1. Kehormatan apa piạ si kitẹ?

SĚBẠE kehormatan gěguwạ si kitẹ ualingu nakoạ bageang bọu sidang i Yehuwa! I kitẹ ene su firdaus rohani napenẹu taumata mararame dingangu maral᷊uasẹ̌. Apa tugasu su sidang?

2. Sasihing apa nipakẹ i Rasul Paulus su piram baụ surate?

² I kitẹ sarung makaěndung mal᷊awọ soal u topik ini bọu sasihing nipakẹ i Rasul Paulus su piram baụ surate. Su manga suratẹ̌ ene, i Paulus napẹ̌sul᷊ung sidang dingangu badangu taumata. I sie lai napẹ̌sul᷊ung taumata su sidang dingangu bageang bọu wadang.​—Rm. 12:4-8; 1 Kor. 12:12-27; Ef. 4:16.

3. Tatěntiro apa sarung ěndungang i kitẹ su pěngangěndungang ini?

³ I kitẹ sěngkatau-sěngkatau maarěga su sidang i Yehuwa. I kitẹ kěbị botonge měnoghasẹ̌ sidang. Tawẹ soale apa suku, latar belakang ekonomi, sosial, budaya, arau sikol᷊ah, i kitẹ kěbị maarěga. Su pěngangěndungang ini, i kitẹ sarung měngěndung tatělu tatěntiro penting botonge kaěndungang bọu sasihing i Paulus. Humotong, i kitẹ sarung měngěndung i kitẹ sěngkatau-sěngkatau piạ tugasẹ̌ su sidang i Yehuwa. Karuane, i kitẹ sarung měngěndung apa wotonge koateng i kitẹ mạeng i kitẹ tawe nakaěna apa tugasi kitẹ su sidang. Kụ katělune, i kitẹ sarung měngěndung kawe nụe i kitẹ harusẹ̌ tatapẹ̌ masibukẹ̌ měkoạ tugasi kitẹ su sidangu Mawu.

4. Apa kaěndungang i kitẹ bọu Roma 12:4, 5?

⁴ Tatěntiro humotong botonge kaěndungang i kitẹ bọu sasihing i Paulus ene kai i kitẹ kěbị piạ tugasẹ̌ penting su kěluargang i Yehuwa. Paulus naul᷊ị, ”Mẹ̌sul᷊ung kere badang sěmbaụ piạ lawọ anggotane, kụ gunane nẹ̌tatěntang, i kitẹ kěbị, maning mal᷊awọ, kai badang sěmbaụ ual᷊ingu nasěmbaụ dingangi Kristus, kụ i kitẹ sěngkatau-sěngkatau kai anggota kụ membutuhkan sěmbaụ su wal᷊inẹ.” (Rm. 12:4, 5) Apa mangal᷊ene bawerang i Paulus? Ene mangal᷊ene i kitẹ kěbị piạ tugasẹ̌ nẹ̌tatěntang su sidang. Maning kerene, kěbị tugasẹ̌ ene kai maarěga.

5. ”Gaghělị” apa seng nighělị i Yehuwa su sidang?

⁵ Mạeng mẹ̌tiněna soal i sire apang piạ tugasẹ̌ su sidang, tantu i kau langsung mẹ̌tiněna soal u i sire apang nakoạ těmbonang su sidang. (1 Tes. 5:12; Ibr. 13:17) Ene kahěngang, ual᷊ingu limiung Kristus, Yehuwa seng něgělị ”gaghělị kere taumata” su sidang’E. (Ef. 4:8) ”Gaghělị kere taumata” ene kai anggota Badan Pimpinan, asisten Badan Pimpinan, anggota Panitia Cabang, pengawas wilayah, instruktur lapangan, penatua su sidang, dingangu hamba pelayanan. Kěbị saudara-saudara ene nipileng rohkẹ̌ masusi gunang měnoghasẹ̌ sidang dingangu měngurusẹ̌ dombang Yehuwa maarěga.​—1 Ptr. 5:2, 3.

6. Tumuhụ 1 Tesalonika 2:6-8, saudara apang nipileng rohkẹ̌ masusi mětẹ̌tawakal᷊i měkoạ apa?

⁶ Saudara-saudara ene nipileng rohkẹ̌ masusi gunang měkoạ haghing tanggung jawab su sidang. Kere lima dingangu laedẹ̌, bageang bọu wadang něhal᷊ẹ̌ sěngkasio gunang kapiang badang. Kerene lai saudara-saudara ene něhal᷊ẹ̌ gunang kapiang kěbị dal᷊ohong sidang. I sire tawe nědeạ daralo gunang watangeng i sire hala. Katewe, i sire nẹ̌tawakal᷊i něnoghasẹ̌ anạu sěmbaụ i sire. (Basa 1 Tesalonika 2:6-8.) I kitẹ tantu makitarimakasẹ si Yehuwa ual᷊ingu seng něgělị saudara-saudara apang měngẹ̌ngal᷊imona kapiang taumata wal᷊inẹ sul᷊ungu kapiang watangeng i sire hala.

7. Al᷊amatẹ̌ apa nikaěbạ i sire apang nakoạ pelayan sepenuh waktu?

⁷ Pirang katau su sidang aramanung nakoạ utusan injil, perintis istimewa, arau perintis biasa. Sěběnarẹ̌e su patikụ dunia, lawọ anạu sěmbaụ seng němutusẹ̌ gunang makoạ penginjil sepenuh waktu. Ual᷊ingu někoạ ene, i sire seng nakatul᷊ung lawọ taumata gunang makoạ muriti Kristus Yesus. Maning doitẹ̌ arau arětạ i sire mahal᷊i, Yehuwa seng něgělị lawọ al᷊amatẹ̌ si sire. (Mrk. 10:29, 30) I kitẹ sěbạe makěndagẹ̌ su anạu sěmbaụ ene, kụ i kitẹ mal᷊uasẹ̌ ual᷊ingu i sire nakoạ bageang bọu sidang.

8. Kawe nụe kěbị penyiar habarẹ̌ mapia maarěga si Yehuwa?

⁸ Apa taumata maarěga su sidang ene kětạeng saudara-saudara apang nipileng rohkẹ̌ masusi dingangu i sire apang nakoạ pelayan sepenuh waktu? Tantu tala! Kěbị penyiar habarẹ̌ mapia kai maarěga su těngong Mawu dingangu su sidang. (Rm. 10:15; 1 Kor. 3:6-9) Ini ual᷊ingu sěmbaụ timonang sidang ene kai měkoạ taumata mariadi muriti Tuang Yesus Kristus. (Mat. 28:19, 20; 1 Tim. 2:4) Kěbị apang měngẹ̌nginjilẹ̌ dingangu sidang, tawẹ soale seng nibaptisẹ̌ arau bědang tala, seng nẹ̌tawakal᷊i někoạ kahumotongange hal᷊ẹ̌ ini su pěbawiahi sire.​—Mat. 24:14.

9. Kawe nụe i kitẹ měngẹ̌ngarěga saudari-saudari su sidang?

⁹ Yehuwa měngẹ̌ngarěga saudari-saudari su sidang kụ i Sie něgělị tugasẹ̌ si sire. I Sie měngẹ̌ngarěga matatimadẹ̌ wawine, wawine wal᷊u, dingangu saudari apang bědang tawe nẹ̌kawing ual᷊ingu masatia si Yehuwa.  Alkitapẹ̌ nẹ̌bisara soal u lawọ wawine nakal᷊uasẹ̌ naungu Mawu. I sire dẹ̌dalong ual᷊ingu matahuěna, piạ pangangimang matoghasẹ̌, masěmangatẹ̌, bahani, maělugẹ̌, dingangu měkẹ̌koạ barang mapia. (Luk. 8:2, 3; Kis. 16:14, 15; Rm. 16:3, 6; Flp. 4:3; Ibr. 11:11, 31, 35) I kitẹ tantu makitarimakasẹ si Yehuwa ual᷊ingu su sidang i kitẹ lai piạ manga wawine seng něnodẹ manga sipatẹ̌ mapia ene.

10. Kawe nụe i kitẹ sěbạe měngẹ̌ngarěga maghaghurang su sidang?

¹⁰ I kitẹ lai mal᷊uasẹ̌ ual᷊ingu su sidang piạ lawọ maghaghurang. Su piram baụ sidang, piạ maghaghurang seng nẹ̌tahamawu si Yehuwa su kanandụu pěbawiahi sire. Sěnggạ lai bědang buhu nakoạ ělang i Yehuwa. Lawọ bọu anạu sěmbaụ ini aramanung nakahombang masalah kasasehatẹ̌ ual᷊ingu seng kakạgurange. Masalah ene aramanung nakasigěsạ si sire gunang měkoạ mal᷊awọ su sidang arau gunang měnginjilẹ̌. Katewe, i sire nẹ̌tawakal᷊i sěngapang botonge gunang měnginjilẹ̌, kụ i sire něpakẹ katatoghasi sire gunang měnoghasẹ̌ dingangu melatih taumata wal᷊inẹ. Kụ i kitẹ lai nakaěbạ gunane bọu pengalaman i sire. Yehuwa dingangi kitẹ sěbạe měngẹ̌ngarěga si sire.​—Amsal 16:31.

11-12. Kerea mangangudạ su sidang seng nakatoghasẹ̌ si kau?

¹¹ Pẹ̌tiněna lai soal u mangangudạ. I sire tụtatěngo lawọ sasal᷊ukạ ual᷊ingu měbẹ̌biahẹ̌ su duniang Setang. (1 Yoh. 5:19) Katewe, i kitẹ kěbị natoghasẹ̌ su tempong nakasilo mangangudạ něgělị komentarẹ̌ su pěngangibadang, timol᷊e něnginjilẹ̌, dingangu bahani timatawang pangangimang i sire. Hakị u ene, mangangudạ kai piạ tugasẹ̌ penting su sidang i Yehuwa.​—Mz. 8:2.

¹² Katewe, pirang katau anạu sěmbaụ masigěsạ mangimang i sire piạ tugasẹ̌ penting su sidang. Apa makatul᷊ung si kitẹ tadeạu makapěndang i kitẹ sěngkatau-sěngkatau kai maarěga su sidang? Mahịe měmanda.

13-14. Aramanung kawe nụe pirang katau nẹ̌pěndang i sire tawẹ apa gunane su sidang?

¹³ Pěmanda tatěntiro karuane botonge  kaěndungang i kitẹ bọu sasihing i Paulus. I sie nẹ̌bisara soal u masalah nikahombangengu lawọ anạu sěmbaụ orasẹ̌ ini. I sire masigěsạ mangimang i sire kai maarěga su sidang. Paulus němohẹ, ”Maning laedẹ̌ maul᷊ị, ’Ual᷊ingu iạ bal᷊inẹbe lima, iạ bal᷊inẹ bageang bọu wadang’, laedẹ̌ ene tatapẹ̌ bageang bọu wadang. Maning tul᷊i maul᷊ị, ’Ual᷊ingu iạ bal᷊inẹbe mata, iạ bal᷊inẹ bageang bọu wadang’, tul᷊i ene tatapẹ̌ bageang bọu wadang.” (1 Kor. 12:15, 16) Apa mangal᷊ene bawerang i Paulus ene?

¹⁴ Mạeng i kau mapẹ̌sul᷊ung watangengu dingangu taumata wal᷊inẹ su sidang, i kau aramanung měnětạ mẹ̌tiněna i kau tawẹ apa gunane su sidang. Pirang katau aramanung mapaelẹ̌ měněntiro, měngatorẹ̌, arau měhiborẹ̌ dingangu měnoghasẹ̌ taumata wal᷊inẹ. Aramanung i kau nẹ̌pěndang i kau tawe makakoạ kere i sire kapaele. Ene něnodẹ i kau masanạ naung dingangu bersahaja. (Flp. 2:3) Katewe, pakaingatẹ̌. Mạeng turusẹ̌ mapẹ̌sul᷊ung watangengu dingangi sire apang piạ kemampuan ene, i kau sarung makadodọ naung. Aramanung i kau sarung mẹ̌pěndang tawẹ apa gunane sarang kadodọ su sidang. Apa makatul᷊ung si kau lumawang pěndang ene?

15. Tumuhụ 1 Korintus 12:4-11, apa harusẹ̌ tahěndungang i kitẹ soal u kemampuan i kitẹ?

¹⁵ Pẹ̌tiněna fakta ini: Yehuwa něgělị su pirang katau tau Kristen su abad humotong kemampuan gunang měkoạ mukjizat. Katewe, tawe kěbị tau Kristen nakaěbạ kemampuan ene. (Basa 1 Korintus 12:4-11.) Yehuwa něgělị si sire kemampuan nẹ̌tatěntang, katewe kěbị tau Kristen ene kai maarěga. Orasẹ̌ ini, i kitẹ tawe nighělịkangu kemampuan gunang měkoạ mukjizat. Katewe prinsipe bědang mẹ̌sul᷊ung. I kitẹ kěbị aramanung tawẹ apa kemampuan mẹ̌sul᷊ung, katewe i kitẹ kěbị maarěga su těngong Yehuwa.

16. Sasasang i Paulus apa harusẹ̌ tol᷊eng i kitẹ?

¹⁶ Sul᷊ungu mapẹ̌sul᷊ung watangeng i kitẹ dingangu anạu sěmbaụ wal᷊inẹ, i kitẹ harusẹ̌ tumol᷊e sasasang Rasul Paulus ini: ”Balạe pẹ̌sěngkatau měmarikěsa hal᷊ẹ̌e hala, kụ i sie sarung mal᷊uasẹ̌ ual᷊ingu watangenge, bal᷊inẹ ual᷊ingu napẹ̌sul᷊ungu watangenge dingangu taumata wal᷊inẹ.”​—Gal. 6:4.

17. Apa gunane mạeng i kitẹ tumol᷊e sasasang i Paulus?

 ¹⁷ Mạeng tumol᷊e sasasang i Paulus dingangu měmarikěsa kakanoạ i kitẹ, i kitẹ aramanung sarung makasilo kemampuan i kitẹ hala. Contone, sěngkatau penatua aramanung tawe tumanịu mapaelẹ̌ měnasẹ̌, katewe i sie mapaelẹ̌ měkoạ muritẹ̌. Arau i sie aramanung tawe tumanịu mapaelẹ̌ měngatorẹ̌, kere manga penatua wal᷊inẹ, katewe i sie kai penatua makěndagẹ̌ kụ manga penyiar gampang mẹ̌těngkarani si sie gunang mẹ̌dorong sasasa bọu Alkitapẹ̌. Arau lawọ taumata masingkạ i sie kai maělugẹ̌. (Ibr. 13:2, 16) Mạeng i kitẹ nakasilo mal᷊ahẹ katatoghasẹ̌ dingangu kemampuan i kitẹ hala, i kitẹ sarung piạ alasang gunang mal᷊uasẹ̌ ual᷊ingu apa wotonge koateng i kitẹ gunang sidang. Kụ i kitẹ tawe makoạ iri su anạu sěmbaụ apang piạ kemampuan nẹ̌tatěntang dingangi kitẹ.

18. Kerea tadeạu i kitẹ makoạ guru limembong mapaelẹ̌?

¹⁸ Tawẹ soale apa tugasi kitẹ su sidang, i kitẹ kěbị harusẹ̌ mẹ̌tawakal᷊i měkoạ limembong mapaelẹ̌ su pelayanan dingangu mengembangkan kemampuan i kitẹ. Tadeạu makoạ guru limembong mapaelẹ̌, Yehuwa něnadia pelatihan limiung organisasi-Ne. Contone, su pěngangibadang tengah pekan, i kitẹ nakatarimạ těgu soal u kerea tadeạu limembong matahuěna su tempong měnginjilẹ̌. Apa i kau timol᷊e těgu nikaěbạu su pěngangibadang ene?

19. Kerea tadeạu i kau botonge makatol᷊e Sekolah bagi Penginjil Kerajaan?

¹⁹ Program pelatihan wal᷊inẹ lai ene kai Sekolah bagi Penginjil Kerajaan. Sikol᷊ah ini nisadia gunang pelayan sepenuh waktu apang umure 23 sarang 65 su taunge. Aramanung i kau mẹ̌pikirẹ̌ tawe makatol᷊e sikol᷊ah ene. Katewe, sul᷊ungu měkoạ daftarẹ̌ alasang i kau tawe makatol᷊e sikol᷊ah ene, kapaelange i kau měkoạ daftarẹ̌ alasang i kau mapulu tumol᷊e sikol᷊ah ene. Dingangu tul᷊umang i Yehuwa lai tawakal᷊inu, apa kakělaěng tawe mariadi ene mang mariadi.

20. Apa wotonge kaěndungang i kitẹ bọu Roma 12:6-8?

²⁰ Tatěntiro katělune botonge kaěndungang i kitẹ bọu sasihing i Paulus niwohẹ su Roma 12:6-8. (Basa.) Su ayatẹ̌ ini, i Paulus saụ napakal᷊ahẹ i kitẹ kěbị piạ kemampuan nẹ̌tatěntang. Katewe, i sie lai naul᷊ị i kitẹ harusẹ̌ měpakẹ kemampuan ene gunang měnoghasẹ̌ sidang.

21-22. Apa wotonge kaěndungang i kitẹ bọu i Robert dingangi Felice?

²¹ Kěnang pẹ̌tiněna apa nariadi su sěngkatau saudara, pělọe arenge Robert. Su apang bọu melayani su negeri wal᷊inẹ, i sie nakaěbạ tugasẹ̌ melayani su Betel su něgěrine. Maning saudara-saudara seng naul᷊ị i sie tawe někoạ barang nẹ̌sal᷊a, i sie nẹ̌bera, ”Bul᷊ange karěngụe iạ nakadodọ naung, ual᷊ingu iạ nẹ̌pikirẹ̌ iạ tawe nakakoạ mapaelẹ̌ tugasẹ̌ku kal᷊imona. Su sěngkatempo iạ nẹ̌pěndang mapulu suměbang bọu Betel.” Kerea i Robert saụ nakaěbạ karal᷊uasẹ̌? Sěngkatau penatua nẹ̌tul᷊ung si sie nẹ̌tahěndung Yehuwa seng nělatih si sie su tugasẹ̌ kal᷊imona tadeạu botonge limembong mapaelẹ̌ měkoạ tugasẹ̌ orasẹ̌ ini. Robert nasadarẹ̌ i sie harusẹ̌ měngědo mẹ̌tiněna soal u apa seng nal᷊iu, kụ harusẹ̌ fokus su apa wotonge koatenge orasẹ̌ ini.

²² Saudara Felice Episcopo lai nakahombang hal᷊ẹ̌ mẹ̌sul᷊ung. I rẹ̌duang kawinge nalulusẹ̌ bọu sikol᷊ah Gilead su taung 1956 kụ melayani su hal᷊ẹ̌ keliling su Bolivia. Su taung 1964 i rẹ̌dua nakaěbạ anạ. Felice naul᷊ị, ”I kami mawěhạ měněntang tugasi  kami. Ěndịu sěntaung karěngụe iạ nakadodọ naung. Katewe, ual᷊ingu tul᷊umang i Yehuwa, iạ němal᷊ui sipatẹ̌ku dingangu fokus su tugasẹ̌ku wuhu, ene kai makoạ matimadẹ̌.” Apa i kau lai piạ pěndang kere i Robert arau i Felice? Apa i kau nakadodọ naung ual᷊ingu orasẹ̌ ini tawẹ apa hak istimewa kere kangerẹ? Mạeng kerene, i kau botonge mal᷊uasẹ̌ mạeng měmal᷊ui tiněnanu lai turusẹ̌ fokus su apa wotonge koatengu orasẹ̌ ini gunang Yehuwa dingangu gunang anạu sěmbaụ. Tatapẹ̌e sibukẹ̌, pakẹe kemampuan gunang mẹ̌tul᷊ung taumata wal᷊inẹ, kụ i kau sarung mal᷊uasẹ̌ su tempong něnoghasẹ̌ sidang.

23. I kitẹ harusẹ̌ mẹ̌tiněna soal u apa? Kụ, apa sarung ěndungang i kitẹ su pěngangěndungang tuhụe?

²³ I kitẹ sěngkatau-sěngkatau kai maarěga su těngong Yehuwa. I Sie mapulu i kitẹ makoạ bageang bọu kěluarga-Ne. Mạeng i kitẹ mẹ̌tiněna apa wotonge koateng gunang měnoghasẹ̌ anạu sěmbaụ kụ mẹ̌tawakal᷊i měkoạ ene, i kitẹ seng tawe mẹ̌pěndang i kitẹ tawẹ apa gunane su sidang. Katewe, kerea pěndang i kitẹ su anạu sěmbaụ? Kerea i kitẹ měnodẹ i kitẹ měngẹ̌ngarěga si sire? I kitẹ sarung měngěndung topik penting ini su pěngangěndungang tuhụe.