IẠ NALAHIRẸ̌ taung 1923 su Hemsworth, sěmbaụ soa su Inggris. Tuhangku arenge i Bob. Su tempong umurẹ̌ku sio taung, papạku nakaěbạ bukẹ̌ nělahẹ kerea agama palsu něngakal᷊ẹ̌ taumata. Papạ sěbạe mal᷊uasẹ̌ su apa niwasane. I sie mawěnsing těmbonangu agama kai munafik. Pira taung bọu ene, Bob Atkinson diměnta su wal᷊eng kami kụ němutarẹ̌ rekaman sěmbaụ nasẹ̌ i Saudara Rutherford. I kami nakasingkạ nasẹ̌ ene asal᷊e bọu kelompok někoạ bukẹ̌ seng niwasang i Papạ. Matimadẹ̌ku němaringang si Saudara Atkinson kumaěng dingangi kami sabang hěbi dingangu sumimbahẹ̌ lawọ kakiwal᷊ong kami soal u Alkitapẹ̌. I sie něgausẹ̌ si kami měngibadah su wal᷊eng sěngkatau saudara, kụ sahene marau bọu wal᷊eng kami. I kami něnětạ něngibadah kụ sěmbaụ sidang nakoạ su Hemsworth. Tawe nararěna hamba zona (orasẹ̌ ini nisěbạ pengawas wilayah) hanesẹ̌ mětikị su wal᷊eng kami kụ manga perintis bọu sidang wal᷊inẹ lai kụkaěng dingangi kami. I sire něgělị pengaruh mapaelẹ̌ si siạ.

Su tempo ene keluargang i kami piạ bisnis i kami hala. Katewe i Papạ naul᷊ị su tuhangku, ”Mạeng i kau mapulu makoạ perintis, i kitẹ měnutu bisnis ini.” I Bob setuju, kụ su tempong umure 21 i sie něngal᷊ing gunang makoạ perintis. Dua taung bọu ene, su tempong umurẹ̌ku 16, iạ lai nakoạ perintis. Su pěngěnsuengu sěngkamisa, iạ piạ hapịku měnginjilẹ̌, katewe su ěllo wiasa, kasauange kětạeng sẹ̌saku. Iạ něpakẹ fonograf dingangu kartu kesaksian, ene kai kartu kadodọ kụ lohone habarẹ̌ manibụ bọu Alkitapẹ̌. Sěngkatau něngěndung Alkitapẹ̌ dingangku, někoạ kemajuan. Samurine keluargane lai nakoạ Sahiding Yehuwa. Ene al᷊amatẹ̌ bọu Yehuwa. Taung tuhụe, iạ nakoạ perintis istimewa dingangi Mary Henshall. I kami nakaěbạ tugasẹ̌ su tampạ bědang tawe nihabareng su Cheshire.

Su kanandụu Perang Dunia II, manga wawine harusẹ̌ měhal᷊ẹ̌ gunang mẹ̌tul᷊ung perang ene. Ual᷊ingu pelayan agama tawe harusẹ̌ tumol᷊e perang,  i kami něpikirẹ̌ i kami lai kerene ual᷊ingu i kami perintis istimewa. Katewe pengadilan tawe setuju, kụ iạ nipenjara 31 su ěllone. Taung tuhụe tempong umurẹ̌ku 19, iạ duang sul᷊ẹ nakoạ sarang pengadilan ual᷊ingu hati nuraniku tawe nẹ̌mala si siạ mẹ̌tul᷊ung hal᷊ẹ̌ u perang. Katewe, su darua pengadilan ene iạ nipakawebasẹ̌. Su tempong tụtatěngo kěbị ene, iạ mangimang rohkẹ̌ masusi nẹ̌tul᷊ung kụ Yehuwa lai něnoghasẹ̌ si siạ.—Yes. 41:10, 13.

Iạ dingangi Arthur Matthews nẹ̌sombang taung1946. I Arthur nipenjara tělu wul᷊ang ual᷊ingu madiri tumol᷊e mẹ̌sekẹ. Su tempong nawebasẹ̌ bọu penjara, i sie něnginjilẹ̌ dingangu tuarine, Dennis, sěngkatau perintis istimewa su Hemsworth. Papạ i sire něněntiro Alkitapẹ̌ dongkeng i sire kadodọ, kụ i rẹ̌dua nisahani tempong bědang mangudạ. Su apang nakoạ perintis, Dennis nakaěbạ tugasẹ̌ su Irlandia. Hakị u ene i Arthur tawẹ apa hapịe. Matimadẹ̌ku mal᷊uasẹ̌ ual᷊ingu i Arthur kai perintis marading lai mapia. Hakị u ene i sire němaringang si sie nětanạ dingangi sire. Su tempong iạ napul᷊ẹ sarang wal᷊e, masueng kaěnge iạ dingangi Arthur biasane měnguhasẹ̌ lamạ sěngkasio. Bọu ene, i kami něnětạ nẹ̌sasuratẹ̌. Su taung 1948, Arthur saụ nipenjara karěngụe těl᷊u wul᷊ang. I kami nẹ̌kawing su wul᷊ang Januari 1949, kụ i kami mapulu turusẹ̌ su dinas sepenuh waktu. I kami mahematẹ̌ měpakẹ doitẹ̌, kụ su tempong liburẹ̌ i kami měhal᷊ẹ̌ měnipo bua. Ual᷊ingu al᷊amatẹ̌ bọu i Yehuwa, i kami botonge tatapẹ̌ měrintis.

Tawe nakaěbạ sěntaung bọu ene, i kami nakaěbạ tugasẹ̌ su Irlandia Utara, humotong su Armagh bọu ene su Newry, su darua soa ene lawọ tau Katolik. Prasangka agama su tampạ ene matoghasẹ̌, hakị u ene i kami maingatẹ̌ dingangu matahuěna su tempong měnginjilẹ̌. I kami měngẹ̌ngibadah su wal᷊eng anạu sěmbaụ karaune 16 kilometer bọu pẹ̌tatanakeng i kami. Ěndịu ual᷊ung katau diměnta něngibadah. Pẹ̌sěnsul᷊ẹ i kami mětẹ̌tikị sene. I kami nětikị su lante kụ diělone i kami něměda sěngkasio. Mal᷊uasẹ̌ nakasingkạ orasẹ̌ ini piạ lawọ Sahiding Yehuwa su tampạ ene.

Tuhangku dingangu kawinge, i Lottie, lai nakoạ perintis istimewa su Irlandia Utara, dingangu su taung 1952 i kami ěpạ nakoạ sarang kebaktian distrik su Belfast. Sěngkatau saudara něnarimạ si kami dingangi saudara Pryce Hughes su wal᷊ene. Pryce Hughes tempo ene kai hamba cabang su Inggris. Piạ sěhěbi i kami nẹ̌bawěke soal u bukẹ̌ buhu, God’s Way Is Love, ene nikoạ khusus gunang tau Irlandia. Saudara Hughes naul᷊ị masigěsạ měnginjilẹ̌ su tau Katolik su Republik Irlandia. Anạu sěmbaụ tẹ̌tokol᷊ang bọu tampạ pẹ̌tatanakengi sire, ku manga pastor měngẹ̌ngoro taumata pěndarihạ anạu sěmbaụ i kitẹ. Saudara Pryce naul᷊ị, ”I kami mědẹ̌deạ sěngkawingang apang piạ otone gunang tumol᷊e kampanye khusus měmahiạ bukẹ̌ ini su patikụ negeri.” *  (Pěmanda catatan kaki.) Su tempo ene i kami naul᷊ị, ”I kami mapulu!”

Sěmbaụ tampạ kẹ̌kahumpakengu perintis su Dublin ene kai wal᷊eng i ”Mamạ” Rutland, sěngkatau saudari masatia si Yehuwa. I kami lai nahumpạ sene, kụ i kami nẹ̌bal᷊ụ piram baụ barang i kami. Bọu ene i kami ěpạ něměli motore pia gandengan gunang i Bob, kụ i kami lai nědẹa oto. I kami nakaěbạ sěmbaụ oto těbe katewe bědang mapaelẹ̌, kụ i kami nakitul᷊ung su taghuangu oto gunang měngěntudẹ̌ oto ene ual᷊ingu i kami kěbị běga mẹ̌bawa. Sabang bawělo i Arthur kụkaiang su ral᷊okang kụ kere měngẹ̌ngal᷊ing porsneleng kere kakahěngang. Dịěllone mal᷊ukadẹ̌ su tempong i sie měnal᷊ukạ měněbang oto bọu garasi, sěngkatau utusan injil arenge i Mildred Willett (samurine nẹ̌kawing dingangi Saudara John Barr) nasongo. I sie masingkạ mẹ̌bawa oto! I sie něněntiro si kami, kụ i kami sadia rumal᷊eng.

Bọu ene, i kami harusẹ̌ mědeạ tampạ pẹ̌tatanakeng. Anạu sěmbaụ nẹ̌sěding si kami mẹ̌tanạ su karavan ual᷊ingu gampang tutungangu taumata mawěnsing si kami. Hakị u ene i kami nědeạ bal᷊e katewe tawe nakaěbạ. Su hěbi ene i kami ěpạ nẹ̌tikị su oto. Dịěllone i kami kětạeng nakaěbạ karavan kụ piạ darua dal᷊okang susun kadodọ. Ene nakoạ bal᷊eng i kami. Kụ, i kami lai botonge měmělọ karavan ene su ěntanang taumata mapia si kami. I kami něnginjilẹ̌ sarang tampa karaune 16 sarang 24 kilometer bọu karavan. Su apang něngal᷊ing sarang tampạ buhu, i kami saụ mẹ̌bal᷊ị měnginjilẹ̌ si sire apang mětẹ̌tanạ maraning tampạ bọu nipẹ̌tahong karavan ene.

I kami nẹ̌tiwo kěbị bal᷊e su bageang mahai bọu Republik Irlandia, kụ mahal᷊i něnahaghe hal᷊ẹ̌ i kami. I kami němahiạ nal᷊iu bọu 20.000 bukẹ̌, kụ něndoho areng i sire apang mapulu tiwong su kantor cabang Inggris. Mal᷊uasẹ̌ nakasingkạ orasẹ̌ ini seng piạ lawọ Sahiding Yehuwa su Irlandia!

Pira taung bọu ene, i kami saụ nakaěbạ tugasẹ̌ su London sěmběkang timuhẹ̌. Tawe nararěna, anạu sěmbaụ su kantor cabang Inggris něnelpon si Arthur kụ nẹ̌dorong si sie měnětạ diěllo makoạ pengawas wilayah! I kami nakaěbạ pelatihan pirang kamisa, kụ bọu ene i kami nakaěbạ tugasẹ̌ sarang Skotlandia, hakị u ene i Arthur tawẹ apa lawọ tempo měnadia nasẹ̌e. Katewe i sie mang mapulu měkoạ tugasẹ̌ nighělị si sie maning ene masigěsạ. Apa nikoạe nakatoghasẹ̌ si siạ. I kami sěbạe mal᷊uasẹ̌ su hal᷊ẹ̌ ini. I kami mal᷊uasẹ̌ sini, ual᷊ingu ene su tal᷊oarang lawọ anạu sěmbaụ.

Su tempong i Arthur nakaěbạ undangan tumol᷊e Sekolah Gilead 1962, i kami harusẹ̌ měkoạ putusang gěguwạ. Sikol᷊ah ene karěngụe mapul᷊o wul᷊ang, katewe iạ tawe wotonge tumol᷊e ual᷊ingu tawe nakaěbạ undangan. I kami němutusẹ̌ i Arthur harusẹ̌ měnarimạ undangan ene. Ual᷊ingu iạ tawẹ apa hapị perintis, kantor cabang saụ něgělị tugasẹ̌ si siạ nakoạ perintis istimewa su Hemsworth. Su tempong Arthur nẹ̌bal᷊ị su taung tuhụe, i sie nihengkẹ nakoạ pengawas distrik. Wilayang kami ene kai Skotlandia, Inggris bageang sawěnahẹ̌, dingangu Irlandia Utara.

Su taung 1964, Arthur nakoạ hamba cabang su Republik Irlandia. Humotong, iạ gụgěnggang sarang Betel ual᷊ingu seng mal᷊uasẹ̌ su pekerjaan keliling. Mạeng saụ mẹ̌tahěndung, iạ nẹ̌tarimakasẹ ual᷊ingu hak istimewa něhal᷊ẹ̌ su Betel. Ia mangimang, mạeng i kau měnarimạ tugasẹ̌ tawe tumanịu ikẹ̌kapuluangu, Yehuwa sarung měngal᷊amatẹ̌ si kau. Su Betel, iạ někoạ hal᷊ẹ̌ u kantorẹ̌, měmakẹ̌ bukẹ̌, měnasạ, dingangu měmurěsi. Pẹ̌sěnsul᷊ẹ, i kami lai nakaěbạ tugas distrik kụ botonge mẹ̌sombang anạu sěmbaụ su patikụ negeri ene. Ual᷊ingu tugasẹ̌ ene dingangu nakasilo apang něngěndung Alkitapẹ̌ dingangi kami někoạ kemajuan,  i kami limembong marani dingangu anạu sěmbaụ su Irlandia. Ini kai al᷊amatẹ̌ gěguwạ!

Kebaktian internasional humotong su Irlandia nikoạ su Dublin taung 1965. * (Pěmanda catatan kaki.) Maning piạ lawọ měnẹ̌nahaghe, kebaktian ene tatapẹ̌ nariadi. Piạ 3.948 diměnta, kụ 65 nisahani. Piạ 3.500 anạu sěmbaụ bọu luar negeri diměnta kụ nahumpạ su wal᷊eng taumata su Dublin. Kěbị taghuangu wal᷊e nakatarimạ suratẹ̌ tatarimakasẹ. Kụ taghuangu wal᷊e nẹ̌dalo kakanoạ mapia bọu anạu sěmbaụ. Ini kai pẹ̌bawal᷊ui mapaelẹ̌ su Irlandia.

Taung 1966, Irlandia bageang sawěnahẹ̌ dingangu timuhẹ̌ tẹ̌tahimataěngu cabang Dublin. Ini sěbạe nẹ̌tatěntang dingangu apa nariadi su pulo ene, ual᷊ingu taumata sene napahiạ ual᷊ingu politikẹ̌ dingangu agama. I kitẹ mal᷊uasẹ̌ ual᷊ingu lawọ tau Katolik nakoạ Sahiding Yehuwa, kụ sěngkapěhal᷊ẹ̌ dingangu anạu sěmbaụ i sire apang kangerẹ bọu Protestan.

Su taung 2011 pěbawiahi kami sěbạe nẹ̌bal᷊ui su tempong cabang Inggris dingangu Irlandia nakoạ sěmbaụ, kụ i kami nakaěbạ tugasẹ̌ su Betel London. Su tempo ene, iạ něnětạ gụgěnggang soal u kasasehati Arthur. I sie nakaěbạ sakị Parkinson. Nasusah naungku su tempong hapiku karěngụe 66 su taunge, nate su tanggalẹ̌ 20 Mei 2015.

Su pira taung ini, iạ sěbạe lụl᷊ahunsusah. Kangerẹ, i Arthur mang ene dingangku. Iạ mapulu mẹ̌sombang dingange! Katewe mạeng i kau nakahombang hal᷊ẹ̌ kerene, i kau sauneng kakạranine dingangi Yehuwa. Iạ mal᷊uasẹ̌ ual᷊ingu lawọ makěndagẹ̌ si Arthur. Iạ něnarimạ lawọ suratẹ̌ bọu anạu sěmbaụ su Irlandia, Inggris, dingangu lai bọu Amerika Serikat. Manga suratẹ̌ ini dingangu bawera makahiborẹ̌ bọu tuaringi Arthur, i Dennis, kawinge, i Mavis, dingangu anạ i rẹ̌dua, i Ruth dingangi Judy, sěbạe nakatul᷊ung si siạ.

Ayatẹ̌ sěbạe nakatoghasẹ̌ si siạ ene kai Yesaya 30:18. Sene niul᷊ị, ”[Yehuwa] e měngẹ̌ngampal᷊ẹ̌ tempone waugu měnodẹu kakěndag’E si kamene. I Sie sadia mědeạu kuměndagi kamene. Batụ u [Yehuwa] e kai Ruata kụ mẹ̌kẹ̌koạ apang suhinone. Kariangkamang apang mělẹ̌harapẹ̌ si Sie.” Iạ sěbạe nahiborẹ̌ nakasingkạ Yehuwa měngẹ̌ngampal᷊ẹ̌ tempone mapakailang kěbị kasasusah dingangu měgělị tugasẹ̌ buhu su dunia wuhu.

Mạeng mẹ̌tahěndung tempo seng nal᷊iu, iạ nakasilo kerea Yehuwa něngahạ dingangu něngal᷊amatẹ̌ hal᷊ẹ̌ měnginjilẹ̌ su Irlandia! Iạ mal᷊uasẹ̌ ual᷊ingu nakaal᷊ạ bageang gunang mẹ̌tul᷊ung hal᷊ẹ̌ ini. Iạ nakapěndang, měkoạ apa dẹ̌dorongang i Yehuwa mang makạděntang al᷊amatẹ̌.