1. Kawe nụe Yehuwa někoạ diadikang?

PIẠ su sěngkatempo Yehuwa kětạeng sẹ̌sane. Katewe ene tawe nakakoạ si Sie nasusah naung. Yehuwa tawe membutuhkan pribadi wal᷊inẹ tadeạu mal᷊uasẹ̌. Maning kerene, Mawu mapulu pribadi wal᷊inẹ makapěndang pěbawiahẹ̌. Ual᷊ingu kakěndagẹ̌, Yehuwa něnětạ někoạ diadikang.​—Mz. 36:9; 1 Yoh. 4:19.

2. Kerea pěndang i Yesus dingangu manga malaekatẹ̌ su tempong Yehuwa něndiadi hal᷊ẹ̌ bal᷊inẹ?

² Humotong, Yehuwa něndiadi Ahus’E, Yesus. Kụ, limiung Ahus’E, ”kěbị hal᷊ẹ̌ bal᷊inẹ niriadi”, sarang lai manga malaekatẹ̌. (Kol. 1:16) Yesus mal᷊uasẹ̌ nakaěbạ kesempatan gunang měhal᷊ẹ̌ sěngkasio dingangi Amange. (Amsal 8:30) Kụ, manga malaekatẹ̌ lai mal᷊uasẹ̌. I sire nakasilo Yehuwa dingangu Mělahal᷊ẹ̌’E Matahuěna, i Yesus, něnětạ něndiadi diadikang su langị dingangu su dunia. Kerea manga malaekatẹ̌ ene něnodẹ karal᷊uasi sire? I sire něnětạ nẹ̌dalo Mawu su tempong dunia niriadi, kụ i sire turusẹ̌ nẹ̌dalo su tempong nakasilo kěbị hal᷊ẹ̌ bal᷊inẹ seng niriadi-Ne, sarang lai taumata. (Ayb. 38:7; Amsal 8:31) Kěbị diadikang i Yehuwa napakal᷊ahẹ kakěndagẹ̌ dingangu pelesa-Ne.​—Mz. 104:24; Rm. 1:20.

3. Kere nilahẹ su 1 Korintus 15:21, 22, apa wotonge mariadi ual᷊ingu piạ tatěbusi Yesus?

³ Yehuwa mapulu taumata měbiahẹ̌ kěkalẹ̌ su dunia mal᷊ěnggihẹ̌ seng niriadi-Ne. Katewe, i Adam dingangi Hawa limawang si Amang i sire makěndagẹ̌, hakị u ene i sire seng tawe makapěbiahẹ̌ kěkalẹ̌. I sire dingangu manga anạ i sire samurine sarung mate. (Rm. 5:12) Apa nikoạ i Yehuwa? Yehuwa langsung naul᷊ị apa sarung koateng’E gunang měnal᷊amatẹ̌ taumata. (Kej. 3:15) Yehuwa sarung měgělị tatěbusẹ̌ tadeạu manga anạ i Adam dingangi Hawa mawebasẹ̌ bọu dosa dingangu papate. Bọu ene, i Sie sarung měgělị pěbawiahẹ̌ kěkalẹ̌ su taumata  apang měmile mẹ̌tahamawu si Sie.​—Yoh. 3:16; Rm. 6:23; basa 1 Korintus 15:21, 22.

4. Kakiwal᷊o apa sarung ěndungang i kitẹ su pěngangěndungang ini?

⁴ Piạ lawọ kakiwal᷊o siměpụ soal u pělaharapẹ̌ taumata nate saụ ipěbiahẹ̌. Contone, kerea ene mariadi? Apa i kitẹ sarung makakiral᷊a si sire apang saụ nipěbiahẹ̌? Kerea hal᷊ẹ̌ ene makarěntang karal᷊uasẹ̌? Kụ, kerea mẹ̌tiněna soal u pělaharapẹ̌ taumata nate saụ ipěbiahẹ̌ ene makatambah pěngangarěgang i kitẹ su kakěndagẹ̌, pelesa, dingangu kasasabari Yehuwa? Mahịe měngěndung soal u manga kakiwal᷊o ene.

5. Kawe nụe i kitẹ mẹ̌pikirẹ̌ taumata nate tawe ipěbiahẹ̌ su tempo mẹ̌sul᷊ung?

⁵ Su tempong Yehuwa saụ mapakawiahẹ̌ jutane taumata nate lumiung Ahus’E, i kitẹ tantu měpẹ̌pikirẹ̌ i sire kěbị tawe ipěbiahẹ̌ su tempo mẹ̌sul᷊ung. Kawe nụe? Ual᷊ingu mạeng taumata su dunia sěngkělěndịu nakoạ mal᷊awọ, dunia sarung mẹ̌kacau. Mawu Yehuwa sěntiniạ měkoạ sěmbaụ hal᷊ẹ̌ naatorẹ̌. I Sie masingkạ, kěbị hal᷊ẹ̌ harusẹ̌ maatorẹ̌ tadeạu taumata měbiahẹ̌ su ral᷊ungu pẹ̌darame. (1 Kor. 14:33) Mawu Yehuwa kai mapelesa dingangu masabarẹ̌ su tempong něhal᷊ẹ̌ dingangi Yesus něnadia dunia ini gunang pẹ̌tanakengu taumata. Yesus lai sarung měnodẹ sipatẹ̌ ene su kanandụu Pěmamarentang Sěhiwu su Taunge. I sie sarung měhal᷊ẹ̌ sěngkasio dingangu taumata apang nasal᷊amatẹ̌ bọu Armagedon tadeạu dunia ini seng sadia su tempong taumata nate saụ ipěbiahẹ̌.

6. Tumuhụ Kisah 24:15, i sai lai sarung saụ ipěbiahẹ̌ karạ i Yehuwa?

⁶ Taumata apang nasal᷊amatẹ̌ bọu Armagedon lai harusẹ̌ měněntiro soal u Kararatuangu Mawu dingangu apa dẹ̌dorongang i Yehuwa si sire apang saụ nipěbiahẹ̌. Kawe nụe? Ual᷊ingu kal᷊awokange apang saụ nipěbiahẹ̌ ene kai taumata ”tawe nihino”.  (Basa Kisah 24:15.) I sire harusẹ̌ měkoạ pẹ̌bawal᷊ui tadeạu makaěbạ gunane bọu tatěbusi Kristus. Kěnang pẹ̌tiněna hal᷊ẹ̌ harusẹ̌ koateng gunang měněntiro jutane taumata soal i Yehuwa. Apa i sire sarung těntirong sěngkatau-sěngkatau kere cara i kitẹ měněntiro Alkitapẹ̌ orasẹ̌ ini? Apa i sire sarung makaěbạ tugasẹ̌ sarang sidang-sidang kụ latiang gunang měněntiro taumata tuhụe apang sarung ipěbiahẹ̌? I kitẹ harusẹ̌ měngampal᷊ẹ̌ dingangu měmanda. Katewe i kitẹ masingkạ, su pěngěngsuengu Pěmamarentang Kristus Sěhiwu su Taunge, ”dunia tantu sarung mapenẹu kasingkạ soal i Yehuwa”. (Yes. 11:9) Sarung piạ hal᷊ẹ̌ makal᷊uasẹ̌ botonge koateng i kitẹ su kanandụu sěhiwu su taunge.

7. Kawe nụe manga ělang i Yehuwa sarung masabarẹ̌ su tempong měněntiro si sire apang saụ nipěbiahẹ̌?

⁷ Su kanandụu Pěmamarentang Kristus Sěhiwu su Taunge, kěbị ělang i Yehuwa harusẹ̌ měkoạ pẹ̌bawal᷊ui tadeạu makal᷊uasẹ̌ si Sie. Hakị u ene, i sire tantu masabarẹ̌ su tempong mẹ̌tul᷊ung taumata apang saụ nipěbiahẹ̌ gunang lumawang kapulu měkoạ dosa dingangu gunang měbiahẹ̌ tuhụ atorang i Yehuwa. (1 Ptr. 3:8) I sire apang saụ nipěbiahẹ̌ sarung makasilo manga ělang i Yehuwa masanạ naung dingangu turusẹ̌ měkẹ̌koạ pẹ̌bawal᷊ui tadeạu makal᷊uasẹ̌ si Yehuwa. (Flp. 2:12) Samurine, i sire lai sarung mapulu mẹ̌tahamawu si Yehuwa.

8. Kawe nụe masuẹ̌ su akal᷊ẹ̌ mẹ̌tiněna i kitẹ sarung makakiral᷊a si sire apang saụ nipěbiahẹ̌?

⁸ Piạ piram baụ alasang kawe nụe i kitẹ mangimang i kitẹ sarung makakiral᷊a si sire apang saụ ipěbiahẹ̌. Contone, bọu cara Yehuwa napakawiahẹ̌ taumata su tempong tamai, i kitẹ botonge mangimang su tempong mapakawiahẹ̌ taumata, Yehuwa sarung saụ měndiadi tau ene, hakị u ene gahịe, cara i sie mẹ̌tiněna dingangu mẹ̌bisara sarung mẹ̌sul᷊ung dingangu su tempong i sie bědang tawe nate. Pẹ̌tahěndung, Yesus napẹ̌sul᷊ung papate dingangu mětẹ̌tikị, kụ su tempong taumata nate saụ nipěbiahẹ̌, i sire mẹ̌sul᷊ungu nipapuko su tempong mětẹ̌tikị. (Mat. 9:18, 24; Yoh. 11:11-13) Su tempong taumata buhudeng napuko bọu nẹ̌tikị, penampilan, cara i sire mẹ̌bisara dingangu apa tẹ̌tiněnang i sire ene mẹ̌sul᷊ung dingangu su tempong i sire buhudeng mẹ̌tikị. Pẹ̌tiněna contoh i Lazarus. I sie seng nate ěpạu ěllo, hakị u ene badange tantu něnětạ nawuhụ. Maning kerene, su tempong Yesus napakawiahẹ̌ si sie, manga wawinene nakakiral᷊a si sie, kụ i Lazarus lai tantu nakatahěndung si sire.​—Yoh. 11:38-44; 12:1, 2.

9. Kawe nụe i sire apang nate tawe saụ ipěbiahẹ̌ dingangu badang lai tiněna seng nasukụ?

⁹ Yehuwa seng nẹ̌diandi su al᷊ungu pěmamarentang i Kristus, tawẹ apa taumata maul᷊ị, ”Iạ masakị.” (Yes. 33:24; Rm. 6:7) Hakị u ene, i sire apang nate tantu saụ nipěbiahẹ̌ dingangu wadang masehatẹ̌. Katewe, i sire tawe langsung makoạ masukụ. Mạeng i sire langsung makoạ masukụ, hapị dingangu kěluargang i sire tantu tawe makakiral᷊a si sire. Hakị u ene, kakělaěng kěbị taumata sarung makoạ masukụ su kanandụu Pěmamarentang Kristus Sěhiwu su Taunge. Kụ su pěngěngsuengu sěhiwu su taunge, Yesus sarung měnul᷊e Kararatuang ene si Amange. Bọu ene, Kararatuang ene sarung měkoạ kěbị kapulung Yehuwa, sarang lai měkoạ kěbị taumata makoạ masukụ.​—1 Kor. 15:24-28; Why. 20:1-3.

10. Su tempong taumata nate saụ nipěbiahẹ̌, apa pěngarune si kau?

¹⁰ Kěnang pẹ̌tiněna kerea pěndangu su tempong měněnsomahẹ̌ taumata ikẹ̌kěndagẹ̌ apang seng nate. Apa karal᷊uasẹ̌  makakoạ si kau sumangị arau luměge? Apa i kau sarung mẹ̌dalo si Yehuwa? I kau tantu sarung turusẹ̌ kuměndagẹ̌ si Amang mapadul᷊i dingangu su Ahus’E ual᷊ingu nakakoạ taumata nate botonge saụ měbiahẹ̌.

11. Tumuhụ bawerang i Yesus kạbawohẹ su Yohanes 5:28, 29, apa sarung mariadi si sire apang timuhụ su atorangu Mawu?

¹¹ Pẹ̌tiněna karal᷊uasẹ̌ nikapěndangengu taumata apang saụ nipěbiahẹ̌ su tempong i sire něněntang pěbawiahẹ̌ těbe kụ něbiahẹ̌ tuhụ atorangu Mawu. I sire apang mapulu měkoạ pẹ̌bawal᷊ui sarung měbiahẹ̌ kěkalẹ̌ su Firdaus. Katewe, taumata apang lumawang Mawu sarung tawe walang tatapẹ̌ měbiahẹ̌ su Firdaus tadeạu i sire tawe makarusa pẹ̌darame sene.​—Yes. 65:20; basa Yohanes 5:28, 29.

12. Kerea kěbị taumata su dunia sarung makaěbạ al᷊amatẹ̌ bọu i Yehuwa?

¹² Su pěmamarentang Kararatuangu Mawu, kěbị ělangu Mawu sarung makasilo bawera su Amsal 10:22 ene kai kahěngang. Sene niul᷊ị, ”Al᷊amatẹ̌ bọu i Yehuwa nakakoạ taumata makalạ, kụ ene tawe makarěntang susah naung.” Ual᷊ingu tul᷊umangu rohkẹ̌ masusi, manga ělangu Mawu sarung makalạ secara rohani, ene mangal᷊ene i sire sarung piạ sipatẹ̌ kere i Kristus dingangu kakạrěngụe makoạ masukụ. (Yoh. 13:15-17; Ef. 4:23, 24) Bọu ene lai, bọu ěllo sarang ěllo i sire sauneng kakạtoghase kụ makoạ taumata limembong mapaelẹ̌. Ene sěbạe makal᷊uasẹ̌! (Ayb. 33:25) Maning kerene, kerea mẹ̌tiněna soal u pělaharapẹ̌ taumata nate sarung ipěbiahẹ̌ makatul᷊ung si kau orasẹ̌ ini?

13. Kerea Mazmur 139:1-4 něnodẹ Yehuwa sěbạe masingkạ si kitẹ, kụ kerea ene nal᷊ahẹ su tempong i Sie saụ mapakawiahẹ̌ taumata nate?

¹³ Kere seng niěndungang i kitẹ kanini, su tempong Yehuwa mapakawiahẹ̌ taumata nate, i Sie sarung měnul᷊e kenangan dingangu sipatu tau ene. Kěnang pẹ̌tiněna apa mangal᷊ene hal᷊ẹ̌ ene. Yehuwa sěbạe makěndagẹ̌ si kau sarang i Sie turusẹ̌ měmẹ̌manda dingangu mětẹ̌tahěndung apa tẹ̌tiněnangu, nikapěndangengu, dingangu apa niwera lai nikoạu. Hakị u ene, su tempong mapakawiahẹ̌ si kau, i Sie sarung gampang měnul᷊e kenangan dingangu sipatu. Datu Daud masingkạ Yehuwa sěbạe masingkạ si kitẹ sěngkatau-sěngkatau. (Basa Mazmur 139:1-4.) Kerea pěndang i kitẹ su tempong nakasingkạ hal᷊ẹ̌ ene?

14. Kerea pěndang i kitẹ su tempong nẹ̌tiněna Yehuwa sěbạe makěndagẹ̌ si kitẹ?

¹⁴ Mạeng i kitẹ mẹ̌tiněna kerea Yehuwa sěbạe masingkạ si kitẹ, i kitẹ tawe guměnggang. Kawe nụe? Pẹ̌tahěndung, Yehuwa sěbạe mapadul᷊i si kitẹ. I Sie měngẹ̌ngarěga si kitẹ sěngkatau-sěngkatau. I Sie kahěngang-hěngang měmẹ̌manda kěbị apa nikahombangeng i kitẹ su kanandụu pěbawiahẹ̌ kụ piạ pěngarune si kitẹ. Ene sěbạe makahiborẹ̌ si kitẹ! I kitẹ tawe mẹ̌pěndang i kitẹ nitěntang hala. Sabang měnitẹ̌, Yehuwa ene su rěduhi kitẹ apidu mědẹ̌deạ kesempatan gunang mẹ̌tul᷊ung si kitẹ.​—2 Taw. 16:9.

15. Kerea pělaharapẹ̌ taumata nate saụ ipěbiahẹ̌ něnodẹ Yehuwa sěbạe mapelesa?

¹⁵ Su tempong taumata matakụ mate, manga sědụ sarung memaksa si sire gunang měkoạ sěmbaụ hal᷊ẹ̌, kụ měmatakụ sarung měmate si sire mạeng i sire tawe měkoạ ene. Taumata apang lẹ̌ahạkengu Setang něpakẹ ene gunang memaksa taumata tadeạu tawe masatia su hapị i sire arau měkoạ sěmbaụ hal᷊ẹ̌ nẹ̌sal᷊a. Katewe, i sire tawe makapaksa si kitẹ měkoạ hal᷊ẹ̌ ene. I kitẹ masingkạ mạeng sědụ měmate si kitẹ, Yehuwa mang sarung mapakawiahẹ̌ si kitẹ. (Why. 2:10) I kitẹ mangimang tawẹ apa makaědo si kitẹ mẹ̌tahamawu si Yehuwa. (Rm. 8:35-39) Nal᷊ahẹ, su tempong něgělị pělaharapẹ̌  taumata nate saụ ipěbiahẹ̌, Yehuwa něnodẹ i Sie sěbạe mapelesa. Ual᷊ingu pělaharapẹ̌ ene, i kitẹ tawe matakụ maning sědụ maul᷊ị sarung měmate si kitẹ, kụ ene lai makakoạ si kitẹ bahani gunang tatapẹ̌ masatia si Yehuwa.

16. Kakiwal᷊o apa harusẹ̌ tiněnangu, kụ kerea sasimbahe makatul᷊ung si kau makasingkạ apa i kau mangimang si Yehuwa?

¹⁶ Mạeng sědụ i Yehuwa maul᷊ị i sire sarung měmate si kau, apa i kau mangimang Yehuwa sarung saụ mapakawiahẹ̌ si kau? Kerea i kau masingkạ i kau sarung mangimang si Yehuwa su tempo ene? Sěmbaụ cara makasingkạ ene ute mạeng i kitẹ mẹ̌tiněna, ’Apa putusang kẹ̌koatengku ěllo-ěllo něnodẹ iạ mangimang si Yehuwa?’ (Luk. 16:10) Arau ’Apa cara iạ měpakẹ tempo dingangu doitẹ̌ něnodẹ iạ mangimang Yehuwa sarung měnukụ kebutuhanku mạeng iạ měngal᷊imona Kararatuang’E?’ (Mat. 6:31-33) Mạeng sasimbahu iya, ene něnodẹ i kau mangimang si Yehuwa kụ i kau seng sadia tumatěngo haghing sasal᷊ukạ su tempo mahi.​—Amsal 3:5, 6.

17. (a) Kerea pělaharapẹ̌ taumata nate saụ ipěbiahẹ̌ něnodẹ kasasabari Yehuwa? (b) Kerea i kitẹ měnodẹ i kitẹ měngẹ̌ngarěga kasasabari Yehuwa?

¹⁷ Yehuwa seng němutusẹ̌ kange i Sie sarung měminasa dunia dal᷊akị ini. (Mat. 24:36) Kụ i Sie masabarẹ̌ měngampal᷊ẹ̌ tempo ene. Maning sěbạe mapulu mapakawiahẹ̌ taumata apang seng nate, i Sie tatapẹ̌ masabarẹ̌ měngampal᷊ẹ̌ tempone. (Ayb. 14:14, 15; Yoh. 5:28) I kitẹ tantu makitarimakasẹ ual᷊ingu kasasabari Yehuwa. Pẹ̌tiněna hal᷊ẹ̌ ini: Ual᷊ingu Yehuwa masabarẹ̌, lawọ taumata, sarang lai i kitẹ, nakaěbạ kesempatan gunang mẹ̌tobatẹ̌. (2 Ptr. 3:9) Yehuwa mapulu lawọ taumata makaěbạ kesempatan gunang měbiahẹ̌ kěkalẹ̌. Hakị u ene, mahịe i kitẹ měngarěga kasasabari Yehuwa. Carane ute mẹ̌tawakal᷊i mědeạ taumata apang ”piạ kapulu nihino gunang makaěbạ pěbawiahẹ̌ kěkalẹ̌”, kụ mẹ̌tul᷊ung si sire kuměndagẹ̌ si Yehuwa lai mẹ̌tahamawu si Sie. (Kis. 13:48) Mạeng měkoạ ene, i sire sarung makaěbạ gunane bọu kasasabari Yehuwa, kere i kitẹ.

18. Kawe nụe i kitẹ harusẹ̌ masabarẹ̌ su taumata wal᷊inẹ?

¹⁸ Yehuwa sarung masabarẹ̌ měngampal᷊ẹ̌ i kitẹ makoạ masukụ sarang pěngěngsuengu sěhiwu su taunge. Sarang tempo ene marěnta, Yehuwa turusẹ̌ měngampung pẹ̌sasal᷊ang i kitẹ. Hakị u ene, i kitẹ harusẹ̌ mẹ̌těno si Sie dingangu fokus su sipatẹ̌ mapaelẹ̌ bọu taumata wal᷊inẹ lai masabarẹ̌ si sire. Contone, kěnang pẹ̌tiněna soal u sěngkatau saudari piạ kawinge nasigěsạ ual᷊ingu nakoạ sěbạe  gụgěnggang kụ něngědo diměnta su pěngangibadang. Saudari ene naul᷊ị, ”Ini sěbạe nakasigěsạ. Rěncanang i kami sěntahanakeng tawe nakoạ.” Maning kerene, saudari ene tatapẹ̌ masabarẹ̌ su kawinge. I sie něngumbala si Yehuwa dingangu sěntiniạ nẹ̌tul᷊ung kawinge. Kere i Yehuwa, i sie tatapẹ̌ fokus su sipatẹ̌ mapia bọu kawinge. I sie nẹ̌bera, ”Kawingku piạ sipatẹ̌ mapaelẹ̌, kụ kadodọ-kadodọ i sie nẹ̌tawakal᷊i limawang pěndang gụgěnggang ene.” Nal᷊ahẹ, i kitẹ kěbị harusẹ̌ masabarẹ̌ su keluarga arau su anạu sěmbaụ apang tụtatěngo masalah mawěhạ.

19. I kitẹ harusẹ̌ mẹ̌tawakal᷊i měkoạ apa?

¹⁹ Yesus dingangu manga malaekatẹ̌ mal᷊uasẹ̌ su tempong dunia niriadi. Katewe, i sire sarung limembong mal᷊uasẹ̌ su tempong makasilo dunia ini mapenẹu taumata masukụ, kụ makěndagẹ̌ lai měnẹ̌němbah si Yehuwa. Kěnang pẹ̌tiněna lai karal᷊uasẹ̌ nikapěndangengu taumata apang mẹ̌parenta su sorga su tempong makasilo taumata su dunia makaěbạ gunane bọu apa sarung koateng i sire. (Why. 4:4, 9-11; 5:9, 10) Kụ, kěnang pẹ̌tiněna kerea keadaan i kitẹ su tempong seng tawẹ apa sakị, kasasusah, sasangị, dingangu papate. (Why. 21:4) Kạpěhědone kěbị ene, pẹ̌tawakal᷊ịe mẹ̌těno si Amang i kitẹ makěndagẹ̌, mapelesa, dingangu masabarẹ̌. Mạeng měkoạ ene, i kitẹ botonge tatapẹ̌ mal᷊uasẹ̌ tawẹ soale sasal᷊ukạ apa nikahombangeng i kitẹ. (Yak. 1:2-4) I kitẹ tantu sěbạe makitarimakasẹ ual᷊ingu Yehuwa seng nẹ̌diandi ”taumata nate sarung ipěbiahẹ̌”.​—Kis. 24:15.