ĚNDỊU su taung 1910, matimadẹ̌ku něngal᷊ing bọu Tbilisi, Georgia, sarang Kanada. I sire nẹ̌tanạ su wal᷊e kadodọ su perladangan maraning kampong Pelly, Saskatchewan, su Kanada bageang bahẹ. Ia nalahirẹ̌ 1928, kụ iạ anạ katuariange bọu ěnung tahatuari. Ěnung u wul᷊ang iạ bědang tawe nalahirẹ̌, i papạku nate. Bọu ene i mamạku lai nate su tempong iạ bědang kadodọ. Tawe nararěna tuhangku kaiakanenge, Lucy, nate su tempong umure 17. Hakị u ene papạ ariku, arenge i Nick, něngurusẹ̌ si kami.

Su tempong iạ buhudeng nakaral᷊eng, keluargaku nakasilo iạ měmẹ̌mol᷊eng tol᷊eng kawal᷊o. I sire matakụ iạ sakelangu kawal᷊o ene, hakị u ene i sire nẹ̌kui si siạ. Iạ tawe nakaringihẹ̌ ual᷊ingu tawe němanda si sire. Untung iạ tawe nal᷊esẹ. Katewe bọu tempo ene keluargaku nakasingkạ iạ tunarungu arau tawe makararingihẹ̌.

Hapị keluargang kami něgělị těgu tadeạu iạ pẹ̌sikol᷊ah dingangu manga rariọ tunarungu wal᷊inẹ. Hakị u ene iạ nisuẹ̌ i Papạ ariku su sikol᷊ah khusus tunarungu su Saskatoon, Saskatchewan. Sikol᷊ah ene marau bọu wal᷊eng keluargaku, kụ ual᷊ingu iạ buhudeng lima taung, iạ natakụ. Iạ kětạeng mapul᷊ẹ su tempong liburẹ̌ arau su tempong musim panas. Katewe samurine iạ nakaěndung werang  isyarat kụ botonge měnalang dingangu manga rariọ bal᷊inẹ.

Su taung 1939, tuhangku Marion nẹ̌kawing dingangi Bill Danylchuck, kụ i rẹ̌dua něngurusẹ̌ si siạ dingangu wawineku, arenge Frances. Su keluargang i kami, i rẹ̌dua něngěndung Alkitapẹ̌ kakal᷊imonange dingangu Sahiding Yehuwa. Su tempong liburẹ̌ musim panas, i sire nẹ̌tawakal᷊i mẹ̌běke si siạ apa niěndungang i sire bọu Alkitapẹ̌. Ual᷊ingu i sire běga werang isyarat, iạ masigěsạ mẹ̌bisara dingangi sire. Maning kerene i sire masingkạ iạ mapulu měngěndung soal i Yehuwa. Ual᷊ingu masingkạ apa nikoạ i sire nẹ̌tatahino dingangu Alkitapẹ̌, iạ timol᷊e něnginjilẹ̌ dingangi sire. Bọu ene, iạ mapulu sahaniang. Su tanggalẹ̌ 5 September 1941, i Bill něnahani si siạ su bakẹ̌ bọu uase kụ nilohongu akẹ bọu pahighi. Akẹ e sěbạewe matěho-těho!

Su taung 1946, su tempong iạ napul᷊ẹ su musim panas, i kami timol᷊e kebaktian su Cleveland, Ohio, AS. Su ěllo humotong, manga tuhangku někoạ catatan tadeạu ia makaěna acarane. Su ěllo karuane, iạ mal᷊uasẹ̌ ual᷊ingu piạ bageang gunang tunarungu. Sene piạ u menerjemah sarang werang isyarat. Kụ buhudeng ene iạ kahěngang-hěngang nakaěna těntirong Alkitapẹ̌. Iạ sěbạe mal᷊uasẹ̌!

Napul᷊ẹ bọu kebaktian, iạ saụ nẹ̌sikol᷊ah. Su tempo ene Perang Dunia II buhudeng nasue, kụ taumata mapulu měnodẹ kasasatiang i sire su negara. Ual᷊ingu masingkạ těntirong Alkitapẹ̌, iạ mapulu masatia si Yehuwa. Hakị u ene iạ tawe něhormat bendera, nẹ̌kantarị lagu kebangsaan werang isyarat, dingangu timol᷊e hari raya. Iạ lai madiri sarang gaheda dingangu hapị su sikol᷊ah. Guru-guru pědu si siạ kụ i sire němahang dingangu nẹ̌konti tadeạu iạ mẹ̌bal᷊ui. Manga hapị su sikol᷊ah masingkạ hal᷊ẹ̌ ene, kụ iạ botonge nẹ̌běke pangangimangku si sire. Pirang katau bọu i sire, kere i Larry Androsoff, Norman Dittrick, dingangi Emil Schneider, nakoạ Sahiding Yehuwa sarang orasẹ̌ ini.

Mạeng iạ mẹ̌tiwo manga soa wal᷊inẹ, iạ mẹ̌tawakal᷊i měnginjilẹ̌ su tunarungu. Contone, su Montreal, iạ nakoạ sarang tampạ u tunarungu. Sene iạ něnginjilẹ̌ si Eddie Tager, sěngkatau anggota geng bědang mangudạ. Sarang i sie nate su taung tamai, i sie tatapẹ̌ su sidang werang isyarat Laval, Quebec. Iạ lai nẹ̌sěmạ dingangu sěngkatau mangudạ arenge, Juan Ardanez. Kere tau Berea kangerẹ, i sie saụ němarikěsa Alkitapẹ̌ tadeạu makasingkạ apa niěndungange ene kahěngang bọu Alkitapẹ̌. (MMR. 17:10, 11) I sie lai nisahani kụ nakoạ penatua su Ottawa, Ontario, sarang i sie nate.

Su taung 1950, iạ něngal᷊ing sarang Vancouver. Maning iạ mapulu měnginjilẹ̌ su tunarungu, iạ piạ pengalaman něnginjilẹ̌ su sěngkatau wawine arenge Chris Spicer, i sie bal᷊inẹ tunarungu. Iạ něnginjilẹ̌ si sie su ral᷊eng. I sie mapulu turusẹ̌ makaěbạ bawasang kụ něgausẹ̌ si siạ mẹ̌sěmạ u kawinge, Gary. Iạ nakoạ sarang bal᷊eng i sire, kụ i kami nẹ̌bawěke marěngụ carane bẹ̌bohẹkang su karětasẹ̌. I kami saụ nẹ̌sěmạ pira taung bọu  ene su kebaktian su Toronto, Ontario. Iạ himěkosẹ̌ nẹ̌sěma i rẹ̌dua, kụ su ěllo ene i Gary sahaniang. Bọu pengalaman ene iạ něngěndung penting turusẹ̌ měnginjilẹ̌, ual᷊ingu i kitẹ běga mạeng samurine i sire měnarimạ těntirong Alkitapẹ̌.

Bọu ene iạ nẹ̌bal᷊ị sarang Saskatoon. Sene piạ sěngkatau wawine mědẹ̌dorong si siạ pěněntiro Alkitapẹ̌ su anạe wawine kembar, Jean dingangi Joan Rothenberger. I sire měsẹ̌sikol᷊ah su sikol᷊ahku kangerẹ. I rẹ̌dua nẹ̌běke su manga hapị su sikol᷊ah apa niěndungang i rẹ̌dua. Kụ limang katau hapị i rẹ̌dua nakoạ Sahiding Yehuwa. Sěngkatau arenge, Eunice Colin. Iạ bọu nẹ̌sombang dingange su taung pěngěnsuenge iạ nẹ̌sikol᷊ah sene. Su tempo ene, i sie něgělị gula-gula kụ nẹ̌kiwal᷊o apa iạ mapulu mědal᷊ahapị dingange. Samurine i sie nakoạ bageang penting su pěbawiahẹ̌ku. I sie nakoạ kawingku!

Su tempong mamạ i Eunice nakasingkạ i Eunice něngěndung Alkitapẹ̌, i sie nẹ̌dorong kepala sekolah pěngologẹ̌ si Eunice tadeạu měngědo měngěndung. Kepala sekolah ene něngal᷊ạ kěbị bukẹ̌ e, katewe Eunice tatapẹ̌ masatia si Yehuwa. Su tempong i sie sahaniang, matimade naul᷊ị, ”Mạeng i kau makoạ Sahiding Yehuwa, i kau harusẹ̌ sěbang bọu wal᷊e!” Su tempong Eunice umure 17, i sie siměbang bọu wal᷊e kụ nětanạ dingangu Sahiding Yehuwa. I sie turusẹ̌ něngěndung, kụ bọu ene nisahani. Su tempong i kami nẹ̌kawing su taung 1960, matimade tawe simongo. Katewe, pira taung bọu ene, i sire něnětạ měngarěgang i kami ual᷊ingu pangangimang dingangu carane i kami měněntiro manga rariọ.

Anạ i kami pitung katau, esẹ kěbị kụ bal᷊inẹ tunarungu. Hakị u ene měhiking  si sire tawe gampang. I kami něněntiro si sire werang isyarat tadeạu botonge mẹ̌bisara dingangu měněntiro Alkitapẹ̌ si sire. Anạu sěmbaụ su sidang lai nẹ̌tul᷊ung si kami. Contone, piạ saudara němohẹ su karětasẹ̌ naul᷊ị anạ i kami něpakẹ bawera kotorẹ̌ su Banalang Kararatuang. Hakị u ene i kami botonge měngatorẹ̌ si sire. Ěpạ u katau anạ i kami—i James, Jerry, Nicholas, dingangi Steven—nakoạ penatua kụ satia si Yehuwa dingangu kawinge lai keluargang i sire. Nicholas dingangu kawinge, Deborah, mělẹ̌hal᷊ẹ̌ su penerjemahan werang isyarat su kantor cabang Inggris. I Steven dingangu kawinge, Shannan, su tim penerjemah werang isyarat su kantor cabang Amerika Serikat.

Nasusah naungku su tempong Eunice nate ual᷊ingu kanker. Ene nariadi sěmbul᷊ang maraning hari jading pẹ̌kakawing i kami ka-40 su taunge. Su tempong tụtatěngo sakị ene, pangangimang i Eunice tatapẹ̌ matoghasẹ̌ ual᷊ingu nẹ̌tahěndung taumata nate sarung saụ ipěbiahẹ̌. Iạ turusẹ̌ měngampal᷊ẹ̌ saụ mẹ̌sombang dingange.

 Su wul᷊ang Februari 2012, iạ nanawo kụ duhing kal᷊uwaengku napědi. Iạ masingkạ harusẹ̌ piạ u mẹ̌tul᷊ung si siạ. Hakị u ene iạ nẹ̌tanạ su wal᷊eng anạku. I kami timol᷊e Sidang Bahasa Isyarat Calgary, kụ iạ nakoạ penatua sene. Ini kai sidang werang isyarat humotong si siạ! Kerea pẹ̌dal᷊ahapịku dingangi Yehuwa tatapẹ̌ matoghasẹ̌ su tempong iạ seng taunge tụtol᷊e sidang werang Inggris? Yehuwa nẹ̌tul᷊ung si siạ. I Sie někoạ apa seng niriandi-Ne gunang měndiagạ anạ kasisi. (Mzm. 10:14) Iạ nẹ̌tarimakasẹ si sire apang němohẹ su karětasẹ̌, něngěndung werang isyarat, dingangu nẹ̌tul᷊ung menerjemah.

Pẹ̌sěnsul᷊ẹ iạ tawe nakaěna apa niul᷊ị u taumata arau iạ mẹ̌pěndang tawẹ apa taumata makaěna carane mẹ̌tul᷊ung tunarungu. Ini nakakadodọ naungku. Su tempo kerene iạ mẹ̌tahěndung bawerang Petrus si Yesus, ’Mawu, kụ kai sarang anung i sai tangu i kami? Bawerang Mawu kai makạděntang pẹ̌bawiahẹ̌ kakalẹ̌.’ (Yoh. 6:66-68) Kere anạu sěmbaụ wal᷊inẹ apang tunarungu, kụ seng marěngụ nakoạ Sahiding Yehuwa, iạ něngěndung tadeạu masabarẹ̌. Iạ něngěndung mangimang si Yehuwa dingangu organisasi-Ne kụ ene tawe sia-sia. Orasẹ̌ ini lawọ publikasi su werang isyarat. Kụ iạ lai mal᷊uasẹ̌ ual᷊ingu botonge sumongo su pěngangibadang dingangu kebaktian Bahasa Isyarat Amerika. Pěbawiahẹ̌ku mal᷊uasẹ̌ ual᷊ingu nakoạ ělangi Yehuwa, Mawung i kitẹ Mawantugẹ̌.