1-3. Kawe nụe tugasu pelayan sepenuh waktu aramanung harusẹ̌ mẹ̌bal᷊ui?

”SU APANG i kami seng 21 su taunge nakoạ utusan injil, matimadi kandua kěbị seng mal᷊ongkọ,” ěngkuěng i Robert dingangi Mary Jo. ”I kami mal᷊uasẹ̌ nẹ̌tangkiang si sire. Katewe, i kami tatapẹ̌ nasusah naung něněntang tampạ tugasẹ̌ ikẹ̌kapuluang i kami.”

² ”Su tempong nakasingkạ i kami seng tawe makapẹ̌bal᷊ị sarang tampạ tugasẹ̌, ual᷊ingu nasakị, i kami simangị,” ěngkuěng i William dingangi Terrie. ”I kami mapulu mẹ̌tahamawu si Yehuwa su negeri wal᷊inẹ, katewe i kami seng tawe makakoạ ene.”

³ ”I kami seng masingkạ pěměrenta mapulu měnutu kantor cabang tampạ i kami mělẹ̌hal᷊ẹ̌,” ěngkuěng i Aleksey. ”Katewe, su tempong i sire něnutu Betel kụ i kami harusẹ̌ suměbang, i kami tatapẹ̌ himěkosẹ̌.”

4. Kakiwal᷊o apa sarung ěndungang i kitẹ su pěngangěndungang ini?

⁴ Kere manga pengalaman ene, piạ lawọ pelayan sepenuh waktu dingangi sire apang mělẹ̌hal᷊ẹ̌ su Betel nakaěbạ tugasẹ̌ buhu. * Su kěbị anạu sěmbaụ ini, tawe gampang měněntang tugasẹ̌ ikẹ̌kapuluang i sire. Apa makatul᷊ung si sire tumatěngo pẹ̌bawal᷊ui? Kerea i kite mẹ̌tul᷊ung si sire? Sasimbahu manga kakiwal᷊o ini botonge makatul᷊ung si kitẹ tumatěngo pẹ̌bawal᷊ui su pěbawiahẹ̌.

5. Su tempong tugasẹ̌ nẹ̌bal᷊ui, aramanung apa pěngarune si kitẹ?

⁵ Tawẹ soale melayani su Betel arau su lapangan, i kitẹ sarung  kuměndagẹ̌ taumatane dingangu puluang ene sene. Mạeng harusẹ̌ měněntang tampạ ene, i kitẹ masusah naung. I kitẹ rindu su anạu sěmbaụ sene, dingangu gụgěnggang soal i sire, něngělembo mạeng i kitẹ něněntang si sire ual᷊ingu dẹ̌darihang. (Mat. 10:23; 2 Kor. 11:28, 29) Bọu ene lai, aramanung tawe gampang měngal᷊ing sarang tampạ buhu ual᷊ingu i kitẹ harusẹ̌ měngěndung budaya wuhu. I kitẹ lai botonge makapěndang kerene maning mapul᷊ẹ sarang banuang i kitẹ. ”I kami seng tawe nawiasa dingangu budayang i kami, sarang lai měnginjilẹ̌ měpakẹ bawerang i kami hala,” ěngkuěng i Robert dingangi Mary Jo. ”I kami nakoạ taumata raghị su wanuang i kami hala.” Pirang katau apang tugase nẹ̌bal᷊ui aramanung sěngkělěndịu timatěngo masalah ekonomi. I sire aramanung gụgěnggang dingangu nakadodọ naung. Apa sarung makatul᷊ung si sire?

6. Kerea i kitẹ botonge tatapẹ̌ marani dingangi Yehuwa?

⁶ Tatapẹ̌ pakarani dingangi Yehuwa. (Yak. 4:8) Kerea carane? Mangimang i Sie kai ”Dumararingihẹ̌ daroa”. (Mz. 65:2) Mazmur 62:8 naul᷊ị, ”Pẹ̌běkẹe lohongu naungu si Sie.” Yehuwa botonge měkoạ ”limembong mal᷊awọ bọu kěbị apa dẹ̌dorongang arau tẹ̌tiněnang i kitẹ”. (Ef. 3:20) Yehuwa tawe kětạeng měgělị apa dẹ̌dorongang i kitẹ. I Sie botonge měkoạ hal᷊ẹ̌ tawe nikatiněnang i kitẹ gunang mapakailang masalang i kitẹ.

7. (a) Apa sarung makatul᷊ung si kitẹ tatapẹ̌ marani dingangi Yehuwa? (b) Tumuhụ Ibrani 6:10-12, apa hasile mạeng i kitẹ turusẹ̌ mẹ̌tahamawu si Yehuwa?

⁷ Tadeạu tatapẹ̌ marani dingangi Yehuwa, pẹ̌basạe dingangu pẹ̌tiněnạe Alkitapẹ̌ ěllo-ěllo. Sěngkatau mantan utusan injil naul᷊ị, ”Tatapẹ̌ koạ ibadah keluarga dingangu persiapan pěngangibadang, kere kẹ̌koatengu su tugasẹ̌ kal᷊imona.” Bọu ene, turusẹ̌ pẹ̌koạ apa wotonge ikakoạ i kamene gunang měnginjilẹ̌ su sidang buhu. Yehuwa mẹ̌tahěndung taumata apang masatia mẹ̌tahamawu si Sie, maning i sire seng tawe makakoạ kěbị hal᷊ẹ̌ kẹ̌koateng i sire kal᷊imona.​—Basa Ibrani 6:10-12.

8. Kerea bawera su 1 Yohanes 2:15-17 makatul᷊ung si kitẹ měndiagạ pěbawiahẹ̌ tatapẹ̌ sederhana?

⁸ Diagạ pěbawiahẹ̌ tatapẹ̌ sederhana. Su duniang Setang, lawọ taumata  gụgěnggang soal u hal᷊ẹ̌ materi. Katewe, abe wala kaghaghěnggang ene makakoạ si kitẹ měngědo mẹ̌tahamawu si Yehuwa. (Mat. 13:22) Abe raringihẹ̌ su taumata bal᷊inẹ ělang i Yehuwa, hapị, arau keluarga apang mapulu mẹ̌tul᷊ung, kụ maul᷊ị i kitẹ harusẹ̌ mědeạ doitẹ̌ mal᷊awọ tadeạu pěbawiahi kitẹ limembong mapia. (Basa 1 Yohanes 2:15-17.) Pangimangke si Yehuwa. I Sie nẹ̌diandi sarung měnadia kebutuhan rohani, emosi, dingangu materi ”su tempo nẹ̌tatahino”.​—Ibr. 4:16; 13:5, 6.

9. Tumuhụ Amsal 22:3, 7, kawe nụe penting tawe měngutang mạeng tawe perlu, kụ apa makatul᷊ung si kitẹ měkoạ putusang nihino?

⁹ Abe měngutang mạeng tawe perlu. (Basa Amsal 22:3, 7.) Su tempong harusẹ̌ měngal᷊ing, biayane gěguwạ. Ene gampang makakoạ si kitẹ měngutang. Ual᷊ingu ene, abe měngědang doitẹ̌ gunang měměli barang tawe tumanịu perlu. Su tempong stres, contone su tempong mẹ̌tangkiang keluarga masakị, i kitẹ masigěsạ měmutusẹ̌ pira kal᷊awọe doitẹ̌ ědangeng. Su tempo kerene, pẹ̌tahěndung, ”daroa” botonge makatul᷊ung si kitẹ měkoạ putusang nihino. Gunang sumimbahẹ̌ daroang i kitẹ, Yehuwa sarung měgělị karal᷊ungsemahẹ̌. Ene sarung ’měndiagạ naung dingangu tiněnang i kitẹ’, kụ lai mẹ̌tul᷊ung si kitẹ tatapẹ̌ těnang tadeạu botonge měkoạ putusang nihino.​—Flp. 4:6, 7; 1 Ptr. 5:7.

10. Kerea tadeạu i kitẹ piạ hapị buhu?

¹⁰ Tatapẹ̌ pakarani dingangu hapị apang piạ pěngarune mapaelẹ̌ si kitẹ. Pẹ̌běke su hapị kerene soal u pěndang dingangu kasasigěsạ nikahombangeng i kitẹ. Mạeng měkoạ ene, i kitẹ sarung limembong tenang. (Pkh. 4:9, 10) Manga hapị su tugasẹ̌ kal᷊imona sarung tatapẹ̌ makoạ hapị i kitẹ. Su tugasẹ̌ buhu, i kitẹ harusẹ̌ mědeạ hapị. Pẹ̌tahěndung, mạeng mapulu piạ hapị, i kitẹ lai harusẹ̌ makoạ hapị. Kerea tadeạu i kitẹ piạ hapị buhu? Pahiạ pengalaman mapaelẹ̌ seng nighělị i Yehuwa si kitẹ tadeạu i sire botonge makasilo karal᷊uasi kitẹ. Maning piạ taumata su sidang tawe tumanịu nakaěna karal᷊uasi kitẹ su dinas sepenuh waktu, tantu piạ u mapulu makasingkạ mal᷊awọ dingangu mapulu makoạ hapị i kitẹ. Katewe pẹ̌tahěndung, abe mẹ̌bisara tumanịu mal᷊awọ soal u watangeng i kitẹ, arau manga hal᷊ẹ̌ seng nikoạ i kitẹ, arau tědụu naung nikapěndangeng i kitẹ.

11. Kerea měndiagạ pẹ̌kakawing tatapẹ̌ mal᷊uasẹ̌?

¹¹ Mạeng i kitẹ harusẹ̌ měněntang tugasẹ̌ ual᷊ingu kawing nasakị, abe mapẹ̌sal᷊ang i sie. Arau, mạeng i kitẹ nasakị, abe mẹ̌pěndang nẹ̌sal᷊a dingangu mẹ̌tiněna i kitẹ seng nakasusah naungu kawing i kitẹ. Pẹ̌tahěndung, i kitẹ seng ”nakoạ sěmbaụ” dingangu seng nẹ̌diandi su těngong Yehuwa  gunang měngurusẹ̌ sěmbaụ su wal᷊inẹ su kěbị situasi. (Mat. 19:5, 6) Aramanung i kitẹ harusẹ̌ měněntang tugasẹ̌ ual᷊ingu nakaěbạ anạ, maning tawe někoạ rencana kal᷊imona. Mạeng kerene, koạko anạ i kitẹ masingkạ i sie limembong penting sul᷊ungu tugasi kitẹ. Koạko i sie mangimang i sie kai ”hadiah” bọu Mawu si kitẹ. (Mz. 127:3-5) Pẹ̌běke si sie pengalaman mapaelẹ̌ seng nikapěndangeng i kitẹ su tugasẹ̌. Měkoạ manga hal᷊ẹ̌ ene sarung makatul᷊ung anạ i kitẹ měpakẹ pěbawiahe gunang makoạ pelayan sepenuh waktu kere i kitẹ.

12. (a) Kerea carane mẹ̌tul᷊ung pelayan sepenuh waktu tatapẹ̌ měkoạ tugasi sire? (b) Kerea carane mẹ̌tul᷊ung si sire tumatěngo situasi wuhu ene?

¹² Lawọ sidang dingangu anạu sěmbaụ su sidang nẹ̌tul᷊ung pelayan sepenuh waktu tatapẹ̌ někoạ tugasi sire. Contone, anạu sěmbaụ ini měmahangsang si sire tadeạu tawe měngědo bọu tugasẹ̌, měgělị hal᷊ẹ̌ materi, arau měngurusẹ̌ kěluargang i sire su wanuang i sire. (Gal. 6:2) Mạeng pelayan sepenuh waktu apang nakaěbạ tugasẹ̌ buhu něngal᷊ing sarang sidang i kitẹ, abe mẹ̌tiněna ene nariadi ual᷊ingu i sire tawe něhal᷊ẹ̌ mapaelẹ̌ arau někoạ pẹ̌sasal᷊a. * Katewe, tul᷊ungko i sire tumatěngo situasi wuhu ene. Tarimạe i sire pakapia kụ daloi apa seng nikoạ i sire maning orasẹ̌ ini i sire seng tawe makakoạ mal᷊awọ ual᷊ingu mahungsakị. Pẹ̌dal᷊ahapịe mapia dingangi sire. Pěngěndungke bọu kěbị kasingkạ, pelatihan, dingangu pengalaman i sire.

13. Apa wotonge koateng i kitẹ gunang mẹ̌tul᷊ung si sire apang nakaěbạ tugasẹ̌ buhu?

¹³ Su tempong buhudeng něngal᷊ing,  i sire apang nakaěbạ tugasẹ̌ buhu aramanung harusẹ̌ itul᷊ung soal u carane mědeạ oto arau gunang makaěbạ bal᷊e, hal᷊ẹ̌, dingangu manga kebutuhan bal᷊inẹ. I sire lai harusẹ̌ habareng soal u manga hal᷊ẹ̌ kere měmaehẹ̌ pajakẹ̌ dingangu asuransi. Limembong penting, i sire mělẹ̌harapẹ̌ i kitẹ makaěna situasing i sire, balinẹ tumal᷊ěntụ si sire. I sire aramanung mětẹ̌tawakal᷊i tumatěngo sakị su wadang i sire arau kěluargang i sire. I sire ěndịu lụlahunsusah. * Kụ i sire lai ěndịu nasusah naung ual᷊ingu něněntang manga hapị su tampạ tugasẹ̌ kal᷊imona, maning i sire tawe nẹ̌běke soal u ene. Manga pěndang kerene tawe sarung lighạ mailang, kụ i sire aramanung nẹ̌bingọ tumatěngo ene.

14. Kerea anạu sěmbaụ su sidang buhu nakatul᷊ung sěngkatau saudari timatěngo pẹ̌bawal᷊ui?

¹⁴ I kitẹ botonge makatul᷊ung si sire tumatěngo pẹ̌bawal᷊ui. Carane, i kitẹ měnginjilẹ̌ dingangi sire lai měnoghasẹ̌ si sire bọu kakanoạ mapia. Sěngkatau saudari taunge nakaěbạ tugasẹ̌ su negeri wal᷊inẹ nẹ̌běke, ”Su tugasẹ̌ kal᷊imona, iạ měnẹ̌něntiro Alkitapẹ̌ ěllo-ěllo. Su tampạ buhu, kětạeng měmuka Alkitapẹ̌ dingangu měmutarẹ̌ video ene masigěsạ. Katewe, anạu sěmbaụ su sidang buhu němaringang si siạ saụ mẹ̌tiwo dingangu měněntiro Alkitapẹ̌. Iạ lai nakasilo i sire masěmangatẹ̌ dingangu marading měněntiro Alkitapẹ̌. Ini nakakoạ si siạ limembong mapulu melayani sene. Iạ lai něngěndung carane měnětạ mẹ̌bawěke. Kěbị ene nakakoạ si siạ saụ mal᷊uasẹ̌.”

15. Kerea tadeạu makaěbạ hasilẹ̌ mapaelẹ̌ su tugasẹ̌ buhu?

¹⁵ I kitẹ botonge makaěbạ hasilẹ̌ mapaelẹ̌ su tugasẹ̌ buhu. Abe mẹ̌pěndang i kitẹ tawe něhal᷊ẹ̌ mapaelẹ̌ arau tawe maarěga. Pẹ̌tiněna kerea Yehuwa seng nẹ̌tul᷊ung si kitẹ, kụ turusẹ̌e pěnginjilẹ̌. Pẹ̌těno su tau Kristen masatia su abad humotong. Maning saranga i sire rumal᷊eng,  i sire ’mělẹ̌habarẹ̌ habarẹ̌ mapia soal u hengetangu Mawu su haghing tampạ su něgěring’ i sire. (Kis. 8:1, 4) Mạeng turusẹ̌ měnginjilẹ̌, i kitẹ sarung makaěbạ hasilẹ̌ mapaelẹ̌. Contone, manga perintis seng niuserẹ̌ bọu sěmbaụ negeri něngal᷊ing sarang negeri marani, kụ sene piạ lawọ kebutuhan měnginjilẹ̌ su werang i sire. Pira wul᷊ang bọu ene, piạ piram baụ kelompok buhu nirarisị kụ turusẹ̌ kakạguwạe.

16. Kerea i kitẹ botonge mal᷊uasẹ̌ su tugasẹ̌ buhu?

¹⁶ ”Karal᷊uasẹ̌ bọu Yehuwa kai katatoghasẹ̌ i kamene.” (Neh. 8:10, catatan kaki) Alasang kahumotongange i kitẹ mal᷊uasẹ̌ ene kai Yehuwa, bal᷊inẹ tugasi kitẹ, tawẹ soale i kitẹ sěbạe puluang su tugasẹ̌ ene. Hakị u ene, mạeng i kitẹ mapulu mal᷊uasẹ̌, tatapẹ̌e pakarani dingangi Yehuwa lai pěngumbala pelesa, laahạ, dingangu tul᷊umang bọu i Sie. Pẹ̌tahěndung, i kitẹ mal᷊uasẹ̌ su tugasẹ̌ kal᷊imona ual᷊ingu i kitẹ něgělị kapaelange gunang mẹ̌tul᷊ung taumata sene. Pěgělịe kapaelange su tugasẹ̌ buhu, kụ pěmandạe kerea Yehuwa lai sarung mẹ̌tul᷊ung si kitẹ mal᷊uasẹ̌ su tugasẹ̌ ini.​—Pkh. 7:10.

17. Apa harusẹ̌ tahěndungang i kitẹ soal u tugasẹ̌ orasẹ̌ ini?

¹⁷ I kitẹ harusẹ̌ mẹ̌tahěndung pelayanan i kitẹ si Yehuwa ene kai kěkalẹ̌, katewe tugasi kitẹ orasẹ̌ ini kětạeng sementara. Su dunia wuhu, tugasi kitẹ kěbị aramanung mẹ̌bal᷊ui. Aleksey, seng nisěbạ humotong, mangimang pengalaman nikaěbạe orasẹ̌ ini makatul᷊ung si sie sadia gunang pẹ̌bawal᷊ui ene. I sie naul᷊ị, ”Iạ sěntiniạ masingkạ Yehuwa dingangu dunia wuhu kahěngang-hěngang ene. Katewe hědo orasẹ̌ ini iạ nakapěndang marani dingangi Yehuwa, lai mangimang dunia wuhu seng marani.” (Kis. 2:25) Tawẹ soale apa tugasi kitẹ, mahịe i kitẹ turusẹ̌ marani dingangi Yehuwa. I Sie tawe měněntang si kitẹ. Katewe, i Sie sarung mẹ̌tul᷊ung si kitẹ mal᷊uasẹ̌ měkoạ apa wotonge ikakoạ i kitẹ su pelayanan si Sie, tawẹ soale su apa ene.​—Yes. 41:13.