1. Yehuwa seng něgělị apa su kěbị ělang’E?

YEHUWA seng něgělị tugasẹ̌ su kěbị ělang’E su sidang. Maning tugasi kitẹ nẹ̌tatěntang, i kitẹ kěbị maarěga dingangu membutuhkan sěmbaụ su wal᷊inẹ. Rasul Paulus nẹ̌tul᷊ung si kitẹ makaěna hal᷊ẹ̌ penting ini. Kerea i sie někoạ ene?

2. Tumuhụ Efesus 4:16, kawe nụe i kitẹ harusẹ̌ měngarěga sěmbaụ su wal᷊inẹ dingangu měhal᷊ẹ̌ sěngkasio?

² Kere seng nilahẹ su ayat tema pěngangěndungang ini, Paulus něnodẹ i kitẹ tawe makapẹ̌bera su anạu sěmbaụ, ”Iạ tawe membutuhkan si kau.” (1 Kor. 12:21) Mạeng i kitẹ mapulu sidang mararame, i kitẹ harusẹ̌ měngarěga sěmbaụ su wal᷊inẹ dingangu měhal᷊ẹ̌ sěngkasio. (Basa Efesus 4:16.) Mạeng i kitẹ měhal᷊ẹ̌ sěngkasio su kasasěmbaụ, kěbị sarung makapěndang lẹ̌arěgang kụ sidang sarung makoạ matoghasẹ̌.

3. Apa sarung ěndungang i kitẹ su pěngangěndungang ini?

³ Kerea i kitẹ botonge měnodẹ pěngangarěga su anạu sěmbaụ su sidang? Su pěngangěndungang ini, i kitẹ sarung měngěndung kerea manga penatua botonge měnodẹ pěngangarěga su penatua wal᷊inẹ. Bọu ene, i kitẹ lai měngěndung kerea i kitẹ kěbị botonge měnodẹ pěngangarěga si sire apang tawe nẹ̌kawing. Kụ pěngěngsuenge, i kitẹ sarung měngěndung kerea měnodẹ pěngangarěga si sire apang tawe tumanịu lancarẹ̌ mẹ̌bisara su werang i kitẹ.

4. Sasasa apa kạbawohẹ su Roma 12:10 kụ harusẹ̌ tol᷊engu manga penatua?

⁴ Kěbị penatua su sidang kai nipileng rohkẹ̌ i Yehuwa.  Katewe, i sire kěbị piạ kemampuan nẹ̌tatěntang. (1 Kor. 12:17, 18) Pirang katau aramanung buhu nakoạ penatua kụ tawẹ apa lawọ pengalaman kere penatua wal᷊inẹ. Sěnggạ lai seng maghurang dingangu mahungsakị. Maning kerene, kěbị penatua piạ tugasẹ̌ penting. Hakị u ene, tawẹ apa penatua botonge makapẹ̌bera su penatua wal᷊inẹ, ”Iạ tawe membutuhkan si kau.” Kěbị penatua harusẹ̌ tumol᷊e sasasang i Paulus kạbawohẹ su Roma 12:10.​—Basa.

5. Kerea manga penatua měnodẹ i sire měngẹ̌ngarěga penatua wal᷊inẹ, kụ kawe nụe penting měkoạ ene?

⁵ Manga penatua měnodẹ pěngangarěga su penatua wal᷊inẹ mạeng i sire dumaringihẹ̌ pakapia. Hal᷊ẹ̌ ini limembong penting su tempong manga penatua mẹ̌bisara soal u manga masalah serius. Kawe nụe? Pěmanda apa niul᷊ị u Menara Pengawal seri 53 taung 1988: ”Manga penatua sarung mẹ̌tahěndung i Kristus, limiung rohkẹ̌ masusi, botonge makaahạ tiněnang penatua su ral᷊ungu badan penatua gunang měgělị prinsip Alkitapẹ̌ gunang tumatěngo masalah arau měkoạ haghing putusang penting. (Kis. 15:6-15) Tawẹ apa penatua botonge měmonopoli rohkẹ̌ masusi su ral᷊ungu badan ene.”

6. Kerea manga penatua botonge měhal᷊ẹ̌ sěngkasio su kasasěmbaụ, kụ kerea sidang makaěbạ gunane mạeng i sire měkoạ ene?

⁶ Penatua apang měngẹ̌ngarěga penatua wal᷊inẹ tawe sěntiniạ mẹ̌bisara kahumotongange su rapat penatua. I sie tawe kal᷊awọkange mẹ̌bisara su tempong rapatẹ̌, kụ i sie tawe mẹ̌pěndang pěndapate sěntiniạ nihino. Katewe, i sie naul᷊ị pěndapate dingangu kasasanạu naung lai bersahaja. I sie dumaringihẹ̌ pakapia apa niul᷊ịu penatua wal᷊inẹ. Kụ limembong penting, i sie masěmangatẹ̌ měmahiạ prinsip Alkitapẹ̌ dingangu dumaringihẹ̌ laahạ bọu ”ělang masatia dingangu matahuěna”. (Mat. 24:45-47) Mạeng manga penatua měnodẹ kakěndagẹ̌ dingangu pěngangarěga sěmbaụ su wal᷊inẹ su tempong rapatẹ̌, rohkẹ̌ masusi sarung duměndingang si sire dingangu měngahạ si sire měkoạ putusang makatoghasẹ̌ sidang.​—Yak. 3:17, 18.

7. Kerea pěndang i Yesus si sire apang tawe nẹ̌kawing?

⁷ Su sidang orasẹ̌ ini piạ keluarga-keluarga dingangu i sire apang seng nẹ̌kawing. Katewe, su sidang lai piạ anạu sěmbaụ apang tawe nẹ̌kawing. Kerea pěndang i kitẹ si sire apang tawẹ apa kawinge? I kitẹ harusẹ̌ mẹ̌těno cara i Yesus měmanda si sire. Su kanandụu pěbawiahe su dunia, Yesus tawe nẹ̌kawing. I sie někoạ ene tadeạu botonge fokus lai měpakẹ tempone gunang pelayanan. Yesus tawe pernah něněntiro tau Kristen harusẹ̌ mẹ̌kawing arau tawe mẹ̌kawing. Katewe, i sie naul᷊ị sarung piạ tau Kristen měmile tawe mẹ̌kawing. (Mat. 19:11, 12; pěmanda keterangan tambahan gunang Matius 19:12.) Yesus měngẹ̌ngadatẹ̌ si sire apang tawe nẹ̌kawing. I sie tawe nẹ̌pěndang i sire apang tawe nẹ̌kawing ene tawe tumanịu maarěga arau pěbawiahi sire tawe lěngkapẹ̌ ual᷊ingu tawe nẹ̌kawing.

8. Tumuhụ 1 Korintus 7:7-9, Paulus němahangsang tau Kristen gunang mẹ̌tiněna apa?

⁸ Kere i Yesus, su tempong někoạ pelayanan, Rasul Paulus lai tawẹ apa kawinge. Paulus tawe pernah něněntiro mạeng tau Kristen mẹ̌kawing ene kai hal᷊ẹ̌ nẹ̌sal᷊a. I sie masingkạ ene putusangu pẹ̌sěngkatau. Katewe, Paulus němahangsang si sire tadeạu mẹ̌tiněna apa i sire botonge tatapẹ̌ tawe mẹ̌kawing su tempong mẹ̌tahamawu si Yehuwa. (Basa 1 Korintus 7:7-9.) I Paulus tantu tawe nẹ̌pěndang tau Kristen apang tawe nẹ̌kawing ene tawe maarěga. Ene nal᷊ahẹ su tempong i sie němile si Timotius, sěngkatau saudara tawe nẹ̌kawing, gunang měkoạ tugasẹ̌ mawěhạ. * (Flp. 2:19-22) Hakị u ene nal᷊ahẹ, mạeng mẹ̌tiněna sěngkatau saudara botonge memenuhi syarat kětạeng bọu statuse, apa i sie seng nẹ̌kawing arau tala, ene kai hal᷊ẹ̌ nẹ̌sal᷊a.​—1 Kor. 7:32-35, 38.

9. Pěndang i kitẹ harusẹ̌ kerea soal u mẹ̌kawing dingangu tawe mẹ̌kawing?

⁹ Yesus dingangi Paulus tawe něněntiro tau Kristen harusẹ̌ mẹ̌kawing arau tatapẹ̌ tawe mẹ̌kawing. Mạeng kerene, harusẹ̌ kerea pěndang i kitẹ soal u mẹ̌kawing dingangu tawe mẹ̌kawing? Menara Pengawal 1 Oktober 2012 něgělị sasimbahẹ̌ mapaelẹ̌ soal u kakiwal᷊o ini. Sene niul᷊ị, ”Sěběnarẹ̌e, [mẹ̌kawing arau tawe mẹ̌kawing] ene botonge ikawera gaghělị bọu Mawu. . . . Mawu tawe nẹ̌pěndang tawe mẹ̌kawing ene kai makamea arau makasusah naung.” Hakị  u ene, i kitẹ harusẹ̌ měngadatẹ̌ su anạu sěmbaụ su sidang apang tawe nẹ̌kawing.

10. Kerea i kitẹ měngadatẹ̌ anạu sěmbaụ apang tawe nẹ̌kawing?

¹⁰ Kerea i kitẹ botonge měngadatẹ̌ pěndangu anạu sěmbaụ apang tawe nẹ̌kawing? I kitẹ harusẹ̌ mẹ̌tahěndung i sire tawe nẹ̌kawing ual᷊ingu piạ alasang nẹ̌tatěntang. Contone, pirang katau seng němutusẹ̌ gunang tatapẹ̌ tawe mẹ̌kawing. Sěnggạ lai mapulu mẹ̌kawing, katewe tawe nakaěbạ taumata nẹ̌tatahino su naunge. Kụ piạ lai nikapatengu kawing i sire. Tawẹ soale apa alasange, apa nẹ̌tatahino mạeng i kitẹ mẹ̌kiwal᷊o kawe nụe i sire tawe nẹ̌kawing arau mạeng i kitẹ mẹ̌tul᷊ung si sire mědeạ kawing? Tantu piạ pirang katau apang tawe nẹ̌kawing nẹ̌dorong tul᷊ung soal u ene. Katewe, mạeng tawe nirorongang, kụ i kitẹ mẹ̌tul᷊ung si sire, aramanung kerea pěndangu anạu sěmbaụ ene? (1 Tes. 4:11; 1 Tim. 5:13) Mahịe měmanda komentarẹ̌ pirang katau anạu sěmbaụ apang tawe nẹ̌kawing.

11-12. Kerea i kitẹ makakadodọ naungu anạu sěmbaụ apang tawe nẹ̌kawing?

¹¹ Sěngkatau pengawas wilayah tawe nẹ̌kawing kụ sěbạe mapaelẹ̌ měkoạ tugase nẹ̌pěndang piạ lawọ gunane mạeng tatapẹ̌ tawe mẹ̌kawing. Katewe, i sie naul᷊ị i sie nakadodọ naung su tempong lawọ anạu sěmbaụ apang mapulu mẹ̌tul᷊ung, nẹ̌kiwal᷊o si sie, ”Kawe i kau bědang tawe nẹ̌kawing?” Sěngkatau saudara tawe nẹ̌kawing kụ mělẹ̌hal᷊ẹ̌ su kantor cabang nẹ̌bera, ”Pẹ̌sěngsul᷊ẹ anạu sěmbaụ makakoạ si siạ mẹ̌pěndang tawe mẹ̌kawing ene makạtatal᷊ěntụ. Kụ tawe mẹ̌kawing kakělaěng kere sěmbaụ bawawaěng, bal᷊inẹbe gaghělị.”

¹² Sěngkatau saudari tawe nẹ̌kawing kụ mělẹ̌hal᷊ẹ̌ su Betel nẹ̌bera, ”Pirang katau penyiar nẹ̌pikirẹ̌ kěbị anạu sěmbaụ apang tawe nẹ̌kawing kai mědẹ̌deạ kawing. Arau i sire mẹ̌pikirẹ̌ su tempong anạu sěmbaụ mẹ̌tampung, apang tawe nẹ̌kawing mědẹ̌deạ kesempatan gunang makaěbạ kawing. Sěngsul᷊ẹ tempo, iạ nakoạ sarang tampạ bal᷊inẹ gunang měkoạ sěmbaụ tugasẹ̌, kụ iạ něngibadah sene. Saudari wal᷊ene nikahumpạkengku nẹ̌bera piạ darua saudara su sidange kụ sěngumurẹ̌ dingangku. Saudari ene naul᷊ị i sie bal᷊inẹbe mẹ̌tul᷊ung si siạ makaěbạ kawing. Katewe, su apang simuẹ̌ su Banalang Kararatuang, i sie němol᷊eng si siạ gunang mẹ̌sombang dingangu darua saudara ene. Hal᷊ẹ̌ ene nakakoạ si siạ dingangu darua saudara ene sěbạe namea.”

13. Contoh bọu i sai nakatoghasẹ̌ si saudari tawe nẹ̌kawing?

¹³ Saudari wal᷊inẹ tawe nẹ̌kawing kụ mělẹ̌hal᷊ẹ̌ su Betel nẹ̌bera, ”Iạ kěnalẹ̌ anạu sěmbaụ perintis apang limembong maiakang bọu iạ kụ tawe nẹ̌kawing. I sire matatapẹ̌, fokus, rela berkorban, dingangu mal᷊uasẹ̌ su tugasi sire. I sire někoạ lawọ hal᷊ẹ̌ gunang sidang. I sire seimbang měmanda watangeng i sire. I sire tawe nẹ̌pěndang limembong marangẹ ual᷊ingu tatapẹ̌ tawe nẹ̌kawing. I sire lai tawe nẹ̌pěndang tawe lěngkapẹ̌ ual᷊ingu tawẹ apa kawing arau keluarga.” Sěbạe mal᷊ěnggihẹ̌ mạeng kěbị taumata su sidang měngadatẹ̌ dingangu měngarěga sěmbaụ su wal᷊inẹ. I kitẹ tawe iri su taumata wal᷊inẹ arau mẹ̌pěndang pěbawiahi kitẹ makạtatal᷊ěntụ. I kitẹ lai tawe mẹ̌pěndang i kitẹ niwala arau lai mẹ̌pěndang i kitẹ limembong mapaelẹ̌ bọu taumata wal᷊inẹ. I kitẹ masingkạ anạu sěmbaụ makěndagẹ̌ si kitẹ.

14. Kerea i kitẹ měnodẹ i kitẹ měngẹ̌ngadatẹ̌ anạu sěmbaụ apang tawe nẹ̌kawing?

¹⁴ Anạu sěmbaụ apang tawe nẹ̌kawing sarung mal᷊uasẹ̌ mạeng i kitẹ měngarěga si sire ual᷊ingu sipati sire mapia, bal᷊inẹ ual᷊ingu status i sire. Sul᷊ungu tumal᷊ěntụ si sire, kapaelange i kitẹ měngarěga kasasatiang  i sire. Hasile, anạu sěmbaụ apang tawe nẹ̌kawing ene tawe mẹ̌pěndang i kitẹ maul᷊ị si sire, ”Iạ tawe membutuhkan si kau.” (1 Kor. 12:21) I sire sarung makasingkạ i kitẹ měngẹ̌ngadatẹ̌ si sire dingangu mal᷊uasẹ̌ ual᷊ingu i sire ene su sidang i kitẹ.

15. Pẹ̌bawal᷊ui apa seng nikoạu pirang katau gunang měkoạ mal᷊awọ su pelayanan?

¹⁵ Su pira taung ini, lawọ penyiar seng někoạ cita-cita gunang měngěndung bawera wal᷊inẹ tadeạu botonge měkoạ mal᷊awọ su pelayanan. Gunang měkoạ ene i sire harusẹ̌ měmal᷊ui pěbawiahẹ̌. Anạu sěmbaụ ene něněntang sidang měpẹ̌pakẹ bawerang i sire tadeạu botonge melayani su sidang měpẹ̌pakẹ bawera wal᷊inẹ kụ membutuhkan penyiar. (Kis. 16:9) I sire někoạ putusang ene tadeạu botonge měkoạ mal᷊awọ gunang hal᷊ẹ̌ i Yehuwa. Maning taunge buhudeng makapẹ̌bisara lancarẹ̌ bawera wuhu, i sire někoạ lawọ barang mapia gunang sidang. Sipatẹ̌ dingangu pengalaman i sire seng nakatoghasẹ̌ sidang. I kitẹ tantu měngẹ̌ngarěga pengorbanan nikoạ i sire!

16. Dasarẹ̌ apa paketangu penatua su tempong menilai sěngkatau saudara gunang makoạ penatua arau hamba pelayanan?

¹⁶ Badan penatua tawe wotonge měnahang rekomendasi gunang saudara-saudara apang botonge makoạ penatua arau hamba pelayanan, maning i sie tawe tumanịu lancarẹ̌ mẹ̌bisara bawera pẹ̌paketang su sidang. Manga penatua sarung menilai saudara ene tuhụ syarat Alkitapẹ̌ gunang penatua dingangu hamba pelayanan, bal᷊inẹ tuhụ kerea kapaele i sie mẹ̌bisara bawera pẹ̌paketang su sidang.​—1 Tim. 3:1-10, 12, 13; Tit. 1:5-9.

17. Putusang apa harusẹ̌ koatengu matatimadẹ̌ mạeng keluarga měngal᷊ing sarang negeri wal᷊inẹ?

¹⁷ Piạ keluarga-keluarga seng něngal᷊ing sarang negeri wal᷊inẹ tadeạu maliwirẹ̌ bọu kasasigěsa arau gunang makaěbạ hal᷊ẹ̌. Ual᷊ingu hal᷊ẹ̌ ene, manga anạ i sire aramanung nitěntiro bawera pẹ̌paketang su negeri ene. Matatimadẹ̌ aramanung něngěndung bawera pẹ̌paketang su negeri ene gunang makaěba hal᷊ẹ̌. Kerea mạeng sene piạ sidang měpẹ̌pakẹ bawera bọu negeri asal᷊i sire? Su sidang sude keluarga ene sarung mẹ̌gabung? Su sidang měpẹ̌pakẹ bawera su negeri ene arau su sidang měpẹ̌pakẹ bawera bọu negeri asal᷊i sire?

18. Nẹ̌tatahino dingangu Galatia 6:5, kerea i kitẹ botonge měngarěga putusangu těmbonangu keluarga?

¹⁸ Těmbonangu keluarga harusẹ̌ měmutusẹ̌ su sidang sude i sire sarung mẹ̌gabung. Ual᷊ingu ini kai putusang pribadi, i sie harusẹ̌ mẹ̌tiněna apa kapaelange gunang kěluargane. (Basa Galatia 6:5.) I kitẹ harusẹ̌ měngadatẹ̌ putusangu těmbonangu keluarga. Tawẹ soale apa putusange, mahịe i kitẹ měnarimạ putusange kụ měnarimạ kěluargane gunang makoạ bageang bọu sidang i kitẹ.​—Rm. 15:7.

19. Těmbonangu keluarga harusẹ̌ mẹ̌tiněna pakapia dingangu mẹ̌doa soal u apa?

 ¹⁹ Piram baụ keluarga aramanung nẹ̌gabung dingangu sidang měpẹ̌pakẹ bawera pẹ̌paketangu matimadẹ̌, katewe manga anạ i sire tawe tumanịu lancarẹ̌ mẹ̌bisara bawera ene. Mạeng sidang ene lokasine su daerah měpẹ̌pakẹ bawera negeri ene, anạ tantu tawe tumanịu makaěna apa nitěntiro su pěngangibadang kụ tawe maju secara rohani. Kawe nụe? Ual᷊ingu su sikol᷊ah, i sire měpẹ̌pakẹ bawera pẹ̌paketang su negeri ene, balinẹ bawera pẹ̌paketangu matimadi sire. Mạeng kerene, těmbonangu keluarga harusẹ̌ mẹ̌tiněna pakapia dingangu mẹ̌doa mẹ̌dorong pelesa gunang měmutusẹ̌ apa harusẹ̌ koateng gunang mẹ̌tul᷊ung manga anạ mẹ̌těngkarani si Yehuwa dingangu su manga ělang’E. Matatimadẹ̌ botonge mẹ̌tul᷊ung anạ i sire tadeạu lancarẹ̌ mẹ̌bisara bawerang matatimadẹ̌. Arau, matimadẹ̌ botonge měmutusẹ̌ gunang měngal᷊ing sarang sidang měpẹ̌pake bawera kẹ̌kaěnangu manga anạ i sire. Tawẹ soale apa putusangu těmbonangu keluarga, sidang tampạ i sire nẹ̌gabung harusẹ̌ měngadatẹ̌ dingangu měngarěga si sie dingangu kěluargane.

20. Kerea i kitẹ měnodẹ i kitẹ měngẹ̌ngarěga anạu sěmbaụ apang něngěndung bawera wuhu?

²⁰ Ual᷊ingu alasang seng niěndungang i kitẹ, su lawọ sidang, piạ anạu sěmbaụ masigěsạ měngěndung bawera wuhu. I sire aramanung masigěsạ maul᷊ị apa tẹ̌tiněnang i sire. Katewe, mạeng i kitẹ tawe kětạeng měmanda kemampuan i sire měngěndung bawera wuhu, i kitẹ sarung makasilo kakěndagi sire si Yehuwa dingangu kapulung i sire gunang mẹ̌tahamawu si Sie. Mạeng i kitẹ makasilo manga sipatẹ̌ ene, i kitẹ sarung sěbạe měngarěga dingangu měngadatẹ̌ si sire. Maning i sire tawe lancarẹ̌ mẹ̌bisara werang i kitẹ, i kitẹ tawe maul᷊ị si sire, ”Iạ tawe membutuhkan si kau.”

21-22. Apa seng nighělị i Yehuwa si kitẹ?

²¹ I kitẹ sěbạe makitarimakasẹ si Yehuwa ual᷊ingu seng něgělị si kitẹ hal᷊ẹ̌ maarěga gunang koateng su sidang. Tawẹ soale esẹ arau wawine, nẹ̌kawing arau tawe nẹ̌kawing, mangudạ arau maghurang, lancarẹ̌ mẹ̌bisara sěmbaụ bawera arau tala, i kitẹ kěbị maarěga si Yehuwa dingangu su anạu sěmbaụ.​—Rm. 12:4, 5; Kol. 3:10, 11.

²² Karimạko i kitẹ turusẹ̌ měkoạ apa seng niěndungang i kitẹ bọu sasihing i Paulus soal u badangu taumata. Ini sarung makatul᷊ung si kitẹ mẹ̌tiněna apa wotonge koateng i kitẹ gunang měnoghasẹ̌ anạu sěmbaụ. Ini lai makatul᷊ung si kitẹ sěntiniạ kuměndagẹ̌ dingangu měngarěga si sire.