1. Apa gunane kakantarị si kitẹ?

SĚNGKATAU měmamohẹ kakantarị naul᷊ị, ”Su tempong i kau makaringihẹ̌ bawera, ene makakoạ si kau mẹ̌tiněna. Su tempong i kau makaringihẹ̌ musikẹ̌, i kau makapěndang. Katewe su tempong mẹ̌kantarị, bawerane makakanoạ naungu.” Kakantarị i kitẹ nělahẹ daralo dingangu kakěndagẹ̌ si Amang i kitẹ su sorga, Yehuwa. Ene makakoạ i kitẹ limembong marani dingang’E. Hakị u ene, mẹ̌kantarị hala arau dingangu anạu sěmbaụ ene kai bageang penting bọu ibadang kitẹ.

2, 3. (a) Aramanung kerea pěndangu pirang katau soal u mẹ̌kantarị su sidang? (b) Kakiwal᷊o apa sarung ěndungang i kitẹ?

² Katewe, apa i kau puluang mẹ̌kantarị dingangu tingihẹ̌ maihạ su sidang? Arau, apa i kau mamea? Su piram baụ kebudayaan, manga esẹ tawe nawiasa mẹ̌kantari su těngong taumata wal᷊inẹ. Ini piạ tětal᷊e su sidang, napal᷊iung mạeng penatua tawe mẹ̌kantarị arau sibukẹ̌ měkoạ barang bal᷊inẹ su tempong kạpẹ̌kantarịe.​—Mzm. 30:13.

³ Mẹ̌kantarị kai bageang bọu ibadang kitẹ si Yehuwa. Hakị u ene i kitẹ tantu madiri tawe  makatol᷊e bageang ini su pěngangibadang. I kitẹ botonge mẹ̌tiněna, ’Apa iạ mẹ̌pěndang mẹ̌kantarị su pěngangibadang ene penting? Apa koatengku mạeng iạ tawe nawiasa mẹ̌kantarị su těngong taumata wal᷊inẹ? Kụ, kerea tadeạu iạ mẹ̌kantarị bọu dal᷊ungu naung?’

4, 5. Kerea kakantarị dingangu musikẹ̌ pẹ̌paketang tau Israel su tempong měngibadah?

⁴ Dongkeng kangerẹ sarang orasẹ̌ ini, manga ělang i Yehuwa měpẹ̌pakẹ musikẹ̌ gunang mẹ̌dalo si Sie. Su tempong tau Israel masatia si Yehuwa, kakantarị nakoạ bageang penting bọu ibadang i sire. Contone, su tempong Daud nẹ̌sasadia měmětị bait, i sie něngatorẹ̌ 4.000 tau Lewi mẹ̌dalo si Yehuwa dingangu musikẹ̌. Bọu i sire ene, piạ 288 su kataune ”mapapandeng musikẹ̌ [arau mẹ̌kantarị, NW]”.​—1 Kar. 23:5; 25:7.

⁵ Kakantarị dingangu musikẹ̌ lai nakoạ bageang penting su tempong peresmian bait. Alkitapẹ̌ nẹ̌běke, ”Tingihu kakantarị e nasěmbaụ dingangu tingihu slompretẹ̌, simbal dingangkeweng apal᷊iwụ u musikẹ̌ bal᷊inẹ . . . sěngkianu Wal᷊e ene natualagen darěntam MAWU.” Kěnang pẹ̌tiněna pěndangu tau Israel su tempo ene. Tantu pangangimang i sire si Yehuwa sauneng kakạtoghase!​—2 Kar. 5:11-14; 7:6.

6. Su tempong nakoạ gubernur Yerusalem, kerea Nehemia něngatorẹ̌ musikẹ̌ dingangu kakantarị?

⁶ Contoh wal᷊inẹ lai i Nehemia, gubernur Yerusalem. Su tempong něngatorẹ̌ tau Israel gunang měmangung těndạu Yerusalem, i sie lai něngatorẹ̌ tau Lewi gunang mẹ̌kantarị dingangu měnalang musikẹ̌. Su peresmian těndạ ene, musikẹ̌ nẹ̌nalangeng i sire, nakatamba karal᷊uasẹ̌. I Nehemia němile ’duang kamonaěng gěguwạ mẹ̌kantarị daralong tatarimakasẹ’. I sire nẹ̌kantarị su wowong těndạu soa. Sěngkamonaěng dimal᷊eng sarang sěmběka koaneng, sěngkamonaěng sarang sěmběka kaihi, kụ i sire nẹ̌sěmạ su wowong těndạ karaniange dingangu bait. Musikẹ̌ dingangu tingihi sire sěbạe maihạ hakị u nikaringihẹ̌ sarang marau. (Neh. 12:27, 28, 31, 38, 40, 43) Tantu Yehuwa mal᷊uasẹ̌ nakaringihẹ̌ manga ělang’E masěmangatẹ̌ nẹ̌kantarị nẹ̌dalo si Sie.

7. Kerea Yesus něnodẹ kakantarị kai bageang penting su ibadang tau Sahani?

⁷ Su tempong Yesus su dunia, musikẹ̌ lai nakoạ bageang bọu ibadah si Yehuwa. Pẹ̌tahěndung apa nariadi su hěbi sěbạe penting su kanandụu pěbawiahu taumata. Su apang bọu někoạ Perjamuan, Yesus dingangu manga murite nẹ̌kantarị nẹ̌dalo si Yehuwa.​—Basa Matius 26:30.

8. Kerea tau Sahani su abad humotong nakoạ tatěnoěng soal u mẹ̌kantarị mẹ̌dalo Mawu?

⁸ Tau Sahani su abad humotong nakoạ tatěnoěng soal u mẹ̌kantarị mẹ̌dalo Mawu. Bal᷊inẹ kere tau Israel měngẹ̌ngibadah si Yehuwa su bait, tau Sahani měngẹ̌ngibadah su wal᷊e-wal᷊e. Maning bal᷊eng sire tawe mal᷊ěnggihẹ̌ arau gěguwạ kere bait, i sire tatapẹ̌ masěmangatẹ̌ mẹ̌kantarị. Paulus naul᷊ị su anạu sěmbaụe, ”Pěmpẹ̌kantarịkon Mazmurẹ̌ dingangu raralo arau kakantarị mararohkẹ̌;  pẹ̌kantarịko waugu Ruata, ringangu pěndangu tatarimakasẹ su naung i kamene.” (Kol. 3:16) Manga kakantarị su bukẹ̌ u kakantarị i kitẹ harusẹ̌ kantarịkang ”ringangu pěndang tatarimakasẹ su naung”. Ene kai bageang bọu ’kaěng su tempone’ nisadiangu ’ělang masatia ringangu matahuěna’ si kitẹ.​—Mat. 24:45.

9. (a) Kawe nụe pirang katau mamea mẹ̌kantarị su Banalang kararatuang arau su kebaktian? (b) Kawe nụe i kitẹ harusẹ̌ mẹ̌kantarị mẹ̌dalo si Yehuwa, kụ i sai makoạ tatěnoěng si kitẹ? (Pěmanda gambarẹ̌ humotong su pěngangěndungang ini.)

⁹ Apa piram baụ alasang ěndịu makakoạ si kau mamea mẹ̌kantarị? Ěndịu su budaya arau keluarganu, taumata tawe nawiasa mẹ̌kantarị. Arau i kau mamea lai makadodọ naung ual᷊ingu napẹ̌sul᷊ungu tingihu dingangu tingihẹ̌ penyanyi mapaelẹ̌ su radio arau televisi. Katewe, i kitẹ kěbị piạ tanggung jawab gunang mẹ̌kantarị mẹ̌dalo si Yehuwa. Hakị u ene, hengkẹ bukẹ̌u, abe kakurung, kụ pakasěmangatẹ̌ mẹ̌kantarị! (Esr. 3:11; basa Mazmurẹ̌ 147:1.) Orasẹ̌ ini, su lawọ Banalang Kararatuang, piạ layar gunang měnodẹ kakantarị i kitẹ, kụ ene makatul᷊ung si kitẹ mẹ̌kantarị maihạ. Kụ limembong mapaelẹ̌ lai, kakantarị u Kararatuang orasẹ̌ ini nakoạ bageang bọu Sekolah Pelayanan Kerajaan gunang manga penatua. Ini něnodẹ manga penatua harusẹ̌ makoạ tatěnoěng su tempong mẹ̌kantarị su pěngangibadang.

10. Apa harusẹ̌ tahěndungang mạeng i kitẹ gụgěnggang mẹ̌kantarị maihạ?

¹⁰ Lawọ lai madiri mẹ̌kantarị ual᷊ingu gụgěnggangu tingihi sire ral᷊aị arau tumanịu maihạ. Katewe, kěnang pẹ̌tiněna hal᷊ẹ̌ ini.  ”I kitẹ kěbị e masau su sul᷊ene mẹ̌bal᷊insuhụ u pẹ̌kakoạ sal᷊a” su tempong mẹ̌bisara. Maning kerene, i kitẹ tawe měngědo mẹ̌bisara. (Yak. 3:2) Hakị u ene, maning tingihi kitẹ tawe mapaelẹ̌, i kitẹ madiri měngědo mẹ̌kantarị u raralo si Yehuwa.

11, 12. Apa harusẹ̌ koatengi kitẹ tadeạu botonge mẹ̌kantarị mapaelẹ̌?

¹¹ Aramanung i kitẹ gụgěnggang mẹ̌kantarị ual᷊ingu běga carane mẹ̌kantarị. Katewe, piạ piram baụ cara gampang koateng tadeạu makapẹ̌kantarị mapaelẹ̌. *—Pěmanda catatan kaki.

¹² I kau botonge mẹ̌kantarị dingangu tingihẹ̌ maihạ mạeng masingkạ carane sumindạ. Kere listrikẹ̌ makakoạ sol᷊o dumělị, singongo makakoạ si kau botonge mẹ̌bisara arau mẹ̌kantarị maihạ. Kaihạe tingihu su tempong mẹ̌kantarị harusẹ̌ mẹ̌sul᷊ung dingangu su tempong mẹ̌bisara arau limembong maihạ bọu ene. (Pěmanda těgu su Memperoleh Manfaat dari Pendidikan Sekolah Pelayanan Teokratis, halaman 181 sarang 184, su subjudul ”Mengatur Persediaan Udara Saudara dengan Baik”.) Pẹ̌sěnsul᷊ẹ Alkitapẹ̌ něngoro manga ělangi Yehuwa ’pẹ̌giọ’ su tempong mẹ̌kantarị u raralo.​—Mzm. 33:1-3.

13. Lahẹko kerea tadeạu tawe mamea arau guměnggang su tempong mẹ̌kantarị.

¹³ Su ibadat keluarga arau su tempong měngěndung Alkitapẹ̌ hala, kěnang pěkoạ hal᷊ẹ̌ ini: Pilẹe sěmbaụ kakantarị ikẹ̌kapuluangu su bukẹ̌u kakantarị i kitẹ. Basa bawerane dingangu tingihẹ̌ maihạ, kụ abe katakụ arau mamea. Bọu ene, dingangu tingihẹ̌ maihạ, sěbạko kelompok kata su ral᷊ungu sěnsul᷊ẹ sumindạ. Bọu ene, kantarịkeko kěbị kelompok kata dingangu tingihẹ̌ mẹ̌sul᷊ung kaihạe. (Yes. 24:14) Tingihu mẹ̌kantarị mang makoạ limembong maihạ, kụ ene mapaelẹ̌. Abe kamea arau guměnggang mẹ̌kantarị kerene!

14. (a) Kerea měmuka mohong pakaguwạ makatul᷊ung si kitẹ su tempong mẹ̌kantarị? (Pěmanda kotak ”Carane Mẹ̌kantarị Mapaelẹ̌”.) (b) Těgụ sude makatul᷊ung si kau?

¹⁴ Tadeạu botonge mẹ̌kantari dingangu tingihẹ̌ maihạ, i kau harusẹ̌ měmuka mohongu pakaguwạ. Hakị u ene su tempong mẹ̌kantarị, mohong harusẹ̌ buka limembong gěguwạ sul᷊ungu su tempong mẹ̌bisara. Katewe, apa harusẹ̌ koatengu mạeng i kau mẹ̌pěndang tingihu masikome arau běsahẹ̌? Piạ těgu mapaelẹ̌ su kotak ”Mengatasi Problem-Problem Spesifik” su bukẹ̌  Memperoleh Manfaat dari Pendidikan Sekolah Pelayanan Teokratis, halaman 184.

15. (a) Apa niwohang su pertemuan tahunan 2016? (b) Apa piram baụ alasang bukẹ̌ kakantarị nirevisi?

¹⁵ Su pertemuan tahunan 2016, kěbị apang diměnta sěbạe mal᷊uasẹ̌ su tempong Saudara Stephen Lett bọu Badan Pimpinan němohang piạ bukẹ̌ kakantarị buhu, tatěmbọe Pẹ̌kantarịe dingangu Ral᷊uasẹ̌ si Yehuwa. Kawe nụe harusẹ̌ piạ bukẹ̌ kakantarị buhu? Kere niul᷊ị i Saudara Lett, sěmbaụ alasange ute ual᷊ingu Kitab Suci Terjemahan Dunia Baru seng nirevisi arau saụ niparikěsa kụ nikoạ pakapaelẹ̌. Ual᷊ingu piạ manga istilah seng tawe nipakẹ su Terjemahan Dunia Baru, bawera su manga kakantarị ene lai niwal᷊ui. Bọu ene, kakantarị buhu soal u měnginjilẹ̌ dingangu tatěbusẹ̌ seng nitamba. Mẹ̌kantarị kai bageang penting bọu ibadang i kitẹ, hakị u ene Badan Pimpinan mapulu měkoạ bukẹ̌ kakantarị mapaelẹ̌. Ual᷊ingu ene, papikunge mẹ̌sul᷊ung dingangu Terjemahan Dunia Baru.

16, 17. Apa sarung bal᷊uiang su bukẹ̌ kakantarị buhu?

¹⁶ Tadeạu gampang měpakẹ bukẹ̌ kakantarị buhu, manga kakantarịe nipahiạ tuhụ topik. Contone, 12 kakantarị humotong nělahẹ soal i Yehuwa, kụ 8 kakantarị tuhụe soal i Yesus dingangu tatěbusẹ̌, kụ kakantarị bal᷊inẹ lai kerene. Daftar kěbị kakantarịe,  ene su bageang humotong bọu bukẹ̌ ene. Ini lawọ gunane, contone su saudara apang měmile kakantarị gunang nasẹ̌e.

¹⁷ Tadeạu kěbị makapẹ̌kantarị bọu dal᷊ungu naung, piram baụ bawerane sarung bal᷊uiang tadeạu lohong kakantarị ene gampang kaěnang. Bawera tawe wiasa pẹ̌paketang lai sarung gantiang. Ual᷊ingu sarung bal᷊uiang bọu gaya resmi makoạ gaya wiasa, bawerane gampang kantarịkang, ual᷊ingu tawẹ apa struktur arau bawera masigěsạ.Piram baụ kakantarị lai sarung koateng pakapaelẹ̌ tadeạu limembong nẹ̌tatahino dingangu pěngangibadang lai měnginjilẹ̌.

18. Kawe nụe i kitẹ harusẹ̌ měngěndung kakantarị su bukẹ̌ kakantarị buhu? (Pěmanda catatan kaki.)

¹⁸ Su bukẹ̌ Pẹ̌kantarịe dingangu Ral᷊uasẹ̌ si Yehuwa, lawọ kakantarị bawerane mẹ̌sul᷊ungu daroa. Manga kakantarị ene makatul᷊ung si kitẹ maul᷊ị pěndangi kitẹ si Yehuwa. Manga kakantarị bal᷊inẹ lai makawahansang si kitẹ ’kuměndagẹ̌ ringangu měkoạ hal᷊ẹ̌ mapia’. (Ibr. 10:24) I kitẹ mapulu měngěndung nada, irama, dingangu bawera su kakantarị buhu. Sěmbaụ carane ute dumaringihẹ̌ rekaman anạu sěmbaụ měkẹ̌kantarị. Rekaman ene kasasadia su jw.org. Mạeng i kau měngěndung kantarị ene su wal᷊e, i kau botonge mẹ̌kantarị bọu dal᷊ungu naung. *—Pěmanda catatan kaki.

19. Apa botonge koatengu kěbị dal᷊ohong sidang gunang maněmbah si Yehuwa?

¹⁹ Pẹ̌tahěndung, mẹ̌kantarị kai bageang penting bọu ibadang i kitẹ. Su tempong mẹ̌kantarị, i kitẹ měnodẹ i kitẹ makěndagẹ̌ si Yehuwa dingangu mẹ̌tarimakasẹ ual᷊ingu kěbị apa seng nikoạ’E gunang i kitẹ. (Basa Yesaya 12:5.) Mạeng i kau masěmangatẹ̌ mẹ̌kantarị, anạu sěmbaụ lai mapulu měkoạ kerene. Kěbị su sidang, mangudạ, maghurang, arau buhudeng nakoạ ělangi Yehuwa, botonge mẹ̌kantarị mẹ̌dalo si Yehuwa. Hakị u ene abe ghěnggang arau mamea mẹ̌kantarị bọu dal᷊ungu naung. Pẹ̌těno si pemazmur, i sie naul᷊ị, ’Pẹ̌kantarịkong waugi [Yehuwa]!’ Pẹ̌kantarịe dingangu ral᷊uasẹ̌!​—Mzm. 96:1.