1, 2. (a) Hadiah apa turusẹ̌ lẹ̌ampal᷊eng manga ělangu Mawu? (b) Apa makatul᷊ung si kitẹ turusẹ̌ mẹ̌tahěndung hadiah ene? (Pěmanda gambarẹ̌ humotong su pěngangěndungang ini.)

TAU Sahani apang nilanisang nakaěbạ pělaharapẹ̌ sěbạe maarěga. I sire sarung měbiahẹ̌ su sorga. Rasul Paulus nẹ̌sěbạ pělaharapẹ̌ ene kai ”hadiah bọu Mawu, ene kai kakui sarang sorga”. (Flp. 3:14, NW) Su sorga i sire sarung mẹ̌parenta dingangi Kristus su Kararatuange, kụ sěngkapěhal᷊ẹ̌ dingange gunang mẹ̌tul᷊ung taumata makoạ masukụ. (Pěl. 20:6) Pělaharapẹ̌ ini sěbạewe maarěga! Manga domba wal᷊inẹ lai měngẹ̌ngampal᷊ẹ̌ hadiah wal᷊inẹ. Pělaharapẹ̌ i sire ute měbiahẹ̌ sarang karěngụe su Firdaus su dunia, kụ ene nakakoạ si sire sěbạewe mal᷊uasẹ̌!​—2 Ptr. 3:13.

² Paulus mapulu mẹ̌tul᷊ung si sire apang nilanisang su tempo ene, tadeạu tatapẹ̌ masatia kụ makatarimạ hadiah. I sie naul᷊ị si sire, ”Pěmpěnẹ̌naungbe apan dasị sene.” (Kol. 3:2) I sire harusẹ̌ turusẹ̌ mẹ̌tiněna pělaharapẹ̌ i sire. (Kol. 1:3-5) Mẹ̌tiněna al᷊amatẹ̌ sarung gělịkangi Yehuwa makatul᷊ung kěbị ělang’E mẹ̌tahěndung hadiah ene, maning  i sire měbiahẹ̌ su sorga arau su dunia.​—1 Kor. 9:24.

3. Apa laingatẹ̌ nighělị i Paulus su tau Sahani?

³ Paulus lai něgělị laingatẹ̌ su tau Sahani soal u bahaya makakoạ si sire tawe makatarimạ hadiah. Contone, i sie naul᷊ị soal u tau Sahani palsu kụ bědang tụtol᷊e hukung Musa gunang makal᷊uasẹ̌ naungu Mawu bal᷊inẹbe mangimang si Kristus. (Kol. 2:16-18) Paulus lai nẹ̌bisara soal u bahaya bědang ene sarang orasẹ̌ ini kụ makakoạ si kitẹ tawe makatarimạ hadiah bọu Mawu. I sie nělahẹ kerea mẹ̌těngkarau bọu kapulu amoral dingangu apa harusẹ̌ koateng mạeng piạ masalah su ral᷊ungu keluarga arau dingangu anạu sěmbaụ su sidang. Sasasang Paulus makatul᷊ung si kitẹ orasẹ̌ ini. Mahịe i kitẹ měngěndung piram baụ laingatẹ̌ bọu surati Paulus su tau Kolose.

4. Kawe nụe kapulu měkoạ amoral makakoạ si kitẹ tawe makaěbạ hadiah?

⁴ Su apang bọu nẹ̌bisara soal u pělaharapẹ̌ su anạu sěmbaụ e, Paulus němohẹ, ”Pakasueko pate kal᷊awọu kapulun dunia e mẹ̌nẹ̌naghal᷊i watangengue; kere pẹ̌sasundal᷊ẹ̌, karal᷊amuhụ, abul᷊i, ěnning dal᷊akisẹ̌ dingangu anggang.” (Kol. 3:5) Kapulu měkoạ amoral kakạrěngụe kakạtoghase, kụ ene makarusa pẹ̌dal᷊ahapị dingangi Yehuwa lai makailang pělaharapẹ̌ i kitẹ. Piạ sěngkatau saudara tawe limawang kapulu měkoạ amoral, kụ i sie někoạ dosa. Samurine i sie nẹ̌tobatẹ̌ kụ nẹ̌bal᷊ị sarang sidang. I sie naul᷊ị kapulune měkoạ amoral kakạtoghase, kụ i sie ”hědo nasadarẹ̌ hal᷊ẹ̌ ene seng nariadi”.

5. Kerea měndiagạ watangeng i kitẹ bọu situasi makawahaya?

⁵ I kitẹ harusẹ̌ limembong maingatẹ̌ su tempong piạ situasi makakoạ si kitẹ tawe tumuhụ standar moral i Yehuwa. Contone, duang katau měsẹ̌sasintị harusẹ̌ mẹ̌bisara kal᷊imona soal u batase mẹ̌sasenggehẹ̌, mẹ̌darěngu, dingangu dumal᷊eng kětạeng i rẹ̌dua hala. (Baw. 22:3) Situasi wal᷊inẹ kụ makawahaya ene kai mạeng měkoạ perjalanan bisnis arau sěngkapěhal᷊ẹ̌ dingangu hapị esẹ arau wawine. (Baw. 2:10-12, 16) Kerea i kau botonge měndiagạ watangengu? Paul᷊ị kal᷊imona i kau kai Sahiding Yehuwa. Diagạ kakanoạ, kụ pẹ̌tahěndung mạeng masahigẹ̌ ene makạděntang silakạ. I kitẹ lai harusẹ̌ maingatẹ̌ su tempong nasusah naung arau tawẹ apa hapị. Ěndịu i kitẹ mapulu piạ u měhiborẹ̌ si kitẹ, kụ ene makakoạ si kitẹ měnarimạ taumata mẹ̌pandung si kitẹ maning i sai i sie. Ene makasilakạ. Mạeng i kau nakapěndang kerene, abe pěkoạ barang makakoạ si kau kailangengu hadiah. Pẹ̌dorong tul᷊ungke si Yehuwa dingangu anạu sěmbaụ su sidang.​—Basa Mazmurẹ̌ 34:19; Baweran Salomo 13:20.

6. Apa harusẹ̌ tahěndungang i kitẹ su tempong měmile hiburan?

⁶ Gunang měmate kapulu měkoạ amoral, i kitẹ tawe wotonge měnarimạ hiburan amoral. Orasẹ̌ ini, lawọ hiburan mẹ̌sul᷊ung dingangu apa nariadi su soa Sodom dingangu Gomora. (Yud. 7) I sire apang někoạ hiburan ene mapulu taumata mẹ̌pěndang amoral ene wiasa kụ tawe makasilakạ. Hakị u ene i kitẹ harusẹ̌ maingatẹ̌. Tawe kěbị hiburan bọu dunia ini botonge tarimakeng i kitẹ.  I kitẹ harusẹ̌ měmile pakapia, abe sarang hiburan makakoạ si kitẹ kailangengu hadiah pěbawiahẹ̌.​—Baw. 4:23.

7. Masalah apa botonge mariadi su sidangu tau Sahani?

⁷ I kitẹ mal᷊uasẹ̌ nakoạ bageang bọu sidangu tau Sahani. Su pěngangibadang, i kitẹ něngěndung Hengetang u Mawu dingangu mẹ̌kakěndagẹ̌ sěmbaụ su wal᷊inẹ. Ini makatul᷊ung si kitẹ turusẹ̌ mẹ̌tahěndung hadiah. Katewe pẹ̌sěnsul᷊ẹ měsẹ̌sal᷊a tiněna makakoạ i kitẹ mẹ̌papědu dingangu anạu sěmbaụ. Mạeng tawe lighạ bisaraěng, ene makapẹ̌sitori.​—Basa 1 Petrus 3:8, 9.

8, 9. (a) Sipatẹ̌ apa makatul᷊ung si kitẹ makatarimạ hadiah? (b) Apa makatul᷊ung si kitẹ tatapẹ̌ mẹ̌dame mạeng piạ anạu sěmbaụ nakatědụ naung i kitẹ?

⁸ I kitẹ tawe wotonge měmala pẹ̌sasitori makakoạ si kitẹ kailangengu hadiah. Paulus naul᷊ị apa harusẹ̌ koatengu tau Sahani, ’Ruata němile si kamene. Ual᷊ingu ene i kamene harusẹ̌ pẹ̌kakěndagẹ̌, mẹ̌sěngkapiang anạ u sěmbaụ, kasasanạ u naung, sikome naung, ringangu makědang su sigěsạ. I kamene harusẹ̌ mẹ̌sasabarẹ̌, dingangu mẹ̌gaghělị u ampung kereu piạ u měndesọ tunenaung su wal᷊inẹ. Mawu mal᷊uasẹ̌ měngampung si kamene, kụ i kamene mal᷊aing hinong pẹ̌papangampung. Su wowong kěbị ene, i kamene harusẹ̌ mẹ̌kakěndagẹ̌ ual᷊ingu kakěndagẹ̌ mapakasěmbaụ si kamene’.​—Kol. 3:12-14.

⁹ Kakěndagẹ̌ dingangu kapiang naung makatul᷊ung si kitẹ mẹ̌papangampung. Mạeng naung i kitẹ natědụ ual᷊ingu bawera arau kakakoạu taumata wal᷊inẹ, i kitẹ botonge mẹ̌tahěndung tempong i kitẹ nẹ̌bera arau někoạ barang dal᷊akị su taumata wal᷊inẹ. Su tempong i sire něgělị ampung, i kitẹ tantu mal᷊uasẹ̌ ual᷊ingu i sire mapia dingangu makěndagẹ̌ si kitẹ! (Basa Měnanasẹ̌ 7:21, 22.) I kitẹ mẹ̌tarimakasẹ ual᷊ingu Kristus seng napakasěmbaụ taumata apang mapulu maněmbah si Yehuwa. (Kol. 3:15) I kitẹ kěbị kụkěndagẹ̌ Mawu mẹ̌sul᷊ung, mẹ̌bawa habarẹ̌ mẹ̌sul᷊ung, dingangu tụtatěngo sasal᷊ukạ mẹ̌sul᷊ung. Mạeng i kitẹ makěndagẹ̌, mapia, dingangu mẹ̌papangampung sěmbaụ su wal᷊inẹ, sidang sarung masěmbaụ, kụ i kitẹ botonge turusẹ̌ mẹ̌tahěndung hadiah bọu Mawu.

10, 11. (a) Kawe nụe pěndang iri ene makawahaya? (b) Kerea tadeạu i kitẹ tawe iri?

¹⁰ Pěndang iri makakoạ si kitẹ tawe makatarimạ hadiah. Alkitapẹ̌ něnodẹ kerea pěndang iri sěbạe makawahaya. Contone, Kain iri si Habel, kụ i sie němate si Habel. I Korah, Datan, dingangi Abiram iri si Musa, kụ i sire tělu limawang si sie. Datu Saul lai iri si Daud, hakị u ene i sie mapulu měmate si Daud. Apa niul᷊ị u Alkitapẹ̌ mang kahěngang, ’Su apang piạ pẹ̌sasingking arau iri dingangu kụkěndagu watangeng hala ute, sene mal᷊aing kaěbakeng pẹ̌sasil᷊ontahẹ̌ arau pẹ̌sasitori dingangu haghing kakanoạ dal᷊akisẹ̌.’​—Yak. 3:16.

¹¹ Mạeng i kitẹ mẹ̌tawakal᷊i měnodẹ kakěndagẹ̌ dingangu kapiang naung, i kitẹ tawe masahawụ piạ pěndang iri. Alkitapẹ̌ naul᷊ị, ”I saing kụkěndagu sěndinganenge i sie kai makẹ̌dang dingangu mapia naunge. I sie tawe sumasingking arau iri.” (1 Kor. 13:4) Tadeạu tawẹ apa pěndang iri su naung i kitẹ, i kitẹ harusẹ̌ měmanda kěbị haghi kere cara Yehuwa měmanda. I kitẹ kěbị kai bageang bọu wadang sěmbaụ, mangal᷊ene sidang.  Alkitapẹ̌ naul᷊ị, ”Kereu piạ laese sěmbaụ daloěnge ute, kěbị laese lai wal᷊ine e ute mal᷊aing mahul᷊uasẹ̌.” (1 Kor. 12:16-18, 26) Haki u ene, mạeng piạ barang mapia nariadi su anạu sěmbaụ i kitẹ, i kitẹ lai mal᷊uasẹ̌ kụ tawe iri si sie. Pẹ̌tiněna contoh mapaelẹ̌ bọu i Yonatan, anạ i Datu Saul. Yonatan tawe iri su tempong i Daud nipile nakoạ datu, bal᷊inẹbe i sie. I sie něnoghasẹ̌ dingangu nẹ̌tul᷊ung si Daud. (1 Sam. 23:16-18) Apa i kitẹ botonge měnodẹ kakěndagẹ̌ dingangu kapiang naung kere i Yonatan?

12. Sasasa apa nighělị i Paulus su manga keluarga?

¹² Mạeng sěntahanakeng měpakẹ prinsip u Alkitapẹ̌, keluarga sarung mararame, mal᷊uasẹ̌, dingangu makatarimạ hadiah bọu Mawu. Paulus něgělị sasasa ini gunang keluarga, ’Manga wawine pakasasumělung arau pakaadatẹ̌ su kawing i kamene, u kawe kerene kakakoạ u tau Sahani. Manga esẹ, kẹ̌kěndagẹ̌beng kawingi kamene. Abe ral᷊ahětu mẹ̌koạ si sire. Manga rariọ, harusẹ̌be pakararingihẹ̌ si amangu ringangu si ninangu, batụu kai ene makạl᷊uasẹ̌ naungu Mawu Ruata. Manga amang, arịebe mapal᷊angehu arau makatědụ naung anạ i kamene mạdiring kumondọ arau masusah naung i sire.’ (Kol. 3:18-21) Apa sasasa ini makatul᷊ung keluarganu?

13. Kerea saudari botonge mẹ̌tul᷊ung kawinge tadeạu mapulu makoạ ělangi Yehuwa?

¹³ Ěndịu i kau sěngkatau saudari kụ kawingu bal᷊inẹ ělangi Yehuwa. Apa koatengu mạeng i sie dal᷊akị měkoạ si kau? Aramanung i kau nẹ̌pědu kụ nẹ̌bul᷊o ringange, katewe apa ene piạ gunane? Mạeng i kau nakauntung nẹ̌darendehẹ̌, apa ene makakoạ  i sie mapulu makoạ ělangi Yehuwa? Ěndịu tala. Katewe, mạeng i kau měngarěga i sie kai těmbonangu keluarga, i kau makatul᷊ung keluarganu makoạ mararame kụ makaralo si Yehuwa. Mạeng kakanoạu mapia, ene makatul᷊ung kawingu mapulu makoạ ělangi Yehuwa, kụ i rua sarung makatarimạ hadiah bọu Mawu.​—Basa 1 Petrus 3:1, 2.

14. Apa harusẹ̌ koatengu sěngkatau saudara mạeng kawinge tawe měngẹ̌ngadatẹ̌ si sie?

¹⁴ Aramanung i kau sěngkatau saudara kụ kawingu bal᷊inẹ ělangi Yehuwa. Apa koatengu mạeng i sie tawe měngẹ̌ngadatẹ̌ si kau? Mạeng i kau mẹ̌pědu kụ měhěkadẹ̌ si sie tadeạu i sie měngadatẹ̌ si kau, apa ene piạ gunane? Tantu tala! Mawu mapulu i kau makoạ kawing makěndagẹ̌ kụ mẹ̌těno si Yesus. (Ef. 5:23) Yesus, těmbonangu sidang, kai masabarẹ̌ dingangu makěndagẹ̌. (Luk. 9:46-48) Mạeng i kau mẹ̌těno si Yesus, kakạrěngụe kawingu sarung mapulu makoạ ělangi Yehuwa.

15. Kerea esẹ botonge měnodẹ kakěndagẹ̌ su kawinge?

¹⁵ Yehuwa nẹ̌parenta su kawing esẹ, ”Kẹ̌kěndagẹ̌beng kawingi kamene. Abe ral᷊ahětu mẹ̌koạ si sire.” (Kol. 3:19) Esẹ mapia měngẹ̌ngarěga kawinge. Kerea carane? I sie dumaringihẹ̌ pěndangu kawinge, kụ maul᷊ị apa niwerane ene penting. (1 Ptr. 3:7) Maning kawing esẹ tawe makatol᷊e kěbị kapulung kawinge, dumaringihẹ̌ apa niwerane makatul᷊ung kawing esẹ měkoạ putusang limembong mapaelẹ̌. (Baw. 15:22) Esẹ mapia tawe měnuntụ kawinge harusẹ̌ měngadatẹ̌ si sie. Katewe, i sie mẹ̌tawakal᷊i makaěbạ laadatẹ̌ ene. Mạeng esẹ makěndagẹ̌ su kawinge dingangu anạe, aramanung keluargang i sire sarung  mal᷊uasẹ̌ měkoạ kapulung Yehuwa, kụ sarung makatarimạ hadiah pěbawiahẹ̌.

16, 17. Mạeng i kau anạ mangudạ, kerea tadeạu i kau tawe mẹ̌pědu su tempong nakaěbạ disiplin bọu matimadẹ̌?

¹⁶ Ěndịu i kau anạ mangudạ kụ nẹ̌pěndang matimadu tawe nakaěna pěndangu dingangu mal᷊awọ atorange. Ene tantu nakakoạ si kau mẹ̌pědu kụ i kau seng malasẹ̌ měkoạ kapulung Yehuwa. Katewe mạeng i kau měněntang Yehuwa, i kau sarung makapěndang tawẹ apa taumata kuměndagẹ̌ si kau kere matimadu arau manga hapịu su sidang.

¹⁷ Kěnang pẹ̌tiněna hal᷊ẹ̌ ini: Mạeng matimadu tawe mẹ̌taradạ su tempong i kau někoạ barang nẹ̌sal᷊a, apa i sire makěndagẹ̌ si kau? (Ibr. 12:8) I sire tawe nasukụ, hakị u ene cara i sire měgělị disiplin ěndịu makakoạ si kau mẹ̌pědu. Abe kětạeng mẹ̌pikirẹ̌ soal u kerea disiplin ene nighělị. Katewe, pẹ̌tiněna alasang i sire nẹ̌bera arau někoạ kerene. Pakatěnang kụ abe pẹ̌darendehẹ̌. Alkitapẹ̌ naul᷊ị, ”Taumata tiněnnane mal᷊ahoro e, mahal᷊i mẹ̌bera. Taumata kụ pelesa e mang mal᷊enehẹ̌.” (Baw. 17:27) Kariadiko taumata matělang kụ mapulu měnarimạ sasasa dingangu měngěndung bọu sasasa ene, tawẹ soale kerea sasasa ene nighělị. (Baw. 1:8) Pẹ̌tahěndung, mạeng i kau piạ matimadẹ̌ makěndagẹ̌ si Yehuwa, ene kai hadiah maarěga. I sire mapulu i kau měbiahẹ̌ kěkalẹ̌.

18. Kawe nụe i kau harusẹ̌ turusẹ̌ mẹ̌tahěndung hadiah seng nirianding Mawu?

¹⁸ I kitẹ kěbị piạ pělaharapẹ̌ mapaelẹ̌, měbiahẹ̌ su sorga arau su firdaus su dunia. Pělaharapẹ̌ ene mang mariadi. Ini dasare bọu dianding Měndariadi alam semesta. I Sie naul᷊ị, ”Banua e sarung mapenẹ u kasingkạ u mạanum Duata.” (Yes. 11:9) Seng mal᷊ighạ kěbị taumata su dunia sarung těntiroěngu Mawu. Maning harusẹ̌ mẹ̌tawakal᷊i dongkeng orasẹ̌ ini, ini tawe sia-sia. Hakị u ene, abe kiwul᷊ei apa seng nirianding i Yehuwa si kau. Kụ abe wala barang bal᷊inẹ makasahaghe si kau makaěbạ hadiah bọu Mawu!