PANGANGIMANG makatoghasẹ̌ si kitẹ. Contone, maning Setang mapulu měndusa pẹ̌dal᷊ahapị i kitẹ dingangi Yehuwa, pangangimang makakoạ si kitẹ botonge ”měmate kěbị panah piạ putunge bọu Setang”. (Ef. 6:16) Mạeng piạ pangangimang, i kitẹ botonge tumatěngo masalah gěguwạ kere wul᷊udẹ̌. Yesus naul᷊ị su manga murite, ”Mạeng i kamene piạ pangangimang kakadodọe kere batung sesawi, i kamene botonge maul᷊ị su wul᷊udẹ̌ ini, ’Pěngal᷊ing sarang pai,’ kụ i sie sarung měngal᷊ing.” (Mat. 17:20) Ual᷊ingu i kitẹ masingkạ pangangimang sarung makatoghasẹ̌ pẹ̌dal᷊ahapị dingangi Yehuwa, i kitẹ harusẹ̌ mẹ̌tiněna manga kakiwal᷊o ini: Apa pangangimang ene? Kerea pěngangarěgang i kitẹ su katěngadẹ̌ piạ pěngarune su pangangimang? Kerea carane měnoghasẹ̌ pangangimang i kitẹ? I kitẹ harusẹ̌ mangimang si sai?​—Rm. 4:3.

Pangangimang bal᷊inẹ kětạeng mangimang apa niul᷊ị u Alkitapẹ̌, ual᷊ingu ”manga rohkẹ̌ dal᷊akị lai mangimang [Mawu ene] dingangu natakụ”. (Yak. 2:19) Mạeng kerene, apa pangangimang ene?

Tumuhụ Alkitapẹ̌, piạ darua hal᷊ẹ̌ nělahẹ apa pangangimang ene. Humotong, ”pangangimang kai kahěngang-hěngang mangimang apa lẹ̌harapeng sarung mariadi”. (Ibr. 11:1a) Mạeng piạ pangangimang, i kitẹ sěbạe mangimang kěbị apa niul᷊ị i Yehuwa ene kahěngang dingangu sarung mariadi. Contone, Yehuwa naul᷊ị su tau Israel, ”Iạ někoạ pẹ̌dariandi dingangu ěllo lai hěbi, hakị u ene ěllo dingangu hěbi sěntiniạ mariadi su tempone. Mạeng i kamene botonge makakoạ pẹ̌dariandi ene tawe mariadi, pẹ̌dariandi-Ku dingangu ělang-Ku Daud sarung tawe mariadi.” (Yer. 33:20, 21) Apa i kitẹ bọu gụgěnggang matangěllo sarung měngědo suměbang dingangu sumědạ, hakị u seng tawẹ apa ěllo dingangu hěbi? Tala! I kitẹ tantu mangimang matangěllo sarung sěntiniạ suměbang dingangu sumědạ. Hakị u ene, i kitẹ tantu botonge mangimang Měndariadi ěllo dingangu hěbi botonge měkoạ apa seng niwera-Ne.​—Yes. 55:10, 11; Mat. 5:18.

Karuane, pangangimang kai ”bukti mal᷊ahẹ apa tawe kẹ̌kasilong sěběnarẹ̌e ene”. Pangangimang ene wade ”bukti mal᷊ahẹ”, arau ”bukti matoghasẹ̌”, bọu manga hal᷊ẹ̌ tawe kasilongu mata katewe ene. (Ibr. 11:1b, catatan kaki) Apa contone? Umpamane piạ anạ nẹ̌kiwal᷊o, ’Kerea i kitẹ masingkạ piạ udara?’ Maning tawe nakasilo udara, i kitẹ sarung měgělị bukti piạ udara, kere singongo, anging, dingangu contoh wal᷊inẹ. Bukti ini makatul᷊ung si sie makaěna udara kahěngang-hěngang ene maning tawe kẹ̌kasilong. Kerene lai, pangangimang dasare harusẹ̌ bukti matoghasẹ̌.​—Rm. 1:20.

Ual᷊ingu pangangimang dasare kai bukti, kahumotongange taumata harusẹ̌ makaěbạ ”kasingkạ nihino soal u katěngadẹ̌” buhudeng si sie piạ pangangimang. (1 Tim. 2:4) Katewe, piạ kasingkạ ene bědang kurang. Rasul Paulus němohẹ, ”Pangangimang su naung i kamene sarung makakoạ i kamene pandaěng nihino.” (Rm. 10:10) Taumata tawe wotonge kětạeng mangimang su katěngadẹ̌; i sie harusẹ̌ měngarěga ene. Ini sarung makawahangsang si sie gunang měnodẹ pangangimang, ene  kai měbiahẹ̌ tuhụ katěngadẹ̌. (Yak. 2:20) Taumata apang tawe kahěngang-hěngang měngarěga katěngadẹ̌ sarung tawe mangimang su bukti matoghasẹ̌ ual᷊ingu i sie madiri měmal᷊ui tiněnane arau mapulu měkoạ apa ikẹ̌kapulune. (2 Ptr. 3:3, 4; Yud. 18) Ual᷊ingu ene, lawọ taumata nakasilo mukjizat su zaman Alkitapẹ̌ tatapẹ̌ tawẹ apa pangangimang. (Bil. 14:11; Yoh. 12:37) Rohkẹ̌ masusi botonge makakoạ pangangimang tumuwo su naung taumata apang kuměndagẹ̌ barang nihino.​—Gal. 5:22; 2 Tes. 2:10, 11.

Datu Daud kai taumata piạ pangangimang matoghasẹ̌. (Ibr. 11:32, 33) Katewe, tawe kěbị kěluargane piạ pangangimang kerene. Contone, su sěngkatempo i Eliab, tuhange kaiakanenge, něnodẹ i sie tawe tumanịu mangimang su kawasang Yehuwa. I sie něněgorẹ̌ si Daud ual᷊ingu i Daud pědu i Goliat něhinakang tau Israel. (1 Sam. 17:26-28) Tawẹ apa taumata seng piạ pangangimang su tempong nalahirẹ̌ arau nakaěbạ ene bọu matimade. Hakị u ene, i Daud piạ pangangimang ual᷊ingu i sie nědal᷊ahapị dingangu Mawu.

Su Mazmur 27, Daud nẹ̌běke kerea sarang i sie piạ pangangimang matoghasẹ̌. (Ayt. 1) Daud nẹ̌tiněna pengalaman nikaěbạe dingangu kerea Yehuwa limawang manga sědụe. (Ayt. 2, 3) I sie sěbạe měngẹ̌ngarěga tabernakel i Yehuwa. (Ayt. 4) Daud něngibadah su Mawu sěngkasio dingangu manga ělangu Mawu su tabernakel. (Ayt. 6) I sie kahěngang-hěngang nẹ̌doa si Yehuwa. (Ayt. 7, 8) Daud lai mapulu těntiroěng dal᷊engu Mawu. (Ayt. 11) Pangangimang sěbạe penting si Daud sarang i sie nẹ̌bera, ”Apa sarung mariadi si siạ mạeng iạ tawe mangimang?”​—Ayt. 13.

I kitẹ botonge piạ pangangimang kere i Daud mạeng i kitẹ mẹ̌těno cara i sie mẹ̌tiněna dingangu apa nikoạe, kere niwohẹ su Mazmur 27. Pangangimang dasare kai kasingkạ nihino. Hakị u ene, limembong mal᷊awọ i kitẹ měngěndung Hengetangu Mawu dingangu publikasi Kristen, limembong gampang rohkẹ̌ u Mawu mapakatuwo sipatẹ̌ ini su watangeng i kitẹ. (Mz. 1:2, 3) Su tempong měngěndung, i kitẹ harusẹ̌ mẹ̌tiněna. Mạeng mẹ̌tiněna, i kitẹ sarung limembong měngarěga si Yehuwa. Mạeng limembong měngarěga si Yehuwa, i kitẹ sarung limembong mapulu měnodẹ pangangimang, ene kai duměnta su pěngangibadang Kristen lai měmahiạ pělaharapẹ̌ su taumata wal᷊inẹ. (Ibr. 10:23-25) Cara wal᷊inẹ měnodẹ pangangimang ute ”sěntiniạ mẹ̌doa dingangu tawe měngědo”. (Luk. 18:1-8) Hakị u ene, ”pěmpẹ̌kal᷊iomanengke turusẹ̌” si Yehuwa dingangu pangimangke ”i Sie mapadul᷊i si kau”. (1 Tes. 5:17; 1 Ptr. 5:7) Pangangimang makakoạ si kitẹ měkoạ barang nihino, kụ su tempong i kitẹ měkoạ barang nihino, pangangimang i kitẹ matambah matoghasẹ̌.​—Yak. 2:22.

Su hěbi maraning papatene, Yesus naul᷊ị su manga murite, ”Pangimangke su Mawu, kụ pangimangke lai si siạ.” (Yoh. 14:1) Hakị u ene, i kitẹ  harusẹ̌ mangimang bal᷊inẹ kětạeng si Yehuwa, katewe lai si Yesus. Kerea i kitẹ menodẹ pangangimang si Yesus? Mahịe měmanda tatělu carane.

Humotong, pẹ̌tinena tatěbusẹ̌ ene kai gaghělị bọu Mawu si kitẹ pẹ̌sěngkatau. Rasul Paulus naul᷊ị, ”Iạ měbẹ̌biahẹ̌ orasẹ̌ ini tuhụ pangangimang su Ahusu Mawu, kụ makěndagẹ̌ si siạ dingangu něgělị pěbawiahe gunang iạ.” (Gal. 2:20) Mạeng mangimang si Yesus, i kitẹ sěbạe mangimang tatěbusẹ̌ makatul᷊ung si kitẹ, nakoạ dasarẹ̌ gunang měngampung dosang i kitẹ, něgělị pělaharapẹ̌ měbiahẹ̌ kěkalẹ̌, dingangu nakoạ bukti kaguwạkenge Mawu makěndagẹ̌ si kitẹ. (Rm. 8:32, 38, 39; Ef. 1:7) Ini makatul᷊ung si kitẹ tawẹ mẹ̌pěndang dal᷊akị soal u watangeng i kitẹ.​—2 Tes. 2:16, 17.

Karuane, pẹ̌těngkarani si Yehuwa bọu daroa. I kitẹ botonge měkoạ ene ual᷊ingu tatěbusi Yesus. Ual᷊ingu tatěbusẹ̌, i kitẹ botonge ”bebasẹ̌ mẹ̌doa [si Yehuwa], tadeạu i kitẹ makaěbạ tatal᷊ěntụ dingangu kapiang naung sěbạe makạlaherang, kụ sarung mẹ̌tul᷊ung si kitẹ su tempo nẹ̌tatahino”. (Ibr. 4:15, 16; 10:19-22) Daroa makatoghasẹ̌ kapulung i kitẹ gunang lumawang sasal᷊ukạ měkoạ dosa.​—Luk. 22:40.

Katělune, pakatuhụ si Yesus. Rasul Yohanes němohẹ, ”Taumata mangimang su Ahusẹ̌ sarung makaěbạ pěbawiahẹ̌ kěkalẹ̌, arawe taumata apang tawe tumuhụ su Ahusẹ̌ tawe makaěbạ pěbawiahẹ̌, katewe makapěndang pědung Mawu sarang karěngụe.” (Yoh. 3:36) Pěmanda, Yohanes něpakẹ bawera mangimang kụ ene nipẹ̌tatěntang dingangu bawera tawe tumuhụ. Hakị u ene, i kitẹ mangimang si Yesus mạeng tumuhụ si sie. Mạeng tumuhụ si sie, i kitẹ sarung tumol᷊e ”hukung i Kristus”, ene kai kěbị těntiro dingangu parentang i Yesus. (Gal. 6:2) I kitẹ lai sarung tumol᷊e laahạ nighělịe lumiung ”ělang masatia dingangu matahuěna”. (Mat. 24:45) Mạeng tumuhụ si Yesus, i kitẹ sarung matoghasẹ̌ tumatěngo kasasigěsạ kere badai.​—Luk. 6:47, 48.

Sěngkatau esẹ nẹ̌pal᷊ehe si Yesus, ”Iạ mangimang! Tul᷊ungko iạ limembong mangimang!” (Mrk. 9:24) I sie seng piạ pangangimang, katewe i sie něngakui i sie perlu piạ pangangimang limembong mal᷊awọ. Kere tau esẹ ene, i kitẹ kěbị sarung tumatěngo situasi makakoạ si kitẹ perlu piạ pangangimang limembong mal᷊awọ. Kụ i kitẹ kěbị botonge měnoghasẹ̌ pangangimang i kitẹ bọu orasẹ̌ ini. Kere seng nilahẹ kal᷊imona, carane i kitẹ měnoghasẹ̌ pangangimang ene kai měngěndung dingangu mẹ̌tiněna Hengetangu Mawu. Ene sarung makakoạ si kitẹ limembong měngarěga si Yehuwa. Pangangimang i kitẹ lai sarung limembong matoghasẹ̌ su tempong i kitẹ—sěngkasio dingangu anạu sěmbaụ—měngibadah si Yehuwa, mẹ̌běke pělaharapi kitẹ, dingangu turusẹ̌ mẹ̌doa. Bọu ene, mạeng i kitẹ měnoghasẹ̌ pangangimang, i kitẹ sarung měnarimạ al᷊amatẹ̌ kaguwạkenge. Hengetangu Mawu naul᷊ị si kitẹ, ”Anạu sěmbaụ ikẹ̌kěndagẹ̌, i kamene harusẹ̌ měmangung pangangimang i kamene sěbạe masusi . . . tadeạu i kamene tatapẹ̌ ene su ral᷊ungu kakěndagu Mawu.”​—Yud. 20, 21.