 2015 piạ penyesuaian su organisasi, kụ Daniel dingangi Miriam seng tawe nakoạ perintis istimewa. Kerea pěndang i rẹ̌dua? I rẹ̌dua mangimang diandi su Mazmurẹ̌ 37:5, ”Sarakangke pẹ̌bawiahu e su MAWU, pěharape si Sie, i Sie sarung mẹ̌tul᷊ung i kau.” Bọu ene i rẹ̌dua nakaěbạ hal᷊ẹ̌, kụ botonge tatapẹ̌ nakoạ perintis biasa su sěmbaụ sidang su Provinsi Veraguas, Panama.
Daniel naul᷊ị, ”Humotong i kami gụgěnggang apa wotonge měbiahẹ̌ sederhana. Katewe orasẹ̌ ini, i kami něbiahẹ̌ sederhana kụ kebutuhan i kami mang mạsukụ.” Apa karal᷊uasẹ̌ kaguwạkenge? I rẹ̌dua naul᷊ị, ”Karal᷊uasẹ̌ kaguwạkenge si kami, ute mẹ̌tul᷊ung taumata naunge masanạ makasingkạ Yehuwa!”