IẠ NALAHIRẸ̌ su taung 1934. Su tempo ene, matimadẹ̌ku, i Fred dingangi Edna Molohan, seng nariadi Siswa-Siswa Alkitab (Sahiding Yehuwa) karěngụe 20 su taunge. Iạ makitarimakasẹ ual᷊ingu i sire něněntiro si siạ kuměndagẹ̌ si Yehuwa. I kami nětanạ su Parsons, su sěmběkang mahai bọu Kansas. Maraning kěbị anggota sidang i kami kai kaum terurap. Keluargang i kami marading duměnta měngibadah dingangu měnginjilẹ̌. Su Kaehẹ̌ bawělo, i kami měhabarẹ̌ su ral᷊eng, kụ orasẹ̌ ini nisěbạ měnginjilẹ̌ su tampạ piạ lawọ taumata. Pẹ̌sěnsul᷊ẹ i kami nal᷊owe, katewe i Papạ hanesẹ̌ měměli es krim gunang i kami.

Sidang i kami kadodọ, katewe tampạ měnginjilẹ̌ gěguwạ, piạ piram baụ soa dingangu lawọ peternakan. Pirang katau něgělị dukụ, těluhẹ̌ (langsung bọu sal᷊ehe), arau manụ gunang měnal᷊iu bawasang. Ual᷊ingu i Papạ seng něngganti ongkosu manga bawasang ene, hakị u ene manga gaghělị ene botonge kanengang i kami.

Su matimadẹ̌ku piạ fonograf gunang měnginjilẹ̌. Ual᷊ingu iạ bědang kadodọ iạ tawe makapakẹ ene. Katewe iạ mal᷊uasẹ̌ botonge mẹ̌tul᷊ung měmutarẹ̌ rekaman nasẹ̌ Saudara Rutherford su tempong saụ mẹ̌tiwo dingangu měněntiro měngangěndung Alkitapẹ̌.

I Papạ němasẹ̌ toa gěguwạ su wowong kapẹ̌ u otong kami, Ford taung 1936. Hakị u ene otong kami botonge paketang gunang měnginjilẹ̌. Biasane, humotong i kami měmutarẹ̌ musik tadeạu taumata mẹ̌tarukira. Bọu ene, i kami měmutarẹ̌ nasẹ̌ u Alkitapẹ̌ dingangu měgělị bawasang gunang taumata apang mapulu.

Su soa Cherryvale, Kansas, Papạku nẹ̌bawa oto sarang dal᷊ungu taman kota. Su ěllo Misa, lawọ taumata něnalang su tampạ ene. Bọu ene polisi diměnta kụ naul᷊ị si Papạ tawe wotonge mẹ̌bawa oto sarang dal᷊ungu taman. Hakị u ene i Papạ něngal᷊ing oto ene sarang ral᷊eng su liduku taman  ene tadeạu taumata su taman ene bědang botonge makaringihẹ̌ mapia. Iạ sěbạe mal᷊uasẹ̌ měnginjilẹ̌ kere ini dingangi Papạ lai tuhangku, i Jerry.

Su tempo ene, i kami někoạ lawọ kampanye khusus su tampạ hal᷊ẹ̌ i kitẹ nisěding. Kere seng nisěbạku humotong, i kami nẹ̌bangung hěbi ral᷊ung kụ nẹ̌taho bawasang su al᷊ungu tukadu manga wal᷊e kụ tawẹ apa nakasilo. Bọu ene, i kami mẹ̌sěmạ su likudu soa gunang makasingkạ apa piạ bọu i kami nisamẹ u polisi.

Cara měnginjilẹ̌ wal᷊inẹ kụ makal᷊uasẹ̌ ene kai ”barisan informasi”. I kami něpakẹ plakat gěguwạ kụ dimal᷊eng měbẹ̌barisẹ̌ mělẹ̌likụ soa. Iạ bědang nakatahěndung anạu sěmbaụ dimal᷊eng nělikụ soang kami kụ něpakẹ plakat kạbawohẹ ”Agama Kai Sedẹ dingangu Konti”. I sire něnětạ bọu wal᷊eng kami, dimal᷊eng karaune sěhiwu lima hasụ su metere limiu soa, bọu ene saụ nẹ̌bal᷊ị sarang wal᷊eng kami. I kami mal᷊uasẹ̌ ual᷊ingu tawẹ apa nẹ̌sěding si sire, kụ piạ lawọ mapulu masingkạ.

Keluargang i kami masau makoạ sarang Texas gunang kebaktian dingangu mẹ̌tiwo keluarga. I kami botonge sumake kereta api kụ tawe harusẹ̌ měmaehẹ̌ ual᷊ingu i Papạ mělẹ̌hal᷊ẹ̌ su perusahaan kereta api. Tuhang i mamạku, Fred Wismar, dingangu kawinge, Eulalie, mětẹ̌tanạ su Temple, Texas. I sie něngěndung katěngadẹ̌ dingangu nisahani su tětạu taung 1900 su tempong i sie bědang mangudạ. I sie nẹ̌běke soal u katěngadẹ̌ si mamạku dingangu su anạu sěngkatau wal᷊inẹ. Anạu sěmbaụ su Texas bageang tal᷊oara masingkạ si sie ual᷊ingu i sie bọu nakoạ hamba zona (orasẹ̌ ini nisěbạ pengawas wilayah). I sie mapia naung, měngkate mal᷊uasẹ̌, masěmangatẹ̌, dingangu nakoạ tatěnong si siạ.

Su taung 1941, i kami simake kereta api sarang St. Louis, Missouri, gunang tumol᷊e kebaktian gěguwạ. Kěbị mangangudạ nirorongang kumaiang su rěduhu panggung gunang dumaringihẹ̌ nasẹ̌ i Saudara Rutherford tatěmbọe, ”Manga Anạ u Datu”. Su pěngěnsuengu nasẹ̌, kěbị mangangudạ kal᷊awọe 15.000 nakaěbạ hadiah istimewa. Saudara Rutherford dingangu manga asisten němahiạ bukẹ̌ buhu Children.

Su wul᷊ang April 1943, i kami timol᷊e Kebaktian ”Seruan untuk Bertindak” su Coffeyville, Kansas. Su kebaktian ini nilahẹ sarung piạ acara wuhu su manga sidang, ene kai Sekolah Pelayanan Teokratis. I kami lai něnarimạ bukẹ̌ lohone 52 pěngangěndungang gunang paketang su sikol᷊ah ene. Tawe nararěna bọu ene, iạ nakaěbạ nasẹ̌ humotong su sikol᷊ah ene. Kebaktian ini sěbạe istimewa si siạ ual᷊ingu iạ nisahani. Iạ dingangu pirang katau wal᷊inẹ nisahani su kolam sěbạe matěho maraning peternakan sene.

Iạ nalulusẹ̌ bọu SMA taung 1951 kụ harusẹ̌ měmutusẹ̌ apa sarung koatengku. Tuhangku, i Jerry bọu něhal᷊ẹ̌ su Betel, iạ lai sěbạe mapulu měhal᷊ẹ̌ su Betel, hakị u ene iạ něndaftarẹ̌. Tawe nararěna bọu ene, iạ nikui sarang Betel su tanggalẹ̌ 10 Maret 1952. Ini kai putusang nihino ual᷊ingu iạ botonge měhal᷊ẹ̌ limembong mal᷊awọ gunang Mawu.

Iạ mapulu měhal᷊ẹ̌ su percetakan, katewe iạ nakaěbạ tugasẹ̌ měngatorě kaěng su měda kụ samurine nakaěbạ tugasẹ̌ měnasạ. Iạ mal᷊uasẹ̌ někoạ ene kụ něngěndung mal᷊awọ. I kami měhal᷊ẹ̌ mẹ̌gaghanti, hakị u ene su ěllo rangẹ iạ piạ tempo kụ masau sarang perpustakaan Betel gunang měngěndung hala. Ini nakatoghasẹ̌ pangangimang dingangu pẹ̌dal᷊ahapịku dingangi Yehuwa, kụ iạ lai sěbạe mapulu turusẹ̌ měhal᷊ẹ̌ su Betel. I Jerry něngědo něhal᷊ẹ̌ su Betel taung 1949 kụ nẹ̌kawing dingangi Patricia. Katewe, i sire nětanạ maraning Betel su Brooklyn, kụ i sire nẹ̌tul᷊ung dingangu něnoghasẹ̌ si siạ su tempong iạ bědang buhu su Betel.

Tawe nararěna su tempong iạ seng něhal᷊ẹ̌ su Betel, organisasi něnětạ nědeạ anggota Betel gunang makoạ měnanasẹ̌ wakil Betel. Tugasi sire mẹ̌tiwo manga sidang karaune 320 kilometer bọu Brooklyn. I sire mẹ̌bawa nasẹ̌ lai měnginjilẹ̌  dingangu manga sidang sene. Iạ nakaěbạ tugasẹ̌ ini. Iạ hanesẹ̌ makapěndang gugup su tempong měkoạ manga tugasẹ̌ ene. Kangerẹ, nandụ u nasẹ̌ sěngkaorasẹ̌. Biasane iạ sumake kereta api gunang makoạ sarang manga sidang. Su sěngkatempo, su Misa ěllo rangẹ su musim dingin taung 1954, nariadi anging maihạ dingangu salju. Masinang kereta ene nate. Sěběnarẹ̌e iạ mahumpạ su New York su Misa bawělo. Katewe iạ hědo nahumpạ su New York su Mandakẹ̌ pukul᷊ẹ̌ 5 kalonge. Bọu ene iạ simake kereta bawa tanah sarang Brooklyn kụ apidu něhal᷊ẹ̌ su rapuhang. Iạ nalatẹ̌ simuẹ̌ něhal᷊ẹ̌ ual᷊ingu tawe nẹ̌tikị su kanandụu hěbi. Katewe karal᷊uasẹ̌ nikaěbạku ual᷊ingu nẹ̌tangkiang anạu sěmbaụ limembong mal᷊awọ sul᷊ungu pengorbanan nikoạku.

Su kanandụu taung humotong su Betel, iạ lai něnětạ timol᷊e acara pěngangěndungang Alkitapẹ̌ sabang misa su siaran radiong i kitẹ, WBBR. Manga studione su lante karuane su gedung 124 Columbia Heights. Saudara Alexander H. Macmillan, kụ seng marěngụ něhal᷊ẹ̌ su Betel masau mẹ̌bawa acara ini. I kami mẹ̌kui si sie Saudara Mac. I sie kai tatěnoěng gunang i kami, manga Saudara mangudạ su Betel. I sie tatapẹ̌ satia maning timatěngo lawọ kasasigěsạ.

Su taung 1958, iạ nakaěbạ tugasẹ̌ buhu gunang mẹ̌tul᷊ung manga lulusan Sekolah Gilead. Iạ nẹ̌tul᷊ung si sire tadeạu makaěbạ visa, dingangu něngatorẹ̌ transportasi gunang i sire. Tempo ene, arěgang tiketu pesawatẹ̌ sěbạe mal᷊ěghadẹ̌, hakị u ene i sire apang sarang Afrika dingangu sarang Asia, biasane sumake kapal᷊u barang. Su apang arěgang tiketu pesawatẹ̌ limembong mamura, manga misionaris seng simake pesawatẹ̌ sarang tampạ tugasi sire.

Iạ něngurusẹ̌ manga tiketu pesawatẹ̌ bọu Amerika Serikat sarang Eropa gunang manga kebaktian internasional taung 1961. Iạ lai timol᷊e kebaktian su Hamburg, Jerman. Nasueng kebaktian, iạ dingangu tělung katau saudara wal᷊inẹ bọu Betel něnewa oto, kụ bọu Jerman i kami nakoạ sarang Italia. I kami nẹ̌tiwo Kantor Cabang su Roma, bọu ene i kami sarang Prancis, limiu manga Wukidu Pyrenees, kụ nahumpạ su Spanyol. Su Spanyol hal᷊ẹ̌ i kitẹ nisěding. I kami botonge měgělị su anạu sěmbaụ su Barcelona piram baụ bawasang, kụ ene seng nipikung i kami tadeạu kakělaěng kere hadiah. I kami mal᷊uasẹ̌ botonge mẹ̌sombang dingangi sire! Bọu Barcelona, i kami nakoạ sarang Amsterdam, bọu ene nẹ̌bal᷊ị sarang New York.

Su taung 1962, iạ nakaěbạ tugasẹ̌ gunang měngatorẹ̌ perjalanan 583 anạu sěmbaụ apang tumol᷊e piram baụ kebaktian internasional su patikụ dunia. Ini kai Kebaktian ”Kabar Kesukaan yang Kekal” taung 1963. I sire sarung tumol᷊e kebaktian su Eropa, Asia, Pasifik Selatan bọu ene sarang Honolulu, Hawaii, kụ samurine su Pasadena, Kalifornia. I sire lai sarung tumol᷊e tur istimewa sarang manga tampạ niwohẹ su Alkitapẹ̌ su Lebanon dingangu Yordania. Departemen i kami  něngurusẹ̌ tiketu pesawatẹ̌, visa, dingangu penginapan i sire.

Piạ alasang wal᷊inẹ lai kawe nụe taung 1963 sěbạe penting si siạ. Su tanggalẹ̌ 29 Juni iạ nẹ̌kawing dingangi Lila Rogers bọu Missouri, i sie seng tělu taung něhal᷊ẹ̌ su Betel. Sěngkamisa bọu ene, i kami timol᷊e piram baụ kebaktian internasional dingangu nakoạ sarang Yunani, Mesir, Lebanon, dingangu Yordania. Katewe, hal᷊ẹ̌ i kitẹ nisěding su tampạ ene, kụ pěměrenta madiri měgělị visa gunang Sahiding Yehuwa. Hakị u ene i kami běga apa sarung mariadi su tempong mahumpạ su tampạ ene. I kami sěbạe mal᷊uasẹ̌ dingangu himěkosẹ̌ su tempong nakasilo anạu sěmbaụ dimarisị su těrminalẹ̌ bandara kadodọ ene apidụ měnẹ̌něngal᷊ẹ̌ spanduk gěguwạ kạbawohẹ ”Sal᷊amatẹ̌ Nẹ̌sombang Sahiding Yehuwa”. I kami mal᷊uasẹ̌ botonge duměnta su manga tampạ nisěbạ su Alkitapẹ̌, kụ němanda manga tampạ nipẹ̌tanakeng i Abraham, Ishak, Yakub, tampạ i Yesus dingangu manga rasulẹ̌ něnginjilẹ̌, dingangu tampạ tau Sahani něnětạ kakạtambane sarang ”pondol᷊u dunia”.​—Kisah 13:47.

Karěngụe 55 su taunge, i Lila nakoạ hapị masatia su kěbị tugasẹ̌ nikoạ kami. I kami lai pirang sul᷊ẹ nakoạ sarang Spanyol dingangu Portugal su tempong hal᷊ẹ̌ i kitẹ nisěding su tampạ ene. I kami něnoghasẹ̌ anạu sěmbaụ sene, kụ nẹ̌bawa bawasang gunang i sire dingangu manga barang bal᷊inẹ. Kami lai nẹ̌tiwo anạu sěmbaụ apang nipenjara su Cádiz, Spanyol. Iạ sěbạe mal᷊uasẹ̌ botonge mẹ̌bawa nasẹ̌ makatoghasẹ̌ si sire.

Dongkeng taung 1963, iạ masau měngatorẹ̌ perjalanan gunang kebaktian internasional su Afrika, Amerika Tengah dingangu Selatan, Australia, Eropa, Hawaii, Puerto Riko, Selandia Baru, dingangu Timur Jauh. Iạ dingangi Lila timol᷊e lawọ kebaktian tawe kawul᷊enang, kere su Warsawa, Polandia, su taung 1989. Lawọ anạu sěmbaụ bọu Rusia botonge makarěnta su kebaktian gěguwạ ene. Si sire, ene kai kebaktian humotong! I kami nẹ̌sombang dingangu anạu sěmbaụ apang taunge nipenjara su Uni Soviet ual᷊ingu pangangimang i sire.

Tugasẹ̌ wal᷊inẹ ikẹ̌kapuluangku ene kai mẹ̌tiwo dingangu měnoghasẹ̌ keluarga Betel dingangu manga utusan injil su patikụ dunia. Su pěngěnsuengu tugasi kami, i kami nakoạ sarang Korea Selatan kụ nẹ̌sombang dingangu 50 anạu sěmbaụ apang nipenjara su Suwon. I sire kěbị tatapẹ̌ mal᷊uasẹ̌ dingangu mělẹ̌hědo tempone bebasẹ̌ mẹ̌tahamawu si Yehuwa. I kami sěbạe natoghasẹ̌ ual᷊ingu nẹ̌sombang dingangi sire!​—Roma 1:11, 12.

Su kanandụu wiahẹ̌ku, iạ seng němanda i Yehuwa něngal᷊amatẹ̌ manga ělang’E. Su tempong iạ nisahani su taung 1943, penyiar ěndịu kětạeng 100.000. Orasẹ̌ ini, piạ nal᷊iu bọu 8.000.000 taumata nẹ̌tahamawu si Yehuwa su 240 negeri. Ini  nariadi ual᷊ingu hal᷊ẹ̌ masěghadẹ̌ bọu anạu sěmbaụ lulusan Gilead. Iạ mal᷊uasẹ̌ ual᷊ingu seng nẹ̌tul᷊ung anạu sěmbaụ utusan injil nakoạ sarang tampạ tugasi sire.

Iạ tawe nẹ̌sasěsilẹ̌ su tempong bědang mangudạ někoạ putusang nẹ̌tahamawu si Yehuwa dingangu něhal᷊ẹ̌ su Betel. Yehuwa něgělị lawọ al᷊amatẹ̌ si siạ. I kami sěbạe mal᷊uasẹ̌ něhal᷊ẹ̌ su Betel. Iạ dingangi Lila lai sěbạe mal᷊uasẹ̌ botonge nakoạ bageang bọu piram baụ sidang su Brooklyn karěngụe nal᷊iu bọu 50 su taunge, kụ nakaěbạ lawọ hapị tutune.

Iạ botonge turusẹ̌ měhal᷊ẹ̌ su Betel ual᷊ingu sabang ěllo kawingku, i Lila, mětẹ̌tul᷊ung si siạ. Maning umurẹ̌ku seng nal᷊iu bọu 84 su taunge, iạ bědang botonge měkoạ hal᷊ẹ̌ piạ gunane dingangu mẹ̌tul᷊ung měngurusẹ̌ manga suratẹ̌ su Kantor Cabang.

Iạ sěbạe mal᷊uasẹ̌ ual᷊ingu botonge nakoạ bageang bọu organisasi kapaelange, dingangu nakasilo bawera su Maleakhi 3:18 kahěngang-hěngang nariadi, ”I kamene sarung saụ makasilo pẹ̌tatěntange taumata matul᷊idẹ̌ dingangu taumata ral᷊akị, taumata měkẹ̌koạ kapulung Mawu dingangu tawe měkẹ̌koạ kapulu-Ne.” Sabang ěllo duniang Setang sauneng kakạdal᷊akịe, taumata tawẹ apa pělaharapẹ̌ dingangu tawe kahěngang-hěngang mal᷊uasẹ̌. Katewe, taumata apang kuměndagẹ̌ dingangu mẹ̌tahamawu si Yehuwa piạ pělaharapẹ̌ dingangu hanesẹ̌ mal᷊uasẹ̌ maning timatěngo kasasigěsạ. Mẹ̌bawa habarẹ̌ mapia su taumata wal᷊inẹ, ene kai hak istimewa! (Matius 24:14) Seng mal᷊ighạ Kararatuangu Mawu sarung měmal᷊ui dunia makoạ firdaus. I kitẹ sěbạe měharapẹ̌ ěllo ene marěnta! Su tempo ene, kěbị taumata su dunia sarung masehatẹ̌, mal᷊uasẹ̌, kụ botonge měbiahẹ̌ sarang karěngụe.