1, 2. (a) Apa hal᷊ẹ̌ sěbạe penting su pěbawiahi Yesus, kụ kawe nụe? (b) Apa harusẹ̌ koateng i kitẹ tadeạu berhasil makoạ ”hapị sěngkapěhal᷊ẹ̌ dingangu Mawu”?

YESUS KRISTUS humotong kai basẹ̌ u kalu, kụ bọu ene i sie nakoạ guru. (Markus 6:3; Yohanes 13:13) I sie někoạ darua hal᷊ẹ̌ ene sěbạe mapaelẹ̌. Su tempong nakoạ basẹ̌ u kalu, i sie něngěndung něpakẹ haghing alatẹ̌ gunang měkoạ haghing barang bọu kalu. Su tempong nakoạ guru, i sie něpakẹ kasingkạ bọu Binohẹ Susi gunang mẹ̌tul᷊ung taumata měngěndung katěngadẹ̌. (Matius 7:28; Lukas 24:32, 45) Su tempong umure 30 taung, i Yesus něngědo nakoạ basẹ̌ u kalu. I sie němile nakoạ guru ual᷊ingu masingkạ ene hal᷊ẹ̌ sěbạe penting koatenge. I sie naul᷊ị měhabarẹ̌ Kararatuangu Mawu kai sěmbaụ alasang Mawu něndolohẹ̌ si sie sarang dunia. (Matius 20:28; Lukas 3:23; 4:43) Hakị u ene, Yesus něpakẹ pěbawiahe gunang měmahiạ habarẹ̌ mapia, kụ i sie mapulu taumata wal᷊inẹ měkoạ hal᷊ẹ̌ mẹ̌sul᷊ung.​—Matius 9:35-38.

² Kal᷊awokange bọu i kitẹ bal᷊inẹ basẹ̌ u kalu, katewe i kitẹ kěbị měněntiro taumata wal᷊inẹ soal u habarẹ̌ mapia. Ini kai hal᷊ẹ̌ sěbạe penting ual᷊ingu Yehuwa lai měsẹ̌sumbala hal᷊ẹ̌ ene. Hakị u ene i kitẹ nisěbạ ”hapị sěngkapěhal᷊ẹ̌ dingangu  Mawu”. (1 Korintus 3:9; 2 Korintus 6:4) I kitẹ setuju dingangu bawerang pemazmur ini, ”Dasaru hengetang’U kai katěngadẹ̌.” (Mazmur 119:159, 160) Hengetang i Yehuwa kai katěngadẹ̌. Hakị u ene i kitẹ mapulu ”měpakẹ hengetang katěngadẹ̌ dingangu cara nẹ̌tatahino” su pelayanan. (Basa 2 Timotius 2:15.) Hakị u ene, i kitẹ mapulu limembong matahuěna měpakẹ Alkitapẹ̌, alatẹ̌ i kitẹ kahumotongange gunang měněntiro soal i Yehuwa, Yesus, dingangu Kararatuang. Organisasing Yehuwa něnadia lawọ alatẹ̌ bal᷊inẹ gunang mẹ̌tul᷊ung si kitẹ. Hakị u ene, i kitẹ harusẹ̌ masingkạ carane měpakẹ manga alatẹ̌ ene. Manga alatẹ̌ ene nisěbạ Alat Bantu Pengajaran.

3. Su pelayanan, apa timonang i kitẹ, kụ kerea Kisah 13:48 makatul᷊ung si kitẹ měkoạ ene?

³ Manga alatẹ̌ ini nisěbạ Alat Bantu Pengajaran, bal᷊inẹ Alat Bantu Pengabaran. Kawe nụe? ”Měhabarẹ̌” mangal᷊ene maul᷊ị sěmbaụ habarẹ̌, katewe ”měněntiro” mangal᷊ene mělahẹ habarẹ̌ ene tadeạu taumata makaěna kụ měkoạ apa seng niěndungange. Dunia ini seng mal᷊ighạ mawinasa. Hakị u ene, timonang i kitẹ ute měnětạ pěngangěndungang Alkitapẹ̌ dingangu měněntiro katěngadẹ̌ su taumata tadeạu i sire makoạ muriti Kristus. Ini mangal᷊ene i kitẹ harusẹ̌ masěmangatẹ̌ mědeạ taumata apang ”piạ kapulu nihino gunang makaěbạ pěbawiahẹ̌ kěkalẹ̌” dingangu mẹ̌tul᷊ung si sire měnětạ mẹ̌tahamawu si Yehuwa.​—Basa Kisah 13:44-48.

4. Kerea mědeạ taumata apang ”piạ kapulu nihino gunang makaěbạ pěbawiahẹ̌ kěkalẹ̌?

⁴ Gunang mědeạ taumata apang ”piạ kapulu nihino gunang makaěbạ pěbawiahẹ̌ kěkalẹ̌”, tau Sahani su abad humotong harusẹ̌ měnginjilẹ̌. Yesus naul᷊ị su manga murite, ”Su tempong sumuẹ̌ su haghing soa arau kampong, pědeạe taumata apang mapulu měnarimạ si kamene.” (Matius 10:11) I kitẹ lai harusẹ̌ měkoạ hal᷊ẹ̌ mẹ̌sul᷊ung. Pẹ̌sěnsul᷊ẹ i kitẹ měsẹ̌sombang taumata madiri dumaringihẹ̌, maobotẹ̌, arau tawẹ pandungange soal u Mawu. I kitẹ tawe měharapẹ̌ i sire měnarimạ habarẹ̌ mapia. Katewe, i kitẹ mědeạ taumata mapulu dumaringihẹ̌, masanạ naung, dingangu mapulu masingkạ katěngadẹ̌. Ene botonge isul᷊ung dingangu apa nikoạ i Yesus su tempong i sie bědang basẹ̌ u kalu. Gunang měkoạ haghing pěrabotẹ̌, tukadẹ̌, papasanengang, arau barang bal᷊inẹ, humotong i Yesus harusẹ̌ mědeạ kalu mapaelẹ̌. Bọu ene i sie něpakẹ haghing alatẹ̌ dingangu katatahuěnane gunang měkoạ manga barang ene. Kerene lai, i kitẹ harusẹ̌ mědeạ taumata mapulu dumaringihẹ̌, bọu ene i kitẹ botonge měpakẹ manga alatẹ̌ dingangu katatahuěna gunang mẹ̌tul᷊ung si sire makoạ muritẹ̌.​—Matius 28:19, 20.

5. Kawe nụe i kitẹ harusẹ̌ masingkạ cara měpakẹ manga alatẹ̌ su Alat Bantu Pengajaran? (Pěmanda gambarẹ̌ humotong su pěngangěndungang ini.)

⁵ Su tempong nakoạ basẹ̌ u kalu, Yesus něpakẹ haghing alatẹ̌. * (Pěmanda catatan kaki.) I sie masingkạ kěbị alatẹ̌ ene gunane nẹ̌tatěntang. Piạ alatẹ̌ gunang měngukurẹ̌, měniala, měmotọ, měmorẹ̌, dingangu měmakang. Piạ lai alatẹ̌ gunang měnikapẹ̌ kalu tadeạu botonge sěmpụkang dingangu kalu wal᷊inẹ.  Kěbị alatẹ̌ su Alat Bantu Pengajaran i kitẹ lai piạ gunane nẹ̌tatěntang. Hakị u ene, i kitẹ harusẹ̌ masingkạ cara měpakẹ manga alatẹ̌ penting ini.

6, 7. (a) Kerea i kau něpakẹ kartu kontak? (b) Apa timonang i kitẹ měgělị undangan?

⁶ Kartu kontak. Maning kadodọ, alatẹ̌ ini sěbạe mapaelẹ̌. Su kartu ini piạ informasi soal i kitẹ kụ makaahạ taumata sarang situs web jw.org. Su situs web i kitẹ, taumata sarung makasingkạ limembong mal᷊awọ soal i kitẹ dingangu botonge mẹ̌dorong měngěndung Alkitapẹ̌. Sarang orasẹ̌ ini, nal᷊iu bọu 400.000 taumata seng nẹ̌dorong měngěndung Alkitapẹ̌ su jw.org. Sabang ěllo, piạ hasụe taumata nẹ̌dorong měngěndung Alkitapẹ̌. I kau botonge sěntiniạ mẹ̌bawa kartu ini, kụ měgělị su taumata apang nipẹ̌sombangengu.

⁷ Undangan. Su undangan sarang pěngangibadang niul᷊ị, ”Anạu sěmbaụ gẹ̌gausang měngěndung Alkitapẹ̌ dingangu Sahiding Yehuwa.” Sene lai niul᷊ị taumata botonge měngěndung ”su pěngangibadang” arau ”dingangu sěngkatau měnaněntiro”. Hakị u ene, undangan ini naul᷊ị su taumata i sai i kitẹ dingangu něgausẹ̌ ’taumata apang sadarẹ̌ piạ kebutuhan rohani’ gunang měngěndung Alkitapẹ̌ dingangi kitẹ. (Matius 5:3) Katewe, maning bědang tawe něngěndung Alkitapẹ̌, taumata botonge duměnta su pěngangibadang i kitẹ. Sene i sire sarung makasilo apa sarung kaěndungang i sire bọu Alkitapẹ̌.

8. Kawe nụe penting taumata duměnta su pěngangibadang? Gělịko contoh.

⁸ Sěbạe penting měgausẹ̌ taumata duměnta su pěngangibadang. Kawe nụe? Ual᷊ingu su pěngangibadang, i sire makasilo Sahiding Yehuwa něněntiro katěngadẹ̌ bọu Alkitapẹ̌ dingangu nẹ̌tul᷊ung taumata makasingkạ soal u Mawu, sěmbal᷊ia agama palsu tala. (Yesaya 65:13) Contone, sěngkawingang su Amerika Serikat arenge Ray dingangi Linda nakasilo pẹ̌tatěntang ene pira taung tamai. I rẹ̌dua mangimang su Mawu kụ mapulu makasingkạ mal᷊awọ soal i Sie. Hakị u ene i rẹ̌dua němutusẹ̌ makoạ sarang kěbị gaheda su soang i sire, kụ mědeạ darua hal᷊ẹ̌, buhudeng měngal᷊ing sarang gaheda ene. Humotong, gaheda ene harusẹ̌ měněntiro barang piạ gunane. Karuane, pakeangu jěmaatẹ̌ su gaheda ene harusẹ̌ makal᷊ahẹ i sire kai ělangu Mawu. Ual᷊ingu piạ lawọ gaheda, taunge i rẹ̌dua někoạ ene. Katewe i rẹ̌dua nasusah naung. I rẹ̌dua tawe nakaěndung apa-apa, kụ pakeangu taumata su gaheda tawẹ sopange. Su apang bọu nẹ̌tiwo gaheda pěngěnsuenge su daftarẹ̌ i rẹ̌dua, i Linda nakoạ sarang tampạ pělahal᷊ẹ̌kang kụ i Ray napul᷊ẹ sarang bal᷊e. Su ral᷊eng, i Ray nakasilo Banalang Kararatuang. I sie mapulu masingkạ kerea ibadah su tampạ ene. I sie simuẹ̌ su Banalang Kararatuang kụ i sie naherang. Sene, taumatane mahimumu, mapia, dingangu mẹ̌papakeang maudupẹ̌. I Ray kimaiang su mukane, kụ i sie mal᷊uasẹ̌ su apa seng niěndungange! Pengalaman ini nẹ̌tatahino dingangu apa niul᷊ị i Paulus soal u taumata buhudeng diměnta su pěngangibadang. Tau ene naul᷊ị, ”Mawu kahěngang-hěngang ene su tal᷊oarang i kamene.” (1 Korintus 14:23-25) Něnětạ tempo ene, sabang Misa, i Ray dụděnta měngibadah. Bọu ene i sie lai diměnta su  tengah pekan. I Linda lai něnětạ timol᷊e něngibadah. Maning umuri rẹ̌dua nal᷊iu bọu 70 taung, i rẹ̌dua něngěndung Alkitapẹ̌, kụ nisahani.

9, 10. (a) Kawe nụe risalah gampang paketang? (b) Lahẹko kerea carane měpakẹ risalah Kai apa Kararatuang u Mawu?

⁹ Risalah. Si kitẹ piạ ual᷊u risalah, kụ ene gampang paketang gunang měnětạ mẹ̌bawěke. Risalah humotong nirilis taung 2013. Dongkeng tempo ene, seng piạ maraning lima miliarẹ̌ risalah nicetakẹ̌! Kěbị modelẹ̌u risalah ene mẹ̌sul᷊ung. Hakị u ene, mạeng i kau masingka cara měpakẹ sěmbaụ risalah, i kau masingkạ měpakẹ kěbị risalah ene! Kerea měpakẹ risalah gunang měnětạ mẹ̌bawěke?

¹⁰ Contone, i kau mapulu měpakẹ risalah Kai apa Kararatuang u Mawu? Todẹko kakiwal᷊o su halaman humotong, kụ pẹ̌kiwal᷊o, ”Apa i kau bọu nẹ̌tiněna kai apa Kararatuangu Mawu ene? Tumuhụ si kau, apa ene . . . ?” Pẹ̌dorongke i sie měmile sěmbaụ bọu tatělu sasimbahẹ̌ seng nisadia. I kau tawe harusẹ̌ maul᷊ị sasimbahe kahěngang arau nẹ̌sal᷊a. I kau botonge langsung měmuka bageang ”Apa Niul᷊ị u Binohẹ Susi”, kụ pẹ̌basa ayatẹ̌ sene, Daniel 2:44 dingangu Yesaya 9:6. Bọu ene, pěgělị kakiwal᷊o su bageang ”Gunang Tiněnang”: ”Kerea biahu taumata su tempong Kararatuang mẹ̌parenta?” Su tempong mẹ̌tiwo tuhụe, i kau botonge sumimbahẹ̌ kakiwal᷊o ene. I kau lai botonge měpakẹ pěngangěndungang 7 bọu brosur Habarẹ̌ Mapia bọu Mawu! Brosur ini kai sěmbaụ alatẹ̌ gunang měněntiro Alkitapẹ̌.

11. Topik kerea nilahẹ su majalang i kitẹ, kụ i kitẹ harusẹ̌ masingkạ apa soal u darua majalah ene?

¹¹ Majalah. Menara Pengawal dingangu Sadarlah! kai majalah kal᷊awokange nicetakẹ̌ dingangu niterjemah su patikụ dunia. Ual᷊ingu taumata bọu haghing bangsa měbẹ̌basa majalah ini, topik su manga majalah ini nipile pakapaelẹ̌ tadeạu taumata mapulu mẹ̌basa. I kitẹ harusẹ̌ měpakẹ majalah ini gunang mẹ̌tul᷊ung taumata mẹ̌tiněna hal᷊ẹ̌ limembong penting su pěbawiahẹ̌. Katewe, i kitẹ harusẹ̌ masingkạ gunang i sai darua majalah ini nikoạ.

12. (a) Sadarlah! nikoạ gunang i sai, kụ apa timonane? (b) Běkeko pengalaman nikaěbạu su tempong něpakẹ alatẹ̌ ini.

¹² Sadarlah! ini nikoạ gunang taumata apang běga arau kětạeng masingkạ mahal᷊i soal u Alkitapẹ̌. Aramanung i sire wěga těntiro gunang tau Sahani, tawe mangimang su agama, arau běga Alkitapẹ̌ piạ gunane su pěbawiahẹ̌ ěllo-ěllo. Timona kahumotongange bọu Sadarlah! ute mẹ̌tul᷊ung mẹ̌bawasa mangimang Mawu ene. (Roma 1:20; Ibrani 11:6) Majalah ini lai mẹ̌tul᷊ung mẹ̌bawasa mangimang Alkitapẹ̌ kai ”bawerang Mawu”. (1 Tesalonika 2:13) Tatělu terbitan Sadarlah! gunang 2018 tatěmbọe: ”Apa Kebahagiaan Sejati Itu?”, ”12 Kunci Kebahagiaan Keluarga”, dingangu ”Bantuan bagi Yang Berduka”.

13. (a) Menara Pengawal edisi umum nikoạ gunang i sai? (b) Běkeko pengalaman nikaěbạu su tempong něpakẹ alatẹ̌ ini.

¹³ Menara Pengawal edisi umum nikoạ gunang mělahẹ těntirong Alkitapẹ̌ su taumata apang měngẹ̌ngarěga Mawu dingangu Alkitapẹ̌. Aramanung i sire masingkạ  soal u Alkitapẹ̌, katewe tawe kahěngang-hěngang nakaěna těntirone. (Roma 10:2; 1 Timotius 2:3, 4) Tatělu terbitan Menara Pengawal 2018 simimbahẹ̌ tatělu kakiwal᷊o ini: ”Apakah Alkitab Masih Berguna?”, ”Bagaimana Masa Depan Kita?”, dingangu ”Apakah Allah Peduli kepada Anda?”

14. (a) Apa ěpạ video su Alat Bantu Pengajaran i kitẹ? (b) Běkeko pengalaman nikaěbạu su tempong něnodẹ video ini su taumata wal᷊inẹ.

¹⁴ Video. Su tempong i Yesus, su basẹ̌ u kalu kětạeng piạ alatẹ̌ měpẹ̌pakẹ lima. Katewe orasẹ̌ ini, basẹ̌ u kalu bal᷊inẹ kětạeng piạ alatẹ̌ kerene. Si sire lai piạ alatẹ̌ listrik gunang mělahaghari, měmorẹ̌, dingangu měnikapẹ̌. Orasẹ̌ ini, su tempong menginjilẹ̌, si kitẹ tawe kětạeng piạ publikasi seng nicetakẹ̌, katewe lai piạ video mapapaelẹ̌. Piạ ěpạ video su Alat Bantu Pengajaran: Kawe nụe Harusẹ̌ Měngěndung Binohẹ Susi?, Kerea měngěndung Binohẹ Susi?, Apa Kẹ̌koateng su Pěngangibadang i Kami?, dingangu I Sai Sahiding Yehuwa? Video manibụ, tawe nakaěbạ dua měnitẹ̌, botonge paketang su tempong měnginjilẹ̌. Video diọ manandụ botonge todẹkang su taumata piạ limembong mal᷊awọ tempo dingangu paketang su tempong saụ mẹ̌tiwo. Manga video ini botonge makakoạ taumata mapulu měngěndung Alkitapẹ̌ dingangu tumol᷊e měngibadah.

15. Apa hasile su tempong taumata mẹ̌biala video su werang i sire hala? Gělịko contoh.

¹⁵ Contone, sěngkatau saudari něnginjilẹ̌ su sěngkatau wawine buhudeng něngal᷊ing bọu Mikronesia. I sie limembong makaěna werang Yap. Saudari ene něnodẹ si sie video Kawe nụe Harusẹ̌ Měngěndung Binohẹ Susi? su werang Yap. Su tempong video ene něnětạ niputarẹ̌, wawine ene naul᷊ị, ”Ini werang i kami. Ini luar biasa! Bọu logate, iạ masingkạ tau ini asal᷊e bọu pulo mẹ̌sul᷊ung dingangku. I sie nẹ̌bisara su werang i kami!” Bọu ene, i sie mapulu mẹ̌basa dingangu mẹ̌biala kěbị apang piạ su jw.org kụ seng nasadia su werang i sire. (Pěmanda Kisah 2:8, 11.) Contoh wal᷊inẹ lai piạ sěngkatau saudari su Amerika Serikat, kụ anạ u tuhange mětẹ̌tanạ su wanua wal᷊inẹ. Saudari ene něndoho link video Kawe nụe Harusẹ̌ Měngěndung Binohẹ Susi? su anạ u tuhange su werang anạ ene. Su apang bọu nẹ̌biala video ene, anạ u tuhange něndoho e-mail, ”Iạ puluang bageang soal u kawasa ral᷊akị měngẹ̌ngatorẹ̌ dunia ini. Hakị u ene, iạ něloho formulir gunang měngěndung Alkitapẹ̌.” Sěmbal᷊ia i sie nětanạ su negeri nẹ̌sěding hal᷊ẹ̌ i kitẹ. I kitẹ tantu mal᷊uasẹ̌ nakaringihẹ̌ pengalaman ene!

16. Lahẹko timonang manga brosur ini: (a) Daringihẹ̌ko su Mawu Tadeạu Měbiahẹ̌ Sarang Karěngụe. (b) Habarẹ̌ Mapia bọu Mawu! (c) Siapa yang Melakukan Kehendak Yehuwa Dewasa Ini?

¹⁶ Brosur. Kerea měněntiro katěngadẹ̌ su taumata tawe makawasa mapaelẹ̌ arau si sire apang tawẹ apa bawasang su werang i sire hala? I kitẹ botonge měpakẹ brosur Daringihẹ̌ko su Mawu Tadeạu Měbiahẹ̌ Sarang Karěngụe. * (Pěmanda catatan kaki.) Sěmbaụ alatẹ̌ mapaelẹ̌ gunang měnětạ pěngangěndungang Alkitapẹ̌ ene kai brosur Habarẹ̌ Mapia bọu Mawu! I kau botonge měnodẹ  14 topik su bageang belakang bọu brosur ini, kụ pěngoro taumata pěmile topik sude mapulu ěndungange. Bọu ene, pěngěndungke topik ene dingange. Su tempong saụ nẹ̌tiwọ, apa i kau bọu něpakẹ brosur Siapa yang Melakukan Kehendak Yehuwa Dewasa Ini? Ini nikoạ gunang měněntiro taumata soal u organisasing i kitẹ. Cara měpakẹ brosur ini nilahẹ su Pěbawiahẹ̌ Sahani dingangu Pelayanan i Kitẹ—Bageang Pěngangěndungang Maret 2017.

17. (a) Apa timonang bukẹ̌ Alkitapẹ̌ Něněntiro Apa si Kitẹ? dingangu bukẹ̌ Cara agar Tetap Dikasihi Allah? (b) Maning měngangěndung Alkitapẹ̌ seng bọu nisahani, apa bědang harusẹ̌ koatenge, kụ kawe nụe?

¹⁷ Bukẹ̌. Aramanung i kau něpakẹ brosur gunang měněntiro Alkitapẹ̌. Katewe i kau botonge měngganti ene dingangu bukẹ̌ Alkitapẹ̌ Něněntiro Apa si Kitẹ? Alatẹ̌ ini makatul᷊ung taumata makaěndung limembong mal᷊awọ soal u těntiro dasaru Alkitapẹ̌. Mạeng měngangěndung někoạ kemajuan kụ seng nasueng ěndunge bukẹ̌ ini, i sie botonge měnurusẹ̌ pěngangěndungange měpakẹ bukẹ̌ Cara agar Tetap Dikasihi Allah. Alatẹ̌ ini měněntiro měngangěndung kerea měpakẹ prinsip Alkitapẹ̌ su pěbawiahe ěllo-ěllo. Pẹ̌tahěndung, maning i sie seng bọu nisahani, i sie bědang harusẹ̌ měnurusẹ̌ pěngangěndungange sarang darua bukẹ̌ ene masueng ěndunge. Ini makatoghasẹ̌ pangangimange si Yehuwa dingangu makatul᷊ung si sie tatapẹ̌ masatia.​—Basa Kolose 2:6, 7.

18. (a) Tumuhụ 1 Timotius 4:16, apa harusẹ̌ koateng i kitẹ, kụ apa hasile? (b) Apa timonang i kitẹ měpakẹ Alat Bantu Pengajaran?

¹⁸ I kitẹ, Sahiding Yehuwa, piạ tanggung jawab měněntiro taumata ”habaru katěngadẹ̌, ene kai habarẹ̌ mapia” makaahạ taumata sarang pěbawiahẹ̌ kěkalẹ̌. (Kolose 1:5; basa 1 Timotius 4:16.) Gunang mẹ̌tul᷊ung si kitẹ měkoạ ene, si kitẹ piạ Alat Bantu Pengajaran, sene piạ alatẹ̌ botonge paketang i kitẹ. (Pěmanda kotak ” Alat Bantu Pengajaran.”) Mahịe i kitẹ měpakẹ ene pakapia. I kitẹ botonge měmile měpakẹ alatẹ̌ sude, dingangu kange i kitẹ měpakẹ ene. Katewe pẹ̌tahěndung, timonang i kitẹ bal᷊inẹ kětạeng měgělị publikasi, kụ i kitẹ lai tawe měgělị su taumata madiri dumaringihẹ̌ habari kitẹ. Timonang i kitẹ ute mědeạ taumata mapulu dumaringihẹ̌, masanạ naung, dingangu mapulu masingkạ soal u Mawu. I sire ene kai taumata apang ”piạ kapulu nihino gunang makaěbạ pěbawiahẹ̌ kěkalẹ̌”.​—Kisah 13:48; Matius 28:19, 20.