SU SĚMBAỤ soa kadodọ su Gujarat, India, papạ i John nisahani nakoạ Sahiding Yehuwa su pěngěnsuengu taung 1950-an. Katewe i John, manga tuhang dingangu tuarine, lai i mamạe kai agama Katolik Roma kụ i sire sěbạe rohani. Ual᷊ingu ene, i sire mawěnsing su agamang i papạ i sire.

Piạ su sahěllo, papạ i John nakitul᷊ung si sie měngěntudẹ̌ amplopẹ̌ sarang sěngkatau saudara su sidang. Katewe mal᷊ukadẹ̌ ene, i John němuka drom gěguwạ kụ limane nal᷊esẹ. Maning kerene, i sie tatapẹ̌ timuhụ si papạe. Lesẹe nipikungu hekạ, kụ i sie natamai něngěntudẹ̌ amplopẹ̌ ene.

Su apang nahumpạ, John něgělị amplopẹ̌ ene su kawingu saudara ene. Kawingu saudara ene kai Sahiding Yehuwa. I sie nakasilo tal᷊imědong i John, kụ naul᷊ị i sie mẹ̌tul᷊ung měngundang. I sie něngal᷊ạ kotak P3K, němurěsi lesẹ ene, dingangu nipikungu perban. Bọu ene i sie něnggolang teh gunang i John. Su kanandụu tempo ene, i sie turusẹ̌ měbẹ̌bisara soal u Alkitapẹ̌.

Ual᷊ingu kapiang naungu saudari ene, pěndang i John su Sahiding Yehuwa nẹ̌bal᷊ui. Hakị u ene, i sie něgělị darua kakiwal᷊o soal u pangangimangu Sahiding Yehuwa kụ nẹ̌tatěntang dingangu Gahedang Katolik. I sie nakiwal᷊o, apa i Yesus ene Mawu dingangu apa tau Sahani harusẹ̌ mẹ̌doa si Maria. Ual᷊ingu seng něngěndung werang Gujarati, saudari ene něgělị sasimbahe su werang i John. I sie něnodẹ sasimbahe su Alkitapẹ̌ dingangu něgělị bukẹ̌ ”Kabar Kesukaan dari Kerajaan”.

Nasueng basane bukẹ̌ ene, i John nakasingkạ ene těntiro nihino. I sie nakoạ sarang imang kụ nẹ̌kiwal᷊o kakiwal᷊o mẹ̌sul᷊ung. Imang ene sěbạe nẹ̌pědu kụ němal᷊ọ Alkitapẹ̌ si John, kụ něhěkadẹ̌, ”I kau seng nakoạ Setang! Kěnang todẹ ayatẹ̌ sude naul᷊ị Yesus bal᷊inẹ Mawu. Todẹ lai ayatẹ̌ sude naul᷊ị i kitẹ tawe wotonge mẹ̌doa si Maria. Lighạ todẹ!” I John himěkosẹ̌ nakasilo apa nikoạ u imang ene. I sie naul᷊ị su imang ene i sie seng tawe makoạ sarang gahedang Katolik. Kụ i sie někoạ ene!

John něnětạ něngěndung Alkitapẹ̌, kụ i sie nakoạ Sahiding Yehuwa. Samurine pirang katau anggota keluargang i sire lai nakoạ Sahiding Yehuwa. Ěnungu pul᷊o su taunge bọu ene, ěnạu lesẹ su tal᷊imědone nakakoạ si sie nakatahěndung kapiang naung, kụ nakakoạ si sie mapulu makoạ ělangi Yehuwa su kanandụu wiahe.—2 Kor. 6:4, 6.